Gintaklad Ko ang Pinakamatahom nga Bukid sa Tanan
NATAWO ako kag ginpadaku sa diutay nga banwa sa kabukiran sang Nasidlangan nga Europa. Mga Romano Katoliko ang akon mga ginikanan, apang wala nila ako ginapasimba, kag sa balay wala kami nagapangamuyo sing dungan ukon nagahambalanay tuhoy sa relihion. Gani, kaangay sang madamo nga pamatan-on, ginhinguyang ko ang akon tion kag kusog sa hampang, sa pagtuon, kag sa paglakbay.
Sa amon banwa, may yara isa ka aktibo gid nga grupo sang mga manugtaklad sa bukid nga ginapangunahan sang isa ka maluluy-on, eksperiensiado nga tawo nga madamo sing nahibaluan tuhoy sa mga bukid. Bangod sa iya, nangin hanas gid ako sa pagtaklad sa bukid. Disiotso anyos ako sadto, kag madali ako nga nawili sa matahom nga mga danyag gikan sa mataas nga mga duog, sa pagkamakakulunyag sang pag-atubang kag paglampuwas sa makatalagam nga mga kahimtangan, kag sa pagpakig-abyan sa iban pa nga kaupod sa sina nga mga katalagman.
Madumduman ko ang isa ka okasyon sa tapos ako makig-upod sa grupo sing lima ka tuig. Nagataklad ako sa isa ka bukid nga mahapos lamang ang alagyan, kag ginrelaks ko ang akon konsentrasyon sang nagapadulong na ako sa putukputukan. Samtang nagahilapit ako sa ibabaw sang daku nga bato, naglunga ini. Ang lamang nga ginhimo ko amo ang maglumpat sa higad kag nagsinggit sing paandam sa akon kaupod nga mga manugtaklad. Nautod sang nahulog nga bato ang kalat nga nagaangot sa amon tanan, kag nahulog ako. Maayo na lang nga nasagang ako sang isa ka mahilamunon nga bungyod nga mga 4 metros sa ubos. Apang, indi maayo pirme ang resulta sa sini nga hampang!
Sa edad nga 24 anyos, naggradwar ako sa unibersidad kag ako ang nanguna sa isa ka diutay nga grupo sang mga manugtaklad sa bukid sa akon banwa. Pagligad sang pila ka tion, nakatipon kami sing kuwarta sa pagbakal sing minibus agod makakadto kami sa mas malayo nga mga bukid nga dala ang amon mga kasangkapan. Apang may guba ang salakyan, kag naghinguyang ako sing tatlo ka bulan, adlaw kag gab-i, sa pagkay-o sini. Sang handa na ini, nangita kami tanan sing makatalagam nga mga trabaho nga daku sing suweldo, subong sang mataas nga mga tinukod, kag sa sining paagi nakatipon kami sang ulihi sing bastante nga kuwarta sa pagkadto sa Iran. Didto, sang 1974, gintaklad namon ang 5,800 metros nga bulkan nga ginatawag Damavand. Samtang ang pagtaklad nagsugod nga mahapos gawa, sa ibabaw nayon gin-agwanta namon ang madamol nga yelo, pagpungapunga bangod sang kataason, kag makahalalit nga gas gikan sa bulkan.
Sa amon pagpauli nga sakay sa minibus, nagplano kami nga manaug sa Bukid Ararat apang wala kami magdayon bangod sang politikal nga kagamo. Sang 1975 nag-ski kami sa Austrian Alps, kag sa amo man nga tion, nagtukod kami sing pungsudnon nga paindisanay sa litrato nga ginhingadlan namon “Men and Mountains.” Ining paindisanay ginahimo gihapon kada tuig. Kami tanan nagbatyag sing kaayawan sa amon kabuhi.
Pagbulag
Apang, sang mga 30 anyos na ako, daw tinak-an na ako sa pagtaklad sa bukid kag nagpalibog: ‘Amo lang bala sini ang kabuhi?’ Ginsingganan ako sang iban nga mangasawa, apang may mga abyan ako nga minyo, kag daw indi man sila malipayon. Bisan ang mga mag-asawa nga nagnobyahanay lamang samtang nagaatubang sa katalagman kag kakunyag sang pagtaklad sa bukid daw nadulaan sing kalipay bangod sang mabudlay nga pagkabuhi sa adlaw-adlaw. Wala ako makahibalo kon ngaa indi malipayon ang ila pag-asawahay, apang bisan pa luyag ko magpangasawa, indi ko luyag nga mangin indi malipayon kaangay nila.
Dugang pa, natalupangdan ko nga may pagbag-o sa mga pamatan-on nga nagataklad sa bukid. Sang una, may yara pirme espiritu sang disiplina, pagbuligay, kag pag-abyanay sa mga kampo sang mga manugtaklad sa Alpine. Sa karon, ang pamatan-on kag wala sing eksperiensia nga mga lalaki indi disiplinado kag indi kontento sa amat-amat nga pag-uswag. Luyag nila magpakitakita kag nagataklad sa mga talaklaron nga mabudlay gid kag makatalagam para sa ila. Bangod nagbaskog pa ang akon desisyon nga mag-untat, malawig kami nga naghambalanay sang akon abyan nga si Bonjo. Sang ulihi ginpanugda niya nga makighambal anay ako sa amon kaupod nga manugtaklad nga si Henry.
Ginpahulam ako ni Henry sing libro nga Ang Kamatuoran nga Nagadul-ong sa Kabuhi nga Dayon, kag sang mabasa ko ini, nakibot ako nga ginapaathag sini ang mga pamangkot nga ginapaligban ko. Si Henry gali nagatuon sing Biblia upod sa mga Saksi ni Jehova, gani namangkot ako kon mahimo ako makabuylog. Nagsugot sia, kag sa duha ka tuig gintun-an ko ang Biblia sing maid-id kag ang bisan anong literatura tuhoy sa Biblia nga mauyatan ko.
Pagtuon sa Biblia
Samtang nagadalom ang akon ihibalo, nagdugang ang akon kalipay. Hapaw lang ang nahibal-an ko sa Romano Katoliko nga relihion, apang nakibot ako sa paghibalo nga ang Cristianismo sang Biblia wala nagasandig sa mga seremonya, mga tradisyon, kag indi rasonable nga mga emosyon. Sa baylo, nagadalahig ini sing mataas nga mga prinsipio sa moral nga nagaapektar sa tagsa ka bahin sang kabuhi sang Cristiano. Dugang pa, nakibot ako sa paghibalo nga ang Biblia tuman ka lohiko kag wala nagasumpakil sa sientipiko nga mga teoriya nga may malig-on nga pamatuod.
Ang Saksi nga nagadumala sa paghambalanay wala magpilit sa amon ni Henry nga bag-uhon namon ang amon opinyon kag dalanon sang pagkabuhi. Ginpaathag lamang niya sing maathag ang ginasiling sang Biblia. Busa, nagpadayon ako sa pagtaklad sa bukid sa sulod sang nahauna nga duha ka tuig sang pagtuon. Apang samtang nagadalom ang akon nahibal-an, narealisar ko nga ang pagtaklad ko sa bukid daw isa ka pagkagiyan. Ang aksidente may kaangtanan sa nahulog nga bato nagpahanumdom man sa akon sang ginsiling ni Jesus kay Satanas sang ginhangkat sia ni Satanas nga maglumpat sa alibungan sang templo: “Dili mo pagsulayon si Jehova nga imo Dios.” (Mateo 4:5-7) Narealisar ko nga ining hilikuton nagpakita sing indi pagtahod sa kabuhi nga ginhatag sa akon ni Jehova.
Busa gintugyan ko ang salabton para sa amon grupo sang mga manugtaklad sa isa pa ka eksperiensiado nga manugtaklad kag nasapwan ko nga indi mabudlay ang magtabok halin sa pagtaklad sa bukid padulong sa Cristianismo. Sa tapos ko mapanghatag kag mabaligya ang tanan ko nga kasangkapan—mga ski, mga salsalon para sa pagtaklad, mga carabiner, mga martilyo, mga lansang, kag wasay sa yelo—makasiling ako sing bunayag, sa pag-ilog sang ginsiling ni apostol Pablo, nga para sa akon “mga sagbot” lamang sila. (Filipos 3:8) Nangin kontento gid ako kay nakabuylog na ako sa dungganon nga hilikuton sa pagdayaw sa ngalan sang Dios sa publiko. Sang 1977 ginsimbolohan ni Henry kag nakon ang amon dedikasyon kay Jehova paagi sa bawtismo sa tubig.
Pagpanaksi sa Iban
Sadtong tion, mga 15 ang katapo sang grupo nga manugtaklad sa bukid sa amon banwa, kag sing amat-amat si Henry kag ako nagpanaksi sa ila tanan. Daw ano ka makalilipay sang ang akon utod nga lalaki, nga isa man ka katapo, upod sa iya asawa, nagtuon sang Biblia kag ginbawtismuhan sang 1981. Pila ka tion sang ulihi, si Bonjo nagbuylog sa amon, kag ang isa pa, ang ikalima sa grupo sang mga manugtaklad sa bukid. Indi na kami kinahanglan magtaklad sa bukid. Ang amon daku gid nga kalipay amo ang pagduaw sa katawhan sa nalupyakan nga nagaapresyar sa kamatuoran sang Biblia. Ining pagbalhin ginbaton man sang akon iloy nga may daku nga paumpaw, kay pirme lang sia ginanerbios kon magtaklad ako kag ang akon utod. Sang ulihi, sia man nagbuylog sa amon sa matinlo nga pagsimba kay Jehova.
Karon ang akon handum sa pagpangasawa indi na tanto ka hilingagawon. Bangod sa Pulong sang Dios, natun-an ko ang mga prinsipio nga makabulig sa akon sa madinalag-on nga pag-asawahay, apang malipayon ako karon subong soltero kag nagaalagad kay Jehova nga wala sing sablag. Si Solomon nagsiling: “Ang mainandamon nga asawa gikan kay Jehova.” (Hulubaton 18:22; 19:14) Busa, mapailubon ako nga naghulat kay Jehova sa paghatag sa akon sing regalo, samtang nagakabuhi sa paagi nga mangin takus ako nga bana kon mag-abot ini. Sang 1982 ginhatagan ako ni Jehova sing mabuot nga asawa subong dalayawon nga pagpakamaayo.
Ang akon asawa kag ako nagapuyo gihapon sa kabukiran, kag naluyagan ko gihapon ini. Apang ang amon una nga ginakabalak-an karon amo ang pagbulig sa mga tawo sa pagtaklad sa isa pa ka bukid. Ano ina nga bukid? Amo ang ginsambit sa tagna ni Isaias: “Mahanabo sa ulihi nga mga adlaw nga ang bukid sang balay ni Jehova tukuron sing malig-on sa putukputukan sang kabukiran, kag pakataason sa ibabaw sang kabakuluran; kag magadugok sa iya ang tanan nga pungsod. Kag madamo nga katawhan ang magakadto kag magasiling: ‘Kari kamo, magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’ Kay gikan sa Sion magaguwa ang kasuguan.” (Isaias 2:2, 3) Daw ano ka makalilipay nga nakataklad ako sa sini, ang pinakamatahom nga bukid sa tanan!—Gin-amot.