Dumduma ang Imo Daku nga Manunuga sa imo Pagkapamatan-on

“INDI Kontento nga Pamatan-on: Isa ka Katunayan sang Internasyonal nga Kabuhi.” Mabasa ina sa ulong-dinalan sang isa ka artikulo sang The Star sa Johannes­burg, ­South Africa. Ang kapsion para sa artikulo nagasiling: “Bangod sang daku nga populasyon sang mga pamatan-on nga nagaatubang karon sang limitado nga mga opurtunidad nga dugang nga ginabuhinan sang bug-os kalibutan nga pag-isol sa ekonomiya, ang pagkadikontento sang pamatan-on sa dalagku nga mga siudad nangin kitaon dayon nga katunayan sang internasyonal nga kabuhi. Sa mga kinagubot sa Miami, sa San Salvador, sa Managua, sa Teheran kag sa Cape Town may isa ka kinaandan nga butang​—⁠sa tagsa ka higayon ang una nga makapatay kag mapatay amo ang pamatan-on.”

Ginbalhag ina sang mga napulo ka tuig na ang nakaligad, kag kutob sadto naglain pa gid ang kahimtangan. Ngaa indi kontento ang mga pamatan-on sa bug-os nga kalibutan? Ang nagadugang nga pagkawalay kalig-onan sining sistema sang mga butang pat-od gid nga isa ka rason. Ang pagkawalay palamugnan nakalab-ot sa pinakamataas nga proporsion. Kag upod ang madasig nagausmod nga pagkabuhi sa pamilya, ano ang kalig-onan para sa mga pamatan-on? Indi katingalahan nga ang iban sa ila nagamulay sa kalibutan nga indi nila kontrolado. Indi bala ini bangod kay kulang sila sing pat-od nga paglaum nga maangklahan nila sang ila kabuhi?

Ginapaabot sang isa nga ang mga relihion sang kalibutan magahatag sina nga paglaum. Apang, ang isa ka pamatan-on nagsulat: “Naligban gid ako. . . . Madamo ako sing abyan, nga miembro sang lainlain nga relihion, kag pareho lang sila sa akon. Naligban gid ako kag indi ko mahibaluan kon ano na ang patihan. Palihog, mahimo bala ninyo ako mahatagan sing laygay?” Ano nga laygay ang mahatag mo sa sina nga pamatan-on?

Ang mga pamatan-on nga nagapabilin nga suod sa Pulong sang Dios kag sa matuod nga Cristianong kongregasyon hilway sa sina nga kagumon kag kabang-awan. Samtang ang kalabanan nga mga pamatan-on wala sing pat-od nga paglaum para sa palaabuton, ang Cristianong mga pamatan-on nagasalig kay Jehova nga Dios kag sa iya sigurado nga Pulong sang kamatuoran. Gani, may paglaum sila nga makalampuwas nga buhi sa katapusan sining sistema sang mga butang nga nagalaum sang kabuhi nga walay katapusan. Pagkatapos sina, sa isa ka duta nga natinluan sang inhustisya kag kalautan, mangin bahin sila sang sadsaran sang “bag-ong duta” diin “magapuyo ang pagkamatarong.” (2 Pedro 3:​13; Juan 17:3) Sa katumanan sinang mahimayaon nga mga paglaum, ang mga pamatan-on ginalaygayan nga ‘dumdumon ang ila Dakung Manunuga.’ (Manugwali 12:1) Kag ang labing maayong laygay nga mahatag amo nga sila mangin kag magapabilin nga bahin sang Cristianong kongregasyon. Ngaa amo sini?

Ang kalabanan sa inyo nga mga pamatan-on sa Cristianong kongregasyon may tumuluo nga mga ginikanan nga nagahigugma sa inyo kag nagaulikid sa inyo. Ang kada kongregasyon may gintangdo nga mga gulang, nga interesado gid sa inyo espirituwal nga kaayuhan. Ina nga bulig kag pag-ulikid indi dapat pagpakadiutayon. Ang kamatuoran halin sa Pulong sang Dios, upod ang teokratikong panuytoy, magahatag sa inyo sing kalig-onan, kahilwayan gikan sa kapaslawan, kag pat-od nga paglaum para sa palaabuton. Ini tanan magabulig sa inyo nga ‘matigayon ang pagtuo kag maayong konsiensia’ kag makapanguyat sa paglaum nga kaangay sang isa ka angkla agod ang isa ka sakayan indi malunod sa nagabalingaso nga dagat.​—⁠1 Timoteo 1:​18, 19; ipaanggid ang Hebreo 6:⁠19.

Magpalayo sa mga Pagsulay sang Kalibutan

Walay sapayan sang madamong espirituwal nga mga pagpakamaayo nga ginaagom ninyo nga mga pamatan-on sa Cristianong kongregasyon, ang huyog sang iban amo ang pagsunod sa dalanon sang kalibutan. Nagabatyag sila nga daw may butang nga maayo nga kulang nga makita lamang sa kalibutan sa guwa sang Cristianong kongregasyon. Apang may mahatag gid bala nga maayong butang ang kalibutan?

Sa tapos makahinguyang sing kapin sa 40 ka tuig sa bug-os tion nga ministeryo, ang isa ka alagad sang Dios nakasiling sini: “Ang lamang nga bahin sang akon kabuhi nga ginhinulsulan ko amo ang bahin nga ginkabuhi ko antes ako nakasulod sa kamatuoran. Bahin pa ako sadto sang kalibutan. Nagkabuhi ako para lamang sa kalibutan. Sang nag-edad ako sing 18 anyos kag ginbalikid ang akon kabuhi, narealisar ko nga wala gali ini sing pulos. Wala sing tulumuron, wala sing katuyuan, sa akon kabuhi. Ang mga kalipayan sa kalibutan nga ginhunahuna ko nga nanamian ko nagdala lamang sing kapaslawan kag kasubo. Ginsugdan ko nga pangitaon ang kamatuoran. Nakita ko ini kag pagligad sang isa ka tuig ginsugdan ko ang pagpakigbahin sa bug-os tion nga pag-alagad. Wala ako sing kuwarta, kundi isa ka tuig lamang nga eksperiensia sa kamatuoran kag pagtuo nga si Jehova magasakdag sa akon. Karon kon balikdon ko ang akon kabuhi, dos-tersia sini ginhinguyang ko sa bug-os tion nga pag-alagad, malipayon gid ako. Indi ko gid pag-ibaylo ang natigayon ko gikan sa pag-alagad kay Jehova sa bisan ano nga matanyag sang ­kalibutan.” Sa pagkamatuod, nagapalanog ini sang balatyagon sang linibolibo ka Saksi ni Jehova.

Gani ngaa kahidlawan ang mga butang nga ginbayaan sang iban nga mga Cristiano? Ngaa kahidlawan ang mga butang sang kalibutan nga nagapadulong sa kalaglagan? (1 Juan 2:​15-17) Subong isa ka pamatan-on, ayhan nagabatyag ka nga ang pag-alagad kay Jehova estrikto katama kag mawasi mo ang kalipay nga ginatanyag sang kalibutan. Apang maalamon bala nga tamdon mo ang imo mga ginikanan kag mga gulang nga estrikto katama sang luyag nila nga buligan ka nga pahamut-an si Jehova kag matigayon ang kabuhi nga walay katapusan?

Kon ang isa ka iloy nga nagsugo sa iya bata sa tiangge nagapahanumdom sa iya nga magdulog anay kag magtulutan-aw antes magtabok sa dalan, kabigon mo bala sia nga estrikto katama? Sa baylo, indi bala nga mahigugmaon niya nga ginatinguhaan nga amligan ang iya bata? Ano abi kon wala pagsapaka sang bata ang paandam kag naipit sang isa ka salakyan kag napatay? Magabatyag ka bala gihapon nga ang iloy nangin estrikto katama? Ti, ayhan naghunahuna ka nga kuntani ginpaandaman pa niya sia sing dugang agod maamligan ang kabuhi sang iya bata! Sing kaanggid, ang mga pahanumdom halin sa Pulong sang Dios kag sa iya organisasyon ginahatag sing mahigugmaon, indi subong mga pagdumili kundi para sa proteksion naton.

Ang pagdaku sa isa ka Cristianong puluy-an indi bastante agod masarangan mo nga madaug ang mga pag-ipit sining kalibutan. Kinahanglan man nga mangin kombinsido gid ikaw sing personal sa kamatuoran sang Pulong sang Dios. Inang personal nga kombiksion kag gugma sa Manunuga naghatag sing sadsaran para idedikar ang imo kabuhi sa Dios. Ining personal nga kombiksion kinahanglanon man agod masarangan mo nga pangapinan ang imo pagtuo sa iban. (1 Pedro 3:15) Ang pagkanatuytuyan sang Pulong sang Dios isa ka sadsaran para sa isa ka malipayon nga kabuhi. (Josue 1:​8; Salmo 119:9) Apang para sa kadalag-an sang kabuhi, ginakinahanglan mo man ang maayo nga paghanas.

Maghatag sing Espesipiko nga Paghanas

Sa pagkamatuod, kamo nga Cristianong mga ginikanan malipay nga makita ang inyo kabataan nga magtindog sing malig-on para sa kamatuoran kag magpabilin nga nahiusa sa inyo sa matuod nga pagsimba. Responsabilidad sang amay nga padakuon ang kabataan sa “disiplina kag panghunahuna ni Jehova.” (Efeso 6:4) Apang matudlo mo bala ang mga bahin nga kinahanglan mo pauswagon sa paghanas sa ila? Nagahinguyang ka bala sing bastante nga tion upod sang imo kabataan? May ginahimo bala kamo subong pamilya? Kag nalipay bala kamo maglingawlingaw sing tingob?

Indi pagkalimti nga ang pagpahamtang ninyo sing maayo nga halimbawa may makusog nga epekto sa inyo kabataan. Kon luyag ninyo nga tamdon nila ang kamatuoran sing hanuot, nian dapat man ninyo ini tamdon sa sina man nga paagi. (3 Juan 2:4) Kag kon luyag ninyo nga palambuon nila ang tudok nga pagtahod sa organisasyon ni Jehova kag sa mga gulang, nian, dapat man kamo pirme may amo sina kaayo nga panimuot.

Bisan pa ang paghanas sa kabataan amo ang panguna nga katungdanan sang mga ginikanan, ang mga gulang may responsabilidad man sa mga pamatan-on sa kongregasyon. Sa pag-atipan sa panong sang Dios, kinahanglan man nga bantayan sang mga gulang ang mga kordero. (1 Pedro 5:​1-3) Isa gid ka maayong halimbawa ang ginhatag ni Jehova paagi sa mapinalanggaon nga pag-atipan bisan sa mga magamay! (Isaias 40:11) Nagailog sang iya halimbawa, ang Cristianong kabulig nga mga manugbantay maluyag man sa pagpakita sing mainit kag mahigugmaon nga interes sa mga pamatan-on kag pabatyagon sila nga bahin sang kongregasyon. Ang iban nga mga pamatan-on nagpabutyag sing handum nga sugilanunon sila sang mga gulang sing masunson pa kag buligan sila sa pag-alagad sa latagon.

Labi pa sa paghatag sing ihibalo sa Kasulatan ang kinahanglan agod mahanas ang pamatan-on. Halin sa iya tagipusuon, dapat niya dumtan ang ginadumtan sang Dios kag higugmaon ang ginahigugma sang Dios. (Amos 5:​14, 15) Agod dumdumon niya ang iya Manunuga sa pagkapamatan-on, kinahanglan nga nadisiplina sia sa Kasulatan sa paglakat sa dalan sang pagkamatarong ni Jehova. (Hulubaton 22:​6; 2 Timoteo 3:16) Indi dapat pagpaisulon sang mga ginikanan ang kinahanglanon nga disiplina. Ang mga ginikanan nga maluyag huptan ang pagpakig-abyan sang ila kabataan sa bisan paano nahuyog sa pagpasapayan sa sala, nagapakadiutay sang pagkaserioso sini. Naimpluensiahan sila sang pagkamatinuguton sang kalibutan. Apang ang mahigugmaon nga ginikanan nagapamati sa mga balita nga ang iya bata nagtinonto kag nagahatag sing nagakaigo nga disiplina kon kinahanglanon. (Hulubaton 13:24) Sa pagkamatuod, ano ang luyag huptan sang Cristianong ginikanan nga pagpakig-abyan pasad sa pagkamatinuguton apang nawasi ang iya bata tungod sa kakulang sing nagakaigo nga disiplina?​—⁠Hulubaton 22:⁠15.

Magtigayon sing Katuyuan sa Kabuhi

Ginhimo kita ni Jehova nga Dios agod matigayon naton ang pinakadaku nga kalipay kag kaayawan gikan sa pag-alagad sa iya. Hunahunaa ang daku nga latagon nga sarang ninyo mapalambo, mga pamatan-on. Mga katunga sang populasyon sang kalibutan ang 20 anyos ang edad kag ubos pa. Ining mga pamatan-on nagadalangdalang. Bisan pa nga sila wala sing paglaum, kamo nga Cristianong mga pamatan-on may pat-od nga paglaum kag may butang nga maayo nga ipaambit sa ila. Paagi sa inyo maayong Cristianong paggawi kag sa inyo kakugi sa pag-alagad kay Jehova, maganyat ninyo ang madamo sa ila sa kamatuoran. Busa mabuligan ninyo sila sa dalan padulong sa kabuhi.

Ano ang labi pa kaayo nga tulumuron ang matigayon ninyo sang sa ihugod ang inyo kabuhi sa pag-alagad kay Jehova nga Dios? Nahunahuna na bala ninyo ang pagpakigbahin sa nagaluwas kabuhi nga pagbantala nga hilikuton sing regular? Ayhan makapakigbahin kamo sa pagpalapnag sang maayong balita subong payunir, ukon makaalagad kamo sa isa sang mga sanga talatapan sang Watch Tower Society diin ginahimo ang literatura sa Biblia. Bisan pa indi ninyo ina mahimo, indi bala nga dapat ninyo himuon ang pagsimba kay Jehova nga amo ang sentro nga punto sa inyo kabuhi, busa nagadumdom sang inyo Daku nga Manunuga? May yara kamo maayong hilikuton nga himuon. Busa, tubtob sa katapusan sining sistema sang mga butang, mangin determinado nga may ‘bugana nga himuon sa hilikuton sang Ginuo.’​—⁠1 Corinto 15:⁠58.

Gani abante kamo nga Cristianong mga pamatan-on. Dumduma ang inyo Daku nga Manunuga karon, kag amligan niya kamo kon tapuson niya ining walay dios nga kalibutan. Huo, amligan kamo ni Jehova sa sina nga tion kag pakamaayuhon kamo sing walay katapusan kag mahimayaon nga palaabuton.