Report sang mga Manugbantala sang Ginharian

Nakasapo Sila sing Rason sa Pagbag-o

MAHIMO bala magbag-o ang mga katapo sang gang kag ang masingki nga mga tawo? Ano ang makabulig sa ila sa paghimo sini? Ang hinali nga mga pagbag-o sa paggawi posible subong makita sa bahin ni Saulo sang Tarso, nga sang una nagahingabot sa mga Cristiano apang nangin Cristiano sia mismo. Sa tapos sadto nakilal-an sia subong si apostol Pablo. (Galacia 1:​13, 14; 1 Timoteo 1:13) Ang kaanggid nga hinali nga mga pagbag-o ginareport gikan sa Kenya.

◻ Ang isa ka pamatan-on nga lalaki isa ka katapo sang gang sa Nairobi kag ginpadala sia sa nakatundan nga Kenya agod mangita sing mga posibilidad nga kawatan ang mga bangko didto. Nagdayon sia sa isa ka tigulang nga tawo kag nakita niya ang isa ka hantal sang daan nga Magmata! nga mga magasin sa iya balay. Nawili gid ang pamatan-on sa pagbasa sining mga magasin nga nalipatan niya sing bug-os ang iya plano sa pagpangawat sa mga bangko. Sang mabasa niya ang tanan, nangayo pa sia sing dugang, kag ginsugiran sia sang tigulang nga may nagaabot sa iya kada ikaduha ka semana paagi sa koreo. Kutob sadto ginapangabay sang pamatan-on ang iya tagbalay nga magkadto sa post office agod tan-awon kon may magasin na. Samtang, nagdesisyon sia nga biyaan ang iya malain nga dalanon, agod sundon ang iya natun-an gikan sa mga magasin, kag mangin isa ka Saksi ni Jehova. Nanugidsugid pa gani sia sa iya mga kaingod nga sia isa na sang mga Saksi ni Jehova. Sang ulihi, sang mamalaybalay ang isa ka espesyal nga payunir didto sa ila duog, nakibot sia nga ining pamatan-on nagapangangkon nga isa ka Saksi. Ginsugdan ang pagtuon sa Biblia upod sa iya, naghamtong sia, kag karon regular nga payunir na sia. Ang sibu nga ihibalo sa Biblia naghatag sa iya sing rason nga bag-uhon ang iya kabuhi.

◻ Ang isa ka tawo sa Argentina nakasapo man sing rason sa pagbalhin sang iya masingki nga pagkabuhi. Sa sulod sang 20 ka tuig, ginasakit niya ang iya asawa, nga isa ka Saksi. Ginsiling pa gani nga nagkutkot sia sing buho sa iya ugsaran nga may krus sa ibabaw, agod patyon ang tawo nga nagapangawat sang iya mga manok kag ilubong sia didto. Bangod sining kinaiya sang tawo, ginalikawan sia sang tanan nga kaingod.

Ginduaw sia sang manugtatap sa sirkito. Samtang didto, gintanyagan sang manugtatap sa sirkito ining tawo sing pagtuon sa Biblia kag nakibot sang magsiling sia nga nalipay sia sa pagtuon sang Biblia. Gintun-an sang utod ang brosyur nga Aguma ang Kabuhi sa Duta sing Dayon! upod sa iya. Nag-uswag ang tawo sa ihibalo sa Biblia kag sa espirituwal nga paghangop. Nagatambong na sia karon sa tanan nga miting. Naluyagan gid niya ang mga miting kag pagpakig-upod sa kauturan nga nagsiling sia, “Diri ko luyag magpuyo.”

Talalupangdon gid ang pagbag-o sining tawo sa bagay nga ang mga kaingod namangkot sa iya asawa kon sin-o nga doktor ang nagabulong sa iya. Sang ginpaathag niya nga ang nagpabag-o sa iya amo ang iya pagtuon sing Biblia upod sa mga Saksi ni Jehova, ang isa ka kaingod nahamuot gid nga nagpangabay sia sing Biblia. Ang isa pa ka kaingod nagsuskriber sa isa sang aton mga magasin.

Ang sibu nga ihibalo sa Biblia naghatag sa sining mga tawo sing rason sa pagbag-o sang ila pagkabuhi. Makabulig ini kay bisan sin-o nga nagahandum sing kapin ka makahulugan nga kabuhi karon kag nagalaum sa dayon nga kabuhi sa ginsaad nga bag-ong kalibutan sang Dios.​—⁠Juan 17:⁠3.