Report sang mga Manugbantala sang Ginharian

◻ SI APOSTOL Juan nagsiling: “Maghigugma kita, indi sa pulong ukon sa hambal, kundi sa buhat kag sa kamatuoran.” (1 Juan 3:18) Nagsiling si Jesus nga ‘higugmaon naton ang aton isigkatawo subong sang aton kaugalingon.’ (Mateo 22:39) Ang pagpakita sing gugma paagi sa buhat nagarekomendar sang kamatuoran, subong ginapakita sang masunod nga eksperiensia gikan sa Britanya.

Sang ginduaw ni Pauline ang iya iloy, nga may mul­ti­ple scle­rosis, wala sing iban nga tawo didto. Apang sini nga okasyon, pagsulod niya sa balay, nabatian niya nga nagaandar ang makina para sa paglaba kag may tawo sa ibabaw nga nagagamit sing vac­uum clean­er. “Ano ang nagakatabo, sin-o ang yari diri?” pamangkot niya sa iya iloy. Ginpaathag sang iya iloy nga ang mga Saksi ni Jehova nagduaw sa iya balay, nakita ang iya kahimtangan, kag nagkari agod magbulig. Sa tapos nila mahimo ang hilikuton sa balay kag nakaluto na sing pagkaon, nagpungko sila kag nagsiling: “Handa ka na bala?” “Handa para sa ano?” pamangkot ni Pauline. Ginpaathag sang iya iloy nga nagsugot sia sa pagtuon sing Biblia. Daw indi luyag ni Pauline magtener, apang bangod malayo ang iya ginhalinan, namangkot sia kon puwedi sia makabuylog sa pagtuon. Naluyagan gid niya ini sa bagay nga naghimo sia sing kahimusan nga magkari sa amo man nga adlaw kada semana agod nga makatambong sia sing regular. Sang ulihi, may abyan nga nag-upod sa iya, kag sila karon lunsay bawtismado na. Subong resulta sining orihinal nga pagtuon, napulo ka katapo sang isa ka pamilya ang mga Saksi ni Jehova na karon! Huo, isa ka bulig “paagi sa buhat”!

Ang Pastor sa New Guinea Nagbaton sang Kamatuoran

◻ Sang adlaw ni Jesus may pila ka saserdote nga nagbaton sang panudlo ni Jesus. Amo man karon ang bunayag sing tagipusuon nga mga klerigo, subong ginapakita sang isa ka eksperiensia gikan sa bukidnon nga New Guinea, nga ginreport sang isa ka manugtatap sang sirkito. Sia nag-asoy: “Ang isa ka edukado nga hoben pa nga tawo, isa ka Pentecostal nga pastor, nagapatindog sing diutay nga simbahan malapit sa Kingdom Hall. Ginapanaksihan sia sang isa ka utod gikan sa sadto nga kongregasyon, kag daw mainabyanon sia. Wala madugay pagkatapos sini, ginduaw ko ang kongregasyon kag nagdayon ako sa utod nga malapit lamang sa balay sang pastor. Sang una nga gab-i pag-abot ko, ining hoben pa nga lalaki nagkadto sa amon nga dala ang iya Biblia, upod ang isa ka daku nga grupo gikan sa iya kongregasyon. Luyag sang tanan pamatian ang mensahe sang Ginharian. Namangkot sia sing madamo nga pamangkot, kag ang paghambalanay nagpadayon tubtob sa kagab-ihon. Sa kada gab-i sang akon pagduaw, sia kag ang iban pa nga mga interesado nagakadto sa amon agod masabat ang dugang pa nila nga mga pamangkot. Gin-agda ko sia sa sirkito nga asambleya sang masunod nga semana, kag nagtambong sia upod sa utod nga una nga nagpanaksi sa iya. Ginpadayon sining lalaki ang iya pagtuon sa Biblia, naghalin sa Pentecostal nga Iglesia, kag karon isa na ka regular nga manugbantala sing maayong balita.”

Sa pagkamatuod, kabubut-on sang Dios “nga ang tanan nga sahi sang tawo maluwas kag makadangat sa sibu nga ihibalo sang kamatuoran.”​—⁠1 Timoteo 2:⁠4.