Ang Kabuhi kag Ministeryo ni Jesus

Pagpangita sa Nadula

SI Jesus nalangkag sa pagpangita kag sa pagsapo sa mga mapainubuson nga magaalagad sa Dios. Gani ginapangita niya kag ginasugilanon ang tagsatagsa nahanungod sa Ginharian, lakip ang bantog nga mga makasasala. Ina sila nagpalapit karon sa pagpamati sa iya.

Sang makita ini, ginmulay sang mga Fariseo kag sang mga escriba si Jesus bangod sang pagpakig-upod sa mga tawo nga ginakabig nila nga ditakus. Nagkumod sila: “Ining tawo nagabaton sang mga makasasala kag nagakaon upod sa ila.” Ubos gid ina sa ila dignidad! Ginatratar sang mga Fariseo kag sang mga escriba ang kinaandan nga mga tawo nga subong sang higko sa ila mga tiil. Sa katunayan, gingamit nila ang Hebreong ekspresyon nga ‘am ha·’aʹrets, “katawhan sang duta,” agod ipakita ang ila kangil-ad sa ila.

Sa pihak nga bahin, ginatratar ni Jesus ang tagsatagsa nga may dignidad, kalulo, kag kaluoy. Subong resulta, madamo sining mga kubos, lakip ang mga tawo nga kilala sa pagbuhat sing sala, ang nalangkag sa pagpamati sa iya. Apang kamusta ang pagmulay sang mga Fariseo kay Jesus bangod sang pagpanikasog tungod sadtong ginakabig nila nga ditakus?

Ginsabat ni Jesus ang ila pagpamatok paagi sa paggamit sing ilustrasyon. Nagpamulong sia gikan sa punto-de-vista mismo sang mga Fariseo, nga sila matarong kag wala sing peligro sa toril sang Dios, samtang ang talamayon nga ‘am ha·’aʹrets nagtalang kag nadula. Pamati samtang nagapamangkot sia:

“Sin-o bala ang tawo sa inyo nga may isa ka gatos ka karnero, kon madula ang isa sa ila, nga indi magbiya sang kasiaman kag siam sa kamingawan, kag magpangita sang nadula, tubtob nga makita niya ini? Kag sang nakita niya ini ginapahamtang niya ini sa iya mga abaga nga nagakalipay. Kag sang nakapauli sia gintipon niya ang iya mga abyan kag mga kasilingan, nga nagasiling sa ila, ‘Kalipay kamo upod sa akon, kay nakita ko ang karnero nga nadula ko.’ ”

Nian si Jesus naghimo sing aplikasyon sa iya sugilanon, nagapaathag: “Nagasiling ako sa inyo nga sa among bagay may kalipay sa langit tungod sa isa nga makasasala nga nagahinulsol labi pa sa kasiaman kag siam nga matarong nga wala nagakinahanglan sing paghinulsol.”

Ginakabig sang mga Fariseo ang ila kaugalingon nga matarong kag busa wala nagakinahanglan sing paghinulsol. Sang ginmulay sang iban sa ila si Jesus sang mga pila ka tuig ang nagligad bangod sang pagsalo upod sa mga manugsukot sing buhis kag mga makasasala, ginsilingan niya sila: “Wala ako magkari sa pagtawag sang mga matarong, kundi sang mga makasasala.” Ang nagapakamatarong sa kaugalingon nga mga Fariseo, nga napaslawan sa paghangop sa ila kinahanglanon nga maghinulsol, wala magdala sing kalipay sa langit. Apang ang nagahinulsol gid nga mga makasasala nagadala sing kalipay sa langit.

Agod ipadaku sing maayo ang punto nga ang pagpasag-uli sa nadula nga mga makasasala isa ka rason sang daku nga pagkalipay, si Jesus nagsugid sing isa pa ka ilustrasyon. Nagsiling sia: “Sin-o bala nga babayi nga may napulo ka dracma, kon madula niya ang isa, nga indi anay magsindi sing suga kag magsilhig sang balay kag magpangita sing matinatapon gid tubtob nga makita niya ini? Kag sang nakita niya ini ginatipon niya ang iya mga abyan kag mga kasilingan, nga nagasiling, ‘Kalipay kamo upod sa akon, kay nakita ko ang dracma nga nadula ko.’ ”

Nian si Jesus naghatag sing kaanggid nga aplikasyon, nga nagasiling: “Sa among bagay, nagasiling ako sa inyo, nga may kalipay sa atubangan sang mga anghel sang Dios tungod sa isa ka makasasala nga nagahinulsol.”

Daw ano ka talalupangdon ining mahigugmaon nga pag-ulikid sang mga anghel sang Dios sa pagpasag-uli sang nadula nga mga makasasala! Amo gid sini labi na kay ining kubos, gintamay anay nga mga ‘am ha·’aʹrets sa ulihi mangin katapo sang langitnon nga Ginharian sang Dios. Subong resulta, matigayon nila ang posisyon sa langit nga mas mataas pa sa iya sang mga anghel mismo! Apang sa baylo nga mahisa ukon maakig, ang mga anghel mapainubuson nga nagaapresyar sang katunayan nga ining makasasala nga mga tawo nag-atubang kag naglandas sang mga kahimtangan sa kabuhi nga magasangkap sa ila sa pag-alagad subong mahinuklugon kag maluluy-on nga langitnon nga mga hari kag mga saserdote. Lucas 15:​1-10; Mateo 9:​13; 1 Corinto 6:​2, 3; Bugna 20:⁠6.

◆ Ngaa nakig-upod si Jesus sa kilala nga mga makasasala, nagdul-ong sa anong pagmulay gikan sa mga Fariseo?

◆ Paano ginatamod sang mga Fariseo ang kinaandan nga mga tawo?

◆ Anong mga ilustrasyon ang gingamit ni Jesus, kag ano ang maton-an naton gikan sa sini?

◆ Ngaa talalupangdon ang pagkalipay sang mga anghel?