Report sang mga Manugbantala sang Ginharian
‘Ang Alanyon Luntay Na’ sa Burma
◻ ANG matahom nga pungsod sang Burma may kapin sa 1,500 ka manugbantala sing maayong balita. Ang ila nagligad nga mga kombension ginhiwat sa Burmese, Lushai, kag Haka Chin nga mga hambal, upod ang kabilugan nga tumalambong nga 2,273. Ang masunod nga mga eksperiensia nagapahayag sang interes nga ginapakita sang tulad-karnero nga mga tawo sa mensahe sang Ginharian kag nagapaaku sang nakita ni Juan sa palanan-awon: “Ang alanyon sang duta luntay na.”—Bugna 14:15.
Natabo ini sa Dinam
◻ Samtang nagapamalaybalay sa Matupi, nasumalang sang isa ka espesyal nga payunir ang isa ka estudyante nga interesado gid sa paghibalo nahanungod sa impierno. Sang ginpaathag sa iya nga ang impierno sa Biblia isa ka kinaandan nga lulubngan sang katawhan, nakibot gid sia. Indi niya ini matago sa iya kaugalingon gani ginsugiran niya ang iya mga paryente didto sa iya minuro sa Dinam kag ginpalapnag ang kamatuoran nahanungod sa impierno. Kon wala sing klase, nagapauli sia sa iya minuro kag ginapalapnag didto ang kamatuoran nahanungod sa impierno. Ang iya bayaw nga lalaki nangin interesado gid sa paghibalo sing kapin pa, gani nag-upod sia sa estudyante pabalik sa Matupi agod mahambal mismo ang payunir. Nagtener sia sa Matupi sing pila ka semana kag nagtuon upod sa payunir. Sang ulihi, sang iya ikaduha nga pagduaw sa Matupi, nagpamilit sia nga duawon sang mga payunir ang iya minuro, kay, siling niya, madamo sing interesado didto. Malipayon nga ginbaton sang tatlo ka payunir ang imbitasyon. Naghinguyang sila sing 12 ka mabudlay nga oras padulong sa Dinam.
May lubong sa Dinam sang adlaw nga nag-abot ang mga payunir, kag ang mga tawo gikan sa kaiping nga mga minuro yadto man didto sa pagpamati sing dugang pa nahanungod sa impierno sa Biblia. Nagdalidali sila tanan sa pagpakigkita sa mga bisita. Nagsunod ang paghambalanay tuhoy sa Biblia nga nagdugay kutob sang alas 7:00 s.g. tubtob sang alas 11:00 s.g. Ginpadulog sang isa ka mahinangpanon nga tawo sa kadam-an ang paghambalanay sang alas 11:00 s.g., agod makapahuway ang mga payunir para sa masunod nga adlaw. Pagkaaga, ginsugdan nila ang paghambalanay sa Biblia sang mga alas siete kag nagpadayon tubtob sang alas dies sang gab-i, nga may malip-ot lamang nga pahuway para sa pagkaon. Sang maghalin ang mga payunir gikan sa minuro, ang tulad-karnero nga mga tawo nangabay nga magbalik sila kag maghinguyang sing dugang nga tion upod sa ila. Daw ano nga pribilehiyo sa pagbulig sa sinang madali tudluan nga mga tawo paagi sa hamili nga maayong balita sang Ginharian. Sa pagkamatuod, ang alanyon ‘luntay na’ sa Burma!
Natigayon ang Kamatuoran Gikan sa Ginhaboy nga Libro
◻ Ang isa ka lalaki sa Burma nagduaw sa iya abyan nga nagabaligya sing daan nga mga libro kag mga peryodiko subong basura kag nakita niya ang isa ka daan nga libro nga wala sing hapin sa mga basura. Ginpulot niya ini kag ginbasa. Wala madugay nawili sia sa sini. Natabuan nga amo ini ang libro sang Watch Tower Society nga Pagpamati sa Dakung Manunudlu. Nagsulat sia sa sanga talatapan sang Sosiedad agod makatigayon sing dugang pa nga mga libro. Ang sanga talatapan nagpadala sa gilayon sing payunir sa pagduaw sa iya. Ginsugdan ang pagtuon upod sa iya, kag sa tapos sang pila lamang ka pagtuon, nakilal-an niya ang kamatuoran kag gintinluan niya ang iya kabuhi gikan sa malain nga mga bisyo kag sang ulihi ginhaboy niya ang iya relihioso nga mga idolo sang mga Hindu. Wala magdugay, sia kag ang iya kamagulangan nga anak nga babayi nagdedikar sang ila kabuhi kay Jehova kag ginbawtismuhan. Sia karon isa ka regular nga payunir.
Sa pagkamatuod, “ang alanyon daku, apang pila lamang ang mga mangangani” sa mabungahon nga latagon sang Burma.—Mateo 9:37, 38.