Paghangop nga Ginhatag ni Jehova

“Nahanungod sa may mga paghangop sa tunga sang katawhan, ipaambit nila ang paghantup sa madamo.”​—⁠DANIEL 11:⁠33.

1, 2. (a) Bisan pa naeksperiensiahan sang mga Israelinhon ang mahigugmaon nga kalulo sang Dios, ngaa naggawi sila sing rebelyuso? (b) Ano ang maayo nga himuon naton? (Jeremias 51:10)

NAHIBALUAN sang katawhan sang Israel sang una nga si Jehova amo lamang ang matuod nga Dios. Ginsugiran sila nahanungod sa iya pagpakig-angot sa ila mga ginikanan, kag personal nila nga naeksperiensiahan ang iya mahigugmaon nga kalulo. Apang sing kapin sa isa ka okasyon, naggawi sila upod ang daku nga kakulang sing paghangop. “Nagrebelde” sila kay Jehova kag sa iya mga tiglawas. Ngaa? Bangod “wala sila makadumdom” sang ginhimo niya para sa ila. (Salmo 106:​7, 13) Indi nga wala nila mahibalui ining mga bu­tang; wala nila ini pagpamalandungi sing mainapresyahon. Subong resulta, sila nangin “mga tawo nga nagkaibog sang malaut.”​—⁠1 Corinto 10:6.

² Sa aton adlaw, ang dakung paagi nga ginhamulag ni Jehova ang iya mga saksi subong tuhay nga katawhan amo ang paagi sa paghangop nga gin-aman niya paagi sa iya kitaon nga organisasyon. Ang aton mismo apresasyon sa paagi nga ginadumalahan ni Jehova ang iya katawhan sarang mapabakud paagi sa pagrepaso sa pila ka halimbawa sina nga paghangop. Ang isa sini nagadalahig sang sentro mismo sang aton pagtuluohan​—⁠ang pagkilala sa Dios mismo.

Ang Dios Bala Trinidad?

3. Ano ang nagpaposible sa mga alagad ni Jehova, sa sulod sang nagligad nga kapin sa isa ka gatos ka tuig, nga makilala ang kamatuoran nahanungod sa pagkilala sa Dios? (1 Corinto 8:​5, 6)

³ Ang Cristiandad malig-on nga nagasiling nga yadtong wala nagapati sa Trinidad mga erehes. Apang sa baylo nga mahadlok sa mga tawo, ginakilala sang mga alagad ni Jehova nga, indi ang mga tradisyon kag mga kredo nga indi inspirado sang mga tawo, kundi ang Balaan nga Kasulatan ang nagaaman sing talaksan para mahantupan kon ano ang kamatuoran. Napabakud sa sining sadsaran, sadto pa sang 1882 ining dedikado nga mga estudyante sang Biblia maathag nga nagsiling sa Watch Tower: “Ang amon mga bumalasa nakahibalo nga samtang nagatuo kami kay Jehova nga Dios kag kay Jesus, kag sa balaan nga Espiritu, ginasikway namon subong bug-os nga dimakasulatanhon, ang panudlo nga sila tatlo ka Dios sa isa ka persona, ukon subong sang ginasiling sang iban, isa ka Dios sa tatlo ka persona.”​—⁠Juan 5:​19; 14:​28; 20:⁠17.

4. (a) Nagausisa sing labaw pa sa kadaygan, ano ang nahantup sang katawhan sang Dios nahanungod sa sadsaran para sa Trinidad nga doktrina kag sa epekto sina nga panudlo? (b) Ngaa ginahatagan ni Jehova ang iya mga alagad sina nga paghangop?

⁴ Indi lamang kadaygan ang gin-usisa sang mga nagahigugma sa kamatuoran sang Biblia kag nakita nila ang ginhalinan sang Trinidad nga pagtuluohan sa di-Cristiano nga mga relihion. Paagi sa mahalungon nga pagtuon sang Kasulatan, nahibaluan man nila nga sa mga teksto sang Biblia nga daw nagasakdag sa mga ideya sang Trinidad, bangod ini sa may nadampigan nga pagtamod sang mga manugbadbad, indi bangod sang kon ano ang yara sa pinakadaan nga mga manuskrito sa orihinal nga pamulong. Nahibaluan nila nga ining panudlo nga daw nagapadungog kay Jesus, supak gid sa iya mga panudlo kag wala nagapadungog kay Jehova. Busa, ang isyu sang Watch Tower nga ginsambit kaina nagsiling: “Nagakaigo para sa aton nga mga nagapangita sang kamatuoran, nga mangin bunayag sa aton kaugalingon kag sa Pulong sang aton Amay, nga nagahimo sa aton nga tunay nga maalam. Busa, wala nagasapak sa mga tradisyon kag mga kredo sang indi inspirado nga mga tawo kag malaut nga mga sistema, manguyapot kita sing malig-on sa maligdong nga mga pulong nga natigayon gikan sa aton Ginuo kag sa mga Apostoles.” Bangod ginhigugma gid nila ang kamatuoran kag ginhatagan sing igtalupangod indi lamang ang pila ka paborito nga mga bersikulo sa Biblia kundi ang bug-os nga Pulong sang Dios, ginhatagan sila ni Jehova sing paghangop nga dimasaypunon nga nagahamulag sa ila gikan sa Cristiandad.​—⁠2 Timoteo 3:​16, 17; tan-awa ang New World Translation Reference Bible, pahina 1580, seksion 6B.

Ang Makatarunganon nga Lugar sang Ngalan sang Dios

5. Ano ang yara sa likod sang pagkuha sa personal nga ngalan sang Dios sa mga badbad sang Biblia? (Bugna 22:​18, 19)

⁵ Binagbinaga ang ikaduha nga halimbawa: Sang gintago ukon bug-os nga gindula sang madamong badbad sang Biblia ang personal nga ngalan sang Dios, ginhatagan sang Watch Tower Society sing dugang pa nga pagpadaku ang importansia sina nga ngalan. Ang Cristiandad nangatarungan nga ang pagdula sa ngalan ni Jehova nagahatag sa Ebanghelyo sing labi pa nga ganyat sa bug-os nga uniberso, apang nahantup sang hinaplas nga mga alagad ni Jehova kon sin-o ang sa likod sinang padugi nga dulaon gikan sa Sagrado nga Kasulatan ang pinakaimportante sa tanan nga ngalan. (Ipaanggid ang Jeremias 23:⁠27.) Nahibaluan sang katawhan sang Dios nga sugyot ini sang Yawa agod dulaon gikan sa tawhanon nga memorya ang ngalan sang matuod nga Dios.

6. Kabaliskaran sa dalanon sang Cristiandad, ano ang ginhimo sang matuod nga mga alagad sang Dios sa pagpadaku sa iya ngalan? (Binuhatan 15:14)

⁶ Kabaliskaran sa dalanon nga ginalaktan sang Cristiandad, kutob sa iya una gid nga tuig sang publikasyon (1879), ang Watch Tower naghatag sing dignidad sa balaan nga ngalan, JEHOVA. Sang 1926 ining magasin nagbalhag sang artikulo nga “Who Will Honor Jehovah?” (Salmo 135:21) Sang 1931 ginbaton sang mga estudyante sang Biblia nga naangot sa Watch Tower Society ang ngalan nga mga Saksi ni Jehova. (Isaias 43:​10-12) Naapresyar man nila sing labi pa ang daku nga importansia sang pagpakabalaan sa ngalan ni Jehova. (Isaias 12:​4, 5) Sang 1944 ginbalhag nila ang Amer­i­can Stan­dard Ver­sion nga Biblia, nga naglakip sang ngalan nga Jehova sing kapin sa 6,800 ka beses. Apang, may kahilabtanan sa pagbalhag sang Biblia, nangin labing tumalagsahon ang pagbalhag, kutob sang 1950, sa New World Translation. Ginbutang sini ang balaan nga ngalan sa iya nagakaigo nga lugar sa Hebreo kag sa Cristianong Griegong Kasulatan.

7. Paano naapektuhan sing mapuslanon ang madamong tawo sa pagpadaku nga ginabutang sa ngalan sang Dios kag sa tanan nga naangot sa sini?

⁷ Busa ang pagpadaku nga ginhatag sa personal nga ngalan sang Dios nagpahalipay sa minilyon nga nagahigugma sa pagkamatarong sa palibot sang globo. Nagbulig ini sa ila nga maapresyar ang matuod nga Dios subong isa ka Persona. Kag sang nahibaluan nila ang iya mga dalanon, naggawi sila sing maalamon, ukon upod ang paghangop.​—⁠Miqueas 4:​2, 5.

Dimamalatyon Bala ang Tawhanon nga Kalag?

8. Sang temprano sang ila modernong-adlaw nga maragtas, ano ang naton-an sang mga Saksi ni Jehova nahanungod sa kalag kag sa kahimtangan sang patay?

⁸ Karon, ang ikatlo nga halimbawa: Sa una nga bahin sang modernong-adlaw nga maragtas sang mga alagad ni Jehova, ang paghigugma sa Pulong sang Dios nagpamuklat sang ila mga mata sa iban pa importante nga mga kamatuoran. Sang nagligad nga kapin sa isa ka siglo, “ang matutom kag mainandamon nga ulipon” nakahangop sing husto nga ang kalag indi amo ang intelihente kag nagapain nga espiritu nga nagapuyo sa sulod sang mga tawo kundi nga amo ini mismo ang tawo. (Mateo 24:​45-47) Sang 1880 gin-usisa sang Watch Tower ang mga tinaga sang orihinal nga pamulong nga ginbadbad nga Sheol kag Hades sa Biblia kag ginhinakop nga nagapatuhoy ini sa lulubngan. Ginpaathag man nga ang mga tawo nga nagakadto sa Gehena ginalaglag, indi ginapaantos.​—⁠Tan-awa man ang New World Translation Reference Bible, pahina 1573-5.

9. Sang 1894, ano ang ginasiling sang Watch Tower nahanungod sa ginhalinan sang panudlo nga ang tawhanon nga mga kalag duna nga dimamalatyon?

⁹ Sang 1894 ang Watch Tower nagpautwas sang pamangkot, “Diin naghalin ang bantog nga ideya nga ang tanan nga tawo nagapanag-iya sing pagkadimamalatyon, sing pagkaduna, sing pagkakinaugali?” Upod ang paghangop, ini nagsabat: “Nagabukad sa mga pahina sang maragtas, natukiban namon nga, bisan pa ang doktrina sang tawhanon nga pagkadimamalatyon wala ginatudlo sang inspirado nga mga saksi sang Dios, amo gid ini ang ginatudlo sang tanan nga paganong mga relihion. . . . Busa, indi matuod nga sanday Socrates kag Plato amo ang una nga nagtudlo sang doktrina: may nauna pa ini nga manunudlo sang sa ila nga duha, apang isa nga mas sangkol. Walay sapayan, ginpauswag nila ang doktrina . . . kag naghimo sing pilosopiya gikan sa sini, kag busa ginhimo ini nga mas makagalanyat kag kalahamut-an sa edukado nga klase sang ila kaadlawan kag kutob sadto. Ang una nga rekord sining dimatuod nga panudlo makita sa pinakadumaan nga maragtas nga nahibal-an sang tawo​—⁠ang Biblia. Ang dimatuod nga manunudlo amo si Satanas.”⁠a

10. Anong malain nga epekto ang nagresulta gikan sa relihioso nga kabutigan nahanungod sa kalag kag sa kahimtangan sang patay, apang ano ang ginhimo agod buligan ang makatarunganon nga katawhan?

¹⁰ Paagi sa pagpalapnag sang kabutigan nga ang tanan nga tawo may dimamalatyon nga kalag kag nga ang malauton silutan sing dayon sa kalayuhon nga impierno, ginhimutig kag ginpasipalahan ni Satanas ang ngalan sang Dios. Ang una nga editor sang Watch Tower, si C. T. Russell, nakahibalo sina. Nakita niya ang intelihente nga mga tawo nga nagsikway sang ideya nahanungod sa dayon nga pag-antos apang, sing masubo, nagsikway man sa Biblia bangod abi nila amo ini ang ginhalinan sinang dimakatarunganon nga doktrina. Agod dulaon ang aso sang Madulom nga mga Dag-on gikan sa hunahuna sang makatarunganon nga katawhan, subong sang ginsiling niya, si Bro­ther Russell naghatag sing talalupangdon nga pamulongpulong publiko nga “To Hell and Back! Who Are There.”

11. (a) Sang nagbantog ang espiritismo, anong paandam ang ginpalanog sang ‘matutom nga ulipon’ nga klase? (b) Sin-o ang nakabenepisyo sa sining paandam, kag paano?

¹¹ Amo yadto ang dag-on nga ang espiritismo lapnag. Apang upod ang paghangop nga ginpaposible ni Jehova nga Dios paagi sa iya Pulong, nahantup sang ‘matutom nga ulipon’ nga klase nga ang ginakunokuno nga mga espiritu sang nagtaliwan nga ginasugilanon sang mga tawo amo ang mga demonyo. Ang makusog nga mga argumento sa Kasulatan ginhatag sa mga pamulongpulong publiko kag sa nasulat nga dagway agod pamuklaton ang mga mata sang mga bunayag sing tagipusuon sa katalagman sang pagkanadalahig sa espiritistiko nga mga buhat. (Deuteronomio 18:​10-12; Isaias 8:19) Subong resulta sining paghangop nga ginhatag ni Jehova sa iya mga alagad, madamong linibo ka tawo sa palibot sang globo ang nahilway gikan sa kahadlok sa patay, gikan sa pagbuhat sing espiritismo, kag gikan sa malaut nga mga batasan nga naangot sa espiritismo.

Cristianong Pagginawi sa Magamo nga Kalibutan

12, 13. (a) Ipaathag ang Daniel 11:⁠32, 33. (b) Ano ang pila sa sadsaran nga mga kamatuoran sa Biblia ang nagahatag sing rason para sa paghangop nga ginpaambit sang “may mga paghangop”?

¹² Ginpakita ni manalagna Daniel nga ang mga alagad sang Dios magapakita sing paghangop may kahilabtanan sa ikap-at nga butang, sa isa ka importante nga isyu​—⁠neutralidad. Sa tapos malaragway ang detalye sang pagsumpunganay sa ulot sang bantog nga mga bloke sa politika sang kalibutan, ang Daniel 11:⁠32, 33 nagasiling: “Ang mga nagahimo sing pagkamalaut batok sa katipan, tuytuyan niya padulong sa apostasya paagi sa matam-is nga mga pulong.” Kon sayuron, ang totalitaryan nga hari sang aminhan nagatuytoy padulong sa apostasya sadtong nagaangkon nga mga Cristiano apang nagahigugma sa kalibutan, naluyag sa iya kahamuot, kag busa nagapasipala sa katipan ni Jehova para sa isa ka Ginharian nga sa sini si Jesucristo magagahom sa bug-os nga duta. “Apang,” padayon ni Daniel, “nahanungod sa katawhan nga nakakilala sa ila Dios, sila magamadinalag-on kag magagawi sing epektibo. Kag nahanungod sadtong may paghangop sa tunga sang katawhan, ipaambit nila ang paghangop sa madamo.”

¹³ Ang paghangop nga kinahanglanon agod maatubang sing maalamon ang masami magamo nga mga kahimtangan nga nagalibot sa aton napasad sa apresasyon sa sadsaran nga mga kamatuoran sang Biblia. Paagi sa direksion ni Jehova, nahantup sang ‘matutom nga ulipon’ nga klase ining mga kamatuoran. Ang isa sini amo ang kamatuoran nga, subong sang ginpakita ni Jesus, ang dikitaon nga gumalahom sining kalibutan amo si Satanas nga Yawa. (Lucas 4:​5-8; Juan 12:31) Nahisanto sa sining kamatuoran, ang 1 Juan 5:​19 nagdugang nga indi lamang isa ka bahin ukon isa pa kundi “ang bug-os nga kalibutan [ang tanan nga katawhan sa guwa sang matuod nga Cristianong kongregasyon] yara sa gahom sang malauton.” (Bugna 12:9) Sanglit nagsiling si Jesus nga ang iya mga sumulunod mangin “indi bahin sang kalibutan,” nagakinahanglan ini sing Cristianong neutralidad sa bahin nila.​—⁠Juan 17:⁠16.

14. (a) Sa anong suno sa tion nga butang ginpatuhoy sang mga alagad ni Jehova ang igtalupangod sang 1939 kag 1941? (b) Paano nabuligan sina nga paghangop ang mga Saksi ni Jehova agod maggawi sing maalamon?

¹⁴ Busa, suno gid sa tion, nga samtang ang panganod sang Inaway Kalibutanon II nagdulom sa Europa, ang isyu nahanungod sa Cristianong neutralidad ginpatalupangod sa The Watchtower sang Nobiembre 1, 1939. May kahilabtanan sa sining butang amo ang isa pa ka panguna nga kamatuoran​—⁠ang importansia sang isyu nahanungod sa bug-os uniberso nga pagkasoberano kag ang papel sang Mesianikong Ginharian sa paglubad sining isyu. Sing nagakaigo, sang 1941 ining isyu ginhambalan sa isa ka diskurso sa kombension sang mga Saksi ni Jehova sa St. Louis, Mis­souri, E.⁠U.⁠A., kag sang masunod nga tuig sa libro nga The New World. Daku gid nga proteksion ang ginhatag sinang diosnon nga paghangop para sa mga alagad ni Jehova sa sining nabahinbahin kag nagainaway nga kalibutan! Bisan pa nga ang relihioso nga sistema sang Cristiandad nabahinbahin bangod nadalahig sila sa pungsodnon nga inaway kag gerilya nga mga hublag sa pagpukan sa mga gobierno, ang mga Saksi ni Jehova sa tanan nga kadutaan nahiusa nga nagpadayon sa paghugod sang ila kaugalingon sa pagbantala sang Ginharian sang Dios subong ang lamang nga paglaum para sa katawhan. Masako sila sa nagaluwas kabuhi nga hilikuton nga gintagna ni Jesucristo sang nagsiling sia: “Ining maayong balita sang ginharian ibantala sa tanan napuy-an nga duta nga panaksi sa tanan nga kapungsoran; kag ugaling magaabot ang katapusan.”​—⁠Mateo 24:⁠14.

Katumanan sang mga Tagna sang Biblia

15. Ngaa may paghangop ang mga alagad ni Jehova?

¹⁵ Ngaa ang mga alagad ni Jehova may amo sina nga paghangop? Bangod may bug-os sila nga pagsalig sa nasulat nga Pulong sang Dios, ginatuman nila ini, kag ang espiritu ni Jehova yara sa ila. Bangod sini nahangpan nila ang importante nga mga tagna sang Biblia, kag amo ini ang ikalima nga punto nga binagbinagon naton.

16, 17. (a) Ngaa ang mga petsa nga ginagamit sang mga Saksi ni Jehova tuhay kon kaisa sa ginahatag sang sekular nga mga istoryador? (b) Paano nakabenepisyo ang mga Saksi ni Jehova gikan sa pagsalig nila sa Biblia nahanungod sa petsa sang ika-20 ka tuig ni Artajerjes kag sa tion sang paglaglag sang mga Babilonianhon sa Jerusalem?

¹⁶ Ang sekular nga mga istoryador, nga nagasalig sa ila pagpatpat sa kon ano ang yara sa pila ka kaso sang pidaso nga mga tapitapi nga nakutkutan sang mga arkeologo, naghinakop nga ang 464 B.⁠C.⁠E. amo ang unang tuig sang paghari ni Artajerjes Longimanus kag nga ang 604 B.⁠C.⁠E. amo ang una nga tuig sang paghari ni Nabokodonosor II. Kon matuod ina, ang ika-20 ka tuig ni Artajerjes nagsugod sang 445 B.⁠C.⁠E., kag ang petsa sang paghapay sa Jerusalem sang mga Babilonianhon (sa ika-18 nga tuig sang paghari ni Nabokodonosor) amo ang 587 B.⁠C.⁠E. Apang kon ginagamit sang estudyante sang Biblia inang mga petsa sa pagkalkular sang katumanan sang tagna, magamuhan gid sia.

¹⁷ Ang mga Saksi ni Jehova interesado sa mga natukiban sang mga arkeologo kay may kahilabtanan ini sa Biblia. Apang, kon ang interpretasyon sa sining mga tukib nagasumpakil sa maathag nga mga pinamulong sang Biblia, ginabaton namon nga may pagsalig ang ginasiling sang Balaan nga Kasulatan, bisan sa mga butang nga may kahilabtanan sa kronolohiya ukon sa bisan anong iban pa nga topiko. Subong resulta, madugay na ginakilala sang mga alagad ni Jehova nga ang matagnaon nga panag-on sang tion nga nagsugod sang ika-20 ka tuig ni Artajerjes gin-isip halin sang 455 B.⁠C.⁠E. kag busa nga ang Daniel 9:​24-27 masaligon nga nagatudlo sa tuig 29 C.⁠E. sang tigragas subong ang tion para haplasan si Jesus subong ang Mesias.⁠b Bangod sina nga rason, ginkilala nila nga ang tagna sa Daniel kapitulo 4 nahanungod sa “pito ka panag-on” nagsugod nga gin-isip sang 607-606 B.⁠C.⁠E. kag nga nagatudlo ini sa 1914 C.⁠E. sang tigragas subong ang tuig nga si Cristo naglingkod sa trono subong nagagahom nga Hari kag ining kalibutan nagsulod sa iya tion sang katapusan.⁠c Apang wala kuntani nila nahantup ining makalilipay nga mga katumanan sang tagna kon nagtiong ang ila pagsalig sa inspirasyon sang Balaan nga Kasulatan. Busa, ang paghangop nga ginpakita nila direkta nga naangot sa pagsalig nila sa Pulong sang Dios.

18. Ano ang ginasaad sang Isaias 65:​13, 14 nahanungod sa espirituwal nga kahimtangan sang matutom nga mga alagad ni Jehova?

¹⁸ Nagapaanggid sa espirituwal nga kahimtangan sang iya matutom nga mga alagad sa iya sang mga indibiduwal kag mga grupo nga gilayon nga nagapahigad sang Kasulatan pabor sa bisan ano nga popular karon, si Jehova nagasiling: “Yari karon! Ang akon mga alagad magakaon, apang kamo gutumon. Yari karon! Ang akon mga alagad magainum, apang kamo uhawon. Yari karon! Ang akon mga alagad magakalipay, apang pakahuy-an kamo. Yari karon! Ang akon mga alagad magaamba sa kalipay sang tagipusuon, apang kamo magahibi sa kasubo sang tagipusuon kag magahaya sa kagamo sang espiritu.”​—⁠Isaias 65:​13, 14.

19. (a) Sing una, sa anong paagi nga ang “matutom kag mainandamon nga ulipon” nagaaman sing mga paathag sa Kasulatan? (b) Ano nga sahi sang programa sa pagtuon ang nagapaposible sa aton nga makabenepisyo sing bug-os gikan sa espirituwal nga pagkaon?

¹⁹ Subong sang ginpakita sining malip-ot nga repaso sa maragtas, paagi sa mga kolumna sang Ang Lalantawan nga ang mga paathag sa importante nga mga kamatuoran sa Kasulatan gin-aman sa aton sang “matutom kag mainandamon nga ulipon” ni Jehova. Ang Lalantawan amo ang panguna nga instrumento nga ginagamit sang “ulipon” nga klase sa pagpanagtag sang espirituwal nga pagkaon. Nagabenepisyo ka bala gikan sini sing bug-os? Ginabasa mo bala ang tagsa ka guwa, kag ang imo bala programa sa pagtuon nagalakip sang pagtan-aw sa mga kasulatan nga ginsitar apang wala ginkutlo? Ginahimo mo man bala nga batasan nga pamalandungan ang ginaton-an mo, nagatukod sing apresasyon sa sini, nagabinagbinag kon paano ini dapat nagaapektar sang imo panimuot, sang imo mga handum, sang imo matag-adlaw nga mga hilikuton, sang imo mga tulumuron sa kabuhi? Ang paghimo sina mangin isa ka daku nga butang sa paghimo nimo sing mga desisyon pasad sa matuod nga paghangop nga si Jehova lamang ang nagahatag.

[Mga footnote]

Ano ang Madumduman Mo?

◻ Ang Dios bala Trinidad, kag ngaa amo sina ang sabat mo?

◻ Diin makatarunganon nga natungod ang ngalan sang Dios?

◻ Dimamalatyon bala ang tawhanon nga kalag?

◻ Anong paghangop ang ginaaman ni Jehova nahanungod sa Cristianong pagginawi sa magamo nga kalibutan?

◻ Ano nga paghangop ang natigayon sang mga Saksi ni Jehova nahanungod sa katumanan sang mga tagna sang Biblia?

[Mga piktyur sa pahina 18]

Paagi sa Ang Lalantawan, ang “matutom kag mainandamon nga ulipon” nagaaman sing paghangop nahanungod sa kahulugan sang kasulatan kag sa aplikasyon sini sa aton adlaw