Balaan nga Hustisya​—⁠Isa ka Rason sa Pagkasadya!

“AMBA kamo kaupod namon . . . ‘Si Jehova nagagahom; magkasadya ang duta.’ ” Inang mga pulong bahin sang ambahanon sa hambal sang mga 9,000 ka Arabe, Griego, Italyano, Portugues, kag Katsila nga mga delegado sa “Balaan nga Hustisya” Distrito nga Kombension sa Montreal, Can­a­da. Ang mga kombensionista nagdugok sa latagon sang Olym­pic Sta­dium para sa katapusan nga mga higayon sining apat ka adlaw nga kombension agod magbuylog sa ambahanon upod sa 36,900 ka delegado nga yara na sa estadyum.

Ang mga grupo sang iban nga hambal nagtambong sa amo man nga programa sa kombension sa kaingod nga mga arena kag mga awditoryum. Karon ginbuylugan nila ang Pranses kag Ingles nga mga kombensionista sa isa ka makapulukaw nga pagpakita sing paghiliutod kag katutom​—⁠butang nga makita lamang sa tunga sang mga alagad sang Dios sang matuod nga hustisya, si Jehova. Bangod sang lapnag nga inhustisya sa modernong kalibutan, ang tema sang kombension​—⁠“Balaan nga Hustisya”​—⁠suno gid sa tion. Ginhambalan sing bug-os sa programa, ining tema nagpasangkad sang aton apresasyon para sa sining pangunang kinaiya ni Jehova nga Dios.

“Malipayon ang mga Nagabantay sang Hustisya”

Amo ini ang tema sang una nga adlaw sang kombension. (Salmo 106:3) Ang pamulongpulong sa pag-abiabi sang tsirman nag-athag nga ang balaan nga hustisya indi lamang ang walay balatyagon nga legal nga pagbuhat sang isa ka hudisyal nga hilikuton. Sa baylo, amo ini ang pagsakdag sa kon ano ang matarong sa wala sing ginadampigan kag wala sing ginapasulabi nga paagi nahisuno sa mga talaksan sang Dios. Si Jehova nagapahamtang sing pinakamataas nga mga talaksan kag himpit sa hustisya bangod ginahuptan niya ini. Busa, sarang masiling nga “ang tanan niyang dalanon hustisya.”​—⁠Deuteronomio 32:⁠4.

Dugang ini nga ginpatalupangod sa keynote address, nga natig-ulohan sing “Ang Hustisya Nagatanda sang Tanan nga mga Dalanon sang Dios.” Wala gid maglisa si Jehova gikan sa iya matarong nga mga talaksan kundi gingamit inang makatarunganon man nga mga paagi sa pagpakig-angot sa tanan dihimpit nga katawhan. (Malaquias 3:6) Bisan pa nga ginasumbong sang iban ang Dios subong dimakatarunganon bangod nakita nila ang kabilugan nga pagkawalay hustisya sa tawhanon nga katilingban, indi sia ang may salabton sa pagkabalingag sang malaut nga katawhan.

Bangod kay si Jehova nagahigugma sang hustisya, ginapaabot niya nga himuon naton ini nga kinaiya paagi sa paghimo sa kon ano ang matarong kag maayo. Dapat naton ini himuon sa aton isigkatawo kag sa aton mga pamilya, sa sulod sang kongregasyon, kag sa tanan nga bahin sang aton pagsimba. Nagadala ini sing bugana nga mga pagpakamaayo, subong sang nakita sa kon ano ang ginpresentar sa programa sa nabilin nga tatlo ka adlaw sang “Balaan nga Hustisya” Distrito nga Kombension.

“Batona ang Disiplina nga Nagahatag sing Paghangop”

Ang ikaduha nga adlaw sang kombension may amo sina nga tema, pasad sa Hulubaton 1:⁠3. Ginlaygayan kita nga “Batunon ang Disiplina kag Mangin Maalam,” subong nga amo sina ang titulo sang una nga bahin sang programa. Ang disiplina halin kay Jehova nagatanda sang dalanon sang pagkabuhi nga nagalakip sang pagputli sang aton kaisipan kag moral nga pagkahuman. Pagpakita man ini sang gugma sang Dios para sa aton. (Hebreo 12:​4-11) Ina nga disiplina nagahimo sa aton nga sensitibo sa pinakamataas nga mga talaksan sang hustisya​—⁠ang balaan nga hustisya.

Ining positibo nga mga ekspresyon ginsundan sang pamulongpulong nga “Mangin Matinlo sa Hunahuna kag Lawas.” Daw ano gid ka makapahunahuna ina! Nagpatudok ini sa aton sang kinahanglanon nga ipresentar ang aton kaugalingon subong putli, matinlo, kag balaan nga katawhan. Ngaa? Bangod si Jehova matinlo gid katama kag balaan​—⁠ang kahimtangan nga nagahamulag sa iya gikan sa tanan nga mahigko nga mga diosdios sang mga pungsod. Nagahunahuna sa sining pamulongpulong, ang isa ka lamharon nga utod nga lalaki nagkomento: “Ang tanan nga butang may kaangtanan sa aton katinlo sa hunahuna, sa moral, sa lawas, kag sa espirituwal gin-usisa. Ang aton pamayo, pamustora, puluy-an, salakyan, kag personalidad ginhatagan tanan sing igtalupangod.” Ang isa ka gulang nagsiling: “Ang pag-aplikar sina nga laygay magahimo sa aton mga kauturan nga tumalagsahon gikan sa katawhan sa palibot nila kag magahatag sing maayong panglawas nga wala mahibalui sang kalibutan sa kabilugan.”

Ang modernong-adlaw nga drama nga “Natandaan Para sa Kaluwasan” nagdugang sing pagbatyag sing kadagmit sa programa, kay ang balaan nga hustisya dapat nga ipatuman sa dili madugay. Ining makatalandog nga presentasyon makusog nga nagpakita nga madagmit para sa tanan nga buksan ang ila mga mata sa kahulugan sang aton tion. Sa pagkamatuod, antes laglagon ang dimatuod nga relihion, dapat kita magdalagan pakadto sa duog nga dalangpan kag pat-od nga tandaan para sa kaluwasan.

Sang hapon, ang isa ka symposium sang mga humalambal nag-asoy sang kinahanglanon para sa “Pagdisiplina sa Pagkamatarong sa Sulod sang Pamilya.” Ang mga bana kag mga amay ginlaygayan sa pagtigayon sing espirituwal nga programa sa balay, sa pagpanguna sa pangamuyo, pagtuon, kag balaan nga pag-alagad. Ang makusog nga mga kinaiya sang amay kag kon paano niya ginatatap ang iya pagkaulo may epektibo nga epekto sa pagtamod sang bata sa awtoridad, diosnon man kag tawhanon. Busa, ang Cristianong mga amay dapat mangin makatarunganon kag mapinadayunon sa ila disiplina. Dapat nila ipakita ang kahanuklog kag kainit, busa nagahupot nga bukas sang mga linya sang komunikasyon upod sa ila mga kabataan.

Ang mga ginikanan ginpalig-on sa pagpahisanto sang ila pagpanudlo sa mga kabataan. Importante nga hatagan ang mga kabataan sing paghangop paagi sa pagbinagbinag sa kon paano magtudlo kag sa kon ano ang itudlo agod malab-ot ang ila mga tagipusuon. Ang tuyo amo nga ang kamatuoran magaimpluensia sa bilog nga pamilya sa maayo nga paagi.

Ang katapusan nga humalambal sa sining symposium naghimo sing mainit nga pangabay sa mga kabataan nga himuon ang kon ano ang ginapaabot ni Jehova sa ila sa sulod sang kahimusan sang pamilya. Ang mga pamatan-on ginlaygayan sa paglikaw sa rebelyuso nga espiritu sang matinuguton nga katilingban karon kag sa pagkasadya sa disiplina nga nagahatag sing paghangop.

Sa mga komento pasad sa Hulubaton 2:​1-9, ang mga kombensionista ginpalig-on nga “Magpadayon sa Pagpangita Subong sang mga Bahandi nga Natago.” Gin-ilustrar nga ang espirituwal nga hiyas sarang makita paagi sa makugi nga pagtuon kag pagpanalawsaw. Nagapamulongpulong sa topiko nga “Magkadto kay Jehova Para sa Paghangop,” ginpaathag sang masunod nga humalambal nga ang paghangop amo ang ikasarang sa pagtan-aw sa isa ka kahimtangan, sa pagtan-aw labaw sa makita kag sa pagkuha sang kahulugan sa pila ka butang. (Mateo 13:​13-15; Roma 3:​11; Efeso 5:17) Ining makalilipay nga adlaw natapos sang ulihi sang ang Olym­pic Sta­dium gin-angot paagi sa telepono sa madamong iban pa nga siudad sa Can­a­da kag Estados Unidos. Ang duha ka bahin nga symposium ginpadaku paagi sa pagpaguwa sa duha-sing-tomo nga publikasyon nga Insight on the Scriptures, nagaunod sing kapin sa 2,500 ka pahina sang impormatibo nga mga ­artikulo kag mga ilustrasyon nga magapatudok sang aton apresasyon sa espirituwal nga mga butang.

“Ang Iya Paghukom Matuod kag Matarong”

Sa ikatlo nga adlaw, nga may amo sini nga tema pasad sa Bugna 19:​2, madamo gid nga butang ang nagapahalipay sa aton. Ang pamulongpulong nga “Ang Moral nga Katinlo Amo ang Katahom sang Pamatan-on” naghimo sing mabaskog nga pangabay sa mga pamatan-on. Ginpalig-on sila sa pagpakabahandi sa katahom nga nabuylog sa paghupot sa talaksan sang Dios tuhoy sa pisikal, moral, kag espirituwal nga katinlo. Ang nagapukaw sa sekso nga mga ambahanon, imoral nga mga programa sa telebisyon, porno­grapiko nga mga sine kag literatura, kag pag-ipit sang mga katubotubo masunson nga nagasabad sa Cristianong mga pamatan-on. Suno sa isa ka ginhalinan, isa lamang ka tumalagsahon nga pamatan-on ang wala makahimo sing wala pa ang kasal nga paghulid sa edad nga 19 anyos. Apang ang tumalambong mainit nga nagpalakpak sang ginhatagan sing komendasyon sang humalambal ang linibolibo ka Saksi nga mga pamatan-on nga nagpakita sang ila kaugalingon nga tumalagsahon paagi sa paghupot sing mataas nga talaksan sang pagkamatarong. Ang temprano nga pag-asawahay puno sing mga problema, kag ginpakita nga ang mga pinamulong ni Pablo nahanungod sa pagminyo bangod nga “nasunog sa kailigbon sang unod” ginpatuhoy indi sa mga tin-edyer kundi sa mga “lampas sa kapagsik sang pagkabatan-on.”​—⁠1 Corinto 7:​9, 36.

“Dili Kamo Magpagota sa mga Dimatinuohon” amo ang masunod nga topiko. Ang pagtuman sa sugo sang Dios nga magminyo “lamang sa Ginuo” nagahilway sa aton sa masakit nga mga resulta. (1 Corinto 7:39) Dugang pa, wala na sing makapabakud pa sa pag-asawahay sang sa ginaambitan nga debosyon kay Jehova kag pagsakdag sa iya matarong nga mga talaksan. Masunod kita nga ginbuligan sa paghangop kon paano kita dapat “Magpanghikot nga May Pagtahod kag Diosnon nga Debosyon.”

Nian nagsunod ang makakulunyag nga bahin​—⁠ang pamulongpulong nga “Ang Bawtismo nga Nagapadulong sa Kalahamut-an nga Paghukom,” ginsundan sang pagtugmaw sa bag-ong dedikado nga mga tawo. Ginpadaku nga labi pa ang ginapaabot sa ila sang sa pagkuha sang kahigkuan sa unod. Ang paghinulsol, pagkakombertir, kag bug-os kabuhi nga balaan nga pag-alagad dapat magaupod sa ila dedikasyon kag bawtismo agod matigayon nila ang kalahamut-an nga paghukom gikan kay Jehova.

Ang programa sang hapon pat-od gid nga halandumon. Sa liwat paagi sa hook­up sang telepono, ang mga katapo sang Nagadumala nga Hubon sang mga Saksi ni Jehova nagpapagsik sa mga tumalambong tabok sang Naaminhan nga Amerika paagi sa makapulukaw nga presentasyon sang symposium nga “Ang Gintalana nga Tion Malapit Na.” Sa sulod sang mga dekada, ang hinaplas nga mga saksi ni Jehova nagbantala sang mga mensahe sang balaan nga paghukom batok sa Babilonia nga Daku, ang bug-os kalibutan nga emperyo sang butig nga relihion. Apang, sa sini nga kombension, ining mga mensahe ginpadaku pa gid sing labi. Ang Babilonia nga Daku naglapas sang matarong nga mga sugo ni Jehova. Nagakabagay sia laglagon, kay “ang iya mga sala natumpi tubtob sa langit, kag ang Dios nakadumdom sang iya mga kalautan.” Busa, samtang ang anghel ni Jehova nagabantala, “sa isa ka adlaw magaabot ang iya mga kalalat-an, kamatay, kag kalisud kag tiggulutom, kag sunugon sia sa kalayo, kay gamhanan si Jehova nga Dios, nga nagahukom sa iya.”​—⁠Bugna 18:​5, 8.

Nagapamulongpulong nahanungod sa topiko nga “Ang Bantog nga ‘Makihilawason’​—⁠Ang Pagkapukan kag Kalaglagan Niya,” ang katapusan nga humalambal sining symposium nagdala sang igtalupangod sa putukputukan sang Bugna. Ining putukputukan nalab-ot paagi sa pagminyo sang Kordero, nga nahiusa upod sa iya nobya, ang balaan nga siudad, sa pagpakamaayo sa katawhan sing kabuhi nga dayon. Ang ngalan ni Jehova ginpakabalaan! Ang symposium natapos paagi sa nagapahulag nga pinamulong nga ang gintalana nga tion mas malapit na sang sa mahimo nga ginahunahuna naton! Sa pagkamatuod, ang putukputukan sang Bugna malapit na!

Samtang ang mga tumalambong nagakasadya pa, ginpaguwa ang bag-ong 320-ka-pahina nga libro nga Revelation​—⁠Its Grand Climax At Hand! Isa gid ka rason sa pagkasadya! Ini nga publikasyon pat-od gid nga mangin isa ka epektibo nga paagi sa pagpahibalo nga ang Babilonia nga Daku napamatbatan na, nga ang mga pungsod karon nagaatubang sang Armagedon, kag nga si Jehova magapadapat sang paghukom. Tuguti ang tanan nga mga mainapresyahon sa pagsabat sa pangagda sang “espiritu kag sang nobya” nga “magkari” sa tubig sang kabuhi. (Bugna 21:​2, 9; 22:17) Ining makalilipay naimprinta nga release ginsundan sang isa pa ka rason sa pagkasadya. Upod ang malipayon nga kombiksion, ang mga tumalambong sa kombension nahiusa nga nag-adoptar sang tuman kaathag kag prangka nga resolusyon nga nagasambit sang aton pagkangil-ad sa Babilonia nga Daku.

“Hustisya​—⁠Hustisya nga Tinguhaan Ninyo”

Pasad sa Deuteronomio 16:​20, amo ini ang tema sang katapusan nga adlaw. Ang mga humalambal sang aga nagpadaku sang katunayan nga agod makabenepisyo gikan sa balaan nga hustisya, dapat kita nga mangin tuhay gikan sa kalibutan. Binagbinaga ang pamulongpulong nga “Paghupot sang Espirituwal nga Kapagros sa Nagabalatian nga Kalibutan.” Ginpakita sini kon paano naton likawan ang malatnan gikan sa dimapagros sa espirituwal nga kalibutan paagi sa pagbantay batok sa undanon nga mga kaluyahon, kalibutanon nga impluensia, kag “mga padugi sang Yawa.” (Efeso 6:​11, 12; Roma 7:​21-25; 1 Juan 2:​15-17) Ang pamulongpulong nga “Ang Imo Bala Pagtuo Nagapakamalaut sa Kalibutan?” nagpakita nga agod may pagtuo kita nga kaangay ni Noe, dapat nga matalupangdan kita nga tuhay gikan sa kalibutan. Sang kaadlawan ni Noe, may yara tumalagsahon nga kinatuhayan sa ulot sang mga nakalampuwas sa Anaw kag sa mga nalaglag. Amo man ina sa karon.

Ining importante nga punto ginpatalupangod sa drama sang Biblia nga “Ang Paghukom ni Jehova Batok sa Nagalapas sa Kasuguan nga Katawhan.” Maathag sini nga ginpaanggid ang nagalapas sa kasuguan nga katawhan sang adlaw ni Noe kag ni Lot sa mga nagakabuhi sa tion naton. Sanday Noe kag Lot tuhay gid katama, kag ang ila pagtuo nagpakamalaut sa ila mga katubotubo. Personal bala kita nga tuhay gid gikan sa katawhan karon nga masako sa materyal nga mga butang kag nagahigugma sa malaut?

Ang pamulongpulong publiko, “Hustisya Para sa Tanan Paagi sa Gintangdo nga Hukom sang Dios,” isa ka makawiwili nga pag-analisar sa pamulongpulong ni apostol Pablo sa mga tawo sang Atenas sa Areopago, ukon Mars’ Hill. Ginlibutan kaangay naton sang daku nga inhustisya kag dimatuod nga relihion, ang pinamulong sang apostol may daku nga kahulugan sa aton. Labi na gid nga may rason kita sa pagkasadya bangod nagakabuhi kita sa ital-ital nga tion sang paghukom nga sarang kita makapanghikot sa pagtigayon ang kahamuot sang Dios. Huo, subong sang ginsiling ni Pablo, tuyo ni Jehova “nga hukman niya ang napuy-an nga duta sa pagkamatarong paagi sa tawo [si Jesucristo] nga iya gintangdoan, kag nahanungod sini nakahatag sia sing kalig-onan sa tanan nga tawo paagi sa pagbanhaw niya sa iya.”​—⁠Binuhatan 17:⁠31.

Samtang manugtapos ang programa, ginlaygayan kita nga “Magpadayon sa Pagpanikasog sang Hustisya Samtang Malapit Na ang Katapusan.” Ining matahom nga apat-ka-adlaw nga kombension naghatag sa aton sing determinasyon nga himuon ina. Ang programa nagpatudok man sa aton sang kasangkad sang aton internasyonal nga paghiliutod. Halimbawa, daw ano nga kalipay ang makabati gikan sa nagduaw nga mga misyonero nga nag-alagad sing matutom sa ila mga asaynment sa sulod sang mga tinuig!

Nagbiya kita sa kombension upod ang bag-o liwat nga determinasyon nga magpabilin nga nahamulag gikan sa kalibutan kag magpabilin nga matinlo sa espirituwal, sa moral, sa hunahuna, kag sa pisikal. Samtang nagabuylog kita sing nahiusa sa nagatakop nga ambahanon, nalipay kita sa pag-amba sang mga pagdayaw kay Jehova, nagapasalamat nga ang balaan nga hustisya nagahatag sa aton sing daku nga rason sa pagkasadya.

Sa kapin sa 125 ka kombension sa Estados Unidos kag Canada lamang, 1,440,932 ka tawo ang nagtambong kag 19,878 ang ginbawtismuhan

[Mga piktyur sa pahina 26]

1, 2. Ang mga publikasyon nga Insight on the Scriptures kag Revelation​—⁠Its Grand Climax At Hand! nga ginpaguwa sa Yankee Stadium, New York City, sang katapo sang Nagadumala nga Hubon nga sanday J. E. Barr kag W. L. Barry

3, 4. Mga danyag gikan sa drama sa Biblia nga “Si Jehova Nagahukom Batok sa Nagalapas sa Kasuguan nga Katawhan”

5. Linibolibo ang ginbawtismuhan bilang simbulo sang ila dedikasyon kay Jehova nga Dios

6. Danyag gikan sa modernong-adlaw nga drama nga “Natandaan Para sa Kaluwasan”

7. Ang nagaduaw nga mga misyonero, subong ni John Cutforth sang Papua New Guinea, nagpaambit sang ila mga eksperiensia sa mga kombensionista