Mga Utod nga Lalaki—Magsab-ug Para sa Espiritu kag Lab-uta ang mga Pribilehiyo!

“Sia nga nagasab-ug para sa espiritu magaani sang kabuhi nga walay katapusan.”—GAL. 6:8.

1, 2. Paano ang Mateo 9:37, 38 nagakatuman karon, kag nagaresulta ini sa ano nga kinahanglanon sa mga kongregasyon?

NASAKSIHAN mo sa karon ang mga hitabo nga mangin bahin sang kasaysayan nga indi na malimtan! Ang hilikuton nga ginpamulong ni Jesucristo madasig na karon nga nagauswag. “Ang alanyon bugana, apang pila lamang ang mamumugon,” siling ni Jesus. “Busa, pakiluoy kamo sa Agalon sang alanyon nga magpadala sia sang mga mamumugon sa iya alanyon.” (Mat. 9:37, 38) Ina nga mga pangamuyo ginasabat karon ni Jehova nga Dios sa tumalagsahon nga paagi. Sang 2009 nga tuig sang pag-alagad, ang kadamuon sang kongregasyon sang mga Saksi ni Jehova sa bug-os nga kalibutan nagdugang sing 2,031, kag nakalab-ot na sa 105,298. Sa aberids, 757 ka indibiduwal ang ginabawtismuhan kada adlaw!

² Bangod sining madasig nga pag-uswag kinahanglan gid ang kalipikado nga mga utod nga lalaki nga magpanguna sa pagtudlo kag sa pagbantay sa mga kongregasyon. (Efe. 4:11) Sa sulod na sang mga dekada nga nagagamit si Jehova sang kalipikado nga mga lalaki para mag-atipan sang mga kinahanglanon sang iya mga karnero, kag makasalig kita nga padayon niya ini nga himuon. Ang tagna sa Miqueas 5:5 nagapasalig sa aton nga sa katapusan nga mga adlaw, ang katawhan ni Jehova makatigayon sing “pito ka manugpahalab” kag “walo ka principe,” nga nagarepresentar sa bastante nga kadamuon sang kalipikado nga mga lalaki nga magapanguna sa ila.

3. Ipaathag kon ano ang buot silingon sang ‘pagsab-ug para sa espiritu.’

³ Kon isa ikaw ka lalaki kag bawtismado nga Saksi ni Jehova, ano ang makabulig sa imo nga magtinguha nga malab-ot ang mga pribilehiyo sa pag-alagad? Importante nga ‘magsab-ug ka para sa espiritu.’ (Gal. 6:8) Agod mahimo ina, dapat ang paagi sang imo pagkabuhi nagatugot sa balaan nga espiritu sang Dios nga manghikot sa imo kabuhi. Mangin determinado nga indi ‘magsab-ug para sa unod.’ Indi pagtuguti ang mga kasulhayan, pagliwaliwa, kag kalingawan nga magpaluya sang imo handum nga alagaron ang Dios. Ang tanan nga Cristiano dapat ‘magsab-ug para sa espiritu,’ kag sa ulihi, ang mga lalaki nga nagahimo sina mangin kalipikado para sa mga pribilehiyo sa kongregasyon. Bangod daku karon ang kinahanglanon para sa mga ministeryal nga alagad kag mga gulang, ini nga artikulo ilabi na nga gindesinyo para sa mga Cristianong lalaki. Gani mga kauturan nga lalaki, ginapalig-on namon kamo nga binagbinagon ini sing maayo upod ang pangamuyo.

Tinguhai ang Isa ka Maayo nga Buhat

4, 5. (a) Ginapalig-on ang bawtismado nga mga lalaki nga tinguhaan ang ano nga mga pribilehiyo sa kongregasyon? (b) Paano mapakita sang isa nga nagatinguha sia sa paglab-ot sing mga pribilehiyo?

⁴ Wala sang Cristianong lalaki ang awtomatiko nga ginatangdo subong manugtatap. Dapat niya tinguhaan ining “maayo nga buhat.” (1 Tim. 3:1) Nalakip sa sini ang pagbulig sa mga masigkatumuluo paagi sa kinabubut-on nga pag-atipan sang ila mga kinahanglanon. (Basaha ang Isaias 32:1, 2.) Ang isa ka tawo nga may husto nga motibo sa paglab-ot sa mga pribilehiyo indi ambisyuso. Sa baylo, may yara sia hanuot nga handum nga buligan ang iban.

⁵ Ang isa makalipikar subong ministeryal nga alagad ukon manugtatap paagi sa pagtinguha nga malab-ot ang mga kalipikasyon nga ginpahamtang sa Kasulatan. (1 Tim. 3:1-10, 12, 13; Tito 1:5-9) Gani, kon ikaw isa ka dedikado nga lalaki, pamangkuta ang imo kaugalingon: ‘Nagapakigbahin bala ako sing bug-os sa pagbantala nga hilikuton, kag nagabulig sa iban nga mahimo ini? Ginapalig-on ko bala ang akon mga masigkasumilimba paagi sa pagpakita sing hanuot nga interes sa ila kaayuhan? Kilala bala ako nga isa ka maayo nga estudyante sang Pulong sang Dios? Ginapauswag ko bala ang kalidad sang akon mga komento? Ginaatipan ko bala sing maayo ang mga asaynment nga ginahatag sa akon sang mga gulang?’ (2 Tim. 4:5) Ini nga mga pamangkot maayo gid nga binagbinagon.

6. Ano ang isa ka importante nga kinahanglanon para makalipikar ang isa sa mga pribilehiyo sa kongregasyon?

⁶ Ang isa pa ka paagi nga malab-ot sang isa ang mga pribilehiyo sa kongregasyon amo ang ‘pagpabaskog sang iya pagkatawo sa sulod paagi sa gahom sang espiritu’ sang Dios. (Efe. 3:16) Ang pagtangdo sa isa nga mangin ministeryal nga alagad ukon gulang sa Cristianong kongregasyon wala ginapaagi sa eleksion. Ini nga pribilehiyo matigayon suno sa espirituwal nga pag-uswag sang isa. Paano matigayon ini nga pag-uswag? Ang isa ka paagi amo ang “padayon nga paglakat suno sa espiritu” kag pagpalambo sang mga bunga sini. (Gal. 5:16, 22, 23) Samtang ginapakita mo ang espirituwal nga mga kinaiya nga kinahanglanon mo sa pagtuman sang dugang nga mga responsibilidad kag sa pag-aplikar sang mga laygay, “ang imo pag-uswag madayag sa tanan nga tawo.”—1 Tim. 4:15.

Kinahanglan ang Masinakripisyuhon nga Espiritu

7. Ano ang nadalahig sa pag-alagad para sa iban?

⁷ Kon luyag mo mag-alagad para sa iban dapat handa ka magpangabudlay kag magpakita sing masinakripisyuhon nga espiritu. Bangod ang Cristianong mga manugtatap nagaalagad subong mga manugbantay, apektado gid sila sa mga problema sang panong. Talupangda kon ano ang ginbatyag ni apostol Pablo sa iya responsibilidad subong manugbantay. Ginsilingan niya ang iya mga masigkatumuluo sa Corinto: “Gikan sa tuman nga kapipit-an kag kalisang sang tagipusuon nagsulat ako sa inyo nga may madamo nga luha, indi agod magkasubo kamo, kundi agod mahibaluan ninyo ang akon gugma ilabi na gid para sa inyo.” (2 Cor. 2:4) Ginapakita sini nga nadalahig gid ang balatyagon ni Pablo sa iya hilikuton.

8, 9. Maghatag sang mga halimbawa sa Biblia kon paano gin-atipan sang mga lalaki ang mga kinahanglanon sang iban.

⁸ Ang isa ka talalupangdon nga kinaiya nga ginapakita sang mga lalaki nga nagapangabudlay para sa mga alagad ni Jehova amo ang masinakripisyuhon nga espiritu. Halimbawa, indi gid naton mahunahuna nga si Noe magsiling sa iya pamilya: ‘Pahibalua n’yo lang ako kon human na ang arka para makaupod ako sa inyo.’ Si Moises wala nagsiling sa mga Israelinhon sa Egipto: ‘Tabuon ko na lang kamo sa Pula nga Dagat. Bahala na kamo kon paano kamo makalab-ot didto.’ Si Josue wala gid magsiling: ‘Pahibalua na lang ako kon mapukan na ang mga pader sang Jerico.’ Kag si Isaias wala magtudlo sa iban kag magsiling: ‘Yara sia! Ipadala sia.’—Isa. 6:8.

⁹ Ang panguna naton nga halimbawa nga nagpatuytoy sa espiritu sang Dios amo si Jesucristo. Kinabubut-on niya nga ginbaton ang iya asaynment nga mag-alagad subong Manunubos sang katawhan. (Juan 3:16) Wala ka bala natandog sa masinakripisyuhon nga gugma ni Jesus? Ang isa ka madugay na nga gulang nagsugid kon ano ang iya ginabatyag sa panong: “Napahulag gid ako sa ginsiling ni Jesus kay Pedro nga ‘bantayi ang akon gamay nga mga karnero.’ Sa sulod sang mga tinuig, nakita ko kon paano ang pila ka mahigugmaon nga tinaga ukon simple nga mga buhat sang kaayo makapalig-on gid sa isa. Ang pag-shepherding isa ka hilikuton nga nanamian ko gid.”—Juan 21:16.

10. Ano ang makapahulag sa Cristianong mga lalaki nga ilugon ang halimbawa ni Jesus sa pag-alagad sa iban?

¹⁰ Sa pag-atipan sa panong sang Dios, pat-od gid nga luyag ilugon sang dedikado nga mga lalaki sa kongregasyon ang panimuot ni Jesus nga nagsiling: “Paumpawan ko kamo.” (Mat. 11:28) Ang pagtuo sa Dios kag gugma sa mga kauturan amo ang nagapahulag sa Cristianong mga lalaki nga tinguhaan ining maayo nga buhat kag wala nila ginahunahuna nga mabudlay ini ukon isa ka daku nga sakripisyo. Apang, kamusta kon ang isa wala sing handum nga maglab-ot sang mga pribilehiyo? Mahimo bala mapalambo sang isa ka utod nga lalaki ang handum nga mag-alagad sa kongregasyon?

Palambua ang Handum nga Mag-alagad

11. Paano mapalambo sang isa ang handum nga mag-alagad sa iban?

¹¹ Kon nagabatyag ka nga indi mo masarangan ang paglab-ot sang isa ka pribilehiyo, nagakaigo lang nga mangamuyo ka sang balaan nga espiritu. (Luc. 11:13) Ang balaan nga espiritu ni Jehova magabulig sa imo nga malandas ang kabalaka nga imo nabatyagan. Ang hanuot nga handum nga mag-alagad nagagikan sa Dios, kay ang espiritu ni Jehova amo ang nagapahulag sa isa ka utod nga lalaki nga maglab-ot sang mga pribilehiyo kag nagahatag sa iya sing kusog agod makahimo sing sagrado nga pag-alagad. (Fil. 2:13; 4:13) Gani, nagakaigo lamang nga mangabay ka kay Jehova nga buligan ka nga magpalambo sing handum nga magbaton sing mga pribilehiyo sa pag-alagad.—Basaha ang Salmo 25:4, 5.

12. Paano matigayon sang isa ang kinahanglanon nga kaalam agod maatipan ang mga responsibilidad nga gintugyan sa iya?

¹² Ayhan nakita sang isa ka Cristiano nga ang pagtatap sa panong may yara kabudlayan amo nga indi na sia magtinguha sa paglab-ot sa mga pribilehiyo. Ukon mahimo magbatyag sia nga kulang sia sing kaalam agod tungdan ina nga responsibilidad. Kon amo sini ang iya ginabatyag, mahimo sia makatigayon sang kaalam paagi sa maukod nga pagtuon sa Pulong sang Dios kag sa mga publikasyon nga napasad sa Biblia. Mahimo man niya pamangkuton ang iya kaugalingon, ‘Nagapain bala ako sang tion sa pagtuon sa Pulong sang Dios, kag nagapangamuyo bala ako nga hatagan ako sing kaalam?’ Si disipulo Santiago nagsulat: “Kon may isa sa inyo nga kulang sang kaalam, padayon sia nga magpangayo sa Dios, kay maalwan Sia nga nagahatag sa tanan kag wala nagapangita sang sayop; kag ihatag ini sa iya.” (Sant. 1:5) Nagapati ka bala sa sining inspirado nga pinamulong? Ang pangamuyo ni Solomon ginsabat sang Dios kag ginhatagan sia sing “tagiposoon nga maalam kag mahangponon” agod makahibalo sia sang maayo kag malain kon maghukom sia. (1 Hari 3:7-14) Huo, ang kahimtangan ni Solomon indi kinaandan. Apang makasalig kita nga ang Dios magahatag man sing kaalam sa mga lalaki nga gintugyanan sang mga responsibilidad sa kongregasyon agod maatipan nila sing nagakaigo ang iya panong.—Hulu. 2:6.

13, 14. (a) Ipaathag kon ano ang nangin epekto kay Pablo sang “gugma ni Cristo.” (b) Ano dapat ang epekto sa aton sang “gugma ni Cristo”?

¹³ Ang isa pa nga makabulig sa aton nga mapalambo ang handum nga mag-alagad sa iban amo ang pagpamalandong sa tanan nga ginhimo ni Jehova kag sang iya Anak para sa aton. Halimbawa, binagbinaga ang 2 Corinto 5:14, 15. (Basaha.) Paano ‘ang gugma ni Cristo nagapahulag sa aton’? Ang gugma nga ginpakita ni Cristo paagi sa paghatag sang iya kabuhi para sa aton suno sa kabubut-on sang Dios talalupangdon gid, amo nga samtang nagadugang ang aton apresasyon sa sini, napahulag man ang aton tagipusuon. Ang gugma ni Cristo may daku gid nga epekto kay Pablo. Nagbulig ini sa iya nga likawan ang maiyaiyahon nga panimuot kag himuon nga tulumuron ang pag-alagad sa Dios kag sa iya isigkatawo sa sulod kag sa gua sang kongregasyon.

¹⁴ Ang pagpamalandong sa gugma ni Cristo sa katawhan magapahulag sa aton nga mangin mapinasalamaton. Sa paghimo sini, marealisar naton nga indi gid nagakaigo nga padayon kita nga ‘magsab-ug para sa unod’ paagi sa paghingamo sang makagod nga mga tulumuron kag sa pagkabuhi para paayawan lamang ang kaugalingon. Sa baylo, nagahimo kita sang mga pagbag-o agod mauna naton sa aton kabuhi ang pag-alagad sa Dios. Napahulag kita nga “magpaulipon” sa aton mga kauturan bangod sa gugma. (Basaha ang Galacia 5:13.) Kon ginatamod naton ang aton kaugalingon subong mga ulipon nga mapainubuson nga nagaalagad para sa kaayuhan sang dedikado nga mga alagad ni Jehova, pakig-angutan naton sila nga may dignidad kag pagtahod. Pat-od gid nga indi naton luyag ilugon ang mamulayon kag mahinukmanon nga panimuot nga ginapasanyog ni Satanas.—Bug. 12:10.

Ang Suporta sang Pamilya

15, 16. Ano ang papel sang mga katapo sang pamilya agod mangin kalipikado ang isa ka lalaki nga mangin ministeryal nga alagad ukon gulang?

¹⁵ Kon ang isa ka utod nga lalaki minyo kag may kabataan, ang kahimtangan sang iya pamilya ginabinagbinag kon bala kalipikado sia nga mangin ministeryal nga alagad ukon gulang. Huo, ang espirituwalidad kag reputasyon sang iya pamilya may daku nga epekto sa iya kalipikasyon. Ginapakita sini nga importante gid ang suporta sang pamilya kon ang bana kag amay nagatinguha nga mag-alagad sa kongregasyon subong ministeryal nga alagad ukon gulang.—Basaha ang 1 Timoteo 3:4, 5, 12.

¹⁶ Nahamuot gid si Jehova kon ang mga miembro sang Cristianong pamilya nagakooperar sa isa kag isa. (Efe. 3:14, 15) Kinahanglan nga mangin balanse ang ulo sang panimalay agod matuman niya ang iya mga responsibilidad sa kongregasyon kag sa amo man nga tion madumalahan ang iya panimalay sa “maayo nga paagi.” Gani, importante nga ang isa ka gulang ukon ministeryal nga alagad magtuon sing Biblia upod sa iya asawa kag kabataan agod ang tanan makabenepisyo sa ila Pangpamilya nga Pagsimba kada semana. Dapat man sia makigbahin sing regular sa pag-alagad sa latagon upod sa ila. Gani, importante gid nga may yara kooperasyon ang mga katapo sang pamilya sa ulo sang ila panimalay.

Makaalagad Ka Bala Liwat?

17, 18. (a) Kon ang isa ka utod nadulaan sing pribilehiyo, ano ang dapat niya himuon? (b) Ano dapat ang panimuot sang isa ka utod nga nag-alagad anay subong gulang ukon ministeryal nga alagad?

¹⁷ Ayhan isa ikaw anay ka gulang ukon ministeryal nga alagad apang sa karon indi na. Ginahigugma mo si Jehova kag nakahibalo ka nga nagaulikid gihapon sia sa imo. (1 Ped. 5:6, 7) Ginsilingan ka bala nga kinahanglan mo maghimo sang pila ka pagbag-o? Mangin handa sa pagbaton sing sayop kag manikasog nga bag-uhon ini paagi sa bulig sang Dios. Likawi nga maghinakit. Magpakita sing kaalam kag positibo nga panimuot. Ang isa ka gulang nga tinuig na nga nagaalagad apang nadulaan sang pribilehiyo nagsiling: “Determinado ako nga magpabilin nga regular sa pagtambong sa mga miting, sa pag-alagad sa latagon, kag sa pagbasa sang Biblia subong sang ginahimo ko sang gulang pa ako—ang tulumuron nga nalab-ot ko. Natun-an ko nga magbatas bangod naghunahuna ako nga sa sulod lang sang isa ukon duha ka tuig makabalik ako sa akon pribilehiyo. Apang mga pito ka tuig pa ang nagligad antes ako nakaalagad liwat subong gulang. Sadto nga tion daku gid ang nabulig sa akon sang mga pagpalig-on nga akon nabaton nga indi dapat magluya kundi magpadayon sa paglab-ot sang mga pribilehiyo.”

¹⁸ Kon pareho sini ang imo kahimtangan, indi ka dapat magluya. Pamalandungi kon paano ginapakamaayo ni Jehova ang imo ministeryo kag ang imo panimalay. Palig-una ang espirituwalidad sang imo pamilya, magbisita sa mga nagamasakit, kag palig-una ang mga maluya. Labaw sa tanan, pabalori ang imo pribilehiyo sa pagdayaw sa Dios kag sa pagbantala sang maayong balita sang Ginharian subong isa sa mga Saksi ni Jehova.a—Sal. 145:1, 2; Isa. 43:10-12.

Usisaa Liwat ang Imo Kahimtangan

19, 20. (a) Ano ang ginapalig-on nga himuon sang tanan nga bawtismado nga mga lalaki? (b) Ano ang pagabinagbinagon sa masunod nga artikulo?

¹⁹ Sa karon, mas madamo nga manugtatap kag ministeryal nga alagad ang kinahanglanon kon ipaanggid sang una. Gani, ginapalig-on ang tanan nga bawtismado nga mga lalaki nga usisaon liwat ang ila mga kahimtangan kag pamangkuton ang ila kaugalingon, ‘Kon indi ako isa ka ministeryal nga alagad ukon gulang, ano ayhan ang mga rason?’ Tuguti ang espiritu sang Dios nga magbulig sa imo nga matigayon ang husto nga pagtamod sa sining importante nga butang.

²⁰ Ang tanan nga miembro sang kongregasyon makabenepisyo sa masinakripisyuhon nga panikasog sang ila mga masigkatumuluo. Kon nagahimo kita sing maayo nga mga buhat nga wala nagapaabot sing balos, matigayon naton ang kalipay nga resulta sang pag-alagad sa iban kag sa pagsab-ug para sa espiritu. Apang, makita naton sa masunod nga artikulo nga indi naton dapat pagpasubuon ang balaan nga espiritu sang Dios. Paano naton ini malikawan?

[Nota]

Paano Mo Sabton?

• Ano ang ginapasalig sa aton sang tagna sa Miqueas 5:5?

• Ipaathag kon ano ang nadalahig sa masinakripisyuhon nga espiritu.

• Paano mapalambo sang isa ang handum nga mag-alagad sa iban?

• Daw ano ka importante ang kooperasyon sang pamilya agod ang isa ka lalaki mangin kalipikado sa pag-alagad subong ministeryal nga alagad ukon gulang?

[Mga Retrato sa pahina 25]

Ano ang dapat mo himuon agod malab-ot mo ang mga pribilehiyo?