Mga Pamatan-on—Pabakura ang Inyo Handum nga Alagaron si Jehova

“Dumduma man ang imo Manunuga sa mga adlaw sang imo pagkapamatan-on.”—MAN. 12:1.

1. Ano nga pangagda ang ginpalab-ot sa mga kabataan sa Israel?

MGA 3,500 ka tuig na ang nagligad, ginsugo sang manalagna ni Jehova nga si Moises ang mga saserdote kag tigulang nga mga lalaki sa Israel: “Tipona ang katawohan, ang mga lalaki, ang mga babayi, kag ang mga magamay . . . , agud nga magpamati sila kag nga magtoon sila kag magkahadluk sa GINOO nga imo Dios, kag magbantay sa paghimo sang tanan nga polong sining kasogoan.” (Deut. 31:12) Talupangda kon sin-o ang ginsugo nga magtipon para sa pagsimba: ang mga lalaki, mga babayi, kag ang mga magamay. Huo, bisan ang mga bata nalakip sa ginsilingan nga magpamati, magtuon, kag magsunod sa panuytoy ni Jehova.

2. Paano ginpabutyag ni Jehova ang iya kabalaka sa mga Cristianong pamatan-on sang unang siglo?

² Sang unang siglo, padayon nga ginpakita ni Jehova ang iya kabalaka sa diosnon nga mga pamatan-on. Halimbawa, gin-inspirar niya si apostol Pablo nga ilakip sa pila sang iya sulat nga ginpadala sa mga kongregasyon ang espesipiko nga mga instruksion para sa mga pamatan-on. (Basaha ang Efeso 6:1; Colosas 3:20.) Ang mga Cristianong pamatan-on nga nag-aplikar sini nga laygay nangin suod sa ila mahigugmaon nga langitnon nga Amay kag nakabaton sang iya pagpakamaayo.

3. Paano ginapakita sang mga pamatan-on karon ang ila handum nga alagdon ang Dios?

³ Ang mga pamatan-on bala karon ginaagda man nga magtipon agod simbahon si Jehova? Huo! Gani, makalilipay gid para sa katawhan sang Dios nga makita ang madamo nga pamatan-on nga nagaalagad sa Dios sa bug-os nga kalibutan nga nagasunod sa laygay ni Pablo: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.” (Heb. 10:24, 25) Madamo nga kabataan ang nagaupod sa ila ginikanan sa pagbantala sing maayong balita sang Ginharian sang Dios. (Mat. 24:14) Dugang pa, linibo ka pamatan-on kada tuig ang nagapabutyag sang ila tinagipusuon nga gugma kay Jehova paagi sa pagpabawtismo kag nakabaton sang mga pagpakamaayo sa ila pagsunod kay Cristo.—Mat. 16:24; Mar. 10:29, 30.

Batuna Gilayon ang Pangagda

4. San-o mahimo batunon sang mga pamatan-on ang pangagda nga alagaron ang Dios?

⁴ Ang Manugwali 12:1 nagasiling: “Dumduma man ang imo Manunuga sa mga adlaw sang imo pagkapamatan-on.” Mga pamatan-on, pila dapat ang inyo edad nga puede na ninyo batunon ang mainit nga pangagda nga simbahon kag alagaron si Jehova? Wala sing espesipiko nga edad nga ginsambit sa Kasulatan. Gani, indi ka dapat magpangalag-ag ukon maghunahuna nga bata ka pa para mamati kag mag-alagad kay Jehova. Bisan ano man ang imo edad, ginapalig-on ka nga batunon ining pangagda kag indi na magpabuyanbuyan pa.

5. Paano mabuligan sang mga ginikanan ang ila kabataan nga mag-uswag sa espirituwal?

⁵ Madamo sa inyo ang nabuligan sang inyo ginikanan nga mag-uswag sa espirituwal. Ayhan kaangay kamo ni Timoteo sang panahon sang Biblia. Sang lapsag pa sia, gintudluan sia sang iya iloy nga si Eunice, kag sang iya lola nga si Loida tuhoy sa balaan nga mga sinulatan. (2 Tim. 3:14, 15) Mahimo nga amo man sini nga paghanas ang ginhimo sang imo mga ginikanan. Ginatun-an ka nila sa Biblia, ginatudluan kon paano mangamuyo, ginadala sa mga miting kag mga asembleya, kag ginaupod sa ministeryo sa latagon. Sa pagkamatuod, ang pagtudlo sa imo sang imo ginikanan sang mga dalanon sang Dios isa gid ka importante nga salabton nga nabaton nila halin kay Jehova. Ginapabaloran mo bala ang ila gugma kag kabalaka sa imo?—Hulu. 23:22.

6. (a) Suno sa Salmo 110:3, ano nga sahi sang pagsimba ang ginakahamut-an ni Jehova? (b) Ano karon ang aton binagbinagon?

⁶ Samtang nagadalagku kamo, luyag ni Jehova nga “mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios” pareho sang ginhimo ni Timoteo. (Roma 12:2) Kon himuon mo ina, magapakigbahin ka sa mga hilikuton sang kongregasyon indi bangod luyag ini sang imo mga ginikanan, kundi bangod luyag mo nga himuon ang kabubut-on sang Dios. Kon alagaron mo si Jehova sing kinabubut-on, mapahamut-an mo sia. (Sal. 110:3) Gani, paano mo mapakita nga luyag mo pabakuron ang imo handum nga pamatian si Jehova kag sundon ang iya panuytoy? Binagbinagon naton ang tatlo ka importante nga paagi nga mahimo mo ini. May kaangtanan ini sa pagtuon, pangamuyo, kag paggawi. Binagbinagon naton ang kada isa sini.

Kilalaha si Jehova Subong Isa ka Persona

7. Paano nagpahamtang si Jesus sing halimbawa subong estudyante sang Kasulatan, kag ano ang nakabulig sa iya sa paghimo sini?

⁷ Ang una nga paagi nga mapakita mo nga luyag mo palambuon ang imo handum nga alagaron si Jehova amo ang pagbasa sang Biblia adlaw-adlaw. Sa paghimo sini, mapun-an mo ang imo espirituwal nga kinahanglanon kag matigayon mo ang hamili nga ihibalo gikan sa Biblia paagi sa regular nga pagbasa sini. (Mat. 5:3) Nagpahamtang si Jesus sing maayo nga halimbawa. Isa ka bes, sang 12 anyos sia, nakita sia sang iya mga ginikanan sa templo, “nga nagalingkod sa tunga sang mga manunudlo kag nagapamati sa ila kag nagapamangkot sa ila.” (Luc. 2:44-46) Bisan bata pa si Jesus, interesado na sia sa Kasulatan kag may madalom na sia nga paghangop sa sini. Ano ang nakabulig sa iya? Wala sing duhaduha nga nakabulig sing daku ang paghanas sang iya iloy nga si Maria kag sang bana sini nga si Jose. Bangod mga alagad sila sang Dios, gintudluan nila si Jesus tuhoy sa Dios kutob pa sang lapsag sia.—Mat. 1:18-20; Luc. 2:41, 51.

8. (a) San-o dapat sugdan sang mga ginikanan nga ipatudok sa ila kabataan ang gugma sa Pulong sang Dios? (b) Magsugid sing isa ka eksperiensia nga nagapamatuod nga importante gid nga hanason ang mga bata kutob pa sa pagkalapsag.

⁸ Sing kaanggid, nakita sang mahinadlukon sa Dios nga mga ginikanan karon nga importante gid nga ipatudok sa tagipusuon sang ila kabataan ang kamatuoran sa Biblia kutob pa sa pagkalapsag. (Deut. 6:6-9) Amo ini ang ginhimo sang isa ka Cristianong utod nga si Rubi pagkabun-ag sang iya una nga anak nga si Joseph. Kada adlaw, ginabasahan niya si Joseph sang Ang Akon Libro Sang mga Sugilanon sa Biblia. Samtang nagadaku si Joseph, ginabuligan sia ni Rubi nga magsaulo sang mga teksto sa Biblia. Nakabenepisyo bala si Joseph sa sini nga paghanas? Sang makahibalo na sia maghambal, madamo nga kasaysayan sa Biblia ang masugid niya sa iya kaugalingon nga mga tinaga. Kag sang lima sia ka tuig, ginhatagan na sia sing bahin sa Teokratikong Eskwelahan Para sa Ministeryo.

9. Ngaa importante ang pagbasa sang Biblia kag ang pagpamalandong sa imo nabasahan?

⁹ Mga pamatan-on, kon luyag ninyo mag-uswag sa espirituwal, dapat basahon ninyo ang Biblia adlaw-adlaw samtang bata pa kamo. (Sal. 71:17) Ngaa ang pagbasa sang Biblia makabulig sa imo nga mag-uswag? Talupangda ang pangamuyo ni Jesus sa iya Amay: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios.” (Juan 17:3) Sa pagkamatuod, samtang nagadugang ang imo ihibalo tuhoy kay Jehova, labi mo sia nga makilala subong isa ka matuod nga Persona kag magatudok ang imo gugma sa iya. (Heb. 11:27) Gani, sa kada tion nga ginabasa mo ang Biblia, gamita ina nga kahigayunan nga makilala mo sing labi si Jehova. Pamangkuta ang imo kaugalingon: ‘Ano ang ginasugid sa akon sining kasaysayan tuhoy kay Jehova subong isa ka Persona? Paano ining kasaysayan sa Biblia nagapakita sang gugma kag kabalaka sang Dios sa akon?’ Ang paghinguyang sing tion sa pagpamalandong sa sini nga mga pamangkot magabulig sa imo nga mahibaluan kon ano ang panghunahuna kag balatyagon ni Jehova kag kon ano ang ginapatuman niya sa imo. (Basaha ang Hulubaton 2:1-5.) Kaangay ni Timoteo, ‘mabuyok ka nga patihan’ ang imo natun-an sa Kasulatan, kag mapahulag ka nga simbahon si Jehova sing kinabubut-on.—2 Tim. 3:14.

Kon Paano Ginapabakod sang Pangamuyo ang Imo Gugma kay Jehova

10, 11. Paano ang pangamuyo makabulig sa imo nga mapabakod ang imo handum nga alagaron ang Dios?

¹⁰ Ang ikaduha nga paagi nga mapabakod mo ang imo handum nga alagaron si Jehova sing bug-os tagipusuon amo ang pangamuyo. Ang Salmo 65:2, nagasiling: “O ikaw nga nagapamati sang pangamuyo! Sa imo magakari ang tanan nga unud.” Sa dumaan nga Israel, ang mga dumuluong mahimo makakadto sa templo ni Jehova kag makapangamuyo sa iya. (1 Hari 8:41, 42) Ang Dios wala sing ginapasulabi. Ang mga nagatuman sa iya mga sugo makasalig nga pamatian sila sang Dios. (Hulu. 15:8) Huo, ang “tanan nga unud” nagalakip sa inyo nga mga pamatan-on.

¹¹ Nahibaluan mo nga importante ang maayo nga komunikasyon sa matuod nga pag-abyanay. Nalipay ka nga isugid sa imo suod nga abyan ang imo mga ginahunahuna, mga kabalaka, kag balatyagon. Sing kaanggid, paagi sa imo tinagipusuon nga pagpangamuyo, nagapakigsugilanon ka sa imo Dakung Manunuga. (Fil. 4:6, 7) Gani, ipabutyag kay Jehova ang imo balatyagon subong sang pagpabutyag mo sa imo mahigugmaon nga ginikanan ukon suod nga abyan. Sa pagkamatuod, ginapakita sang aton mga pangamuyo kon ano ang aton ginabatyag tuhoy kay Jehova. Matalupangdan mo nga samtang nagabakod ang imo pagpakig-abyan kay Jehova, mas mangin hanuot man ang imo mga pangamuyo.

12. (a) Ngaa ang hanuot nga pangamuyo indi lamang basta pagsambit sing mga tinaga? (b) Paano mo mahibaluan nga si Jehova malapit sa imo?

¹² Apang dumduma nga ang hanuot nga pangamuyo indi lamang basta pagsambit sing mga tinaga. Nadalahig sa sini ang imo nasulod nga balatyagon. Sa imo mga pangamuyo, ipabutyag ang imo mainit nga gugma, tudok nga pagtahod, kag bug-os nga pagsalig kay Jehova. Kon mabatyagan mo nga ginasabat ni Jehova ang imo mga pangamuyo, marealisar mo nga si Jehova “malapit sa tanan nga nagapanawag sa iya.” (Sal. 145:18) Huo, si Jehova mangin suod sa imo, kag pabakuron ka niya nga pamatukan ang Yawa kag himuon ang husto nga mga desisyon sa imo kabuhi.—Basaha ang Santiago 4:7, 8.

13. (a) Paano ang pagpakig-abyan sa Dios nakabulig sa isa ka utod nga babayi? (b) Paano ang pagpakig-abyan sa Dios nakabulig sa imo sa pag-atubang sa mga pag-ipit sang imo katubotubo?

¹³ Binagbinaga kon paano si Cherie nakatigayon sang kusog sa iya suod nga kaangtanan kay Jehova. Sang hayskul sia, madamo sia sang nabaton nga award bangod sia ang nagapanguna sa ila klase kag sa sports. Sang naggradweyt sia sa hayskul gintanyagan sia sang scholarship para sa kolehiyo. “Makagalanyat gid ang ginatanyag nila sa akon,” siling ni Cherie, “kag ginapilit ako sang mga coach kag sang iban pa nga estudyante nga batunon ini.” Apang, narealisar niya nga ang pagkuha sang mataas nga edukasyon nagakinahanglan sing daku nga tion sa pagtuon kag sa pagpraktis sa sports—kag diutay na lang ang tion nga maggamit niya sa pag-alagad kay Jehova. Ano ang ginhimo ni Cherie? Nagsiling sia, “Sa tapos ako mangamuyo kay Jehova, wala ko ginbaton ang scholarship. Sa baylo, nag-alagad ako subong regular payunir.” Sa karon, lima ka tuig na sia nga payunir. “Wala gid ako sing ginhinulsulan,” siling niya. “Malipayon ako bangod nahibaluan ko nga ang akon desisyon nagapahamuot kay Jehova. Matuod gid nga kon unahon mo ang Ginharian sang Dios, ang tanan iban pa nga butang idugang sa imo.”—Mat. 6:33.

Ang “Tagiposoon nga Putli” Makita sa Imo Maayo nga Paggawi

14. Ngaa ang imo maayo nga paggawi importante kay Jehova?

¹⁴ Ang ikatlo nga paagi nga mapakita mo nga ginaalagad mo si Jehova sing kinabubut-on amo ang paagi sang imo paggawi. Ginapakamaayo ni Jehova ang mga pamatan-on nga nagapabilin nga matinlo sa moral. (Basaha ang Salmo 24:3-5.) Wala gin-ilog sang pamatan-on nga si Samuel ang imoral nga paggawi sang mga anak sang mataas nga saserdote nga si Eli. Ang maayo nga paggawi ni Samuel natalupangdan gid. Ang Biblia nagasiling: “Karon ang bata nga si Samuel nagdayon sa pagtubo kag nagdugang sa kahamuut sa GINOO kag sa mga tawo.”—1 Sam. 2:26.

15. Ano ang pila ka rason ngaa dapat mo huptan ang maayo nga paggawi?

¹⁵ Nagakabuhi kita sa kalibutan nga puno sang mga tawo nga ginasiling ni Pablo nga mga mahigugmaon sa kaugalingon, bugalon, malalison sa mga ginikanan, di-mapinasalamaton, maluib, mabangis, nagahabok sa pagpadayaw, mahigugmaon sa kinasadya sa baylo sang sa Dios. (2 Tim. 3:1-5) Bangod sini, mabudlay gid para sa imo nga magpabilin nga huwaran sa paggawi. Apang, sa kada tion nga ginahimo mo ang husto kag ginalikawan ang di-diosnon nga paggawi, ginapamatud-an mo nga dampig ka kay Jehova sa isyu sang bug-os uniberso nga pagkasoberano. (Job 2:3, 4) Mabatyagan mo ang matuod nga kalipay bangod ginabaton mo ang mahigugmaon nga pangagda ni Jehova: “Anak ko, magmaalam ka, kag pasadyaha ang akon tagiposoon, agud nga masabat ko sia nga nagapakahuya sa akon.” (Hulu. 27:11) Isa pa, kon nahibaluan mo nga ginakahamut-an ka ni Jehova magabakod ang imo handum nga alagaron sia.

16. Paano napahalipay sang isa ka utod nga babayi ang tagipusuon ni Jehova?

¹⁶ Subong isa ka tin-edyer nga nagaeskwela, ginasunod gid sang isa ka Cristianong utod nga si Carol ang mga prinsipio sa Biblia, kag ang iya maayo nga paggawi natalupangdan gid. Paano? Sang una, ginayaguta si Carol sang iya mga klasmeyt kay wala sia nagaentra sa kalibutanon nga mga selebrasyon kag mga seremonya bangod sa iya nahanas sa Biblia nga konsiensia. Sa pila sa sini nga mga okasyon, nakahigayon sia nga ipaathag ang iya pagpati sa iban. Pagligad sang mga tinuig, nakabaton si Carol sang isa ka kard halin sa iya klasmeyt sang una, nga nagasiling: “Madugay ko na ikaw nga ginapangita kay luyag ko ikaw pasalamatan. Ang imo maayo nga paggawi subong isa ka Cristianong pamatan-on, kag ang imo maisog nga panindugan sa mga selebrasyon, nakapalig-on gid sa akon. Ikaw ang pinakauna nga Saksi ni Jehova nga nakilala ko.” Ang maayo nga halimbawa ni Carol nagtudok gid sa iya klasmeyt amo nga sang ulihi nagtuon ini sa Biblia. Sa kard nga ginpadala niya kay Carol ginsugid niya nga kapin na sa 40 ka tuig sia nga nabawtismuhan. Kaangay ni Carol, kamo nga mga pamatan-on karon nga maisog nga nagasunod sa mga prinsipio sang Biblia mahimo man makapahulag sa iban nga kilalahon si Jehova.

Ang mga Pamatan-on nga Nagadayaw kay Jehova

17, 18. (a) Ano ang ginabatyag mo sa mga pamatan-on sa inyo kongregasyon? (b) Ano ang palaabuton sang mahinadlukon sa Dios nga mga pamatan-on?

¹⁷ Tanan kita nga bahin sang bug-os kalibutan nga organisasyon ni Jehova nakunyag gid nga makita ang linibo ka pamatan-on nga makugi nga nagapakigbahin sa matuod nga pagsimba! Ginapabakod sining mga pamatan-on ang ila handum nga simbahon si Jehova paagi sa pagbasa sang Biblia adlaw-adlaw, sa pagpangamuyo, kag sa paggawi nahisuno sa kabubut-on sang Dios. Ang huwaran nga mga pamatan-on nagapahalipay gid sa ila mga ginikanan kag sa bug-os nga katawhan ni Jehova.—Hulu. 23:24, 25.

¹⁸ Sa palaabuton, ang matutom nga mga pamatan-on malakip sa mga maluwas padulong sa ginsaad sang Dios nga bag-ong kalibutan. (Bug. 7:9, 14) Maagom nila didto ang wala tupong nga mga pagpakamaayo samtang nagadugang ang ila apresasyon kay Jehova, kag madayaw nila sia sing walay katubtuban.—Sal. 148:12, 13.

Mapaathag Mo Bala?

• Paano ang mga pamatan-on makapakigbahin sa matuod nga pagsimba karon?

• Ngaa kinahanglan ang pagpamalandong para makabenepisyo ka sa pagbasa sang Biblia?

• Paano ang pangamuyo makabulig sa imo nga mangin suod kay Jehova?

• Ano ang resulta kon ang isa ka Cristiano magpakita sing maayo nga paggawi?

[Retrato sa pahina 5]

Nagabasa ka bala sing Biblia adlaw-adlaw?