Ang Kabuhi kag Ministeryo ni Jesus

Sang Nakita ang Nadula nga Anak

SANG ang nadula, ukon buhaha, nga anak sa ilustrasyon ni Jesus nagbalik sa balay sang iya amay, anong pag-abiabi ang nabaton niya? Pamati samtang nagasugilanon si Jesus:

“Sang malayo pa sia, nakit-an sia sang iya amay kag ginkaluoyan, kag nagdalagan ang amay kag ginhakus sia niya kag ginhalukan sing mapinalanggaon.” Daw ano ka maluluy-on, mahigugmaon nga amay, nga nagarepresentar sing maayo sa aton langitnon nga Amay, si Jehova!

Mahimo nga nabalitaan sang amay ang patuyang nga pagkabuhi sang iya anak. Apang gin-abiabi niya sia sa balay nga wala na maghulat para sa isa ka detalyado nga paathag. May amo man sina ka maabiabihon nga espiritu si Jesus, una nga nagpalapit sa mga makasasala kag mga manugsukot sang buhis, nga ginrepresentar sa ilustrasyon sang buhaha nga anak.

Matuod, ang mahinantupon nga amay sa ilustrasyon ni Jesus walay duhaduha nga may ideya na tuhoy sa paghinulsol sang iya anak paagi sa pagtan-aw sa iya masinulub-on kag napung-awan nga pangguyahon sang nagpauli sia. Apang ang mahigugmaon nga inisyatibo sang amay nagpahapos para sa anak nga itu-ad ang iya mga sala, subong sang ginsaysay ni Jesus: “Kag ang anak nagsiling sa iya, ‘Amay, nakasala ako batok sa langit kag sa imo atubangan. Indi na ako takus pagtawgon nga anak mo. Himua ako nga subong sang isa sang imo mga mamumugon.’ ”

Apang, halos pa lang mabungat sang anak ang mga pulong sang ang iya amay naghulag, nagsugo sa iya mga ulipon: “ ‘Dali! dalha ang pinakamahal gid nga panapton, kag isul-ob sa iya, kag butangi sing singsing ang iya kamot kag sandalyas ang iya mga tiil. Kag dalha ang pinatambok nga tinday sang baka kag ihawa ini kag magkaon kita kag magkasadya, kay ining akon anay napatay kag nabuhi liwat; nadula sia kag nakita.’ Kag nagsugod sila sa pagkasadya.”

Samtang, ang “anak nga magulang [sang amay] yadto sa uma.” Tan-awa kon kilala ninyo kon sin-o ang ginarepresentar niya paagi sa pagpamati sa nabilin nga sugilanon. Si Jesus nagsiling tuhoy sa anak nga magulang: “Sang nagpauli sia kag naghinamput sa balay nabatian niya ang lanton kag sinaut. Kag gintawag niya ang isa sang mga suluguon kag ginpamangkot kon ano ang kahulugan sini. Kag nagsiling sia sa iya, ‘Ang imo utod nag-abot, kag ginpaihaw sang imo amay ang pinatambok nga tinday, bangod nga nabaton niya sia nga maayo.’ Apang nangakig sia kag indi buot magsulod.

“Nian ang iya amay nagguwa kag nagpakiluoy sa iya. Apang nagsabat sia sa iya amay, ‘Yari karon sa sining mga tinuig nagaalagad ako sa imo kag wala gid ako maglapas sang imo sugo, apang wala mo gid ako paghatagi sing tinday nga kanding agod nga magkasadya ako upod sang akon mga abyan. Apang sang nag-abot ining anak mo, nga naghalunhon sang imo pangabuhian upod sa makihilawason nga mga babayi, gin-ihaw mo tungod sa iya ang pinatambok nga tinday.’ ”

Sin-o, kaangay sang anak nga magulang, ang wala magpakita sing kaluoy kag igtalupangod sa mga makasasala? Indi bala ang mga escriba kag ang mga Fariseo? Bangod ginmulay nila si Jesus kay gin-abiabi niya ang mga makasasala nga nagresulta sa sini nga ilustrasyon, maathag nga sila amo ang ginarepresentar sang anak nga magulang.

Ginhinakpan ni Jesus ang iya sugilanon paagi sa pangabay sang amay sa iya anak nga magulang: “Anak, ikaw kaupod nakon sa gihapon, kag ang tanan nga akon imo; dapat kita magkasadya kag magkalipay, kay ining imo utod napatay kag nabuhi, kag nadula sia kag nakita.”

Busa ginbilin ni Jesus nga wala mahibalui ang ginhimo sang ulihi sang anak nga magulang. Sa pagkamatuod, sang ulihi, pagkatapos sang kamatayon kag pagkabanhaw ni Jesus, “isa ka daku nga kadam-an sang saserdote nagmatinumanon sa pagtuo,” ayhan nagalakip sa iban sining “anak nga magulang” nga klase nga ginahambalan diri ni Jesus.

Apang sin-o sa modernong tion ang ginarepresentar sang duha ka anak? Sila amo ang may bastante na nga nahibaluan nahanungod sa mga katuyuan ni Jehova agod may rason nga makasulod sila sa isa ka kaangtanan upod sa iya. Ang anak nga magulang nagarepresentar sa iban nga mga katapo sang “diutay nga panong,” ukon “kongregasyon sang panganay nga nalista sa langit.” Gin-adoptar nila ang panimuot nga kaanggid sa iya sang anak nga magulang. Indi nila luyag nga abiabihon ang dutan-on nga klase, ang “iban nga mga karnero,” nga sa banta nila nagapangagaw sing igtalupangod.

Ang buhaha nga anak, sa pihak nga bahin, nagarepresentar sa iban nga katawhan sang Dios nga naglakat agod agumon ang kalipayan nga ginatanyag sang kalibutan. Apang, sang ulihi, mahinulsulon sila nga nagbalik kag sa liwat nangin aktibo nga mga alagad sang Dios. Sa pagkamatuod, daw ano ka mahigugmaon kag maluluy-on ang Amay sa ila nga nagakilala sang pagkinahanglan nila sing kapatawaran kag nagabalik sa iya! Lucas 15:​20-32; Binuhatan 6:​7; Lucas 12:​32; Hebreo 12:​23; Juan 10:⁠16.

◆ Paano gin-ilog ni Jesus ang huwaran sang maluluy-on nga amay sa iya ilustrasyon?

◆ Ano ang pagtamod sang anak nga magulang sa pag-abiabi sa iya utod, kag paano naghulag sing kaanggid sa anak nga magulang ang mga Fariseo?

◆ Ano ang aplikasyon sang ilustrasyon ni Jesus sa aton adlaw?