Kahulugan sang Balita
Ang mga Katoliko kag ang Bawtismo
Dugang nga mga adulto ang ginabawtismuhan sa Iglesia Katolika Romana sa Pransya, report sang Le Monde, isa ka Pranses nga pamantalaan. Sa katunayan, ang pamantalaan nagasiling nga “ang numero nagpilo sa sulod sang nagligad nga apat ka tuig.” Ang mga klase sa wala pa ang bawtismo gintambungan sang kapin sa 4,000 ka Pranses nga mga adulto nga nagapanikasog nga mangin bawtismado nga mga Katoliko. Dos-tersia mga babayi sa ulot sang pangedaron nga 20 kag 40. Un-kuwarto indi mga taga-Pransya.
Apang, ang paghanda para sa bawtismo sang adulto nagalawig sing duha ukon tatlo ka tuig. Ang pari nga si Guy Cordonnier, ang may salabton sa sinang mga klase sa wala pa ang bawtismo sa Versailles, nagsiling: “Agod mabawtismuhan, indi bastante ang magsiling lamang nga ang isa nagatuo sa Dios. Kinahanglan nga maton-an niya kon paano magkabuhi sa sulod sang isa ka komunidad.”
Sa pagkamatuod, ang pagbawtismo sa adulto indi butang nga bag-o. Si Jesus mismo ginbawtismuhan sa edad nga 30 anyos. Indi man bag-o nga labi pa sa pagtuo lamang sa Dios ang kinahanglan para sa bawtismo. Ang sugo ni Jesus sa iya mga disipulo amo nga “maghimo kamo sing mga disipulo . . . , nagabawtismo sa ila” kag “nagatudlo sa ila” sa pagtuman sang iya mga sugo.—Mateo 28:19, 20.
Apang, bangod ang Iglesia Katolika nagahimo sing bawtismo sa lapsag sa sulod sang mga siglo, ang tindog sang iglesia nahanungod sa pagbawtismo sa mga adulto makahalam-ot. Ang mga awtoridad sang iglesia nagasiling nga nagakinahanglan sing duha ukon tatlo ka tuig ang paghanda sa isa ka adulto para mabawtismuhan, apang nagasiling sila nga ang bawtismo sa lapsag nagakaigo. Nagasiling sila nga ang bawtismo nagatinlo sa mga lapsag sa napanubli nga sala, apang si apostol Pablo nagsulat: “Ang dugo ni Jesus . . . nagatinlo sa aton gikan sa tanan nga kasal-anan.” (1 Juan 1:7) Bangod ang mga lapsag wala sing ikasarang sa pagtuo sa Dios kag sa ginpatulo nga dugo ni Cristo, ngaa bawtismuhan sila?
Mga Pulong nga Wala Pa Mabatii
Halos katunga sang 3,800 ka asawa nga ginsurbey sang kompanya sang seguro sa Japan ang “wala makabati sang mga tinaga nga ‘Ginahigugma ko ikaw’ gikan sa ila mga bana sa sulod sang mga pila ka tuig,” report sang The Daily Yomiuri. Ang promedyo sang mga asawa nga wala makabati sining mga tinaga nagadugang sa edad, kag sa mga edad nga 50, ang 82 porsiento nagsiling nga wala gid nila mabatii ining mga tinaga gikan sa ila mga bana. Bisan sa tunga sang mga asawa nga sa edad nga 20, 10 porsiento lamang ang nakabati sa ila mga bana nga nagabungat sining mga tinaga kada adlaw.
Sa sugilanon sa gugma sang maalam nga si Hari Solomon may kahilabtanan sa manugbantay nga lalaki kag sa matahom nga taga-uma nga babayi gikan sa dumaan nga siudad sang Sunem, paagi sa “mga ekspresyon sang pagpalangga” nga nadaug sang lalaki ang tagipusuon sang babayi. (Ambahanon ni Solomon 1:2) Kon madaug na sang mga bana ang tagipusuon sang ila mga asawa, kinahanglan bala gihapon nga ipabutyag ang ila pagpalangga? Huo! Ang Biblia nagalaygay: “Mga bana, padayon nga higugmaa ang inyo mga asawa, subong nga si Cristo man naghigugma sang kongregasyon kag nagtugyan sang iya kaugalingon tungod sa iya.”—Efeso 5:25.
Sang gab-i nga ginluiban sia, liwat kag liwat nga ginpabutyag ni Jesus ang iya gugma sa iya mga apostoles. (Juan 13:34; 14:19-21; 15:9, 10, 12) Dapat binagbinagon sang bana ang pagkinahanglan sang iya asawa nga pasaligon niya sang iya gugma. Dapat man dumdumon sang mga bana nga ‘gintugyan [ni Cristo] ang iya kaugalingon tungod sa kongregasyon.’ Busa, ginpabutyag niya ang gugma paagi sa mga pulong kag paagi sa mga buhat. Sing maathag, mas maayo nga ilugon sang mga bana ang halimbawa ni Cristo.