Report sang mga Manugbantala sang Ginharian

Maayong Balita sang Ginharian Gikan sa Australia

SUBONG sa 211 ka iban nga kadutaan, ang maayong balita sang Ginharian ginabantala sing makugi sang mga Saksi ni Jehova sa Aus­tralia. Ang kapin sa 49,000 ka Saksi didto nagabaton sing daku nga mga pagpakamaayo. Madamo nga tawo sang nanuhaytuhay nga nasyonalidad ang nagsaylo didto sang nagligad nga mga tinuig, nga sa karon 58 ka etniko nga kongregasyon ang nagareport sing naalagdan sa latagon. Ang sanga talatapan sang Watch Tower Society nagaasoy sing makapalig-on nga mga eksperiensia.

“Vietnamese Refugee”

Ang isa ka “Vietnamese ref­u­gee,” nga nagapuyo karon sa Australia, nagdaku sa pagsimba sa katigulangan, Confucianismo, kag Budhismo, upod sa pilosopiya sang Sidlangan kag Nakatundan. Tubtob sang 1975 isa sia ka soldado sa armada sang Bagatnan nga Vietnam. Sang 1979 gin-utod ang iya nawala nga butkon bangod sang tumor sa iya bulutkunan. Nagahandum sa kahilwayan, nalagyo sia gikan sa Vietnam sang 1983, upod sa 24 pa ka tawo, sa isa ka diutay nga sakayan. Sa tapos sang makahaladlok nga engkwentro sa mga pirata, ang ila sakayan gin-anod sa South China Sea sa sulod sang anom ka mainit nga adlaw, tubtob nakalab-ot sila sang ulihi sa Malay­sia. Sa tapos maghinguyang sing lima ka bulan sa kampo sang mga ref­u­gee, gintugutan sia sa pagsulod sa Aus­tralia. Tatlo ka bulan sang ulihi nakita niya ang kamatuoran. Ginsabat sang mga pulong ni Jesus sa Juan 8:​32 ang iya tudok nga pagkalangkag sa kahilwayan: “Makilala mo ang kamatuoran, kag ang kamatuoran magahilway sa imo.” Ginpakitaan sia sang mga kauturan sing daku nga gugma. Sia karon isa ka Saksi ni Jehova kag ginagamit sa pagbulig sa madamo pa sang nagahambal sing Viet­na­mese nga katawhan sa pagtuon sing kamatuoran nga nagahilway sa isa.

Ang Isa ka Tumandok Nagbaton sang Kamatuoran

Sa aminhan-nakatundan sang Aus­tralia ang isa ka pamatan-on nga utod nga lalaki kag ang iya kaupod nagduaw sa isa ka Tumandok nga babayi sa tribo nga ginatawag wool­shed. Sa tapos mabatian kon ngaa nagduaw sila, ginhukas sang babayi ang yabi nga nabalighot sa iya liog kag ginbuksan ang isa ka daku nga asero nga baol. Sa ila daku nga kakibot, nakita nila sa sulod sa tunga sang iya pila ka pagkabutang ang duha ka brosyur sang Watch Tower kag daan nga kopya sang Biblia. Samtang nagapungko sila sa duta, ginsugdan nila ang pagtuon nga ginagamit ang isa sa mga brosyur. Bisan indi makabasa ukon makasulat ang babayi, ginpabilihan gid niya ang mga brosyur nga iya anay nakuha. Nalipay sia nga ginadumalahan karon ang isa ka regular nga pagtuon upod sa iya.

Aksidente nga Pagdayal sa Telepono

Sa siudad sang Sydney, nga may tatlo ka milyon ka pumuluyo, ginahampangan sang tres-anyos nga bata nga babayi ang telepono kag palagpat nga nagdayal sing numero. Natabuan nga yadto nga numero iya sang isa ka Saksi. Nagsabat ang utod nga babayi, kag sang primero pagdumdom niya ang nagatawag amo ang iya apo. Nian nabatian niya ang tingog sang isa ka adulto. Amo yadto ang iloy sang bata nga babayi, nga nagapangayo sing pasaylo sa ginhimo sang iya bata. Nagsunod ang paghambalanay, nga sa sining tion nagpanaksi ang aton utod. Ang babayi nagtuaw: “Madugay ko na ginahulat nga kadtuan ako sang mga Saksi. Luyag ko mangin isa sang mga Saksi ni Jehova!” Nagsiling sia nga sang nagligad lamang nga duha ka bulan, nagduaw sia sa Peru kag nahamuot gid sia sa iya tiya kag pamilya nga karon mga Saksi ni Jehova na. Sia nagsiling: “Ang kabataan sang akon mga paryente mga diutay nga yawa anay, apang karon sila mga diutay nga anghel na!” Ginhimo ang kahimusan para sa pagtuon sa Biblia, kag ang interesado nga babayi nagapadayon sa pag-uswag​—⁠bangod lamang sang aksidente nga pagtawag sa telepono sang iya bata nga babayi.