Pagpanaksi sa Kumbuyahan Estilo Hapones

ANG sugo ni Jesucristo nga ang pagpanaksi nga hilikuton palapnagon tubtob sa “ukbong sang duta” dapat maglakip sa mga kumbuyahan. (Binuhatan 1:8) Sa Hapon, ang pagpanaksi tuhoy sa Ginharian sa mga tawo nga nagaobra sa publiko nga mga ahensya kag mga opisina sang dalagku nga kompanya isa ka daku nga hangkat. Ang mga manugbantala sang Ginharian sa isa ka kongregasyon nakatigayon sing permiso nga magpanaksi paagi sa magasin sa isa ka tinukod sang mga opisina sang siudad sa tion sang panyaga nga wala sing trabaho. Wala lamang nangamuyo ang mga manugbantala kay Jehova nga hatagan sila sing kaisog kundi ginhatagan gid nila sing daku nga igtalupangod ang ila mga pamayo kag paggawi kag naghanda pa sila sing mga lapel card nga nagapakita sang ila ngalan kag nagapakilala sa ila subong mga Saksi ni Jehova.

Ginapalapitan sang Saksi ang mamumugon, nga nagasiling: “Pasayluha ako, ginhatagan ako sing permiso nga makighambal sa mga tawo diri. Puwedi ka bala mamati sa akon samtang nagakaon ka?” Dapat magpakita ang mga Saksi sing maayo nga paghukom kag maggamit sing mga tinaga nga “naunawan sing asin.” (Colosas 4:6) Sa ila una nga pagduaw, nakapahamtang sila sing 39 ka magasin, apang makap-at sila magbalik sa pagkobre sang bug-os nga walo sing panalgan nga tinukod nga sa diin 1,500 ka tawo ang nagaobra. Nakapahamtang sila sing kabilugan nga kapin sa isa ka gatos ka magasin kag nakaumpisa sila sing mga ruta sang magasin kag nakahimo sing mga pagbalik duaw.

Ang isa sang mga manugbantala nagduaw liwat sa isa ka manedyer. Sang mabatian niya ang isa ka kasulatan nga ginbasa gikan sa New World Translation, sia nagsiling: “Mahapos hangpon ini nga Biblia. Ang nabasa ko anay dinumaan nga Hapones kag mabudlay gid basahon.” Gindul-ungan sia sing isa ka kopya sang New World Translation sang masunod nga semana.

Makahimo ka bala sing kapin sa teritoryo sang inyo kongregasyon sa pagbantala sing maayong balita sa “tanan nga sahi sang tawo,” lakip ang mga sa kumbuyahan?​—⁠Ipaanggid ang 1 Timoteo 2:⁠4.