Nasangkapan Para sa Misyonero nga Pag-alagad sa Katuigan 1990
ISA ka pinasahi nga dag-on ang nagasugod para sa misyonero nga pag-alagad. Bangod ginabuksan ang ganhaan sang kahigayunan sa madamong bag-ong mga alagyan, ang tanan nga matutom nga mga Saksi ni Jehova nalangkag sa pagpadayon padulong sa daku pa nga hilikuton.
Gani upod ang hanuot nga pagpaabot nga ang 24 ka estudyante sang ika-89 nga klase sang Watchtower School of Gilead nagtambong sa ila programa sa gradwasyon sang Septiembre 9, 1990. Nagtipon ang tumalambong nga kapin sa 5,000 ka imbitado nga mga bisita kag mga katapo sang panimalay Bethel para sa gradwasyon sining bag-ong mga misyonero, nga nakabaton na sing asaynment pakadto sa napulo ka pungsod. Halin sa Assembly Hall sang mga Saksi ni Jehova sa Jersey City, New Jersey, ang bug-os nga programa nabatian man sang mga nagtipon sa Brooklyn Bethel, Watchtower Farms, kag sa Watchtower Educational Center sa Patterson, New York.
Alas 10:00 s.a., si Theodore Jaracz, katapo sang Nagadumala nga Hubon sang mga Saksi ni Jehova kag tsirman sa sina nga adlaw, nagpaamba sa pag-umpisa. Pagkatapos sini, ang pangamuyo ginpangunahan ni Arthur Worsley sang panimalay Bethel sa Brooklyn. Nian ginpatuhuyan sang tsirman ang Binuhatan 10:33, diin ang Romanong senturyon nga si Cornelio nagsiling kay Pedro: “Yari kami sa atubangan sang Dios sa pagpamati sang tanan nga ginsugo ni Jehova sa imo.” Natalupangdan nga ang maragtason nga mga hitabo nga natabo sadtong panahon ni Pedro magabukas sing dalan para mabantala ang maayong balita sa katawhan sang tanan nga mga pungsod.
Si Philip D. Wilcox, halin sa Watchtower Farms, ang naghatag sang nahauna sa pito ka makapulukaw nga pamulongpulong. Halin sa Filipos 4:7, gingamit niya nga tema ang “Kabay nga ang Paghidait sang Dios Magabulig sa Inyo sa Inyo Asaynment.” Sia nagsiling: “Si Jehova nga Dios amo ang Tuburan sang tanan nga matuod nga paghidait. Nagaagom sia sing paghidait sa bug-os gid nga kahulugan kag wala nagaeksperiensia sing makapulung-aw nga paghimud-os, pangalag-ag, ukon pagkadimahim-os sa hunahuna. Gani, may kalinong kag paghidait nga nagapalibot sa dungganon nga presensia ni Jehova sa iya trono, subong sang ginapakita sang esmeralda nga balangaw nga nakita ni Juan sa palanan-awon. (Bugna 4:2, 3) Ang iya paghidait nagalab-ot tubtob sa tanan nga nagatugot sini nga magbulig sa ila. Tugutan bala ninyo ini?” Ginhatag ni Brother Wilcox ang duha ka importante nga bulig, ang pangamuyo kag ang kahanda sa paghulat kay Jehova. (Miqueas 7:7; Filipos 4:6) Wala sing butang nga ginapahanugot sang Dios ang makatuga sa aton sing mapinadayunon nga halit, siling niya.
Si Lloyd Barry, katapo sang Nagadumala nga Hubon, ang nagsunod sa tema nga “Padayon nga Nagayuhum.” Nagsugod sia paagi sa pagsiling, “Ang pagkadlaw amo ang maayo nga bulong.” Nadumduman niya ina nga prase bangod sadto anay sang 1955 amo ini ang topiko sa panghapin para sa nahauna nga guwa sang Awake! nga magasin sa Hapon nga hambal. Apang ano nga sahi sang pagkadlaw? Indi ang magahod kag walay pulos nga “kinadlaw sang buangbuang.” (Manugwali 7:6) Sa baylo, isa ini ka malipayon kag relaks nga kinadlaw sang mga misyonero kag sang iban pa nga nagabaton sa imbitasyon ni David nga pirme “magkasadya kay Jehova.” (Salmo 32:11) Nagsiling si Brother Barry nga walay sapayan sang daku nga pagtilaw, si Job pirme nga nagyuhum, kay nahibaluan niya nga ginahuptan niya ang integridad sa Dios. Ang mga misyonero nga dimationg walay sapayan sang mabudlay nga mga eksperiensia kaangay sang kay Job makabaton sing daku pa nga pagpakamaayo sa ulihi. (Job 29:24; 42:12) Ang humalambal naghinakop: “Padayon nga masako, padayon nga nagayuhum, kag maani man ninyo ang walay katapusan nga yuhum sang kahamuot ni Jehova.”
Ang masunod nga humalambal amo si Richard E. Abrahamson, nga nagpili sang tema nga “Tuguti ang Inyo Pagkarasonable nga Mahibal-an sang Tanan nga Tawo,” pasad sa Filipos 4:5. Suno sa sadsaran nga Griego, ang tinaga nga “rasonable” nagapaalinton sang kahulugan nga “pagpailob.” Ang iban nga mga misyonero may mga problema bangod lamang sang personal nga mga luyag. Nakibot ang isa sa kon paano ginakihad sang kaupod nga misyonero ang keso sa lamesa. Pagligad sang 22 ka tuig sang misyonero nga pag-alagad, ang isa nga nakibot nagsiling nga ang kalabanan nga problema nagaumpisa sa mga butang nga indi gid man importante kaangay sa kon paano ang isa nagakihad sing keso. Ang humalambal nagsiling: “Magtuon sa pagpasibu, kaangay sang isa ka kahoy sa panahon sang bagyo. Madamong benepisyo ang matigayon sa pagpailob, subong sang ikasarang nga mabatas ang mga pagtilaw kag magpabilin sa asaynment nga may kalinong sa hunahuna.”
Si Milton G. Henschel, sang Nagadumala nga Hubon, naghinun-anon sang tema nga “Ang Ganhaan nga Daku Padulong sa Mabungahon nga Pagpangabudlay Bukas.” Si Brother Henschel nagsiling nga si Jesus naghigugma sa mga tawo, nagkaluoy sa ila, kag nagtudlo sa ila sing madamong mga butang. Halin sa Efeso si apostol Pablo nagsulat sa mga taga-Corinto: “Nagabukas sa akon ang ganhaan nga daku padulong sa mabungahon nga pagpangabudlay, kag may madamo nga mga kasumpong.” (1 Corinto 16:8, 9) Walay sapayan sini nga pagsumpong, si Pablo nagtudlo sa awditoryum sang eskwelahan sa Tirano sa duha ka tuig, amo kon ngaa nga ang mensahe sang Ginharian naglapnag sa distrito sang Asia. (Binuhatan 19:9, 10) Ang bukas nga ganhaan nagdul-ong sa kadalag-an sang iya pagbantala. Ang kongregasyon sa Efeso nagapanghikot sa gihapon sang talipuspusan sang nahaunang siglo.—Bugna 2:1-7.
Si Jack D. Redford, instruktor sa Gilead, nagpamulongpulong sa tema nga “Padayon sa Pagtilaw Kon Ano Kamo.” (2 Corinto 13:5) Ang mga misyonero sang Gilead nagbukas sing bag-ong mga latagon kag nagpabakud sa mga kongregasyon nga nahuman na, nagabatas sing daku kag nagapakig-away sa siod nga ginagamit sang Yawa agod patalikdon sila. Kag ang mga bag-ohan padayon nga nagapakigbuylog sa ila. Paagi sa duha ka maathag nga eksperiensia, ginlaragway sang instruktor kon daw ano ka importante ang pagtilaw sa pagtuo. Nadula sang isa ka misyonero ang iya mga pribilehiyo sa tapos nga wala niya ginsapak sing matinaastaason ang nagapaandam nga laygay nahanungod sa sayop nga dalanon. Sa kabaliskaran, isa pa ang nagpabilin sa iya asaynment nga may kalipay, bisan pa nga sa iya nahaunang tatlo ka bulan didto, nagniwang sia katama bangod sang balatian nga nagresulta man sa pagkaupaw sang iya buhok kag sang iya pagkabungol. Didto gihapon sia pagligad sang 42 ka tuig kag, paagi sa mga pagtuon sa Biblia, nakabulig sa 156 ka tawo padulong sa bawtismo. Si Brother Redford naghinakop: “Sumpunga ang Yawa, kag sia magapalagyo sa inyo. Indi gid pagkagta ang iya siod. Padayon nga pamatud-i kon ano gid kamo. Si Jehova magatatap sa inyo.”
Sa masunod, isa pa ka instruktor, si Ulysses V. Glass, ang nagpamulong sa tema nga “Ang Kaalam Upod sa mga Maugdang.” (Hulubaton 11:2) Gingamit niya ang relo nga may baterya nga ginapaandar sang silak sang adlaw sa pag-ilustrar nga ang kapawa sang Pulong sang Dios magahupot sa aton nga “kargado.” “Apang,” siling niya, “ang ihibalo indi lamang ang nagahatag sing kaalam. Ginakinahanglan man sang Dios ang kaugdang.” (Miqueas 6:8) Ang kaugdang magatuytoy sa aton sa pagkahadlok sa Dios, kag “ang kahadlok kay Jehova amo ang pamuno sang kaalam.” (Hulubaton 9:10) Huo, dapat kita maghunahuna nahanungod sa aton kaugalingon; ang pagkondenar sa kaugalingon mahimo nga malaglagon. Ginhatagan ni Jehova ang iban sing pinasahi nga ikasarang, subong sang ginhimo niya sang ginpatindog ang tabernakulo, apang ang katutom sa kaugdang dapat pangabudlayan. “Sang nagatuon kamo,” siling ni Brother Glass sa klase, “nagpakita kamo sing pamatuod sang pagkamasaligan kag pagtahod. Ipakita man ninyo ini nga katutom sa inyo asaynment, kag ang Dios magapakamaayo sa inyo.”
Si Albert D. Schroeder, sang Nagadumala nga Hubon, ang naghatag sang pamulongpulong nga natig-ulohan “Nasangkapan sing Maayo Para sa Misyonero nga Pag-alagad sa Katuigan 1990.” Nagsugod sia: “Ang katuigan 1990 may magahod na nga umpisa. Madamong mga pungsod sa Nasidlangan nga Europa ang natay-ug. Sang nagligad nga pila ka bulan ang Pader sang Berlin ginbuksan. Ang The New York Times may pangulong dinalan: ‘Agosto 1990, ang Bulan nga Nagtay-ug sang Kalibutan.’ Gani, kamo nga mga naggradwar nagakabuhi sa tion sang pagtay-ug. Ginhanda bala kamo para sa sini sang inyo lima ka bulan nga pagtuon? Huo gid!” Nian ginsambit niya ang iban sang mabuligon nga bahin sang New World Translation of the Holy Scriptures—With References kag kon paano nga ang pagtuon sini naghimo sa Pulong sang Dios nga buhi. Ang isa pa ka epektibo nga instrumento nga nagsangkap sa mga estudyante amo ang “All Scripture Is Inspired of God and Beneficial,” karon sa iya rebisado nga 1990 nga edisyon. Ang bag-ong publikasyon nga Mankind’s Search for God isa man ka epektibo nga bulig para sa mga misyonero. Si Brother Schroeder naghinakop: “Gani nian, mga kauturan, magpasalamat kamo kay Jehova tungod sang inyo matahom kag hamili nga edukasyon—isa nga solido kag indi matay-ug. Lakat kamo upod ang pagpakamaayo ni Jehova kag magsalig sing bug-os sa iya kag sa aton makatilingala nga Lider, si Jesucristo. Ang mga pulong sa Kasulatan ginbugna gid sa pagkamatuod kag magagiya kag magatuytoy sa inyo sa misyonero nga hilikuton.”
Ginbasa ang panamyaw gikan sa 11 ka pungsod. Ginbaton sang mga estudyante ang ila mga diploma, kag ginbasa sang isa sa ila ang tinagipusuon nga sulat sa Nagadumala nga hubon kag sa panimalay Bethel.
Ang sesyon sa hapon naglakip sang ginpalip-ot nga pagtuon sa Ang Lalantawan, nga gindumalahan ni David L. Walker, katapos sang Watchtower Farms Committee. Nian gingamit sang mga estudyante ang makapapagsik nga tema nga “Ang Gahom sang Pangamuyo sa Pagbantala” sa pag-arte sang mga eksperiensia sa latagon. Ginpresentar sang isa ka lokal nga kongregasyon ang makapulukaw nga drama nga Ginhilway Agod Pauswagon ang Matuod nga Pagsimba, pasad sa pagbalik ni Esdras sa Jerusalem agod pauswagon ang matuod nga pagsimba. Si Brother Frederick W. Franz, ang presidente sang Eskwelahan sang Gilead, naghinakop paagi sa makatalandog nga pangamuyo.
[Piktyur sa pahina 24]
Ika-89 nga Klase nga Naggradwar sa Watchtower Bible School of Gilead
Sa listahan sa ubos, ang mga raya ginanumerohan halin sa atubangan pakadto sa likod, kag ang mga ngalan ginalista halin sa wala pakadto sa tuo sa kada raya. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.