Malipayon nga mga Pamatan-on sa Pag-alagad kay Jehova

“Bisan ang bata makilala paagi sa iya mga buhat, kon bala ang iya paggawi putli kag matarong.”​—⁠HULUBATON 20:​11, New International Version.

1. Ano ang pila sang talalupangdon nga mga butang ang ginasiling sang Biblia nahanungod kay Samuel?

ANG bata pa nga si Samuel mahimo nga tres tubtob singko anyos lamang sang magsugod sia sa “pag-alagad” sa tabernakulo ni Jehova sa Silo. Ang isa sang iya mga katungdanan amo ang pagbukas sang “mga ganhaan sang balay ni Jehova.” Ang Biblia nagasiling nga si “Samuel nagdaku kag nangin kapin ka kalahamut-an gikan sa pagtamod ni Jehova kag sang mga tawo.” Sang daku na sia, ginpabalik niya ang Israel sa matuod nga pagsimba. Nag-alagad sia sa Dios sa “tanan nga adlaw sang iya kabuhi.” Bisan sang “tigulang kag ubanon” na sia ginlaygayan gihapon niya ang katawhan nga ‘kahadlukan si Jehova, kag . . . alagdon sia sa kamatuoran.’ Indi bala matahom kon ang mga tawo maghambal man sining maayong mga butang nahanungod sa imo subong sang ginasiling sang Biblia nahanungod kay Samuel?​—⁠1 Samuel 1:​24; 2:​18, 26; 3:​15; 7:​2-4, 15; 12:​2, 24.

2. Ano ang matun-an sang mga magamay sa mga miting sang katawhan ni Jehova karon?

² Kon ikaw isa sang mga Saksi ni Jehova ukon nagatambong ka sa ila Cristianong mga miting, manghulonghulong sa palibot sang Kingdom Hall nga sa diin ginatun-an ini nga leksion. Makita mo ang mga tawo sang tanan nga edad. Mahimo nga may yara mga tawo nga “tigulang kag ubanon” na. May yara man mga ginikanan, mga pamatan-on, mga magamay nga kabataan, kag mga lapsag pa gani nga ginakungkong pa lang. Nagatuon na bala ang mga pinakagamay? Huo. Pamangkuta lang sila nga ginadala anay sa mga miting sang gamay pa sila. Sugiran ka nila sing bunayag nga halin sa ila pagkabata, nakatuon sila sa pagtahod sa Dios, sa paghigugma sa iya katawhan, kag sa pag-apresyar sa mga duog diin ginasimba sia. Samtang nagaligad ang tion, ang mga magamay nagatuon sing dalayawon nga mga kamatuoran. Madamo nga pamatan-on, sa tapos mag-uswag sa ihibalo kag apresasyon, ang nangin bahin sang ‘mga pamatan-on nga lalaki kag mga ulay, mga tigulang nga lalaki kag mga bata nga lalaki’ nga ginpalig-on sang salmista sa “pagdayaw sa ngalan ni Jehova, kay ang iya ngalan lamang amo ang pinakamataas.”​—⁠Salmo 148:​12, 13.

3. Paano nga tuhay ang pagtamod sang mga pamatan-on nga may ihibalo sa Biblia sang sa mga pamatan-on nga wala sing ihibalo sa sini?

³ Kon ikaw isa ka pamatan-on nga regular nga ginapaupod sang mga ginikanan sa sini nga mga miting, ginpakamaayo ikaw sing pinasahi. Madamo sang iban pa nga mga pamatan-on ang ginatublag sang mga problema sang kalibutan. Ang iban mahimo nahadlok nga basi laglagon sang mga tawo ang duta. Nahibaluan mo nga indi ina pagtugutan sang Dios, nga indi niya pagtugutan ang mga tawo nga padayunon ang paglaglag sa sining matahom nga planeta. Sa baylo nga tugutan ina, ang Dios, suno sa Biblia, ‘magalaglag sa mga nagalaglag sang duta.’ Nahibaluan mo nga ang Biblia nagasaad nga ang isa ka masanag nga palaabuton sa matarong nga bag-ong kalibutan sang Dios malapit na.​—⁠Bugna 11:​18; Salmo 37:​29; 2 Pedro 3:⁠13.

Ang Imo Kaugalingon nga Pagtuo

4. Anong salabton ang ginahatag sa mga pamatan-on sang paghibalo sang mga dalanon sang Dios?

⁴ Sang primero, mahimo nga ang dalanon sang Cristianong kamatuoran ginatinguhaan lamang sang imo mga ginikanan. Ayhan nagakadto ka sa Cristianong mga miting bangod ginapaupod ka nila, kag mahimo nga nagapakigbahin ka sa diosnon nga pag-alagad bangod ginahimo man nila ini. Apang, samtang nagaligad ang tion, ang pag-alagad kag pagtuman kay Jehova mahimo mangin imo man kalipay. Bata pa si Samuel sang ginsugdan sia nga hanason sang iya iloy sa matarong nga dalanon, apang dapat niya ini sundon sing personal. Aton mabasa: “Bisan ang bata makilala paagi sa iya mga buhat, kon bala ang iya paggawi putli kag matarong.”​—⁠Hulubaton 20:​11, NIV.

5. (a) Daw ano ka daku ang bili sang Biblia? (b) Ano ang ginsiling ni Pablo kay Timoteo nahanungod sa importansia sang nasulat nga Pulong sang Dios?

⁵ Ginasugid sa aton sang Kasulatan kon ano ang luyag sang Dios sa aton. Maathag nga ginapakita sini sa aton kon paano sia mapahamut-an, kag nagaaman sa aton sing madamo nga impormasyon nga makahatag sa aton sing daku nga kaayuhan. Ginsingganan ni apostol Pablo ang iya pamatan-on nga kabulig nga si Timoteo: “Ang bug-os nga Kasulatan ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios mangin sangkol sing bug-os, nga nasangkapan para sa tagsa ka maayong buhat.”​—⁠2 Timoteo 3:​16, 17.

6. Ano ang ginasiling sang tulun-an sang Hulubaton nahanungod sa importansia sang ihibalo kag diosnon nga kaalam?

⁶ Ginasugo man kita sang Biblia nga “mamati sa disiplina kag mangin maalam.” Nagasiling ini nga ‘pakabahandion’ ang mga sugo sang Dios, ‘tawgon ang paghangop,’ kag ‘padayon nga pangitaon’ ang paghangop subong sang pagpangita mo sa bilidhon nga mga bahandi nga natago. Kon sundon mo ining laygay, nian, ‘mahangpan mo ang kahadlok kay Jehova, kag masapwan mo ang ihibalo gid tuhoy sa Dios.’ Masapwan man naton ining laygay: “Busa karon, mga anak ko, pamati sa akon; huo, malipayon ang mga nagasunod sang akon mga dalanon. Pamatii ang disiplina kag magmaalam, kag dili magpatumbaya. Malipayon ang tawo nga nagapamati sa akon . . . Kag ang makakita sa akon makakita sing kabuhi, kag makaagom sing maayong kabubut-on gikan kay Jehova.” Ginapabilihan mo bala ang Biblia sing subong sina kag ginahimo ang subong sina nga panikasog sa pagtuon sang mga butang nga ginasiling sini?​—⁠Hulubaton 2:​1-5; 8:​32-35.

Magtigayon sing Ihibalo

7. Ano ang labing importante nga mga butang nga dapat naton tun-an?

⁷ Nahibaluan gid sang iban nga pamatan-on ang tanan nga estadistika sa hampang ukon masugid nila sa imo ang tanan nahanungod sa ila paborito nga grupo sa musika. Nahapusan sila sa pagtuon sining mga butang kag madali nila madumduman bangod interesado sila sa sini. Apang ang labing importante nga pamangkot amo, Ano ang nahibal-an nila nahanungod sa Dios? Hunahunaa lamang ang iya nahimo. Ginhimo sang Dios ang uniberso. Gintagna niya kon ano ang himuon sang mga tawo kag kon ano ang matabo madugay pa antes matabo ang mga butang. Wala lamang ang Biblia nagasugid sa aton nahanungod sa Dios kundi nagatudlo man ini sa aton kon paano sia mapahamut-an. Ginapakita sini kon paano kita makatigayon sing malipayon nga pagkabuhi karon kag kon paano makatigayon sing kabuhi nga wala sing katapusan sa iya matarong nga bag-ong kalibutan. Indi bala kapin ina ka importante sang sa paghibalo kon sin-o ang nagdaug sa basketball ukon sa pagtuon sang mga ngalan sang mga musikero nga sa indi madugay malipatan na sang mga tawo?​—⁠Isaias 42:​5, 9; 46:​9, 10; Amos 3:⁠7.

8. Ano ang maayong huwaran ni Josias kag ni Jesus?

⁸ Sang si Hari Josias 15 anyos, “nagsugod sia sa pagpangita sa Dios ni David nga iya amay.” Sang si Jesus 12 anyos, nakit-an sia nga “nagalingkod sa tunga sang mga manunudlo” sa templo ni Jehova, nga “nagapamati sa ila kag nagapamangkot sa ila.”⁠a Pila man ang edad, imo bala, kaangay ni Josias kag ni Jesus, napalambo ang matuod nga interes sa pagtuon nahanungod sa mga butang nga nahimo sang Dios kag himuon pa?​—⁠2 Cronica 34:​3; Lucas 2:⁠46.

9. (a) Ano ang problema sang madamo nga pamatan-on? (b) Ano ang makahimo sang pagbasa kag pagtuon nga mas mahapos, kag napamatud-an mo bala ini sa imo kaugalingon?

⁹ Apang, mahimo magasiling ka: ‘Ang pagtuon isa ka mabudlay nga hilikuton.’ Madamo nga tawo, bata kag tigulang, ang wala pa makabasa sing tuman agod mangin mahapos ang pagbasa. Sa dugang nga pagbasa mo, dugang pa nga nagahapos ang pagbasa mo. Sa dugang nga pagtuon mo, dugang pa nga nagahapos ang pagtuon mo. Ginaangot mo ang bag-ong mga ideya sa mga butang nga nahibaluan mo na, sa amo madali mo mahangpan kag madumduman ini.

10. (a) Paano ikaw makatuon sing kapin pa gikan sa Cristianong mga miting? (b) Ano ang imo naeksperiensiahan sa sining bahin?

¹⁰ Ano ang makabulig sa imo sa pagtuon sing kapin pa nahanungod sa Dios? Ayhan mahimo mo nga mangin kapin ka regular sa pagtambong sa Cristianong mga miting. Makahanda ka bala sing abanse kag magpakigbahin gid? Halimbawa, makatigayon ka bala sing madalom pa nga nibel sang ihibalo gikan sa sining leksion paagi sa pagpangita kag pagbasa sang mga teksto sang Kasulatan nga ginsambit apang wala mabalikwat? Nagsulat ka bala sing isa ukon duha ka tinaga sa marhin agod pahanumdumon ka kon ano ang ginadugang sang tagsa sining mga teksto sa parapo ukon sa leksion? Batasan mo bala nga basahon ang dimagkubos isa sining mga teksto sa komento nga nagapakita sang imo apresasyon sa Makasulatanhon nga paghambalanay? Ang isa ka gulang sang kongregasyon nga regular nga nakatambong sa mga miting sa madamo nga tuig nagsiling: “Nabudlayan ako sa paghupot sang akon hunahuna sa bisan ano nga leksion nga wala ko mahandai, apang nalipay gid ako nga sundan ang isa ka topiko nga natun-an ko sing maayo.”

11. Paano ikaw makatuon sing kapin pa gikan sa napasad-sa-Biblia nga mga pamulongpulong, kag ngaa importante gid ini?

¹¹ Kon nagapamati ka sa mga pamulongpulong sa Biblia, nagakuha ka bala sing malip-ot nga nota agod mabuligan ka sa pag-analisar kon paano ginapasangkad ang pamulongpulong kag agod mahuptan ang imo hunahuna sa ginahambal? Ginapaanggid mo bala ang imo mabatian sa imo nahibaluan na agod mas madali mo ini mahangpan kag madumduman? Si Jesus nangamuyo: “Nagakahulugan ini sing kabuhi nga wala sing katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Indi bala ang ihibalo nga nagadul-ong sa kabuhi amo ang labing maayo nga ihibalo nga sarang mo matigayon? Talupangda ang ginasiling sang Biblia nahanungod sini: “Kay si Jehova nagahatag sing kaalam; gikan sa iya baba nagaguwa ang ihibalo kag paghangop. Kon ang kaalam magasulod sa imo tagipusuon kag ang ihibalo mangin kahamut-an sa imo kalag, ang ikasarang sa paghunahuna magabantay sa imo, ang paghangop magaamlig sa imo.”​—⁠Hulubaton 2:​6, 10, 11.

Mag-uswag sa Pag-apresyar

12. Ano ang pila sang talalupangdon nga mga butang nga nahimo sang Dios para sa aton?

¹² Ginaapresyar gid bala naton ang nahimo sang Dios para sa aton? Nagtuga sia sing matahom nga duta kag ginhanda ini para sa kabuhi. Gintuga niya ang aton nahauna nga mga ginikanan, sa amo natawo kita. Ginhimos niya para sa aton nga sakdagon kita sang aton mga pamilya kag sang mahigugmaon nga kongregasyon. (Genesis 1:​27, 28; Juan 13:​35; Hebreo 10:25) Ginpadala niya ang iya panganay nga Anak sa duta agod tudluan kita sing dugang pa nahanungod sa Iya Kaugalingon kag mag-aman sing gawad agod mangin posible ang kabuhi nga wala sing katapusan. Ginaapresyar mo gid bala inang matahom nga mga regalo? Ginapahulag ka bala sini nga batunon ang iya imbitasyon nga magtuon nahanungod sa iya kag alagdon sia?​—⁠Mateo 20:​28; Juan 1:​18; Roma 5:⁠21.

13. Ngaa ginabatyag mo nga interesado ang Dios sa mga indibiduwal?

¹³ Ang Manunuga sang uniberso interesado sa katawhan. Gintawag niya si Abraham nga “akon abyan,” kag nagsiling sia kay Moises: “Kilala ko ikaw sa ngalan.” (Isaias 41:​8; Exodo 33:12) Ginapakita sang tulun-an sang Bugna nga ang Dios may simbuliko nga tulun-an, ukon “linukot sang kabuhi,” nga nagaunod sang mga ngalan sang iya matutom nga mga alagad “kutob sang pagtukod sa kalibutan.” Malakip ayhan ang imo ngalan didto?​—⁠Bugna 3:​5; 17:​8; 2 Timoteo 2:⁠19.

14. Paano ang pagsunod sa mga prinsipio sang Dios makapauswag sang imo kabuhi?

¹⁴ Ang mga prinsipio sang Dios epektibo. Ang paghimo sang mga butang suno sa iya paagi nagabuhin sang madamo nga problema​—⁠imoralidad, pagkagiyan sa droga, alkoholismo, wala ginakinahanglan nga pagbusong, balatian sa kinatawo, kasingki, pagpatay, kag isa ka malawig nga listahan sang iban pa nga mga balatian. Ang pagsunod sa iya mga dalanon magabulig man sa imo sa pagsapo sing matuod nga mga abyan kag sa pagkabuhi sing malipayon pa nga kabuhi. Indi bala ina takus sa panikasog? (1 Corinto 6:​9-11) Bisan ang isa ka pamatan-on nga determinado na sa paghimo sang mga butang suno sa dalanon sang Dios makatigayon sing kapin nga kusog sa paghimo sang matarong. Ang Biblia nagasiling: “Sa isa nga matutom [si Jehova] magahikot sing matutom.” Nagapasalig man ini sa aton nga indi niya ‘pagbiyaan ang iya mga matutom’ ni ‘sikwayon ang iya katawhan.’​—⁠Salmo 18:​25; 37:​28; 94:​14; Isaias 40:​29-31.

Mag-uswag sa Pag-alagad sa Dios

15. Anong diosnon nga laygay ang ginhatag ni Solomon sa mga pamatan-on?

¹⁵ Ang imo bala mga tulumuron nasentro sa tagumatayon nga dumaan nga kalibutan ukon sa matarong nga bag-ong kalibutan? Nagapamati ka bala sa Dios, ukon nagapamati ka bala sa maalam-sa-kalibutan nga mga tawo nga nagasumpakil sa iya? Una bala sa Dios kag sa pag-alagad sa iya ang kalingawan, mataas nga edukasyon, ukon ang makonsumo sa oras nga sekular nga karera? Ginsulat sang maalam nga si Hari Solomon ang bug-os nga tulun-an nga Manugwali sang Biblia agod ipakita kon ano dapat ang unahon sa aton kabuhi. Sia naghinakop: “Dumduma, karon, ang imo Dakung Manunuga sa mga adlaw sang imo pagkapamatan-on, sa wala pa mag-abot ang malaut nga mga adlaw, ukon magpalapit ang mga tuig nga magsiling ka: ‘Wala ako sing kalipay sa ila.’ Ini amo ang katapusan sang butang, ang tanan nabatian na: Magkahadlok sa Dios kag tumana ang iya mga sugo. Kay amo ini ang bug-os nga katungdanan sang tawo.”​—⁠Manugwali 12:​1, 13.

16. Paano ang mga pamatan-on makatinguha para sa dugang pa nga mga pribilehiyo?

¹⁶ Ang tanan sang hamtong na nga Cristianong kauturan nga mga lalaki nga kilala mo​—⁠ang mga gulang, mga payunir, kag ang inyo mga manugtatap sa sirkito kag distrito⁠—​mga bata anay. Ano ang nagdul-ong sa mga pagpakamaayo nga ginaagom nila karon? Ginahigugma nila ang Dios kag luyag nila mag-alagad sa iya. Madamo sa ila sang pamatan-on sila ang naghimulos sang ekstra nga tion sa pagtigayon sing ihibalo kag eksperiensia. Nagtuon sila kag nagpakigbahin sa mga miting. Nagpakigbahin sila sa pagpanudlo, kag gintinguhaan nila ang dugang pa nga mga pribilehiyo​—⁠ang pagpayunir, pag-alagad sa Bethel, ukon ang iban pa makapaladya nga hilikuton. Indi sila ‘super nga mga pamatan-on’; may normal sila nga mga interes kag mga kabalaka subong nimo. Apang, gingamit nila ang ila kaugalingon nahisuno sa laygay: “Bisan ano ang inyo himuon, himua ninyo sing bug-os kalag kay Jehova, kag indi sa mga tawo.”​—⁠Colosas 3:​23; ipaanggid ang Lucas 10:​27; 2 Timoteo 2:⁠15.

17. Ano ang makabulig sa mga pamatan-on sa pag-uswag sa pag-alagad sa Dios?

¹⁷ Kamusta naman ikaw? Ginaapresyar mo bala ang diosnon nga mga butang? Nagapili ka bala sing mga abyan sa tunga sang mga tawo nga nagauna sang espirituwal nga mga butang? Ginapalig-on mo bala ang iban nga magpakigbahin upod sa imo sa Cristianong hilikuton? Nagaupod ka bala sa Cristianong serbisyo upod sa may edad na, kapin ka eksperiensiado nga mga utod agod makatuon ka sa ila, agod matilawan ang ila kalipay, kag agod mapalig-on ka sang ila maayong mga buhat? Madumduman sang isa ka Saksi ang adlaw, halos 20 ka tuig na ang nagligad, sang sa nahauna nga tion mapagsik nga gin-agda sia sang isa ka may edad na nga utod sa pag-alagad sa latagon. Siling niya, amo ini ang daku nga punto sa iya kabuhi: “Sa nahauna nga tion nagguwa ako bangod luyag ko gid, indi lamang bangod ginapaupod ako sang akon mga ginikanan.”

18. Ano ang mga butang nga dapat binagbinagon antes mo ipresentar ang imo kaugalingon para sa bawtismo?

¹⁸ Kon nagauswag ka sa paghimo sang mga butang suno sa dalanon sang Dios, mahimo nga sa indi madugay binagbinagon mo ang nahanungod sa bawtismo. Importante dumdumon nga ang bawtismo indi isa ka rito sang pagsaylo sa pagkahamtong. Wala sini ginapakita nga nagadaku ka na, ni isa ini ka butang nga dapat mo himuon bangod nahimo na ini sang imo mga abyan. Antes ka mangabay nga bawtismuhan, dapat nga may yara ka sadsaran nga ihibalo tuhoy sa kamatuoran kag magkabuhi nahisuno sa Pulong sang Dios. Dapat nga may yara ka bastante nga eksperiensia sa pagpaambit sina nga ihibalo sa iban kag nakahangop nga isa ini ka importante nga bahin sang matuod nga pagsimba. (Mateo 24:​14; 28:​19, 20) Dapat mo man mahibaluan nga sa tapos mo mahimo ining importante nga Cristianong tikang ginapaabot ka nga magkabuhi nahisuno sa matarong nga mga prinsipio sa moral sang Biblia.⁠b Sa imo tagipusuon, dapat nga gindedikar mo na ang imo kabuhi sa imo mahigugmaon nga langitnon nga Amay.​—⁠Ipaanggid ang Salmo 40:​8, 9.

19. San-o dapat magpabawtismo ang isa ka tawo?

¹⁹ Ang bawtismo isa ka tikang nga ginahimo mo kon ikaw nakadesisyon na sing malig-on nga bisan ano man ang matabo sa imo kabuhi, magaalagad ka sa Dios. Isa ini ka dayag nga tanda nga ikaw nakahimo sing bug-os, wala sing hawid, kag wala sing kondisyon nga dedikasyon kay Jehova paagi kay Jesucristo sa paghimo sang kabubut-on sang Dios. Madumduman sang isa ka Cristianong gulang ang adlaw, halos tunga sa siglo na ang nagligad, sang marealisar niya: “Dapat ako magdesisyon sa sini!” Si Michelle, isa ka pamatan-on nga Saksi nga ginbawtismuhan sa New­castle, Inglaterra, sang nagligad nga pila ka tuig, nagsiling: “Sa edad nga 13, narealisar ko nga dapat ko idedikar ang akon kabuhi kag magbawtismo; wala ako sing luyag himuon kundi ang mag-alagad sa Dios.”

20. (a) Anong maayong huwaran ang napahamtang na sang tignapulo ka libo nga mga pamatan-on? (b) Paano dapat tamdon ini nga tikang?

²⁰ Tignapulo ka libo sang mga pamatan-on ang nabawtismuhan sining karon lang. Gintun-an nila ang Pulong sang Dios kag ang iya mga dalanon, kag nian, paagi sa pagpabawtismo sa tubig, malipayon nga nagbuylog sila sa madamo sang mga may edad na sa dayag nga pagsimbulo sang ila dedikasyon sa Dios. Nahibaluan nila nga ang bawtismo indi ang katapusan kundi ang pamuno lamang sang dedikado nga dalanon sang pagkabuhi nga determinado sila nga magpadayon sa pag-alagad kay Jehova sing dayon.

[Mga footnote]

Paano Mo Sabton?

◻ Ngaa importante gid ang ihibalo tuhoy sa Pulong sang Dios?

◻ Paano ikaw makatuon sing kapin pa gikan sa Cristianong mga miting?

◻ Anong mga pagpakamaayo gikan sa Dios ang dapat magpahulag sa aton sa pagtuman sa iya?

◻ Paano ikaw mag-uswag sa pag-alagad sa Dios?

◻ San-o ang isa dapat magpabawtismo?