Handurawa ang Kalibutan nga Wala sing Kakagod

MAHANDURAW mo bala ang kalibutan diin ang mga tawo nagabinuligay sa baylo nga nagapaindisanay? Diin ang mga tawo nagatratar sa iban subong sang luyag nila nga sila tratahon? Amo ini ang mga karakteristiko sang isa ka kalibutan nga wala sing kakagod. Matahom gid ina nga kalibutan! Magaabot gid bala ini? Huo. Apang paano ang kakagod​—⁠nga natanom gid sa katawhan​—⁠madula?

Agod matigayon ang sabat, dapat naton anay hangpon ang ginhalinan sang kakagod. Ginapakita sang Biblia nga indi ini pirme karakteristiko sang tawhanon nga rasa. Ginapahanumdom sa aton ni manalagna Moises nga ang depekto subong sang kakagod indi anay makita sa unang tawo, ang himpit nga tinuga sang wala sing kakagod nga Manunuga: “Ang Igang, ang iya binuhatan himpit, kay ang tanan niyang dalanon katarungan.” Gani, nian, diin naghalin ang kakagod? Ang unang tawhanon nga mag-asawa gintugutan sa pagpalambo sini sa ila kaugalingon​—⁠si Eva sa makagod nga pagpaabot sa kon ano ang matigayon niya gikan sa pagkaon sa bungang-kahoy nga gindumili sang Dios, si Adan sa makagod nga pagkaindi luyag nga madula ang iya matahom nga asawa. Si Moises nagdugang, sa mga pulong nga matuod man kanday Adan kag Eva: “Nahimuan nila sia sing malaut; sila indi niya mga anak, kasawayan nila ini.”​—⁠Deuteronomio 32:​4, 5; 1 Timoteo 2:⁠14.

Sang panahon sang tugob-globo nga Anaw sang adlaw ni Noe, ang kakagod kag kaibog naglambo tubtob sa kahimtangan nga “ang pagkamalaut sang tawo daku sa duta kag nga ang tagsa ka painoino sang mga hunahuna sang iya tagipusuon malaut sing dalayon.”​—⁠Genesis 6:⁠5.

Ining dominante nga panimuot sang kakagod sa tawo nagpadayon tubtob karon, nga daw naglab-ot sang iya putukputukan sa pagkadimapasalamaton kag makagod nga katilingban karon.

Pagdula sa Kakagod

Subong nga ang kakagod sa tunga sang mga tawo nagdugang, ang kabaliskaran posible man. Ang kakagod sarang malandas. Apang, agod mahanabo ini, ang nagakaigo nga edukasyon kag paghanas kinahanglan, upod ang pagsunod sa estrikto nga mga pagsulundan ukon mga kasugoan sang paggawi. Makatarunganon ini, apang sin-o ang makahatag sina nga sahi sang edukasyon kag makapasalig nga ang naton-an ginaaplikar​—⁠ginapatuman kon kinahanglan?

Ina nga edukasyon dapat maghalin sa tuburan nga hilway sa kakagod mismo. Dapat wala sing natago nga motibo ukon pagpaabot sing pila ka butang subong balos para sa sina nga paghanas. Dugang pa, ang kabilihanan kag pagkapraktikal sang pagkadimakagod dapat itudlo kag ipakita. Ang isa nga nagatuon dapat mangin kombinsido nga ina nga dalanon sang kabuhi indi lamang posible kundi nga amo ina ang maayo nga paagi, upod ang mga benepisyo sa iya kaugalingon kag sa mga nagapalibot sa iya.

Ang Dios lamang sa langit ang makahatag sini nga sahi sang edukasyon, kay ano bala nga tawo ukon organisasyon sa duta ang may mga kalipikasyon kag ginhalinan? Ang tanan nga tawo indi kalipikado sa sadsaran sining kamatuoran sa Biblia: “Ang tanan nagpakasala kag nawad-an sang himaya sang Dios.”​—⁠Roma 3:⁠23.

Sing malipayon, si Jehova, ang Dios sang langit, nagaaman sina nga edukasyon sa iya nasulat nga tolon-an, ukon manwal, ang Balaan nga Biblia. Ang iya Anak, si Jesucristo, nagsakdag sini nga sahi sang panudlo sang sia isa anay ka tawo sa duta. Sa tungatunga sang bantog nga Sermon sa Bukid ni Jesus, nagpamulong sia tuhoy sa pagkabuhi nga daw dikinaandan sa kalabanan nga nagapamati, kay nagalakip ini sang pagkadimakagod bisan sa mga kaaway ukon mga nagapamatok sa isa. Si Jesus nagsiling: “Padayon nga higugmaa ang inyo mga kaaway kag pangamuyo kamo tungod sa mga nagahingabot sa inyo; agod nga mangin anak kamo sang inyo Amay nga yara sa langit, kay nagapasubang sia sang iya adlaw sa mga malauton kag sa mga maayo kag nagapaulan sa mga matarong kag sa mga dimatarong. Kay kon kamo maghigugma sa mga nagahigugma sa inyo, ano bala ang inyo balus? Wala bala nagahimo man sing subong ang mga manugsukot sang buhis?”​—⁠Mateo 5:​44-46.

Bahin sang misyon ni Jesus sa duta amo ang paghanas sa dimakagod nga mga instruktor agod nga sila man makatudlo sa iban sa sining wala sing kakagod nga dalanon sang kabuhi. Dili madugay sa tapos napatay kag nabanhaw si Jesus, si apostol Pablo nangin isa sina nga mga instruktor. Sa madamo sang iya inspirado nga mga sulat, ginpalig-on ni Pablo ang pagdula sa kakagod. Halimbawa, nagsulat sia sa mga taga-Efeso: “Ang pagkamakihilawason kag ang tanan nga kahigkoan ukon paghamkon dili gid paghingadlan sa inyo, subong nga nagakaigo sa mga balaan.”​—⁠Efeso 5:⁠3.

Sing kaanggid karon, ang mga Saksi ni Jehova nagatudlo sa mga lalaki kag mga babayi sa pagtapna sa mahamkunon nga mga huyog. Sa ulihi sila man mangin kalipikado sa paglakat kag sa pagtudlo sa iban sinang diosnon nga mga paagi.

Mga Kamatuoran sa Biblia Nagapanghikot

Apang mahimo ka mamangkot: ‘Ang dihimpit nga mga tawo, nga natanum ang kakagod, makagabot gid bala sini gikan sa ila mga personalidad?’ Huo. Indi sing himpit, sa pagkamatuod, apang tubtob sa punto nga talalupangdon. Binagbinagon naton ang halimbawa nahanungod sini.

Ang isa ka kompirmado nga makawat nagapuyo sa Espanya. Ang iya puluy-an puno sang kinawat nga mga butang. Nian nagtuon sia sing Biblia upod sa mga Saksi ni Jehova. Subong resulta, ang iya konsiensia nagsugod sa pagtublag sa iya, gani namat-od sia nga iuli sa mga tag-iya ang mga butang nga ginkawat niya. Ginkadtuan niya ang iya anay amo kag nagtu-ad nga ginkawatan niya sia anay sing isa ka bag-ong makina sa pagpanglaba. Ang amo, nga nahamuot gid sa iya nagbalhin nga panimuot, namat-od nga indi magsugid sa polis kag ginpabayaran na lang sa makawat anay ang makina sa pagpanglaba.

Masunod, ang nagbag-o nga makawat determinado sa pagduaw sa tanan nga nadumduman niya nga ginkawatan niya kag gin-uli ang kinawat nga mga butang. Ang tanan nga ginduaw niya nagpabutyag sing kakibot nga bangod sang pag-aplikar niya sa mga prinsipio sang Biblia, nahimo niya ining daku nga pagbalhin sang panimuot.

Karon may daku sia nga problema. Indi niya kilala ang mga tag-iya sang madamong butang nga yara pa sa iya. Gani, sa tapos makapangamuyo kay Jehova, nagkadto sia sa istasyon sang polis kag ginhatag ang anum ka isteryo nga radyo nga ginkawat niya gikan sa mga awto. Nakibot ang mga polis, kay matinlo ang iya rekord sa ila. Namat-od sila nga bayaran na lang niya ang pina kag magpabilanggo sa malip-ot nga tion.

Ining makawat anay may matinlo na nga konsiensia karon, kay ginbayaan niya ang iya pagkabuhi sa krimen kag kakagod agod mangin bahin sang bug-os kalibutan nga kongregasyon sang mga Saksi ni Jehova.

Linibo ka kaanggid nga mga halimbawa ang madali mahatag. Bisan pa nga ang mga naghimo sing pagbalhin sa ila kabuhi diutay lang nga bahin sang pumuluyo sang duta, ang katunayan nga madamo ang naghimo sina nagapakita sang gahom para sa kaayuhan nga nagahalin sa paghibalo kag pag-aplikar sang mga prinsipio sang Biblia.

Samtang nagaligad ang tagsa ka tuig, madamo pa nga tawo ang nagabaton sini nga dalanon sang kabuhi. Ang instruksion sa Biblia ginahatag sa kapin sa 60,000 ka kongregasyon sang mga Saksi ni Jehova sa bug-os nga duta. Ang mga Saksi sa sining tion wala nagapaabot nga bag-uhon ang kalibutan subong kabilugan, nga nagadula sang kakagod gikan sa tunga sang linibo ka milyon nga nagakabuhi karon. Walay sapayan, ginapakita sang tagna sang Biblia nga sa dili madugay karon, ang wala sing kakagod nga dalanon sang kabuhi magapangibabaw sa bug-os nga duta!

Ang Wala sing Kakagod nga Bag-ong Kalibutan

Wala sing lugar para sa kakagod kag kahamkon sa nagapakari nga bag-ong kalibutan. Si apostol Pedro nagapasalig sa aton nga ang pagkamatarong mangin tanda indi lamang sang “bag-ong langit” kundi sang “bag-ong duta” man. (2 Pedro 3:13) Ang kakagod mangin isa sa “nahaunang mga butang” nga nagtaliwan, kaupod sang balatian, kasubo, kag bisan sang kamatayon.​—⁠Bugna 21:⁠4.

Busa, kon ginasubuan ka bangod sang nagadugang nga kakagod kag sang mahamkunon nga pagkabuhi nga nakita sa palibot naton tanan karon, maghunahuna! Sugdi karon ang magkabuhi para sa nagapakari nga bag-ong kalibutan nga mangin isa ka katunayan sa dili madugay. Upod sa bulig sang Dios, manikasog sa pagdula sang kakagod sa imo kaugalingon nga kabuhi. Magbuylog sa pagbulig sa iban nga makita ang mga benepisyo nga matigayon karon mismo paagi sa Cristianong pagkabuhi. Ibutang ang imo pagtuo kag pagsalig sa saad ni Jehova nga Dios nga ang kakagod sa dili madugay mangin isa sang madamong dimaayong mga butang nga ‘indi na pagdumdumon, ukon mag-abot sa aton tagipusuon.’​—⁠Isaias 65:⁠17.

[Piktyur sa pahina 5]

Si Jesus nagpamulong tuhoy sa dalanon sang kabuhi nga nagapauswag sang indi paghamkon, indi pagkakagod

[Piktyur sa pahina 7]

Sa dili madugay​—⁠ang kalibutan nga wala sing kakagod