Sa Indi Madugay​—⁠Isa ka Kalibutan nga Wala sing Kasakit!

ISA ka kalibutan nga wala sing kasakit magaabot sa indi madugay? Maayo gid ina nga balita sa mga madugay na nga nagaantos​—⁠ayhan ang ila kasakit pisikal, mental, ukon emosyonal! Halimbawa, minilyon ang malipay sing daku sa pagkadula sang sobra nga kasakit sa lawas tuga sang pila ka sahi sang kanser, sang balatian nga pagpalamaol sang kaunuran, kag sang balatian sa tagipusuon nga nagapalanggutok ang dughan. Ang mga nasit-an sing daku nga problema sa hunahuna malipayon nga magabaton sang paumpaw gikan sa ila masunson dimalaragway nga mga pag-antos. Kag minilyon pa gid ang malipay kon matapos lamang ang ila emosyonal nga kasakit tuga sang kahadlok, kasubo, sala, libog, kag kabang-aw. Apang luyag gid bala naton makita nga matapos ang tanan nga kasakit?

“Isa ka daku nga kapahamakan ang wala sing kasakit,” siling sang anatomo nga si Allan Bas­baum sang Univer­sity of Califor­nia sa San Francisco. Ginpamulong niya ini upod ang maayo nga rason. Bangod butang nga nagapaalarma, ang pisikal nga kasakit nagapahibalo sa aton nga may makahalalit nga butang nga mahanabo.

Ang indi pagbatyag sing pisikal nga kasakit makahalalit gid. Gin-ilustrar ini sa sining report sa Time magasin: “Ang matam-is nga yuhum sang dose-anyos nga bata nga lalaki isa gid ka daku nga kabaliskaran sa iya makaluluoy kuntani nga hitsura. Ang iya mga butkon kag mga batiis kibag kag tiku, subong nga daw sia nagmasakit sing rick­ets. Madamong tudlo ang wala. May daku sia nga pilas sa isa ka tuhod, kag ang nagayuhum nga mga bibig napilas sa kagat. Daw kaangay gid sia sang isa ka bata nga ginsakit tan-awon . . . Natawo sia nga may tumalagsahon katama nga genetiko nga depekto nga bangod sina indi sia makabatyag sing sakit. Ang iya mga tudlo nadugmok ukon napaso bangod wala niya ginapalayo ang iya kamot sa mga butang nga mainit ukon makatalagam. Ang iya mga tul-an kag mga lutalutahan depormado bangod ginapusdak niya ini sing todo kon sia nagalakat ukon nagadalagan. Napilas ang iya tuhod bangod sang pagkamang sa matalom nga mga butang nga indi niya mabatyagan. Mabalian man sia sing tul-an ukon magliw-as ang hawak, indi sia makabatyag agod makasinggit sing bulig.”

Ang iban nga mga tawo maabtik nga nagabasol sa Dios bangod sinang mga balatian kag bangod sang kasubo nga ginaeksperiensiahan sang minilyon. Apang, makatarunganon bala nga basulon naton ang Dios bangod sang masakit nga mga pag-antos sang katawhan?

Dios Bala ang Basulon?

Mga 6,000 ka tuig na karon, ang katawhan naulipon sa kasakit sa pisikal, mental, kag emosyonal. Sa katunayan, sang nagligad nga 19 ka siglo, ang Cristianong apostol nga si Pablo nakapanilag sing husto: “Ang bug-os nga tinuga nagaugayong sa kasakit sing tingob tubtob karon.” (Roma 8:22) Walay sapayan sang madamong pangpakanay sa sakit nga matigayon sa mga botika kag sang mga panikasog sang mga manugbulong kag mga sikyatrista, ang lapnag nga pagkaulipon sa tanan nga sahi sang kasakit nagapadayon. Ti, ginpakamalaut gani sang iban ang Dios bangod sang ila mga pag-antos, subong sang ginlaygay sang asawa ni Job sa iya nga himuon niya sang nagligad nga madamong mga siglo! Apang, subong sang nahibaluan niya mismo, ina nga espiritu binuang kag dinagakaigo.​—⁠Job 2:​9, 10.

Ang karon nga pagkaulipon sang tawo sa kasakit indi makatarunganon nga mabasol sa Dios. Sa baylo, ang balasulon amo ang dikitaon nga butigon kag ang aton unang mga ginikanan. Paano?

Ginapakita sang Kasulatan nga bisan pa matarong primero, isa ka espiritu nga tinuga ang nangin makagod sa gahom kag kabantugan. Sa pamanagbanag sang tawhanon nga kabuhi sa duta, ginhanduraw niya ang isa ka rasa sang katawhan sa paraiso nga duta, ang tanan nagahatag sing bug-os nga debosyon sa Labing Gamhanan nga Dios, si Jehova. Ginpahulag sang tagipusuon nga nangin malaut, ining espiritu nga tinuga nagrebelde batok sa Manunuga, naluyag nga sia ang simbahon kag hatagan sing debosyon sang tawo. Ang iya malaut nga tinutuyo nadayag sang malimbungon sia nga nagbinutig. Kag ini ang nagpasulod sang sala sa kalibutan.

Ginsilingan ni Jehova nga Dios ang unang tawo, si Adan, nga ang pagkaon sang bunga gikan sa kahoy sang ihibalo sang maayo kag malain magaresulta sa kamatayon. (Genesis 2:​15-17) Apang si Eva, nga asawa ni Adan, nasulay sa paglapas. Nagagamit sa man-ug subong humalambal, ang espiritu nga Manugdaya nagsiling sa iya: “Dili kamo mapatay nga totoo. Kay ang Dios nakahibalo nga sa adlaw nga magkaon kamo sa iya nian magamuklat ang inyo mga mata [ang kay Eva kag sa bana niya] kag mangin kaangay sang Dios kamo [nga duha], nga nakakilala sang maayo kag malaut.” (Genesis 3:​1-5) Amo ina ang una nga pagbutig, kag gintawag sini ining malaut nga espiritu nga tinuga subong ‘amay sang kabutigan.’ (Juan 8:44) Ang paggamit niya sang man-ug sa sina nga okasyon sa katamnan sang Eden nagaanggid sa iya Makasulatanhon nga identipikasyon subong “ang orihinal nga man-ug, ang isa nga ginatawag nga Yawa kag Satanas.”​—⁠Bugna 12:⁠9.

Ang sala nagdala sang pag-ugayong kag pagkaulipon sa sala sa katawhan. Suno gid sa pulong sang Dios, sa adlaw mismo sang pagpakasala ni Adan, ginhatag sang Dios ang pamatbat nga kamatayon sa mga naglapas. Sing makatarunganon, halin sa punto-de-vista ni Jehova, si Adan kag si Eva napatay sadto gid nga adlaw. (Ipaanggid ang Lucas 20:​37, 38.) Sa Eden, ginsilingan anay ni Jehova ang makasasala nga unang babayi: “Padamuon ko sing tama ang imo kasakit kag ang imo pagdala; sa kasakit magapanganak ka.” (Genesis 3:16) Si Adan magapangabuhi sing masakit sa guwa sang katamnan sang Eden sa isa ka duta nga malayo sa paraiso nga kinaugali. Siling ni Jehova: “Sa balhas sang imo nawong magakaon ka sing kalan-on tubtob nga magbalik ka sa duta, kay ginkuha ka sa iya. Yab-ok ka kag sa yab-ok magabalik ka.” (Genesis 3:​17-19) Busa ang pagkaulipon sa kasakit nag-umpisa para sa tawhanon nga rasa.

Gani, nian, ang pagkaulipon sa kasakit naangot sa pagkadihimpit, sala, kag kamatayon nga ginpanubli gikan kay Adan. Subong sang ginsiling ni apostol Pablo: “Paagi sa isa ka tawo nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala.” (Roma 5:12) Apang ang Pulong sang Dios nagabulig sa aton nga maagwanta ang kasakit, kay ginasugiran kita sini kon ngaa gintugutan ini ni Jehova kag nagapasalig sa aton nga sa indi madugay ini matapos. Ginpahanugotan sang Dios ang man-ug nga ‘amay sang kabutigan,’ nga si Satanas nga Yawa, sa pagsakit sa matarong nga si Job kag busa nagtilaw sang iya integridad. Ginpangatarungan sang Yawa nga si Job nag-alagad sa Dios bangod sang kakagod, indi sa gugma. (Job 1:​8-12) Apang si Job nagpabilin nga matutom sa Dios, nagapamatuod nga ang dihimpit nga mga tawo makaalagad sa Iya bangod sang gugma kag matutom nga makasakdag sang Iya pagkasoberano walay sapayan sang daku nga pagtilaw sa ila pagtuo. Ang pagbatas ni Job subong manughupot sang integridad nag-amot sa pagpakabalaan sa ngalan ni Jehova, nagpamatuod nga si Satanas butigon, kag nagdala sing bugana nga mga padya sa sadtong huwaran nga patriarka. (Job 42:​12-17; Santiago 5:11) Gikan sa eksperiensia ni Job, mahinakop naton nga agod ang katuyuan sang Dios matuman, ang pagkaulipon sa kasakit sang katawhan tapuson. Apang paano kita nakasiguro sa sina?

Kon Paano Tapuson ang Kasakit

Sa pagkamatuod, si Jehova naghatag sing epektibo gid nga paagi sa pagtapos sang pagkaulipon sa kasakit sang katawhan. Ginhimo niya ini sa sadsaran sang halad gawad sang iya Anak, si Jesucristo. Si Jesus amo ang “Kordero sang Dios nga nagakuha sang sala sang kalibutan.” (Juan 1:29) Nagkari sia sa duta, ‘indi nga alagdon, kundi sa pag-alagad kag sa paghatag sang iya kalag [ang iya himpit tawhanon nga kabuhi] nga gawad sang madamo.’ (Mateo 20:28) Paagi sa paglapas, nadula ni Adan ang himpit tawhanon nga kabuhi, lakip ang tanan niya nga mga kinamatarong kag mga paglaum. Kag amo gid ina ang gingawad paagi sa halad gawad ni Jesus. (1 Timoteo 2:​5, 6; Hebreo 7:26) Sa pagkamatuod, “ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”​—⁠Juan 3:⁠16.

Ispisipiko man nga ginsaad sang Dios nga ang pagkaulipon sa sala matapos. Nagatagna sang tion nga ang kasakit nga kabuylog sa sala mangin wala na, ang Cristianong apostol nga si Juan gin-inspirar sang Dios sa pagsulat:

“Nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat. . . . Nabatian ko ang mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Kay ang nahaunang mga butang nagtaliwan.’ Kag ang Isa nga nagalingkod sa trono [si Jehova nga Dios] nagsiling: ‘Yari karon! Ginahimo ko nga bag-o ang tanan nga butang.’ Kag nagsiling man sia: ‘Isulat ini, kay ining mga pulong masaligan kag matuod.’ ”​—⁠Bugna 21:​1-5.

Ang matinumanon nga katawhan magabaton sa indi madugay sang bug-os nga benepisyo sang halad gawad ni Jesus. Mahanabo ini sa idalom sang paggahom sang Ginharian nga madugay na ginpangamuyo sang matarong, nga nagasiling: “Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on, sa duta, subong sang sa langit.” (Mateo 6:​9, 10) Sa langitnon nga Ginharian, si Jesucristo magagahom tubtob ibutang niya ang tanan nga kaaway sa idalom sang iya mga tiil, lakip ang pagkaulipon sa kasakit kag sa katapusan nga inaway, ang kamatayon.​—⁠1 Corinto 15:​25, 26.

Huo, kon tuhoy sa matinumanon nga katawhan, sa indi madugay ang Dios ‘magapahid sang tagsa ka luha sa mga mata, kag wala na sing kamatayon, kalisud, paghibi ukon kasakit pa.’ (Bugna 21:4) Nian ang masunod nga matagnaon nga mga pulong nga sa karon may espirituwal nga aplikasyon may literal man nga katumanan: “Pakamaayuha si Jehova, O kalag ko, . . . nga nagapatawad sang tanan mo nga kalautan, nga nagaayo sang tanan mo nga balatian.” “Ang pumuluyo indi magsiling: ‘Nagamasakit ako.’ ”​—⁠Salmo 103:​1-3; Isaias 33:⁠24.

San-o Matapos ang Kasakit?

Ang katapusan sang pagkaulipon sa kasakit malapit na. Huo, mahanabo ini sa aton adlaw, kag makita ini sini mismo nga kaliwatan. Ang katumanan sang tagna sang Biblia nagapakita nga nagakabuhi kita sa katapusan sining malaut nga sistema sang mga butang. Ang dimatupungan nga mga inaway, mga gutom, kag mga linog, subong man ang bug-os duta nga pagbantala sang maayong balita sang mga Saksi ni Jehova, bahin sang grupo nga “tanda” sang dikitaon nga “presensia” ni Jesus sa langitnon nga himaya sang Ginharian.​—⁠Mateo 24:​3-14, 21, 34.

Sa indi madugay, “ang nahaunang langit kag ang nahaunang duta,” ang organisado nga sistema sang mga butang ni Satanas nga Yawa upod ang iya pangulohan, magataliwan. Ang magamo nga “dagat” sang malauton nga katawhan indi na magaluntad. Busa nagatindog kita sa atangan sang ginapakamaayo sang Dios nga “bag-ong langit” nga pangulohan sa ibabaw sang “bag-ong duta,” ang matarong nga katilingban sang tawo. Sa sini “nagapuyo ang pagkamatarong.”​—⁠Bugna 21:​1; 2 Pedro 3:⁠13.

Bangod tuman na kalapit inang mga pagpakamaayo sa idalom sang bag-ong pangulohan​—⁠ang Ginharian sang Dios​—⁠maghunahuna. Pangitaa ang dugang nga ihibalo tuhoy sa bag-ong kalibutan nga wala sing kasakit kag kamatayon. Sa pagkamatuod, hulata ang ginpakamaayo nga adlaw nga tuman na kalapit karon nga ang tanan nga nagahigugma kag nagatuman kay Jehova nga Dios magapuyo sa isa ka kalibutan nga wala sing kasakit.