Ginhimo Nila ang Kabubut-on ni Jehova

Isa ka Amay nga Handa Magpatawad

GINTAWAG ini subong ang labing maayo nga malip-ot nga sugilanon nga nasulat​—⁠bangod sang maayo nga rason. Ang parabola ni Jesus tuhoy sa gugma sang isa ka amay sa iya nadula nga anak kaangay sang isa ka bintana nga paagi sa sini makita naton ang dalayawon nga kaluoy sang Dios sa mahinulsulon nga mga makasasala.

Nadula Sia kag Nakita

Ang tawo may duha ka anak nga lalaki. Ang manghod nagsiling sa iya: ‘Kuhaon ko na ang akon palanublion, sa baylo nga hulaton ka nga mapatay.’ Nagsugot ang amay, mahimo nga naghatag sa iya sing ikatlo nga bahin sang iya pagkabutang​—ang legal nga bahin sang palanublion sang manghod sa duha ka anak. (Deuteronomio 21:17) Dalidali nga ginhimos sang pamatan-on ang iya mga pagkabutang kag nagpanglakatan sa malayo nga duog diin gingasto niya ang tanan nga kuwarta sa malaw-ay nga pagkabuhi.​—Lucas 15:​11-13.

Nian natabo ang grabe nga gutom. Bangod wala na sing mahimo, ang pamatan-on nag-obra subong manugbahog sing baboy​—isa ka makahuluya nga trabaho para sa isa ka Judiyo. (Levitico 11:​7, 8) Tuman ka iwat ang pagkaon nga nagsugod sia sa paghandum nga magkaon sing bunga sang algarroba nga ginabahog sa mga baboy! Sang ulihi nakamarasmas ang pamatan-on. ‘Ang mga ulipon sang akon amay nagakaon sing maayo sangsa akon!’ hunahuna niya. ‘Mapauli ako, magtu-ad sang akon mga sala, kag magpakiluoy nga mangin isa sang sinuhulan nga mga tawo sang akon amay.’a​—Lucas 15:​14-19.

Ang pamatan-on nagpauli. Walay duhaduha nga nagbag-o sing daku ang iya dagway. Apang, nakilala gihapon sia sang iya amay “samtang malayo pa sia.” Bangod sang kaluoy nagdalagan nga ginsugata sang amay ang iya anak, naghakos, kag “naghalok sing mapinalanggaon sa iya.”​—Lucas 15:⁠20.

Ining mainit nga pag-abiabi nagpahapos sa pamatan-on nga magtu-ad. “Amay ko,” siling niya, “nakasala ako batok sa langit kag batok sa imo. Indi na ako takus nga pagatawgon nga imo anak. Himua ako nga isa sang imo mga sinuhulan.” Gintawag sang amay ang iya mga ulipon. “Dali!” sugo niya. “Magkuha kamo sing isa ka panapton, ang labing maayo, kag ipasuksok ini sa iya, kag butangi sing singsing ang iya kamot kag pasuksuki sing sandalyas ang iya tiil. Kag magkuha kamo sing pinatambok nga tinday nga baka, kag ihawa ini kay makaon kita kag mangalipay, bangod ining akon anak napatay kag nabuhi liwat; nadula sia kag nakita.”​—Lucas 15:21-⁠24.

Ginhiwat ang daku nga sinalusalo, lakip ang musika kag sinaot. Nabatian sang magulang nga anak ang tunog sang musika kag sinaot samtang nagapauli sia gikan sa latagon. Naakig sia sang mahibaluan niya nga ang sinalusalo ginhiwat tungod sa iya utod nga nagpauli. ‘Nagpaulipon ako sa imo sa madamo nga tuig, kag wala gid magsupak sa imo, apang wala ka gid maghatag sa akon sing bisan isa ka tinday nga kanding agod mangin kalingawan upod sa akon mga abyan,’ reklamo niya sa iya amay. ‘Apang, sang ang imo anak nga nag-uyang sang imo manggad nagbalik, ginhiwatan mo sia sing sinalusalo.’ ‘Anak,’ malum-ok nga sabat sang iya amay, ‘kaupod ko ikaw pirme, kag imo ang tanan nga akon. Apang dapat kita magkalipay bangod ang imo utod napatay kag nabuhi liwat. Nadula sia kag nakita.’​—Lucas 15:25-⁠32.

Leksion Para sa Aton

Ang amay sa parabola ni Jesus nagalaragway sa aton maluluy-on nga Dios, si Jehova. Kaangay sang nadula nga anak, kon kaisa ang pila ka tawo nagabiya sa kalig-unan sang panimalay sang Dios apang sa ulihi nagabalik. Paano ginatamod ni Jehova ang kaangay nila? Yadtong nagabalik kay Jehova nga sinsero nga nagahinulsol makasalig nga “sia wala nagapangita sing sayop, ukon nagapadayon sa pagpangakig.” (Salmo 103:9) Sa parabola, ang amay nagdalagan sa pag-abiabi sa iya anak. Sing kaanggid, si Jehova indi lamang handa apang luyag nga magpasaylo sa mahinulsulon nga mga makasasala. Sia “handa sa pagpatawad,” kag nagahimo sini “sa masangkad nga paagi.”​—Salmo 86:5; Isaias 55:7; Zacarias 1:3.

Sa parabola ni Jesus, ang matuod nga gugma sang amay nagpahulag sa anak nga magtipon sing kaisog nga magpauli. Apang binagbinaga: Ano ayhan ang natabo kon ginsikway sang amay ang iya anak ukon sa daku nga kaakig ginsinggitan niya sia nga indi na magbalik? Ina nga panimuot mahimo nga magpahulag sa anak nga magbulag sing permanente.​—Ipaanggid ang 2 Corinto 2:​6, 7.

Buot silingon nian, nga ang matuod nga gugma sang amay nagbukas sing dalan agod makabalik ang iya anak. Kon kaisa, ang Cristianong mga gulang karon dapat magsikway sa dimahinulsulon nga mga makasasala gikan sa kongregasyon. (1 Corinto 5:​11, 13) Sa paghimo sina, mahimo nila mabuksan ang dalan nga makabalik ang makasasala paagi sa mahigugmaon nga pagtudlo sa mga tikang nga iya himuon tuhoy sa palaabuton nga pagpasag-uli. Ang pagdumdom sinang hanuot nga pagpangabay sang mga gulang nagpahulag sa ulihi sang madamo nga nadula sa espirituwal nga maghinulsol kag nagpahulag sa ila nga magbalik sa panimalay sang Dios.​—2 Timoteo 4:⁠2.

Nagpakita man sing kaluoy ang amay sang magbalik ang iya anak. Nakita niya dayon ang sinsero nga paghinulsol sang iya anak. Nian, sa baylo nga piliton ang iya anak nga isugid ang tanan niya nga sala, gin-asikaso niya ang pag-abiabi sa iya, kag nagpakita sia sing daku nga kalipay sa paghimo sini. Ang mga Cristiano makasunod man sini nga halimbawa. Dapat sila magkalipay kon masalapuan ang isa nga nadula.​—Lucas 15:⁠10.

Ang ginhimo sang amay maathag nga nagpakita nga madugay na niya ginapaabot nga magbalik ang iya malinapason nga anak. Sa pagkamatuod, ang pagpaabot sang amay isa lamang ka landong sang handum ni Jehova tuhoy sa tanan nga nagbiya sa iya panimalay. Sia “wala nagahandum nga ang bisan sin-o malaglag kundi nagahandum nga ang tanan makadangat sa paghinulsol.” (2 Pedro 3:9) Yadtong nagahinulsol sa ila mga sala makasalig nian nga sila pakamaayuhon sang “mga panag-on sang pagpaumpaw . . . gikan mismo kay Jehova.”​—Binuhatan 3:⁠19.

[Footnote]