Pagluwas sa Duta Gikan sa Pagkalaglag

SANG isa ka tion sa maragtas sang tawo, ginluwas sang Dios ang duta gikan sa pagkalaglag sa kamot sang mga tawo. Ginhimo niya ini paagi sa tugub-globo nga anaw sang mga adlaw ni Noe. Wala kita sing rekord nga sadto ginalaglag sang mga tawo ang pisikal nga palibot. Apang ang duta nalaglag sa lain nga paagi tubtob sa kasangkaron nga ginbatyag sang Dios nga kinahanglan ang matigdas nga paghikot.

Ang Biblia nagareport: “Ang duta nadunot sa panulok sang matuod nga Dios kag ang duta napuno sing kasingki. Gani gintan-aw sang Dios ang duta kag, yari karon! dunot ini, kay ginlaglag sang tanan nga unod ang dalanon sini sa duta.” (Genesis 6:​4, 11, 12) Huo, sang adlaw ni Noe gintamod sang Dios ang duta nga nalaglag bangod sang kasingki kag kalautan sang katawhan.

Sing kaanggid, sang ginpuy-an sang dumaan nga Israel ang Ginsaad nga Duta, ang Dios nagpaandam: “Dili ninyo pagdagtaan ang duta diin kamo; kay ang dugo nagadagta sang duta . . . Kag dili ninyo pagdagtaan ang duta.” (Numeros 35:​33, 34) Busa, ang Canaan nalaglag bangod sang sala sa dugo sang mga pumuluyo sini. Ang makasiligni nga halimbawa sini amo ang ila buhat nga paghalad sing mga bata sa ila mga dios-dios.

Imoral man ang mga Canaanhon, kag nakaapektar man ini sa pagtamod sang Dios sa duta. Ginpaandaman niya ang Israel: “Dili kamo magpadagta sa bisan ano sining mga butang [imoral nga mga buhat], kay sa sini tanan nadagtaan ang mga pungsod nga gintabog ko sa atubangan mo. Busa ang duta nadagtaan, kag . . . isuka sang duta ang iya mga pumuluyo.” (Levitico 18:​24, 25) Nalaglag sang imoralidad kag pagpaagay sing dugo ang Canaan tubtob sa kasangkaron nga ginlaglag sang Dios ang Canaanhon nga mga pungsod.

Ang Paglaglag sa Duta

Kamusta sa karon? Wala bala kita nagakabuhi man sa isa ka dag-on sang indi makontrol nga kasingki, pagpaagay sing dugo, kag imoralidad? Ano man ang himuon sang tawo sa pagkay-o sang halit nga nahimo niya sa pisikal nga duta, indi na niya mapasag-uli sa kabuhi ang ginabanta nga isa ka gatos ka milyon nga napatay sa iya mga inaway sa sulod sini nga siglo; ukon mapapanumbalik pa niya ang minilyon nga ginpamatay sang mga kriminal ukon ang dimaisip nga makaluluoy nga mga biktima nga napatay sa gutom. Sa pagkamatuod, indi niya mapasag-uli ang ginabanta nga 40 pa 60 milyones sang wala pa matawo nga mga bata nga ang ila kabuhi ginakutol sang aborsion kada tuig. Maduhaduhaan pa bala naton nga ang duta ginalaglag sa panulok sang Dios sining mga butang​—⁠indi na pagsambiton pa ang imoralidad nga lapnag gid karon?

Ang pagpangatarungan nagasugid sa aton nga ang Dios dapat maghulag sa indi madugay agod luwason ang duta gikan sa malaglagon nga mga hilikuton sang tawo, kag ginapalig-on ini sang tagna sa Biblia. Apang ano ang iya himuon. Ang Biblia nagasiling nga iya ‘laglagon ang mga nagalaglag sang duta.’ (Bugna 11:​18; ipaanggid ang Mateo 24:​3-14.) Subong nga ginatabog sang tag-iya sang duta ang malaglagon nga agsador, ‘tabugon’ man sang Dios ang mga nagalaglag sang iya matahom nga tinuga, ang duta.

Ang Biblia nagasiling: “Ang malauton utdon gikan sa duta; apang ang maluib gabuton sa sini.” (Hulubaton 2:22) Ginatawag sang Biblia ining paghikot sang Dios nga Armagedon. (Bugna 16:16) Gintawag man ini ni Jesus ang “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Mangin daku pa ini sa Anaw.

Sobra bala ini ukon dimakatarunganon nga solusyon? Indi, ang Dios, subong Manunuga sang duta, may kinamatarong sa pagpamat-od kon sin-o ang magapuyo sa sini. May kinamatarong man sia nga sukton ang tawo sa iya ginabuhat. Dugang pa, kon pabay-an sang Dios ang tawo sa iya dalanon, ang duta malaglag para kay bisan sin-o, kag ang kabuhi mangin imposible. Sa pihak nga bahin, paagi sa ‘paglaglag sa mga nagalaglag sang duta,’ ginatipigan sang Dios ang aton dutan-on nga palanublion para sa mga mainapresyahon. Ang Biblia nagasaad: “Kay ang matarong magapuyo sa duta, kag ang himpit magapabilin sa sini.”​—⁠Hulubaton 2:⁠21.

Sa bulig sang Dios, minilyon ang nakasapo sing kusog sa pagpakita sang ila kaugalingon nga himpit bangod luyag nila mabilin agod magkalipay sa tinuga sang Dios. Ginasunod man nila ang mataas nga mga talaksan sang moralidad sang Dios kag ginalikawan ang kasingki kag sala sa dugo bisan sing indi direkta. Busa, indi sila mga manuglaglag sang duta sa sining importante nga kahulugan.

Isa ka Duta nga Naluwas Gikan sa Pagkalaglag

Ina sila karon may makalilipay nga paglaum nga makita ang duta nga nabalhin gikan sa nalaglag nga kahimtangan sini karon padulong sa isa ka matahom nga paraiso. Ti, bisan ang ila lawas tinluan kag putlion gikan sa malaglagon nga mga epekto sang sala. Ginalaragway sang katapusan nga tulun-an sang Biblia ang aman sang Dios sa pagpahanabo sini tanan subong isa ka simbuliko nga “suba sang tubig sang kabuhi.” Sa tagsa ka higad sini nga suba, “may mga kahoy sang kabuhi nga nagadala sing napulog-duha ka sari sang bunga, nga nagapatubas sang iya bunga sa tagsa ka bulan. Kag ang mga dahon sang kahoy bulong sa mga pungsod.”​—⁠Bugna 22:​1, 2.

Ining inspirado nga palanan-awon isa ka garantiya nga luwason sang Dios ang duta kag ang katawhan sa sini gikan sa pagkalaglag. Ang iban pa nga mga tagna nagahatag sing abanse nga laragway sinang napasag-uli nga duta. Binagbinaga, halimbawa, ang mabinalaybayon nga abanse nga laragway ni Isaias: “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa. Sa wala sing kapaslawan magapamulak ini, kag magakalipay gid nga may kasadya kag inamba.” (Isaias 35:​1, 2) Sa sina nga tion wala na sing mahigko nga mga dagat, mahigko nga duta sa ibabaw lamang, ukon makahililo nga atmospera.

Labi ka importante, ang duta indi na paglaglagon sang kasingki, pagpaagay sing dugo, ukon sang imoralidad. Ang mga nagatahod lamang sa Dios, sang iya mga talaksan, kag sang iya tinuga ang mangin didto. (Bugna 21:​7, 8) Pamatii karon ang mahimayaon nga mga resulta sining tanan: “Pahiran niya [Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan. . . . ‘Yari karon! Ginahimo ko nga bag-o ang tanan nga butang.’ ”​—⁠Bugna 21:​4, 5.

Daw ano ka makalilipay nga resulta! Daw ano ka malipayon kita nga sa indi madugay ‘laglagon [sang Dios] ang mga nagalaglag sang duta’! Kag ining inspirado nga mga tagna nagapahulag gid sa aton nga handumon ang pag-alagad sa Dios nga magaluwas sang duta gikan sa pagkalaglag kag himuon ini nga isa ka paraiso nga puluy-an para sa matarong sing tagipusuon nga katawhan!

[Blurb sa pahina 6]

Ang Biblia nagasiling nga ‘laglagon [sang Dios] ang mga nagalaglag sang duta.’​—⁠Bugna 11:⁠18.