Nakita Ko ang Mabakod nga Pagtuo sang Katawhan ni Jehova

Nakakadlaw ako kay wala ko gid nahunahuna nga relihioso gali sia. Ginpamangkot ko sia, “Ano ang nabal-an mo parte sa Biblia haw?” Wala sia nakasabat dayon. Pero ginsugid man niya nga Saksi ni Jehova ang iya iloy kag sa iya niya natun-an ang iya nabal-an sa Biblia. Daw gusto ko pa mabal-an ang parte sa Biblia, gani madamo ako sing ginpamangkot sa iya.

Gab-i na katama kami nakatapos istorya. Nagsiling sia nga suno sa Biblia si Satanas amo ang manuggahom sang kalibutan. (Juan 14:30) Posible nga madugay mo na ini nga nabal-an, pero para sa akon, bag-o ini kag nagpainteres gid sa akon. Pirme ko mabatian nga isa ka maayo kag matarong nga Dios ang nagagahom sa kalibutan. Pero, daw indi gid ini mapatihan kon basihan ko ang mga nagakatabo. Bisan pa 26 anyos pa lang ako sadto, madamo na ako sing nakita nga indi maayo, kag nagalalain gid ako sa sini.

Isa ka piloto si Tatay sa United States Air Force. Gani bata pa lang ako, kabalo ako nga posible matabo ang nuklear nga inaway. Kay man, puede gamiton sang mga soldado ang isa ka nuclear bomb kon gustuhon nila. Sang nagaeskwela ako sang kolehiyo sa California, natabo ang inaway sa Vietnam. Kon magprotesta ang mga estudyante, nagaupod ako. Kon ginalagas kami sang mga pulis nga may mga batuta, nagadinalagan kami. Pero bangod sa tear gas, daw indi kami makaginhawa kag indi makakita. Grabe gid sadto kagamo kag madamo ang nagarebelde. Madamo nga pulitiko ang ginapatay, nagaprotesta ang mga tawo, kag may mga nagapanggamo. Sarisari ang opinyon sang mga tawo kon paano masolusyunan ang mga problema. Daw nagalibog ang ulo ko kon sin-o ang akon patihan.

Sang 1970, nag-obra ako sa naaminhan nga bahin sang Alaska kag nakasupot ako sang madamo nga kuarta. Dayon, nagkadto ako sa London. Nagbakal ako sang motor kag nagbiyahe ako pabagatnan, kag wala ako sing labot kon diin ako makalab-ot. Pila ka bulan sang ulihi, nakalab-ot ako sa Africa. Samtang nagabiyahe ako, madamo ako sang nakilala nga mga tawo nga nagahandum man nga madula ang ila mga problema.

Bangod sa akon mga nakita kag nabatian, nahunahuna ko nga matuod ang ginatudlo sang Biblia nga ginakontrol sang isa ka malain nga espiritu ang mga nagakatabo sa kalibutan. Pero kon indi ang Dios ang nagakontrol sa kalibutan, ano ang iya ginahimo? Gusto ko gid ini mabal-an.

Pagkasunod nga mga binulan, nasabat ang akon pamangkot. Kag sang ulihi, madamo ako sing nakilala nga lalaki kag babayi nga nagaalagad sing matutom sa matuod nga Dios bisan ano man ang ila sitwasyon. Palangga ko gid ini nga mga tawo.

MAGAMO ANG SITWASYON SA NORTHERN IRELAND

Sang nagbalik ako sa London, ginkontak ko ang iloy sang akon abyan, kag ginhatagan niya ako sang Biblia. Sang ulihi, nagkadto ako sa Amsterdam, Netherlands. Samtang nagabasa ako sang Biblia sa tupad sang poste sang suga sa higad sang dalan, nakita ako sang isa ka Saksi, kag ginbuligan niya ako nga madugangan pa gid ang akon nabal-an. Dayon, nagkadto ako sa Dublin, Ireland, kag nakita ko didto ang branch office sang mga Saksi ni Jehova. Nakilala ko didto si Arthur Matthews nga isa ka maalam nga brother nga madugay na nga alagad ni Jehova. Ginsilingan ko sia nga gusto ko mag-Bible study, kag nagpasugot sia nga sia ang ma-Bible study sa akon.

Ginserioso ko gid ang akon pag-Bible study kag ginbasa ko ang mga libro kag mga magasin nga ginhimo sang mga Saksi. Kag siempre, ginbasa ko man ang Biblia. Nalipay gid ako sa akon ginahimo. Sa mga miting sang kongregasyon, nagdayaw gid ako kay bisan ang mga bata kabalo sang sabat sa mga pamangkot nga ginatos ka tuig na nga ginapaligban sang maalam nga mga tawo: ‘Ngaa may mga nagahimo sang malain? Sin-o ang Dios? Ano ang matabo kon mapatay ang tawo?’ Mga Saksi ang tanan ko nga abyan. Wala gid ako nabudlayan nga makig-abyan sa ila kay wala ako sing iban nga kilala sa bilog nga pungsod. Ginbuligan nila ako nga higugmaon si Jehova kag himuon ang iya kabubut-on.

Sang 1972, nabawtismuhan ako. Isa ka tuig sang ulihi, nagpayunir ako sa isa ka gamay nga kongregasyon sa Newry, Northern Ireland. Nag-arkila ako sang isa ka balay sa bukid kag malayo ini sa iban nga pumuluyo. May isa ka uma malapit sa akon ginaistaran, kag nagapraktis ako sang akon mga pamulongpulong sa atubang sang mga baka. Daw nagapamati man sila sa akon samtang nagahalab kag nagausang. Bisan pa indi sila makahatag sing laygay sa akon, nakabulig sila para mapraktis ko ang pagtulok sa mga tagpalamati samtang nagapamulongpulong ako. Sang 1974, gin-asayn ako bilang espesyal payunir kag nakaupod ko si Nigel Pitt nga nangin suod ko gid nga abyan.

Sadto nga tion, magamo gid ang sitwasyon sa Northern Ireland. Gintawag sang iban ang Northern Ireland nga “the land of the bomb and the bullet” kay pirme lang may inaway sa mga dalan, may ginatiro nga tawo, kag may nagalupok nga salakyan bangod ginbutangan sang bomba. Sa masami, ang pulitika kag ang relihion amo ang rason sang kinagamo. Pero, kabalo ang mga Protestante kag ang mga Katoliko nga wala nagaentra sa pulitika ang mga Saksi ni Jehova, gani nakabantala kami gihapon kag wala sing may nagagamo sa amon. Sa masami, kabalo ang mga ginabantalaan namon kon san-o kag diin matabo ang kinagamo, gani ginapaandaman nila kami.

Pero, indi gid malikawan nga makaeksperiensia kami sang delikado nga mga sitwasyon. Isa ka adlaw, upod ko si Denis Carrigan nga isa man ka payunir nga nagbantala sa isa ka malapit nga banwa. Wala sing Saksi sa sini nga banwa kag isa ka beses pa lang kami nakakadto didto. Nagsiling ang isa ka babayi nga mga soldado kuno kami sang Britain nga nagapangespiya sa ila lugar. Posible nga gindudahan niya kami bangod lain ang tono namon sangsa ila. Ginkulbaan gid kami. Kay bisan mabal-an lang gani sang mga tawo nga nagapakita ka sang kaayo sa mga soldado, posible ka nila patyon ukon tiruhon sa tuhod. Puerte katugnaw sadto samtang nagahulat kami sang bus. Dayon, nakita namon nga may nagpundo nga salakyan sa atubang sang kalan-an diin ginsilingan kami sang babayi nga mga espiya kami. Naggua ang babayi kag gin-istorya niya ang duha ka lalaki sa salakyan kag nagalalain gid sia samtang ginatudlo niya kami. Nagpalapit sa amon ang duha ka lalaki kag ginpamangkot nila kami parte sa iskedyul sang biyahe sang bus. Pag-abot sang bus, gin-istorya nila ang drayber. Indi namon mabatian ang ila ginaistoryahan. Bangod kami lang ang pasahero, sigurado kami nga halitan gid nila kami paggua namon sa banwa. Pero wala ina natabo. Pagpanaug ko sa bus, ginpamangkot ko ang drayber: “Ano to ang ginhambal sang mga lalaki parte sa amon?” Nagsabat sia: “Ginsilingan ko sila nga kilala ko kamo. Indi na kamo magkabalaka. Indi kamo nila paghalitan.”

Sang 1976, nag-attend ako sa distrito nga asembleyaa sa Dublin. Nakilala ko sa sini nga asembleya si Pauline Lomax nga isa ka espesyal payunir halin sa England. Matutom gid sia nga sister, mapainubuson, kag guapa. May utod sia nga lalaki nga si Ray, kag bata pa lang sila natun-an na nila ang kamatuoran. Isa ka tuig sang ulihi, nagpakasal kami ni Pauline kag nagpadayon kami sa pag-alagad bilang mga espesyal payunir sa Ballymena, Northern Ireland.

Sang ulihi, nag-alagad kami sa sirkito sa Belfast, Londonderry kag sa iban pa nga delikado nga mga lugar. Napalig-on gid kami sa mabakod nga pagtuo sang mga kauturan. Ginbiyaan nila ang ila relihioso nga mga pagpati, wala na nila ginapakanubo ang iban, kag gindula nila ang ila dumot para makaalagad sila kay Jehova. Ginpakamaayo gid sila kag ginbuligan ni Jehova.

Pulo ka tuig ako nga nag-istar sa Ireland. Dayon sang 1981, gin-agda kami nga mag-eskwela sa ika-72 nga klase sang Gilead. Pagkatapos sang amon klase, gin-asayn kami sa Sierra Leone, West Africa.

PIGADO PERO MATUTOM ANG MGA KAUTURAN SA SIERRA LEONE

Nag-istar kami sa isa ka balay para sa mga misyonero upod ang 11 pa ka matutom nga mga misyonero. May isa ini ka kusina, tatlo ka kasilyas, duha ka palaliguan, isa ka telepono, isa ka washing machine, kag isa ka dryer. Pirme lang naga-brown out kag indi mo mabal-an kon san-o ma-brown out. Madamo sing ilaga sa kisame, kag may mga kobra nga nagasulod sa basement.

Bisan pa mabudlay ang kabuhi didto, nanamian gid kami sa amon pagbantala. Ginarespeto sang mga tawo ang Biblia kag nagapamati sila sing maayo. Madamo ang nagtuon sang Biblia kag nangin Saksi ni Jehova. Ginatawag ako sang mga tawo nga “Mister Robert,” kag si Pauline naman “Missis Robert.” Pero sang ulihi, talagsa na lang ako makabantala bangod sa akon asaynment sa branch office. Gani gintawag na sang mga tawo si Pauline nga “Missis Pauline,” kag ang tawag nila sa akon “Mister Pauline.” Nanamian gid sa sini si Pauline.

Madamo nga kauturan ang pigado, pero pirme gid sila ginaamanan ni Jehova sang ila mga kinahanglanon. Kon kaisa, ginahimo ini ni Jehova sa tumalagsahon nga paagi. (Mat. 6:33) Nadumduman ko ang ginhimo sang isa ka sister. Ang iya kuarta insaktuhan na lang para ibakal sang pagkaon nila sang iya kabataan para sadto nga adlaw, pero ginhatag niya ini tanan sa nagamasakit nga brother nga kulang ang inugbakal sang bulong para sa malaria. Pagkahapon sadto nga adlaw, may isa ka babayi nga nagkadto sa sister kay may gusto sia nga ipahimo nga style sang buhok, kag ginbayaran niya ang sister. Madamo pa sing pareho sini nga eksperiensia ang mga kauturan.

NAG-ADJUST KAMI SA BAG-O NGA KULTURA SA NIGERIA

Siam ka tuig kami nga nag-alagad sa Sierra Leone. Dayon, gin-asayn kami sa Bethel sa Nigeria. Daku ang branch office diri. Pareho lang ang akon trabaho sa trabaho ko sa Sierra Leone. Pero daku gid ini nga pagbag-o para kay Pauline kag kinahanglan niya mag-adjust. Antes sini, 130 ka oras ang ginagamit niya kada bulan para sa pagbantala, kag may mga Bible study sia nga nagauswag. Pero subong, gin-asayn sia sa pagpanahi sang guba nga mga bayo. Madugay antes sia naka-adjust, pero narealisar niya nga nalipay gid ang iban sa iya ginahimo, kag nagpokus sia sa pagpalig-on sa iban nga mga Bethelite.

Bag-o para sa amon ang kultura sa Nigeria, kag madamo kami sang dapat matun-an. Isa ka bes, ginpakilala sa akon sang isa ka brother ang isa ka sister nga bag-o lang nga Bethelite. Sang ginpangamusta ko sia, nagluhod sia kag nagduko. Nakibot gid ako. Nahunahuna ko dayon ang duha ka teksto, ang Binuhatan 10:25, 26 kag Bugna 19:10. Nagapalibog ako kon bala hambalan ko sia nga indi niya ina dapat paghimuon. Pero, ginapamensar ko man nga ginbaton sia sa Bethel, gani kabalo sia kon ano ang ginatudlo sang Biblia.

Nasaw-ahan gid ako samtang nagaistoryahanay kami. Gani pagkatapos namon istorya, nag-research ako dayon. Natun-an ko nga ang ginhimo gali sang sister isa ka kustombre sa pila ka bahin sang pungsod sadto nga tion, kag ginahimo man ini sang mga lalaki. Para sa ila, isa ini ka pagpakita sang respeto. Indi ini isa ka sahi sang pagsimba, kag mabasa naton sa Biblia nga ginhimo man ini sang mga tawo sang una. (1 Sam. 24:8) Maayo lang gid kay wala ako sing may ginsiling nga posible mahuy-an ang sister.

Madamo kami sing nakilala nga mga utod sa Nigeria nga tinuig na nga nagapakita sang mabakod nga pagtuo. Ang isa sa ila amo si Isaiah Adagbona.b Bata pa lang sia, natun-an na niya ang kamatuoran. Pero, nagmasakit sia sing aro. Gindala sia sa lugar sang mga aruon kag sia lang ang Saksi didto. Bisan pa sang pagpamatok, nabuligan niya ang sobra 30 ka aruon nga batunon ang kamatuoran, kag nakaporma sila sang isa ka kongregasyon didto.

NANGIN MAPINASENSIAHON GID SA AKON ANG MGA KAUTURAN SA KENYA

Sang 1996, gin-asayn kami sa branch sa Kenya. Subong pa lang ako liwat nakabalik sa sini nga pungsod halin sang pagkadto ko diri nga ginsugid ko kaina. Nag-istar kami sa Bethel. Madamo sing amu sa palibot sang Bethel. Ginaagaw nila ang dala nga mga prutas sang mga sister. Isa ka adlaw, wala nasiraduhan sang isa ka sister ang bintana sa iya kuarto. Pagbalik niya, puno na sing amu ang iya kuarto kag ginakaon nila ang iya pagkaon. Nagsinggit sia kag nagdalagan. Gani, nakibot ang mga amu kag nagpinalagyo paggua sa bintana.

Nagpakig-angot kami ni Pauline sa isa ka Swahili nga kongregasyon. Wala nagdugay, gin-asayn ako dayon nga magdumala sang Pagtinuon sang Kongregasyon sa Libro (ginatawag subong nga Pagtinuon sang Kongregasyon sa Biblia). Pero, indi pa ako sagad maghambal sang Swahili. Gani, nagatuon ako sing abanse para mabasa ko sing maayo ang mga pamangkot. Pero kon may lain nga tinaga nga gamiton ang utod sa iya komento, indi ko na ini maintiendihan. Nahuya gid ako sa mga kauturan kag naluoy ako sa ila. Pero nanamian gid ako sa ila kay nangin mapinasensiahon sila kag mapainubuson. Wala gid sila nagreklamo sa ginhimo nga kahimusan.

MATUTOM ANG MGA KAUTURAN SA UNITED STATES NGA ISA KA MANGGARANON NGA PUNGSOD

Wala kami natuigan sa Kenya. Dayon sang 1997, gin-asayn kami sa Bethel sa Brooklyn, New York. Manggaranon ang mga tawo sa sini nga pungsod kag posible ini mangin problema sa mga kauturan. (Hulu. 30:8, 9) Pero mabakod gid ang pagtuo sang mga kauturan sa sini nga pungsod. Wala nila gintinguhaan nga mangin manggaranon. Sa baylo, gingamit nila ang ila tion kag mga pagkabutang para suportahan ang hilikuton sang organisasyon ni Jehova.

Sa sulod sang mga tinuig, nakita namon ang mabakod nga pagtuo sang mga kauturan bisan ano man ang ila sitwasyon. Sa Ireland, mabakod ang pagtuo sang mga kauturan bisan pa sang magamo nga sitwasyon. Sa Africa, mabakod ang pagtuo sang mga kauturan nga nagaisahanon lang nga Saksi sa ila lugar kag bisan pa pigado sila. Sa United States, mabakod ang pagtuo sang mga kauturan bisan pa manggaranon ini nga pungsod. Sigurado nga nalipay gid si Jehova sa iya mga alagad nga nagapakita sang gugma sa iya bisan ano man ang ila sitwasyon.

Kadasig lang sang mga tinuig. “Mas madasig pa [ini] sa lansadera sang manughabol.” (Job 7:6) Nagaalagad kami subong sa world headquarters sa Warwick, New York. Nalipay gid kami nga padayon nga mag-alagad upod sa mga kauturan nga nagapalanggaanay gid. Nalipay man kami nga himuon ang amon bug-os nga masarangan para suportahan ang aton Hari nga si Cristo Jesus. Sa indi madugay, pakamaayuhon niya ang tanan nga nangin matutom sa iya.—Mat. 25:34.