Nagatinguha Ka Bala?
“Kon ang isa ka tawo nagatinguha sa palangakuan sang pagkamanugtatap, maayo nga hilikuton ang iya ginahandum.”—1 TIMOTEO 3:1.
1. Ang pagtuman sa ano nga tulumuron ang may daku nga importansia sa mga Saksi ni Jehova?
ANG mga Saksi ni Jehova may nagakaigo nga mga tulumuron nga ginatinguhaan kag ginahimo sa diosnon nga paagi. Indi ini makapakibot, kay ang ila Dios may dungganon nga mga tulumuron kag pirme niya ginatuman ang iya mga katuyuan. (Isaias 55:8-11) Ang mga alagad ni Jehova indi dapat mangin kaangay sang mga tawo nga wala sing maayo nga tulumuron kag nagakabuhi nga wala sing kaayuhan nga ginahimo sa iban kundi sa ila kaugalingon lamang. Ang labi nga importante sa mga Saksi sang Dios amo ang pagtuman sa dungganon nga tulumuron nga ibantala ang mensahe sang Ginharian sa iban kag ipaambit sa iban ang nagahatag sing kabuhi nga ihibalo sa Pulong sang Dios.—Salmo 119:105; Marcos 13:10; Juan 17:3.
2. Ano nga tulumuron para sa Cristianong mga lalaki ang ginsambit ni Pablo sa 1 Timoteo 3:1?
2 Sa organisasyon ni Jehova, may yara man iban pa nga dungganon nga mga tulumuron. Ginsambit ni apostol Pablo ang isa sini sang magsulat sia: “Matuod ini nga pulong. Kon ang isa ka tawo nagatinguha sa palangakuan sang pagkamanugtatap, maayo nga hilikuton ang ginahandum niya.” Ina nga tawo luyag makahimo sing butang para sa kaayuhan sang iban. Ginahandum niya ang “maayo nga hilikuton,” indi ang kabuhi sang pagpahapos kag himaya. Ang isa pa ka badbad nagasiling: “Matuod ang silingon nga ang tawo nga nagapahamtang sang iya tagipusuon sa pagkalider may dalayawon nga ambisyon.”—1 Timoteo 3:1, Phillips.
Ang mga Katalagman Para sa mga Gulang
3, 4. Ngaa bantayan sang isa ka tawo nga nagatinguha sa pagkamanugtatap ang iya tagipusuon?
3 Sa anong paagi ang isa ka tawo nga nagapahamtang sang iya tagipusuon sa pagka-Cristianong manugtatap may “dalayawon nga ambisyon”? Ti, ang ambisyon isa ka mainit nga handum nga malab-ot ang isa ka partikular nga tulumuron. Matuod, may yara dungganon kag didungganon nga mga ambisyon. Apang kon ang isa ka tawo mapainubuson nga nagatinguha sa palangakuan sang pagkamanugtatap bangod luyag niya mag-alagad sa iban, ang iya pag-alagad ginahimo nga may matarong nga mga motibo kag mahimo magresulta sa espirituwal nga mga pagpakamaayo. Apang dapat niya bantayan ang iya tagipusuon.—Hulubaton 4:23.
4 Ang iban sang ambisyuso nga mga tawo nagatinguha sang himaya. Ang iban luyag maggahom sa ila mga isigkatawo. Ang kakagod sa kabantugan ukon gahom kaangay sang isa ka dunot nga gamot nga mahimo bangdan sang pagkatumba sang bisan matambok tulukon nga kahoy. Ang isa ka Cristiano mahimo magpadaug sa sining ambisyon nga may sayop nga motibo. (Hulubaton 16:18) “May ginsulat ako sa kongregasyon,” siling ni apostol Juan, “apang si Diotrefes, nga luyag mangin una sa ila [“nga luyag magpangulo sang tanan,” Phillips], wala nagabaton sa bisan ano halin sa amon nga may pagtahod. Gani, kon magkara ako, dumdumon ko ang ginahimo niya, nga nagawakal sing malain nga mga pulong batok sa akon. Kag sa wala pa maayawi sa sina, wala man niya pagbatuna ang mga kauturan, kag sila nga luyag magbaton sa ila ginadumilian niya kag ginatabog gikan sa kongregasyon.” (3 Juan 9, 10) Ang ambisyon ni Diotrefes dicristiano. Ang pagkamatinaastaason kag ambisyuso nga pagtinguha sing gahom sa ibabaw sang iban wala sing duog sa tunga sang matuod nga mga sumulunod ni Jesus.—Hulubaton 21:4.
5. Upod ang anong panimuot dapat atipanon sang mga manugtatap ang ila mga katungdanan?
5 Ang isa ka Cristianong manugtatap nga nagaatipan sang iya mga katungdanan nga may husto nga motibo indi magatinguha sa makagod nga mga ambisyon. Kabigon niya ining maayong hilikuton sang Cristianong pagkamanugtatap subong isa ka hinatag-sang-Dios nga pribilehiyo kag magabantay sa panong sang Dios “indi sa pilit, kundi sing kinabubut-on; indi tungod sa dibunayag nga daug, kundi sing malangkagon; indi nga nagapakaginuo sa mga panublion sang Dios, kundi nagahimo sang inyo kaugalingon nga [huwaran] sa panong.” (1 Pedro 5:2, 3) Huo, ang mga manugtatap dapat magbantay batok sa pagpalambo sing bugal kag sa pagtinguha nga abusuhan ang gahom.
6. Ngaa indi dapat magpakaginuo ang isa ka gulang sa ibabaw sang katawhan sang Dios?
6 Ang isa ka gulang indi dapat magpakaginuo sa ibabaw sang iban nga mga Cristiano, kay sia ila masigkamanugpangabudlay, indi ‘hari sang ila pagtuo.’ (2 Corinto 1:24) Sang gintinguhaan sang pila ka apostol ang kabantugan, si Jesus nagsiling: “Nahibaluan ninyo nga ang mga punuan sang mga pungsod nagapakaginuo sa ila kag ang ila mga kadalagkuan nagagamit sing awtoridad sa ila. Indi mangin subong sini sa inyo; kundi ang bisan sin-o sa inyo nga luyag mangin daku mangin alagad ninyo, kag ang bisan sin-o sa inyo nga luyag mangin nahauna mangin ulipon ninyo. Subong nga ang Anak sang tawo wala magkari nga alagdon kundi sa pag-alagad, kag sa paghatag sang iya kabuhi nga gawad sang madamo.” (Mateo 20:20-28) Ang isa ka gulang indi ang Pangulo nga Manugbantay kundi isa lamang ka kabulig nga manugbantay. Kon nagapakaginuo sia sa ibabaw sang panong, nagapakita sia sing espiritu sang pagkabugalon. Malain pa ang mangin resulta kon hayluhon niya ang iban nga buligan sia sa pagpadaku pa sang iya bugalon nga mga ambisyon. Ang hulubaton nagasiling: “Ang tagsatagsa nga bugalon sa tagipusuon kangil-aran kay Jehova. Bisan mag-uyatay sa kamot, indi sia makaluwas sa silot.”—Hulubaton 16:5.
7, 8. (a) Ngaa kinahanglanon para sa Cristianong mga gulang nga mangin mapainubuson? (b) Maghatag sing isa ka halimbawa sang isa ka mapainubuson nga gulang.
7 Busa ang Cristianong mga gulang dapat ‘magpaubos sang ila kaugalingon sa idalom sang gamhanan nga kamot sang Dios.’ Ang bugal nagaupang sa dalanon sang espirituwal nga pagkamapuslanon, kay ang mga mapainubuson lamang ang yara sa nagakaigo nga kahimtangan sang tagipusuon kag hunahuna sa paghimo sang balaan nga kabubut-on. “Ang Dios nagasumpong sang mga bugalon, apang nagahatag sia sing dibagay nga kaluoy sa mga mapainubuson.” (1 Pedro 5:5, 6) Huo, ginapakamaayo ni Jehova ang mga mapainubuson. Gikan sa sini nga sahi sang mga tawo nga ang kalipikado nga mga lalaki ginatangdo sa pag-alagad subong Cristianong mga gulang.
8 Ang modernong-adlaw nga maragtas sang mga Saksi ni Jehova puno sing mga kasaysayan sang mapainubuson nga pag-alagad sang diosnon nga mga indibiduwal. Halimbawa, binagbinaga ang malum-ok sing panghunahuna nga si W. J. Thorn, isa anay ka peregrino, ukon nagalakbay nga manugtatap, kag madugay na nagatrabaho sa Bethel. Tuhoy sa iya, ang isa ka Cristiano nagsiling: “Indi ko gid malipatan ang ginhambal ni Utod Thorn nga nakabulig sa akon tubtob karon. Nagsiling sia, kag ginabalikwat ko, ‘Sa kada tion nga ginapakadaku ko ang akon kaugalingon, ginadala ko ang akon kaugalingon sa pamusod, kon sa aton pa, kag ginasilingan: “Ikaw nga isa ka diutay nga yab-ok. Ano ang ginapabugal mo?” ’ ” Daw ano ka dalayawon nga kinaiya nga ipasundayag sang mga gulang kag sa iban pa! Dumduma, “ang balos sang pagpaubos kag sang kahadlok kay Jehova amo ang manggad kag dungog kag kabuhi.”—Hulubaton 22:4.
Ang Hinatag-sang-Dios nga Handum sa Pag-alagad
9. Ngaa masiling nga ang handum sa pag-alagad subong isa ka manugtatap hinatag sang Dios?
9 Ang handum bala sa pag-alagad subong manugtatap hinatag sang Dios? Huo, kay ang espiritu ni Jehova amo ang nagahatag sang motibasyon, kaisog, kag kusog sa paghatag sing balaan nga pag-alagad sa iya. Halimbawa, ano ang natabo sang mangayo sa pangamuyo ang ginhingabot nga mga sumulunod ni Jesus sing kasidla sa pagbantala? “Nag-uyog ang duog diin sila nagtipon sing tingob; kag napuno sila tanan sang balaan nga espiritu kag nagpamulong sila nga may kasidla sang pulong sang Dios.” (Binuhatan 4:27-31) Sanglit ang balaan nga espiritu nakapatubas sing subong sadto nga resulta, makapahulag man ini sa isa ka tawo sa pagtinguha.
10. (a) Ano ang isa ka rason kon ngaa ang isa ka Cristianong lalaki mahimo nga wala nagatinguha? (b) Kon hatagan kita sang Dios sing pribilehiyo sa pag-alagad, ano ang mapat-od naton?
10 Ngaa mahimo nga ang isa ka hamtong nga Cristiano wala nagatinguha? Mahimo nga sia isa ka espirituwal nga tawo apang nagabatyag nga indi sia sangkol. (1 Corinto 2:14, 15) Sa pagkamatuod, dapat kita maghupot sing maugdang nga pagtamod sa aton kaugalingon, nga ginakilala ang aton mga limitasyon. (Miqueas 6:8) Sa baylo nga maghunahuna sing matinaastaason nga kita ang kalipikado gid para sa isa ka salabton, maayo dumdumon nga ang “kaalam yara sa mga mapainubuson.” (Hulubaton 11:2) Apang dapat man naton marealisar nga kon ginahatag sa aton sang Dios ang isa ka pribilehiyo sang pag-alagad, magahatag man sia sa aton sing kusog nga kinahanglanon sa pagtuman sini. Subong ginsiling ni Pablo: “May kusog ako para sa tanan nga butang bangod sa iya nga nagapabakod sa akon.”—Filipos 4:13.
11. Ano ang sarang mahimo sang isa ka Cristiano nga wala nagatinguha bangod ginabatyag niya nga kulang sia sing kaalam sa paghatag sing laygay?
11 Ang isa ka Cristiano mahimo nga wala nagatinguha bangod ginabatyag niya nga kulang sia sing kaalam sa paghatag sing laygay. Ti, mahimo nga makatigayon sia sing kaalam paagid sa maukod pa nga pagtuon sang Pulong sang Dios, sa pagkamatuod dapat sia mangayo sa pangamuyo sing kaalam. Si Santiago nagsulat: “Kon may yara sa inyo nga nakulangan sing kaalam, papangayua sia sa Dios nga nagahatag sing maalwan sa tanan nga tawo kag wala nagabasol; kag hatagan sia sini. Apang papangayua sia nga may pagtuo, sa walay pangduhaduha, kay ang nagaduhaduha kaangay sang balod sang dagat nga ginapalid kag ginatumbo sang hangin. Kay indi maghunahuna inang tawo nga magabaton sia sing bisan ano nga butang kay Jehova; sia isa ka tawo nga duha sing painuino, mahuyang sa tanan niya nga paggawi.” (Santiago 1:5-8) Bilang sabat sa iya pangamuyo, ginhatagan sang Dios si Solomon sing “maalam kag mahinangpanon nga tagipusuon” nga naghatag sa iya sing ikasarang sa paghantop sa ulot sang maayo kag malain kon nagahukom. (1 Hari 3:9-14) Ang kaso ni Solomon pinasahi, apang paagi sa maukod nga pagtuon kag sa bulig sang Dios, ang mga lalaki nga gintugyanan sing salabton sa kongregasyon makalaygay sa iban sing matarong. “Si Jehova nagahatag sing kaalam; gikan sa iya baba nagaguwa ang ihibalo kag paghangop.”—Hulubaton 2:6.
12. Kon bangod sang kabalaka ang isa ka lalaki wala nagatinguha, ano ang makabulig sa iya?
12 Ang diutay nga kabalaka mahimo nga magpugong sa isa ka tawo sa pagtinguha. Ayhan ginahunahuna niya nga indi niya masarangan ang mabug-at nga salabton sang pagkagulang. Bisan si Pablo nagbaton: “May nagapalibog sa akon sa adlaw-adlaw, ang kabalaka sa tanan nga kongregasyon.” (2 Corinto 11:28) Apang nahibaluan sang apostol kon ano ang himuon kon nagakabalaka sia, kay sia nagsulat: “Dili kamo magkabalaka sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios, nga nagalabaw sa tanan nga paghangop, magatipig sang inyo mga tagipusuon kag inyo mga painuino paagi kay Cristo Jesus.” (Filipos 4:6, 7) Huo, ang pangamuyo kag pagsalig sa Dios makabulig sa pagpakanay sang kabalaka.
13. Paano mangamuyo ang isa ka lalaki kon nagapangalag-ag sia sa pagtinguha?
13 Kon magpadayon ang kabalaka, ang isa ka tawo nga nagapangalag-ag sa pagtinguha mahimo mangamuyo subong ni David: “Usisaa ako, O Dios, kag kilalaha ang akon tagipusuon. Tilawi ako, kag kilalaha ang akon nagatublag nga mga panghunahuna, kag tan-awa kon may bisan ano nga malaut nga dalanon sa akon, kag tuytuyi ako sa dalan nga dayon.” (Salmo 139:23, 24) Ano man ang sahi sang aton “nagatublag” ukon “nagakabalaka” nga mga panghunahuna, ang Dios makabulig sa aton sa paglandas sini agod nga mag-uswag kita sa espirituwal. (Tan-awa ang The New International Version.) Matahom ini nga ginpabutyag sa isa pa ka salmo: “Sang nagsiling ako: ‘Ang akon tiil nagakadalin-as,’ ang imo mahigugmaon nga kaluoy, O Jehova, nagpatindog sa akon. Sang madamo ang makatulublag nga mga panghunahuna sa sulod nakon, ang imo mga paglipay nagpasadya sang akon kalag.”—Salmo 94:18, 19.
Mag-alagad sing Malipayon Subong Amo ang Luyag ni Jehova
14. Ngaa ang isa ka lalaki nga wala nagatinguha dapat mangamuyo para sa balaan nga espiritu sang Dios?
14 Kon bangod sang kabalaka, pagbatyag nga indi sangkol, ukon kulang sing motibasyon, ang isa ka Cristiano nga lalaki wala nagatinguha, sa pagkamatuod nagakaigo gid nga mangamuyo sia para sa espiritu sang Dios. Si Jesus nagsiling: “Nian, kon kamo, nga malaut, makahibalo maghatag sing maayong mga dulot sa inyo mga anak, daw ano pa gid bala nga ang inyo Amay nga langitnon magahatag sang balaan nga espiritu sa mga nagapangayo sa iya!” (Lucas 11:13) Sanglit ang paghidait kag pagpugong sa kaugalingon lakip sa mga bunga sang espiritu, ining espiritu makabulig sa aton sa paglandas sang kabalaka ukon pagbatyag sing pagkadisangkol.—Galacia 5:22, 23.
15. Ano nga sahi sang mga pangamuyo ang makabulig sa mga kulang sing motibasyon sa pagtanyag sang ila kaugalingon para sa mga pribilehiyo sang pag-alagad?
15 Kamusta naman ang kakulang sing motibasyon? Subong bawtismado nga mga Cristiano, dapat kita mangamuyo nga buligan kita sang Dios sa paghimo sang nagapahamuot sa iya. Si David nagpakiluoy: “Ipakita sa akon ang imo mga dalanon, O Jehova . . . Palakta ako sa imo mga banas kag tudlui ako.” (Salmo 25:4, 5) Ang mga pangamuyo nga subong sini makabulig sa aton nga likawan ang sayop nga banas, kag makapangamuyo kita sa amo man nga paagi kon kulang kita sing motibasyon sa pagtinguha. Makapangabay kita kay Jehova nga pukawon sa aton ang handum nga batunon ang mga pribilehiyo sang pag-alagad. Sa kamatuoran, kon mangamuyo kita para sa espiritu sang Dios kag magsunod sa pagtuytoy sini, wala sing duhaduha nga gamiton naton ang aton kaugalingon kon itanyag sa aton ang mga pribilehiyo sang pag-alagad. Kay man, indi gid luyag sang mga alagad sang Dios nga pamatukan ang iya espiritu.—Efeso 4:30.
16. Ano nga panimuot ang nagahatag sing mabaskog nga motibasyon sa pagtinguha sang salabton sa kongregasyon?
16 Ginahuptan ang “panghunahuna ni Cristo,” nagakalipay kita sa paghimo sang kabubut-on sang Dios. (1 Corinto 2:16) Si Jesus may pareho nga panimuot sa salmista, nga nagsiling: “Nagakalipay ako sa paghimo sang imo kabubut-on, O Dios ko, kag ang imo kasuguan yari sa sulod sang akon tagipusuon.” (Salmo 40:8) Si Cristo nagsiling: “Yari karon! nagakari ako sa paghimo sang imo kabubut-on,” kag ginhimo niya ina tubtob sa kamatayon sa usok sang pag-antos. (Hebreo 10:9, 10) Ang handum nga himuon ang tanan nga mahimo sa pag-alagad kay Jehova nagahatag sing mabaskog nga motibasyon nga tinguhaan ang salabton sa kongregasyon.
Magtulok sa Palaabuton
17. (a) Ngaa ang mga lalaki nga wala karon nagaalagad sing subong ka bug-os sang una indi dapat magluya? (b) Ano ang labing daku nga pribilehiyo sa tanan?
17 Bangod sang problema sa lawas ukon iban pa nga mga rason, ang iban nga may importante anay nga mga katungdanan sa kongregasyon wala karon nagauyat sini nga mga pribilehiyo. Indi sila dapat magluya. Nahibaluan naton nga madamo sang matutom nga mga lalaki nga indi na karon makaalagad sing subong ka bug-os sang una ang nagatindog gihapon sing malig-on subong mga manughupot sing integridad. (Salmo 25:21) Sa pagkamatuod, ang mapainubuson kag madugay na nga mga gulang padayon nga mangin makapalig-on sa ila eksperiensia paagi sa pagpabilin sa hubon sang mga gulang. Bisan pa ginaupangan sila sang edad ukon balatian, indi sila kinahanglan maghalin sa pagkagulang. Samtang, kabay nga ang tagsatagsa ka Saksi ni Jehova maghigugma sa labing matahom nga pribilehiyo sa tanan, nga amo ang ‘paghambal nahanungod sa himaya sang pagkahari sang Dios’ subong mga sumalakdag sang iya balaan nga ngalan.—Salmo 145:10-13.
18. (a) Kon ang isa ka gulang ukon ministeryal nga alagad ginpahalin, ano ang mahimo nga kinahanglanon? (b) Anong maayong panimuot ang ginpakita sang isa ka gulang nga ginpahalin?
18 Kon ikaw isa anay ka gulang ukon ministeryal nga alagad apang karon wala na nagaalagad sa sina nga kapasidad, saligi nga ang Dios nagaulikid gihapon sa imo, kag ayhan hatagan ka niya sing wala ginapaabot nga mga pribilehiyo sa palaabuton. (1 Pedro 5:6, 7) Kon kinahanglan mo nga maghimo sing pila ka pagpasibu, mangin handa sa pagbaton sang imo sayop kag tadlunga ini sa bulig sang Dios. Ang iban nga ginpahalin sa pagkagulang nagpakita sing dicristiano nga panimuot, kag ang pila nangin diaktibo ukon nagtalikod sa kamatuoran. Apang daw ano ka maalamon nga mangin subong sang mga nagpakita sing maayo nga espiritu! Halimbawa, sang ang isa ka gulang nga nag-alagad sing tinuig sa Sentral nga Amerika ginpahalin, sia nagsiling: “Nasaklaw gid ako sang madula ko ang pribilehiyo nga ginpakabahandi ko sa madugay nga tion. Apang magapangabudlay ako sing lakas sa bisan anong paagi nga luyag ako gamiton sang kauturan kag manikasog ako nga mabawi ang akon mga pribilehiyo sang pag-alagad.” Sang ulihi, ini nga utod nakatigayon liwat sing pribilehiyo nga mag-alagad subong isa ka gulang.
19. Anong nagakaigo nga laygay ang ginahatag sa isa ka utod nga ginpahalin subong gulang ukon ministeryal nga alagad?
19 Kon ginpahalin ka subong isa ka gulang ukon ministeryal nga alagad, hupti ang mapainubuson nga espiritu. Likawi ang malain nga panimuot nga magadiskalipikar sa imo para sa palaabuton nga mga pribilehiyo. Ang diosnon nga espiritu pagatahuron. Sa baylo nga magluya, binagbinaga kon paano ginapakamaayo ni Jehova ang imo ministeryo ukon ang imo panimalay. Palig-una ang imo pamilya sa espirituwal, duawa ang nagamasakit, kag pabaskuga ang maluya. Labaw sa tanan, higugmaa ang imo pribilehiyo sa pagdayaw sa Dios kag pagwali sing maayong balita subong isa sang mga Saksi ni Jehova.—Salmo 145:1, 2; Isaias 43:10-12.
20. Paano makabulig ang hubon sang mga gulang sa isa anay ka manugtatap ukon ministeryal nga alagad?
20 Dapat marealisar sang hubon sang mga gulang nga ang pagpahalin mahimo bangdan sang kahuol sang isa anay ka manugtatap ukon ministeryal nga alagad, bisan pa kon boluntaryo nga ginabiyaan niya ang pribilehiyo. Kon wala sia madisfellowshipped, kag nakita sang mga gulang nga ang utod napung-awan, dapat sila maghatag sing mahigugmaon nga espirituwal nga bulig. (1 Tesalonica 5:14) Dapat nila buligan sia nga mahangpan nga kinahanglan sia sa kongregasyon. Bisan pa kon ginkinahanglan ang paghatag sing laygay, mahimo nga sa indi madugay ang mapainubuson kag mapinasalamaton nga tawo makabaton liwat sing dugang pa nga mga pribilehiyo sang pag-alagad sa kongregasyon.
21. Sin-o ang naghulat sa mga pribilehiyo sang pag-alagad, kag ano ang ginapanugda sa mga nagahulat sini karon?
21 Kon nagatinguha ka, mahimo nga magahulat ka sing madugaydugay antes ka makabaton sing dugang pa nga pribilehiyo sang pag-alagad. Mangin mapailubon. Si Moises naghulat sing 40 ka tuig antes sia gingamit sang Dios sa paghilway sa mga Israelinhon gikan sa pagkaulipon sa Egipto. (Binuhatan 7:23-36) Antes gintangdo subong salili ni Moises, si Josue madugay na nga nag-alagad subong iya alagad. (Exodo 33:11; Numeros 27:15-23) Si David naghulat sing pila ka tion antes sia ginpalingkod sa trono sang Israel. (2 Samuel 2:7; 5:3) Sanday Pedro kag Juan Marcos mahimo gid nga nakaeksperiensia sing panahon sang pagpaputli. (Mateo 26:69-75; Juan 21:15-19; Binuhatan 13:13; 15:36-41; Colosas 4:10) Gani kon wala ka sa karon sing mga katungdanan sa kongregasyon, mahimo nga ginahatagan ka ni Jehova sing tion nga madihon ka paagi sa pagtigayon sing dugang pa nga eksperiensia. Ano man ang kamatuoran, pangitaa ang bulig sang Dios samtang nagatinguha ka, kag mahimo nga pakamaayuhon ka niya sing dugang pa nga mga pribilehiyo sang pag-alagad. Samtang, panikasugi sing maukod nga makalipikar ka para sa salabton sa kongregasyon kag magpakita sing espiritu ni David, nga nagsiling: “Ang akon baba magapamulong sing pagdayaw kay Jehova; kag magpakamaayo ang tanan nga unod sang iya balaan nga ngalan sing dayon, tubtob sa walay katubtuban.”—Salmo 145:21.
Paano Mo Sabton?
◻ Batok sa anong mga katalagman dapat magbantay ang Cristianong mga gulang?
◻ Ano ang makabulig sa mga wala nagatinguha bangod sang kabalaka ukon pagbatyag nga indi sangkol?
◻ Ano ang makapahulag sa isa ka tawo sa pagtanyag sang iya kaugalingon para sa salabton sa kongregasyon?
◻ Upod ang anong panimuot dapat magtulok sa palaabuton ang mga gulang anay kag ministeryal nga mga alagad?
[Piktyur sa pahina 19]
Si W. J. Thorn nagpahamtang sing maayong huwaran subong isa ka mapainubuson nga gulang
[Piktyur sa pahina 21]
Kaangay ni Jesus, handa ka bala sa paghimo sang bisan ano nga posible sa pag-alagad kay Jehova?