Report sang mga Manugbantala sang Ginharian
“Natandog ang Akon Tagipusuon sang Tagsa ka Kasulatan nga Ginbasa Niya”
“ANG pulong sang Dios buhi kag gamhanan,” siling ni apostol Pablo. (Hebreo 4:12) Nagmatuod ini sa kabuhi sang isa ka babayi gikan sa Vietnam nga ginpadaku subong isa ka Budhista. Amo ini ang iya sugilanon.
“Ang akon mga ginikanan, nga yadto gihapon sa Vietnam, mga Budhista sa ngalan lamang, gani ginpadaku ako subong isa ka Budhista tubtob sang magpamana ako sa edad nga 22. Ginpilit ako sang pamilya sang akon bana nga magpabunyag sa Iglesia Katolika. Nagsiling sila nga ang akon patay na nga ugangan nga babayi indi makasulod sa langit bangod Budhista ako! Sang primero, nangindi ako, apang sang ulihi nagpabunyag ako agod pahamut-an sila. Apang, sa alibutod sang akon tagipusuon, naham-ot ako sa akon kaugalingon bangod ginadumtan ko ang pagkasalimpapaw sa Iglesia Katolika. Pareho lang ini sa Budhismo. Nagapakigbahin man ini sa inaway kag politika, kag ining duha ka relihion lunsay nagapalig-on sang pagsimba sa katigulangan.
“Kon nagpabilin ako sa Vietnam, diutay gid ang akon kahigayunan nga makatuon ako sing kamatuoran. Nagdaku ako sa tion nga magamo gid ang politika sa Bagatnan nga Vietnam, kag nagpuyo ako sa isa ka banwa nga malayo gid gikan sa Saigon. Gani isa ka pagpakamaayo nga nakapalagyo ako padulong sa Australia.
“Isa ako sang mapalad nga mga tawo nga nagsakay sa sakayan. Ginakugos ang akon duha ka bulan lamang nga bata, nagdalagan ako sa kadulom agod malagyo gikan sa polisiya kag magsakay sa isa ka diutay nga sakayan sa pagpangisda. Pagligad sang pito ka adlaw sa dagat, nag-abot kami sa Malaysia, nga sa diin nagpabilin kami sing pila ka bulan sa isa ka kampo para sa mga refugee antes magkadto sa Australia.
“Pagligad sang duha ka tuig kag tunga sa Australia, nakita ako sang mga Saksi ni Jehova sa ila pagministeryo sa balay kag balay. Sa nahauna nga pagduaw, ginbaton ko ang regular nga pagtuon sa Biblia bangod nakita ko ini subong isa ka maayo nga kahigayunan sa pagtuon sing Ingles. Apang nahamuot gid ako sa paggawi sang Saksi nga nakakita sa akon kag sa kamatuoran nga gintudlo niya sa akon. Natandog ang akon tagipusuon sa tagsa ka kasulatan nga ginbasa niya, kag wala ako sing makita nga pagkasalimpapaw sa organisasyon ni Jehova. Sa tapos magtuon sing Biblia sing isa ka tuig kag tunga, gindedikar ko ang akon kabuhi kay Jehova kag nagpabawtismo.
“Ginabaton ko nga ginbag-o sang kamatuoran ang akon bug-os nga pagtamod sa kabuhi. Ang akon bana indi tumuluo, apang ginbuligan ako ni Jehova kag ginpabaskog, upod sa akon diutay nga pamilya. Sia ang akon Dakung Manunudlo kag gintudluan niya ako nga mangin mas maayo nga asawa kag iloy. Ginapasalamatan ko gihapon si Jehova nga ginbuligan niya ako sa pagguwa gikan sa espirituwal nga kadudulman padulong sa kapawa sang kamatuoran sang Biblia.”
Sa pagkamatuod, ang inspirado nga Pulong sang Dios naghatag sing gahom para sa kaayuhan sa sini nga kaso. Ang pagtuon sang Biblia kag pag-aplikar sang natun-an nagahatag sing kahulugan kag katuyuan sa kabuhi kag nagadul-ong sa dayon nga kabuhi sa bag-ong kalibutan sang Dios. Subong sang gin-inspirar sang Dios kay Moises nga isiling, “indi ini butang nga walay pulos sa inyo, kundi nagakahulugan ini sang inyo kabuhi.”—Deuteronomio 32:47.