Ang Amon Makapaladya nga Kabuhi Subong mga Misyonero sa Aprika

Panugiron ni John Miles

ANG danyag amo ang indi mapangayaman nga lugar para sa mga hayop sa aminhan nakatundan sang Zimbabwe. Ang akon asawa, nga si Val, kag ako nagalakbay pakadto sa bantog nga Victoria Falls. Indi, indi kami mga turista. Mga misyonero kami kag ginpadala diri agod mangabudlay sa tunga sang lokal nga mga Aprikanong katawhan. Samtang nagaliko kami sa kurbada, didto, nagatindog sa higad sang dalan, ang isa ka daku nga elepante. Ginpatay ko ang makina kag naglaaw sa bintana agod magkuha sing retrato. Makuha pa kuntani ako sang isa sang magsinggit si Val:

“Nagapakadto sia sa aton!”

Sa gilayon ginpaandar ko ang makina, apang napatay ini. Daw ano gid kabudlay nga kahimtangan! Ang elepante nagtapos sang iya pagdalasa kag nagtindog sa pagtapak sa amon. Sing eksakto sa tion ang makina nag-andar liwat kag nagburhot kami pakadto sa katamnan. Maayo na lang, wala sing mga bato ukon mga kahoy nga nag-upang sang amon pagpalagyo. Namat-od kami nga hatagan si G. Jumbo sing alagyan kag mag-agi sa pihak nga dalan.

Isa pa ka danyag. Sini nga tion yara kami sa bukid nga ginharian sang Lesotho, nabagatnan nga Aprika. Domingo sang hapon sadto sa kapital, sa Maseru. Manugpauli kami pagkatapos sang makalilipay nga Cristianong pagtinipon upod sa lokal nga mga masigkatumuluo. Sing hinali, ginsalakay kami sang duha ka pamatan-on nga makawat. Ginsumbag ako sang isa kag ang isa pa nag-aba sa akon likod. Ginwahig ko sia, kag ginbalikid niya si Val, gin-uyatan ang iya bag. Nagsinggit sing mabaskog si Val: “Jehova! Jehova! Jehova!” Sa gilayon, ginbuy-an sang tawo ang iya bag kag naorongan nga nag-isol. Ang isa nga nagasumbag sa akon nag-isol man​—⁠ang iya sumbag nagaigo sa hangin. Nagdalidali kami, napaumpawan sing daku nga makita ang mga masigkatumuluo sa pulunduhan sang bus.​—⁠Hulubaton 18:⁠10.

Ang tagsa ka hitabo sa ibabaw naglawig sing pila lamang ka higayon, apang pila ini sang madamong dimalipatan nga mga handumanan sang amon nagligad nga 32 ka tuig subong mga misyonero sa Aprika. Paano kami nakakadto diri? Ngaa nangin mga misyonero kami? Isa bala ini ka makalilipay nga kabuhi?

Ang Isa ka Amerikanong Trabahador sa Uma Nakatuon sang Kamatuoran

Nagsugod ini sang 1939 sang makilala ko si Val Jensen sa Yakima, Washington, E.U.A. Sadto anay, nagatrabaho ako sa uma kag si Val nagapamugon subong manug-atipan sa balay. Pirme niya ako ginasugilanon nahanungod sa Biblia. Ang isa ka butang nga nagpukaw sa akon amo ang paathag niya nga ang impierno indi isa ka mainit nga duog. (Manugwali 9:​5, 10; Binuhatan 2:31; Bugna 20:​13, 14) Bisan pa nga wala ako nagasimba, nahibal-an ko kon ano ang ginatudlo sang klero nahanungod sa impierno, kag ang ginpakita ni Val sa akon gikan sa Biblia mas makatarunganon.

Ang amay kag iloy ni Val nangin mga Saksi ni Jehova sang 1932. Nagtuon man si Val sa Biblia, kag ginbawtismuhan sia sang Septiembre 1935. Sang magkilalahay na kami sing maayo, gin-agda ako ni Val nga magkadto sa mga miting sa Kingdom Hall. Ginbaton ko ini kag nagkalipay sa pagpakig-upod sa mga tawo nga nakilala ko didto, ina, kon ang pagpanguma nagahatag sa akon sing tion sa pagkadto. Ang pangabuhi sa uma amo pa sadto ang una sa akon kabuhi. Apang, sing amat-amat, ginkabig ko sing mas serioso ang mga miting, kag gin-agda ako sang lokal nga mga Saksi sa pagpakigbahin sa pamalaybalay nga pagbantala. Agod himuon ini sa akon banwa nga natawhan daw kaangay sa isa ka daku katama nga pagtilaw sa akon. Apang nakapasar ako sa sini.

Duha ka halandumon nga butang ang natabo sang 1941. Sang Marso, ginbawtismuhan ako subong isa ka dedikado nga Saksi ni Jehova, kag sang ulihi nagpakasal kami ni Val. Nian, sang Oktubre 1942, nagsugod kami sa bug-os tion nga pagbantala nga hilikuton subong mga payunir sa bagatnan nakatundan sang North Dakota.

Indi gid namon malipatan ang natabo sang masunod nga tuig. Importante ini sa maragtas sang mga Saksi ni Jehova. Sang Pebrero 1, 1943, ang paghanas sa misyonero ginsugdan para sa unang klase sang gintawag sadto anay nga Watchtower Bible College of Gilead. Duha ka bulan sang ulihi nagtambong kami sa “Call to Action” nga asambleya sa Aberdeen, South Dakota. Ang mga pagpakamaayo sang misyonero nga pag-alagad sa mga pungsod sa luwas ginlaragway, kag ang handum nga makaeskwela sa Gilead kag mangin misyonero nagpukaw sang amon tagipusuon.

Pagpangabudlay Para sa Tulumuron sang Misyonero nga Pag-alagad

Siam ka tuig ang nagligad antes namon natigayon ang amon tulumuron. Sadto nga tion, may iban kami nga maayong mga pribilehiyo, kag subong man mga upang. Pagkatapos makapayunir sing isa ka tuig kag tunga sa North Dakota, nag-aplay kami para sa isa ka payunir nga teritoryo sa Missouri. Gin-aprobahan ini, kag nagpuyo kami sa siudad sang Rolla. Ang amon teritoryo naglakip sa bug-os nga Phelps County diin isa lamang ang aktibo nga Saksi. Naghinguyang kami didto sing tatlo ka malipayon nga tuig kag nakigbahin sa pagtukod sa isa ka kongregasyon.

Nian nag-atubang kami sing isa ka problema nga nagpaluya sang amon paglaum nga mangin mga misyonero. Ang amon kuwarta naubos. Ang mapigaw nga pagdumala kag ang kakulang sang pagtuo nga si Jehova magaaman nagtiklod sa amon nga mag-untat sa pagpayunir. Tuyo namon nga sa sulod lamang ini sang pila ka bulan, apang isa kag tunga ka tuig ang nagligad antes kami nakapayunir liwat. Sini nga tion determinado kami nga indi pagliwaton ang amon nagligad nga mga sayop. Ang amon bag-o nga asaynment amo ang upod sa isa ka kongregasyon sa banwa sang Reardan sa nasidlangan nga Estado sang Washington. Mabudlay makakita sing part-time nga trabaho, gani kinahanglan gid nga magsalig kami kay Jehova sa pag-aman sang amon matag-adlaw nga mga kinahanglanon.​—⁠Mateo 6:​11, 33.

Ang amon teritoryo naglakip sang madamong magagmay nga mga banwa sa sina nga lugar. Sa isa ka adlaw dapat kami maglakbay sing 130 kilometros pakadto-pakari agod duawon ang katawhan nga dala ang mensahe sang Ginharian. Wala kami sing bastante nga gasolina apang wala ini mag-upang sa amon. Sa amon paglakbay paguwa sa banwa, naghapit kami sa post office kag ano sa banta ninyo ang nakita namon? Nagahulat didto sa amon ang isa ka sulat gikan sa akon pakaisa nga bag-o lang magsugod sa pagtuon sang Biblia upod sa mga Saksi. May unod ini nga tseke para sa bastante nga kuwarta nga makapuno sang amon tanke kag may nabilin pa. “Idonar kuntani namon ini sa Boy’s Town,” sulat nila, “apang namat-od kami nga mas kinahanglan ninyo ini sang sa kay Padre Flanagan.” Husto gid sila!

Ang mga eksperiensia kaangay sini nagpadaku sa kamatuoran sang saad ni Jesus: “Pangitaa sing padayon ang ginharian [sang Dios], kag ining mga butang [materyal nga mga kinahanglanon] igadugang sa inyo.” (Lucas 12:31) Isa ini ka hamili nga paghanas nga nagbulig sa amon nga magpadayon sa atubang sang iban pa nga mga problema.

Sang isa ka tigtulugnaw, diutay lamang ang amon suplay sang uling. Tugutan bala namon ang kahimtangan nga bayluhan ang amon determinasyon nga magpadayon sa pagpayunir? Gintugyan namon ini kay Jehova sa pangamuyo kag nagtulog. Sang alas seis pagkaaga, may nanuktok sa amon ganhaan! Mag-asawa ini nga utod nga, pagbalik gikan sa paglakbay pakadto sa mga himata, namat-od sa pagduaw sa amon. Gindabokan namon ang kalayo, ginbutang ang katapusan nga uling, kag nagluto sing kape. Samtang nagakalipay kami sa pagpakig-upod sa ila, hinali nga namangkot ang utod nga lalaki, “May uling pa bala kamo?” Si Val kag ako nagtulokay kag nagkadlaw. Ang uling amo ang isa ka butang nga kinahanglan gid namon. Ginhatagan nila kami sing napulo ka dolyar, nga sadto anay makabakal sing dimagkubos tunga sa tonelada nga uling.

Sang isa pa ka bes lapit na lang ang sirkito nga asambleya, kag lima ka dolyar lamang ang amon kuwarta. Subong man, kinahanglan ang pagkuha sing lisensia sa amon salakyan pagkatapos sang asambleya. Namat-od kami nga unahon anay ang butang nga una kag nagtambong sa asambleya. Bangod sang maalwan nga espiritu sang mga kauturan, nagpauli kami sa amon asaynment nga may $15. Ang lisensia nagbili sing $14.50!

Nalipay gid kami sa amon payunir nga pag-alagad sa nasidlangan nga Washington, kag madamo sang mga pamilya nga ginaton-an namon sang Biblia ang nangin matutom nga mga saksi ni Jehova sang ulihi. Apang, pagkatapos sang duha ka tuig sa sina nga asaynment, nakabaton ako sing sulat gikan sa Watch Tower Society nga nagasiling nga ginrekomendar ako nga mag-alagad subong nagalakbay nga ministro, nga amo, ang isa nga nagaduaw kag nagapalig-on sa mga kongregasyon sang mga Saksi ni Jehova sa isa ka sirkito. “Kon matangdo, batunon mo bala ining asaynment?” pamangkot sang Sosiedad, nga nagadugang: “Palihog sabta ini sa gilayon.” Indi na kinahanglan nga ihambal pa, ang akon sabat amo ang huo. Sugod sang Enero 1951, naghinguyang kami sing isa kag tunga ka tuig sa malapad nga sirkito nga nagatuptop sang nakatundan nga katunga sang North Dakota kag sang nasidlangan nga katunga sang Montana.

Sini nga panag-on, nakabaton kami sang isa pa ka sorpresa​—⁠isa ka imbitasyon nga mag-eskwela sa ika-19 nga klase sang Gilead! Matuman gid man bala sa ulihi ang amon handum? Ahay, isa pa ka sulat ang nagsunod nga nagasiling nga ang klase puno na sang mga utod gikan sa iban nga mga pungsod. Isa yadto ka pagpalantang, apang wala magluya ang amon buot! Pila ka bulan sang ulihi, nakabaton kami sing imbitasyon sa ika-20 nga klase nga sa sini ginbaton kami sang Septiembre 1952.

Halin sa Gilead Pakadto sa Aprika

Daku gid ang apresasyon namon sa kaayo ni Jehova sa pagdala sa amon kaupod sang kapin sa isa ka gatos ka estudyante gikan sa madamo nga bahin sang duta​—⁠Australia, New Zealand, India, Thailand, Pilipinas, Scandinavia, Inglaterra, Egipto, kag Sentral nga Europa! Nagbulig ini sa amon nga makita kon tubtob diin ginapabantala ni Jehova ang mensahe sang Ginharian.​—⁠Mateo 24:⁠14.

Madasig nga nagligad ang tion sa Gilead, kag naggradwar kami sang Pebrero 1953. Kaupod sang apat pa, gintangdo kami sa Northern Rhodesia (Zambia na karon) sa Aprika. Apang, malulo nga gintugotan kami sang Sosiedad nga magpabilin sa Estados Unidos para sa internasyonal nga kombension nga ginhiwat sa Yankee Stadium sang ulihi sadto nga tuig sang Hulyo. Sa sulod sang mga binulan antes sang kombension kag sa makadali pagkatapos sadto, nag-alagad ako subong manugtatap sa sirkito sa nasidlangan nga Oklahoma.

Sang Nobiembre 1953, si Val kag ako, upod sa anum pa ka misyonero, nagsakay sa de-karga nga barko pakadto sa Aprika. Nagdungka kami sa Durban, South Africa, kag naglakbay paaminhan paagi sa tren pakadto sa Southern Rhodesia (Zimbabwe na karon). Ginbayaan namon diri ang duha sa amon agod magkadto sa ila asaynment sa Salisbury (Harare na karon), samtang ang iban sa amon nagpadayon pakadto sa Kitwe, Northern Rhodesia.

Si Val kag ako gintangdo sa minahan nga banwa sang Mufulira diin may pila ka interesado nga mga pamilya apang wala sing kongregasyon. Ginpakamaayo ni Jehova ang amon pamalaybalay nga pagbantala nga hilikuton. Nakasugod kami sing madamong pagtuon sa Biblia, kag, sang ulihi madamong interesado ang nagsugod sa pagtambong sa Cristianong mga miting. Pagkatapos sang pila ka bulan gintawag kami agod pun-an ang mga bakante sa sanga talatapan sang Watch Tower Society sa Luanshya. Sang ulihi, ginhatagan kami sing isa pa ka asaynment agod mag-alagad subong mga misyonero sa Lusaka. Samtang didto kami, nag-alagad ako sa pulupanag-on subong manugtatap sa sirkito para sa diutay nga kadamuon sang nagapamulong sing Ingles nga mga kongregasyon.

Makalilipay nga Kabuhi sa “Bush”

Nian, sang 1960, ginsaylo kami sa Southern Rhodesia diin gintangdo ako agod mag-alagad subong manugtatap sa distrito sa tunga sang itom nga mga kauturan. Sing bahin, naglakip ini sang pagduaw sa mga kongregasyon kag sang pagtatap sa sirkito nga mga asambleya kag distrito nga mga kombension. Ang kalabanan sining mga kongregasyon yara sa uma, gani dapat kami magtuon sa pagpangabuhi sa bush ukon wayang. Nagbatyag kami nga kon ang amon mga kauturan sarang magkabuhi sa bush amo man kami.

Ang sanga talatapan sang Watch Tower Society nagsangkap sa amon sing isa-kag-tunga-ka-tonelada nga pick up nga trak. Ang buli gintakpan sang sin nga may doble nga ganhaan para sa pagkarga. Ang mga bintana sa ulot sang salakyan kag sang van bastante lang agod sakaan, kag ginatabonan ini sang plastik nga mga kurtina. Ang amon kasangkapan sa panimalay naglakip sang built-in nga katre nga may de-goma nga kutson. May kahon kami nga platera kag de-gas nga lutoan. May mabitbit man kami nga suludlan sang bayo kag tolda.

Wala madugay sa tapos masugdan ang amon asaynment sa nakatundan nga bahin sang pungsod, ginkagat ako sang wala makilal-i nga insekto. Naghubag ang akon batiis kag ginhilanat ako sing mataas. Dugang pa, malain ang tiempo kag mabunok ang ulan. Nagapamalhas ako sing todo sa bagay nga ang mga gamit sa katre dapat pirme islan. Sang magtungang-gab-i na, namat-od si Val nga dal-on ako sa doktor. Nagmaneho sia pakadto sa daku nga dalan, apang nagguot sa lunang ang salakyan. Ang lamang nga epekto sang mga panikasog ni Val nga paabantehon ukon paatrason ini amo ang pagtulutay-ug sa akon. Sang makita niya nga wala na sing mahimo pa, nagpangurumbot sia sa katapusan nga habol nga mamala kag ginbuylogan ako sa van sa mabunok nga ulan.

Maayoayo na pagkaaga. Maayo na diutay ang akon pamatyag, naghulaw na ang ulan, kag ang mga kauturan nga nag-abot agod maghanda para sa asambleya nagtulod sang amon salakyan halin sa lunang. Sa Bulawayo gindala ako sang iban pa nga malulo nga mga kauturan sa ospital, kag sa tapos mabulong nakabalik ako kag nakapadayon sa mga kahimusan sa asambleya.

Sa sini nga panag-on, samtang nagalakbay sa mga kongregasyon, nga nasugata namon ang elepante. Nasugata man namon ang madamong mas magagmay nga mga sapat. Ang iban sang mga bisita namon sa tolda, luwas sa mga langaw kag mga lamok, amo ang harvest nga subay. Sa tuman kalip-ot nga tion, ginabuhoan nila ang bisan anong panapton ukon tela nga yara sa salog. Ang lainlain nga sahi sang tiki kag damang nga nagduaw sa amon wala nagapanghalit, apang ang kobra nga nagsulod madali nga napatay. Kag ang mga iwiiwi wala man ginaabiabi. Ginalaragway ni Val ang kagat nila subong nga daw ginmartilyo sa imo ang nagabaga nga lansang paagi sa maso. Dapat gid nga nahibaluan niya. Apat ka beses sia nga ginkagat!

Ayhan ining mga butang naghimo sang pangabuhi sa bush nga indi makapaladya, apang indi amo sina ang pagtamod namon. Para sa amon, isa ini ka pangabuhi sa wayang, aktibo, mapagros, kag ang espirituwal nga mga pagpakamaayo nagalabaw sa bisan anong pisikal nga mga dikasulhayan.

Makapabakud pirme sa pagtuo nga makita ang panikasog sang mga kauturan sa uma sa pagtambong sa mga miting. Ang isa ka kongregasyon ginahuman sang duha ka grupo nga 23 kilometros ang layo kag isa lamang ka banas ang nagaangot sa ila. Ang ila “Kingdom Hall,” tungatunga sa ulot sang mga grupo, amo ang isa ka daku nga kahoy para pasilungan nga may mga bato para pulungkoan. Ang mga kauturan sa tagsa ka grupo nagalakat sing 11.5 kilometros kada magkadto sa pagtambong sa mga miting sing makaduha sa isa ka semana. Nadumduman man namon ang tigulang nga mag-asawa nga naglakat sing 120 kilometros nga dala ang ila mga maleta kag mga habol agod magtambong sa sirkito nga asambleya. Duha lamang ini ka halimbawa sa kon paano ginaapresyar sang Aprikano nga mga kauturan ang laygay, ‘indi pagpatumbayai ang pagtipon nila sing tingob.’​—⁠Hebreo 10:⁠25.

Sa iban nga mga lugar ang lokal nga mga pumuluyo nangin suspetsuso sa amon motibo, ang iban indi gani luyag nga magpabilin kami sa ila lugar. Sang isa ka bes, gintukod ko ang tolda sa lugar sang asambleya sa isa ka duog nga ginapalibotan sang mataas nga hilamon. Sang matapos ang sesyon sang asambleya kag nakatulog na kami sing pila ka oras, nakibot ako bangod sang gahod sa guwa. Paagi sa paggamit sang akon flashlight, naaninag ko ang dagway sang isa ka tawo nga nagatindog sa likod sang diutay nga kahoy.

“Ano ang luyag mo?” singgit ko. “Ngaa nagapanago ka sa likod sina nga kahoy?”

“Sh-h-h utod,” sabat niya, “nabalitaan namon nga ang iban nga mga tawo nagasiling nga tutdan nila ining hilamon. Gani nag-organisar kami sing isa ka bantay para sa inyo sa bilog nga gab-i.”

Wala nila kami pagsugiri sang katalagman agod indi madisturbo ang tulog namon. Apang handa sila nga magpulaw agod bantayan kami! Sang matapos ang asambleya sang Domingo sang hapon, gin-areglo nila nga ang isa ka salakyan magauna sa amon kag ang isa sa buli namon tubtob makaguwa kami sa makatalagam nga duog.

Makapaladya man nga makita ang kabilihanan nga ginabutang sining kubos nga katawhan sa Biblia. Ang isa ka kongregasyon nga ginduaw namon amo ang isa ka lugar diin ang mga minuro nagatanum sing mani. Sa sulod sang semana, ginbayluhan namon ang literatura kag Biblia sang mga kahon sang wala pa mapaniti nga mga mani. Sang matapos ang amon pagduaw, ginkarga namon ang amon kasangkapan, literatura, kag mga mani kag nagsugod sa paglakbay pakadto sa masunod nga lugar sang asambleya. Wala madugay nga nakalakat na kami, ginpangabay kami sa pagdulog bangod may isa pa nga nagatinguha sa paghingagaw sa amon. Nagdulog kami kag naghulat. Isa gali ini ka tigulang na katama nga babayi nga nagalukdo sa iya ulo sang kahon sang mga mani. Sang makalab-ot sia sa amon, nakapoy gid sia sa bagay nga natumba sia sa duta kag naghigda didto tubtob nga maulian sang iya ginhawa. Huo, luyag niya ang isa ka Biblia! Ginbuksan namon halos ang tanan nga butang, apang makalilipay nga mapaayawan ang iya handum. Isa pa ka Biblia sa mahigugmaon nga mga kamot​—⁠kag isa pa ka kahon sang mga mani sa amon van!

Makalilipay man nga makita kon paano ginasakdag ni Jehova ang mga manugtatap sa sirkito agod maduaw ang madamong kongregasyon sa Aprikanong bush. Sadto nga tion mabudlay para sa Sosiedad ang makakita sing kalipikado nga mga kauturan nga wala sing obligasyon sa pamilya. Gani kinaandan na para sa isa ka nagalakbay nga manugtatap ang magkadto sa lainlain nga mga kongregasyon, paagi sa bus ukon sa bisikleta, upod ang iya asawa kag duha ukon tatlo ka anak, mga maleta, mga habol, kag literatura. Ining mga kauturan kag ang ila pamilya nagpangabudlay gid sing lakas kag sing walay reklamo agod mag-alagad sa mga kongregasyon. Daku gid nga pribilehiyo ang mag-alagad kaupod nila.

Sang katuigan 1970 ang inaway sibil nagsugod sa pagtuga sing mga problema para sa mga kauturan, kag ang hulusayon tuhoy sa neutralidad nagbutang sa madamo sa ila sa mabug-at nga mga pagtilaw sang katutom. (Juan 15:19) Ginhunahuna sang Sosiedad nga labing maayo nga bayluhan ang akon asaynment agod indi maglain pa ang kahimtangan para sa mga kauturan sing dikinahanglanon. Gani, sang 1972, gintawag ako sa pag-alagad sa sanga talatapan sang Salisbury. Naghatag ini sa akon sing kahigayunan nga makabulig sa pagpatindog sa isa ka bag-ong sanga talatapan. Sang ulihi gintangdo ako subong manugtatap sa sirkito sa nagalinapta nga nagapamulong sing Ingles nga mga kongregasyon. Nagkinahanglan ini sang paglakbay sa kalabaon kag kasangkaron sang Zimbabwe. Sa iban nga mga lugar ang kahimtangan tuman ka makatalagam nga naglakbay kami nga ginaupdan sang kumboy nga gin-organisar sang pangulohan kag ginabantayan sang hangaway nga may suporta nga eroplano kag helicopter.

Ang Amon Pagsaylo Pakadto sa Atop sang Aprika

Nian nag-abot ang isa pa ka daku nga pagbalhin sing asaynment. Magaalagad kami sa Maseru, ang kapital sang Lesotho. Isa ini ka bukid nga pungsod, kon kaisa ginatawag nga atop sang Aprika, kag may madamong lugar ini nga matahom.

Bisan pa nga ginaapresyar kag nalipay kami sa danyag, indi amo sina ang katuyuan namon sa pagkadto diri. Yari kami diri agod magbulig sa pagpangita sa “bilidhon nga mga butang” nga ginapatuhuyan sa Hageo 2:⁠7. Isa ini ka diutay nga pungsod nga may populasyon lamang nga isa kag tunga ka milyon. Sang mag-abot kami sang 1979, 571 ka Saksi, sa promedyo, ang nagapakigbahin sa pagbantala sining “maayong balita sang ginharian” kada bulan. (Mateo 24:14) Ang kongregasyon sa Maseru nagtubo tubtob sa punto nga kinahanglan ini tungaon sa duha. Sining karon lang, sang Abril 1988, nalipay gid kami sing daku sa paglab-ot sa bag-ong kataason nga 1,078 ka manugbantala sang Ginharian.

Samtang ang buluhaton nagapadayon sa pag-uswag sa amon anay misyonero nga mga asaynment sa Zambia kag Zimbabwe. Sang mag-abot kami primero sa Aprika sang nagligad nga mga 35 ka tuig, may kabug-osan nga 36,836 ka manugbantala sa sadtong duha ka pungsod. Sa karon ang kadamuon amo ang 82,229. Ang pribilehiyo sa pagpakigbahin sa diutay nga paagi sa sining mga pag-uswag makatilingala gid nga padya para sa amon.

“Tilawi kag tan-awa nga si Jehova maayo,” sulat ni salmista David. (Salmo 34:⁠8) Ang amon ‘pagtilaw’ sa misyonero nga pag-alagad naghaylo sa amon sa kamatuoran sining mga pulong. Sa katunayan, kutob sang 1942 sang magsugod kami sa bug-os tion nga pag-alagad, ang amon kabuhi napuno sang mga pagpakamaayo samtang ginaagom namon ang bugana nga kaayo ni Jehova. Madamo pa nga buluhaton ang hilimuon. Daw ano gid ang amon pagpasalamat kay Jehova nga may kusog kag kapagros pa kami gihapon agod magamit sa pag-alagad sa iya!

[Laragway sa pahina 24]

Si John Miles kag ang iya asawa, si Val