Report sang mga Manugbantala sang Ginharian

Mabungahon ang Dipormal nga Pagpanaksi

SI Jesus nagbukas sang paghambalanay nga nagdul-ong sa dipormal apang epektibo gid nga pagpanaksi sang magsiling sia sa isa ka Samaritana sa higad sang bubon: “Paimna ako.” (Juan 4:7) Kita karon mangin subong man sini ka epektibo gid kon alisto kita sa tanan nga kahigayunan para sa dipormal nga pagpanaksi. Ang isa ka utod sa Australia nag-umpisa sang dipormal nga paghambalanay paagi sa pagbasa sang adlaw-adlaw nga teksto samtang nagapungko sa parke. Natalupangdan sang nagakatingala nga tawo ang publikasyon kag nagsiling nga interesado man sia sa Kasulatan. Sia isa ka Katoliko apang indi na aktibo nga gintudluan sing ebolusyon sa Katoliko nga eskwelahan kag karon indi niya mahibal-an kon ano ang patihan. Ginhimos sang utod nga makatigayon sia sing libro nga Life​—⁠How Did It Get Here? By Evolution or by Creation?⁠a Pagligad sang duha ka adlaw gindul-ong niya ang libro sa ginaobrahan sang tawo, apang wala sia didto. Ginsabnit sang sekretarya ang libro, nga nagasiling: “Ginahulat namon ining libro.”

Pagligad sang duha ka oras ang utod nakabaton sing tawag sa telepono gikan sa tawo nga nagapakuha sing duha pa ka kopya sang libro nga Creation kag nagapangabay sa Saksi nga duawon sia sa iya opisina. Sang magkadto ang utod sa iya opisina, naabtan niya didto ang tawo kag ang duha pa. Ginsugdan ang pagtuon sa Biblia upod sa ila, lakip ang sekretarya, kag ginhimos nga magduaw ang utod sing makaduha kada semana. Sang nagdason nga mga semana, ang nobya sang tawo, isa ka ­‘born-again nga Cristiano,’ wala sing untat nga nagpadala sing nota nga nagapamangkot sing mga pakiana sa Biblia. Sang ulihi, nagbuylog sia sa pagtuon, subong man ang kasosyo sang tao kag ang iya abyan, nga isa ka ebolusyonista.

Ginpadayon nila ang ila pagtuon sa Biblia sing regular sa lima ka bulan, kag ang ikaduha nga pagtuon kada semana ginahiwat sa parke. Nian ang nobyo sang sekretarya nagbuylog sa pagtuon sang grupo. Wala madugay sa tapos sadto, ang kasosyo sang una nga tawo kag ang iya abyan nagsaylo sa Idaho sa Estados Unidos, nga sa diin ginpadayon nila ang pagtuon. Pila ka semana sang ulihi, ang una nga tawo ginpalapitan sang isa ka bug-os nga dumuluong, nga namangkot kon ano ang natabo sa paghinun-anon sa Biblia sa parke. Nagapamati gali sia sa ila pagtuon. Ginhimo ang kahimusan nga magtuon man sia.

Ano ang resulta sining tanan? Pagligad sang napulog-walo ka bulan kutob sang una nga pagkitaay sa parke, ang una nga tawo kag ang iya nobya, nga isa anay ka ­‘born-again nga Cristiano,’ nagpakasal kag nabawtismuhan. Ang sekretarya kag ang iya nobyo nagpakasal man kag nabawtismuhan. Ang kasosyo kag ang iya abyan nga nagkadto sa Estados Unidos nabawtismuhan, kag ang isa sa ila nagaalagad karon sing regular subong auxiliary payunir. Ang isa nga nagapamati anay sa mga paghinun-anon sa Biblia sa parke nagpadayon sang iya pagtuon. Nian nagsaylo sia sa Irlandiya, kag nagalaum nga mabawtismuhan!

Ini tanan natabo bangod ginhimuslan sang isa ka utod ang iya pahuway sa pagpanyaga nga magpanaksi sing dipormal, kag ginpakamaayo ni Jehova ang iya panikasog. Kabay nga himuslan man naton ang tagsa ka kahigayunan sa pagpalapnag sing maayong balita sa mga ginagutom sa mensahe sang Ginharian ni Jehova!

[Footnote]