Mangin Mapun-an sing Kalipay

“Ang mga disipulo padayon nga napun-an sing kalipay kag sing balaan nga espiritu.”​—⁠Binuhatan 13:52.

1. (a) Ano nga sahi sang bunga ang kalipay? (b) Dapat himayaon ang Dios bangod sa anong makalilipay nga aman?

KALIPAY! Ining Cristianong kinaiya ginlista nga ikaduha lamang sa gugma sa paglaragway ni Pablo sang mga bunga sang espiritu. (Galacia 5:​22-25) Kag ano ang nagapautwas sina nga kalipay? Amo ang maayong balita nga ginpahibalo sang anghel sang Dios sa kubos nga mga manugbantay sang nagligad nga kapin sa 1,900 ka tuig: “Yari karon! Ginabantala ko sa inyo ang maayong balita sang dakung kalipay nga mangin sa bug-os nga katawhan, kay natawo sa inyo karon nga adlaw sa siudad ni David ang Manluluwas, nga si Cristo nga Ginuo.” Nian nagpakita ang hubon sang mga anghel kag nagbuylog sa anghel sa malipayon nga pagdayaw sa Dios kag nagasiling: “Himaya sa kahitaasan sa Dios, kag sa duta paghidait sa tunga sang mga tawo nga iya nahamut-an.”​—⁠Lucas 2:​10-14.

2, 3. (a) Ngaa nagakaigo nga ginpadala sang Dios ang iya panganay nga Anak agod mangin Manunubos sang katawhan? (b) Sa anong iban pa nga mga paagi gintuman ni Jesus ang mga katuyuan sang Dios sang yari sia sa duta?

² Ang kahamuot ni Jehova sa mga tawo ginpabutyag sa paghatag sing kaluwasan paagi kay Cristo nga Ginuo. Ining panganay nga Anak sang Dios amo ang personipikasyon sang matuod nga kaalam kag ginlaragway subong nagasiling tuhoy sa iya Amay sa tion sang pagpanuga: “Nian ako nangin malig-on kag masaligan nga manugpangabudlay sa luyo niya, nian napuno ako sing kalipay sa adlaw-adlaw, nga nagakasadya sa atubangan niya sa tanan nga tion; nga nagakasadya sa iya mabungahon nga duta, huo ang akon bug-os nga kalipay yara kaupod sa mga anak sang mga tawo.”​—⁠Hulubaton 8:​30, 31, Rotherham.

³ Busa, nagakaigo gid nga ginpadala ni Jehova ining Anak, nga nahamuot sa mga anak sang mga tawo, agod mangin Manunubos sang katawhan. Kag paano ini magadala sing himaya sa Dios? Buksan sini ang dalanon agod matuman niya ang iya dungganon nga katuyuan nga pun-on ang duta sing matarong kag mahigugmaon sa paghidait nga mga tawo. (Genesis 1:28) Dugang pa, samtang sa duta, ipakita sining Anak nga si Jesus sa idalom sang labing mabudlay nga pagtilaw nga ang himpit nga tawo matutom nga makatuman kay Jehova subong Soberanong Ginuo, sa amo magabindikar sang kinamatarong sa paggahom sang iya Amay sa ibabaw sang Iya ­tinuga. (Hebreo 4:​15; 5:​8, 9) Ang paghupot ni Jesus sing integridad nagbilin man sing modelo agod sundon sing suod sang tanan nga ma­tuod nga Cristiano ang iya mga tikang.​—⁠1 Pedro 2:⁠21.

4. Ang pagbatas ni Jesus nagresulta sa anong daku nga kalipay, kag paano ini dapat magpalig-on sa aton?

⁴ Si Jesus nakasapo sing daku gid nga kalipay sa paghimo sang kabubut-on sang iya Amay, kag sa pagpaabot sang daku pa nga kalipay, subong ginapakita ni apostol Pablo sa Hebreo 12:​1, 2: “Magdalagan kita nga may pagbatas sang dalaganon nga ginabutang sa aton atubang, nga nagatulok sing hanuot kay Jesus nga Pangulo nga Ahente kag Manughimpit sang aton pagtuo. Kay tungod sa kalipay nga ginbutang sa iya atubang nagbatas sang usok sang pag-antos, nga nagtamay sang kahuluy-an, kag naglingkod sa tuo sang trono sang Dios.” Ano nga kalipay ini? Amo ini ang kalipay ni Jesus, indi lamang sa pagpakabalaan sang ngalan sang iya Amay kag paggawad sa katawhan gikan sa kamatayon kundi sa paggahom man subong Hari kag Mataas nga Saserdote samtang ginapasag-uli niya ang matinumanon nga katawhan sa dayon nga kabuhi sa paraiso nga duta.​—⁠Mateo 6:​9; 20:​28; Hebreo 7:​23-26.

5. Sin-o ang “kauturan” ni Jesus, kag sa anong tumalagsahon nga kalipay nagaambit sila?

⁵ Huo, ang Anak sang Dios pirme nga nakasapo sing kalipay sa pag-alagad sa katawhan. Kag nalipay man sia sa pag-alagad upod sa iya Amay sa pagpili sing grupo sang nagahupot-sing-integridad nga mga tawo nga iya ginatawag nga “kauturan” niya kag sa pagkapatay nila, banhawon sila padulong sa langit. Ini sila magasulod sa pinasahi nga kalipay kaupod ni Jesus. Ginalaragway sila nga “malipayon kag balaan,” kag sila “mangin mga saserdote sang Dios kag ni Cristo, kag magahari kaupod niya sing isa ka libo ka tuig.”​—⁠Hebreo 2:​11; Bugna 14:​1, 4; 20:⁠6.

6. (a) Anong makalilipay nga imbitasyon ang ginahatag sang Hari sa iya “iban pa nga mga karnero”? (b) Anong mga pribilehiyo ang ginaagom sang madamo sining mga karnero karon?

⁶ Dugang pa, ang isa ka dakung kadam-an sang “iban nga mga karnero,” nga ginapain sang nagagahom nga Hari sa iya tuo nga kamot sang kahamuot, nagabaton sang iya imbitasyon: “Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.” (Juan 10:​16; Mateo 25:34) Daw ano ka makalilipay nga pribilehiyo! Sa tunga sining magapanubli sang dutan-on nga bahin sang Ginharian, madamo bisan karon ang nagabaton sing mga salabton upod sa mga hinaplas, subong sang gintagna ni Jehova: “Ang mga tagaluwas magatindog kag magapahalab sang inyo mga panong sang katawhan, kag ang mga dumuluong mangin inyo mga manug-arado kag inyo mga manugtatap sang ubas. Apang kamo hingalanan nga mga saserdote ni Jehova; ang mga tawo magatawag sa inyo nga mga ministro sang Dios.” Ini sila tanan nagabuylog sa manalagna sang Dios sa pagsiling: “Sa wala sing kapaslawan magakalipay ako kay Jehova. Ang akon kalag magamalipayon sa akon Dios. Kay ginpanaptan niya ako sang mga panapton sang kaluwasan.”​—⁠Isaias 61:​5, 6, 10.

7. Ngaa pinasahi gid ining “adlaw” kutob sang 1914?

⁷ Nagakabuhi kita karon sa isa ka pinasahi gid nga adlaw. Kutob sang 1914 nagagahom na si Cristo subong langitnon nga Hari, nga ginlaragway sa Salmo 118:​24, 25: “Amo ini ang adlaw nga ginhimo ni Jehova; magakalipay kita kag magakasadya sa sini. O, Jehova, luwasa kami palihog karon! O Jehova, ihatag sa amon palihog karon ang kadalag-an!” Amo ini ang adlaw nga magadangat sa putukputukan kon laglagon na ni Jehova ang Babilonianhon nga relihion kag dalhon sa paghiusa ang nobya ni Cristo nga 144,000 ka kauturan sa ila langitnon nga Hari. Ang tanan nga katawhan sang Dios “magakasadya kag magakalipay sing tuman” sa sini. Magakasadya man sila samtang ang ila Mesianikong Hari nagapakig-away sa Armagedon agod luwason ang iya matutom nga pungsod pasulod sa iya matarong nga bag-ong kalibutan. (Bugna 19:​1-7, 11:16) Nagahatag bala si Jehova sing kadalag-an samtang ginawali sang iya katawhan ining makalilipay nga paglaum? Ipaathag ini sang masunod nga report.

Bug-os Globo nga Pag-uswag

8. (a) Paano ang kalipay sang balaan nga espiritu ginpakita sa report sa pahina 18 tubtob 21 sining magasin? (b) Ano ang pila sang talalupangdon nga mga punto sang report?

⁸ Ang modernong-adlaw nga mga Saksi ni Jehova ‘nagabugana sa paglaum sa gahom sang balaan nga espiritu.’ (Roma 15:13) Ginapakita ini sa tsart sa pahina 18 tubtob 21 sining magasin, nga sa diin ginapakita sing detalyado ang bug-os globo nga report sang naalagdan sa Ginharian para sa 1990. Daw ano ang kalipay naton nga makita ang bag-ong kataason sang 4,017,213 ka aktibo nga mga ministro sa latagon! Isa ini ka pag-uswag sing 77 porsiento sa sulod sang nagligad nga napulo ka tuig, samtang ang pagtipon sa mga karnero nagadasig sa 212 ka kadutaan sa bilog nga kalibutan. Pagligad sang 15 ka tuig, ang bawtismo nakalab-ot liwat sing bag-o nga kataason​—⁠301,518! May pila ka tumalagsahon nga kataason sang nabawtismuhan sa madamo nga kombension, labi na ang mga gintambungan sang mga Saksi gikan sa Sidlangan nga Europa. Madamo sa sini ang mga pamatan-on, nga nagahimutig sa sosyalistiko nga pangangkon nga ang relihion magataliwan upod sa mga tigulang.

9. (a) Ang maaga nga paghanas sang mga ginikanan nagadala sing anong makalilipay nga resulta? (b) Anong lokal ukon iban pa nga mga eksperiensia ang nagapamatuod sa sini?

⁹ Madamo nga pamatan-on ang nagasabat sang panawag sa Salmo 32:​11: “Magkalipay kay Jehova kag magkasadya, kamo nga mga matarong; kag magsinggit sa kalipay, tanan kamo nga matadlong sa tagipusuon.” Daw madamo nga ginikanan ang nagaaplikar sang laygay nga hanason ang ila mga magagmay “kutob sa pagkalapsag.” (2 Timoteo 3:15) Ginagamit sing mapuslanon ang mga literatura kag mga cas­sette tape nga gin-aman para sa sining mga bata. Kon mag-eskwela na ining mga bata, sa indi madugay magahatag sila sing matahom nga panaksi, subong halimbawa sang otso-anyos nga Haponesa nga bata nga babayi nga nagreport: “Sa tapos sang bakasyon sang tig-ilinit, ginpalapitan ko ang akon manunudlo kag ginpamangkot sia: ‘Ginduaw mo bala ang lulubngan sang imo amay sa tion sang bakasyon?’ Nagsabat sia: ‘Huo, mapinalanggaon gid ang akon amay, kag ginaduaw ko ang iya lulubngan kada tuig.’ Nagsiling ako: ‘Kon magtuon ka sang Biblia kag sundon mo ang mga panudlo sang Dios, makita mo liwat ang imo mahigugmaon nga amay sa isa ka dutan-on nga paraiso.’ Dayon ginhatagan ko sia sing Ang Akon Libro sang mga Sugilanon sa Biblia. Ginabasa karon sang amon manunudlo ang isa ka kapitulo sining libro sa bug-os nga klase sa tion sang panyaga kada semana.”

10. Anong maayong katuyuan ang natuman sang libro nga Young People Ask, kag ano ang pila ka halimbawa?

¹⁰ Ginagamit man sing mapuslanon sang mga tin-edyer ang libro nga Questions Young People Ask​—⁠Answers That Work, para sa pribado nga pagtuon kag sa pagpanaksi sa iban nga mga pamatan-on. Gin-apresyar man sang mga ginikanan ini nga libro. Namat-od ang isa ka utod nga babayi sa Switz­erland, nga nagpalista subong aux­iliary nga payunir, nga duawon ang mga ginikanan sang mga kaklase sang iya bata. Naghatag ini sing dalan para sa matahom nga paghambalanay upod sa madamo nga mga ginikanan, kag 20 ka libro (ang kalabanan Young People Ask) kag 27 ka magasin ang ginbilin sa ila. Sang ginpahamtang sang isa ka nagaeskwela nga bata nga babayi sa Trinidad ini nga libro sa iya manunudlo, gin-atipan ini sang iya iloy, kag nakapahamtang sia sing 25 ka kopya sa tunga sang 36 ka manunudlo. Ginpadayon niya ini sang masunod nga bulan nga ginahatagan sing pinasahi nga igtalupangod ang mga ginikanan nga kilala niya, kag nakapahamtang sia sing 92 pa ka libro kag nakasugod sing bag-o nga mga pagtuon sa Biblia sa puluy-an. Sa Korea, ginagamit sang isa ka manunudlo sa mid­dle ­school ang libro nga Young People Ask sa paghatag sing malip-ot nga mga sermon tuhoy sa mga topiko subong sang “Paano Ko Mapauswag ang Akon mga Grado?” kag “Paano Ako Makigbagay sa Akon Manunudlo” kag dayon ginatanyag niya ang libro. Sa tapos ginbaton sang mga estudyante ang 39 ka libro, nagreklamo ang iban nga mga ginikanan. Apang gin-usisa sang prinsipal ang isa ka kopya, nagsiling sia nga “matahom” ini, kag nag-order man sia sing isa para sa iya anak nga babayi.

Ang Labing Maayo nga Edukasyon

11, 12. Ano ang pila ka pamatuod sa kamatuoran nga ang mga publikasyon sang Watch Tower Society nagahatag sing labing maayo nga edukasyon?

¹¹ Ginaapresyar man sang madamo ang edukasyonal nga balor sang aton mga magasin, subong halimbawa sang isa ka eskwelahan sa E.U. nga nag-order sing 1,200 ka kopya sang July 22, 1990, nga Awake! (nga nagabuyagyag sang pagkagiyan sa ­crack) agod gamiton sa mga klase sini. Dugang pa, ang huwaran nga paggawi sa eskwelahan sang mga anak sang mga Saksi ni Jehova padayon nga nagahimo sing maayo nga impresyon. Sa isa ka magahod nga klase sa Thai­land, gintawag sang manunudlo ang 11-anyos nga si Racha sa atubangan sang klase kag gindayaw sia sa iya paggawi, nga nagasiling: “Ngaa indi ninyo tanan sundon sia subong huwaran? Maukod sia magtuon kag mabuot.” Nian nagdugang pa sia: “Ti, sa banta ko dapat kamo mangin mga Saksi ni Jehova kaangay ni Racha agod mapauswag ninyo ang inyo paggawi.”​—⁠Ipaanggid ang Hulubaton 1:​8; 23:​22, 23.

¹² Ang isa ka pamatan-on nga utod nga babayi sa Do­min­ican Re­pub­lic nagsulat: “Sang kuwatro anyos pa lang ako, manuggradwar na ako sadto sa isa ka relihioso nga pre­school, nga sa diin nakatuon ako sa pagbasa kag sa pagsulat. Subong regalo, ginhatagan ko ang madre nga akon manunudlo sing libro nga Mahimu Ka Mabuhi sing Dayon sa Paraiso sa Duta upod ang mensahe: ‘Nagapasalamat gid ako nga gintudluan mo ako sa pagbasa kag sa pagsulat. Ginahandum ko nga kuntani mahangpan mo man ang akon pagtuluuhan kag makatigayon sang akon paglaum nga mabuhi sing dayon sa sini nga duta kon himuon na ini nga isa ka paraiso.’ Bangod sini, ginpauntat ako sa pag-eskwela. Pagligad sang walo ka tuig, nakita ko liwat ini nga manunudlo. Ginsugid niya kon paano, walay sapayan sang daku nga pagpamatok sang pari, nabasa niya ang libro. Nagsaylo sia sa kapital, nga sa diin nakatuon sia sang Biblia upod sa isa ka Saksi. Ginbawtismuhan sia sa ‘Putli nga Hambal’ nga Distrito nga Kombension kaupod nakon.” Subong sang gintagna, ang kaalam mahimo maghalin bisan sa “baba sang kabataan”!​—⁠Mateo 21:​16; Salmo 8:​1, 2.

13. Ano ang reaksion sang madamo nga tin-edyer sa laygay ni Solomon, kag paano ini ginapakita sa bug-os kalibutan nga report?

¹³ Naghatag si Solomon sing makapalig-on nga laygay: “Magkalipay, pamatan-on nga lalaki, sa imo pagkapamatan-on, kag maglipay sa imo ang imo tagipusuon sa mga adlaw sang imo pagkapamatan-on, kag maglakat sa mga dalanon sang imo tagipusuon.” (Manugwali 11:9) Makalilipay nga makita karon ang madamo gid sang mga kabataan sang mga Saksi ni Jehova nga nagaaplikar sining mga pulong, nga nagagamit sang ila pagkatin-edyer sa paghanda para sa isa ka kabuhi sang bug-os tion nga pag-alagad kay Jehova kag nagasulod sa sining labing dungganon sa tanan nga karera sa paggradwar nila sa hayskol. Ang mga payunir padayon nga nagadugang sing madasig, kay 821,108 ang nagreport sa sulod sang tuig. Upod sa 11,092 ka kauturan nga mga lalaki kag mga babayi nga nagaalagad ­sa Bethel, nagarepresentar ina sa 21 porsiento sang kabilugan nga mga manugbantala!

14. Ano ang ginaamot sang aton kauturan nga babayi, kag takus sila sang ano nga pagdayaw?

¹⁴ Makawiwili nga sa madamo nga kadutaan, subong sang Estados Unidos, mga 75 porsiento sang tanan nga payunir nga manugbantala mga utod nga babayi, nga nagahatag sing puwersa sa mga pulong sang Salmo 68:​11: “Si Jehova mismo nagasiling; ang mga babayi nga nagabantala sing maayong balita isa ka daku nga kadam-an.” Dapat dayawon ang aton kauturan nga babayi kay ginahimo nila ang mas daku nga bahin sang hilikuton sa latagon. Ang ila lantip nga pagpanudlo sa mga pagtuon sang Biblia sa mga puluy-an nagadul-ong sang madamo sa kamatuoran, kag dapat man dayawon ang minyo nga mga utod nga babayi nga matutom nga nagasakdag sa ila bana nga may madamo nga katungdanan sa kongregasyon.​—⁠Hulubaton 31:​10-12; Efeso 5:​21-25, 33.

Nagauswag ang Edukasyon sa Biblia

15. (a) Paano ang iban nga mga pungsod nga nalista sa bug-os kalibutan nga report naglabaw sa mga pagtuon sa Biblia sa puluy-an nga hilikuton? (b) Anong mga eksperiensia ang masugid ninyo, nga nagapakita kon daw ano ka mabungahon ang mga pagtuon sa Biblia?

¹⁵ Ang hilikuton sa pagtudlo sang Biblia nagauswag, kay ang pagtuon ginadumalahan sa bug-os nga kalibutan sa promedyo nga 3,624,091 ka duog kada bulan. Ang kamatuoran sang Biblia makapabag-o sang mga personalidad, subong sang ginapakita sang isa ka report gikan sa New Zea­land. Sang maaga nga bahin sang Enero 1987, ang isa ka lalaki gintapok sa New Zea­land gikan sa Aus­tralia sa tapos mabilanggo sing 25 ka bulan bangod sang pagpangawat kag pagpalsipikar. Nagiyan sia sa droga kag nagabaligya man sia sini sing kapin sa 17 ka tuig. Sang masunod nga tuig ang iya asawa nagtuon sang Biblia upod sa mga Saksi ni Jehova, kag samtang nagauswag ang iya ihibalo, natalupangdan niya ang daku nga pagbalhin sa iya paggawi. Nangin maayo sia nga asawa kag iloy. Sa pagpamilit sang iya asawa, nagtambong sia sa isa ka sirkito nga asambleya sang Hunyo 1989. Sa tapos sadto, nagbaton sia sing pagtuon sa Biblia, kag nagsugod sia sa paghimo sing daku nga mga pagbag-o sa iya panagway kag estilo sang pagkabuhi. Sila tanan nga pito sa ila pamilya nagsugod sa pagtambong sa mga miting. Ginbawtismuhan sia sang Enero 1990 subong isa nga nagsunod sa matahom gid nga laygay ni Pablo sa Efeso 4:​17-24.

16. (a) Paano ang report sang 1990 nga Memoryal isa ka tuburan sang kalipay? (b) Ano nga pagkadagmit ang matalupangdan, kag anong panikasog ang dapat naton himuon agod makabulig?

¹⁶ Ang isa ka talalupangdon nga bahin sang report sang tuig amo ang pinakamadamo nga nagtambong nga 9,950,058 sa pagsaulog sang Memoryal, nga ginhiwat sang Martes, Abril 10, 1990. Kapin sa 70 sa 212 ka pungsod ang nagreport sing tumalambong nga kapin sa tatlo ka beses ang kalabawon sa kataason sang ila mga manugbantala! Halimbawa, walay sapayan sang mga pagdumili, pito ka pungsod sa Aprika nga may tingob nga kataason nga 62,712 ka manugbantala ang nagreport sing tumalambong sa Memoryal nga 204,356. Ang 1,914 ka manugbantala sang magamo nga Liberia nalipay nga 7,811 ang nagtambong sa ila Memoryal. Ang Haiti, nga may 6,427 ka manugbantala, nagreport sing 36,551. Ang 886 sa nalapta nga mga isla sang Micronesia nagreport sing 3,958. Ang 1,298 ka manugbantala sang Sri Lanka nagreport sing 4,521, kag ang Zambia, nga may 73,729 ka manugbantala, may 326,991 ka tumalambong sa Memoryal, isa ka tawo sa kada 25 sang populasyon sang Zambia. Madugangan bala naton kag mapauswag ang kalidad sang aton pagtuon sa Biblia sa mga puluy-an agod mabuligan ang kapin pa sang nagtambong sa Memoryal sa pagtukod sing malig-on nga pagtuo? Luyag naton nga sila mangin aton aktibo nga mga kaupod, nga nagadayaw kay Jehova. Nagakahulugan ini sang ila gid kabuhi!​—⁠Salmo 148:​12, 13; Juan 17:​3; 1 Juan 2:​15-17.

Ang Pagkabug-os sang Kalipay

17. Anong mga huwaran sang nahaunang siglo ang dapat magbulig sa aton sa pagpalig-on sang aton determinasyon nga magpabilin sa aton kalipay?

¹⁷ Bisan ano man nga mga pagtilaw ang nagaatubang sa aton, mangin determinado kita nga magpabilin sa aton kalipay. Mahimo nga indi naton maagihan ang mabudlay nga eksperiensia subong sang kay Esteban, apang ang iya maayo nga huwaran makapalig-on sa aton. Bisan ginsumbong sia, nahuptan niya ang iya malipayon nga panimuot. Nakita sang iya mga kaaway nga ang “iya nawong subong sang nawong sang anghel.” Ginsakdag sia sang Dios sa tion sang iya pag-antos. Nagpanaksi sia sing maisugon, bangod “puno [sia] sang balaan nga espiritu” tubtob sa iya kamatayon subong martir. Sang si Pablo kag si Bernabe nagbantala sa mga pungsod, sila man ‘nagkasadya kag naghimaya sa pulong ni Jehova.’ Nag-utwas liwat ang paghingabot. Apang wala ini magpahadlok sa mga nagtuo. “Ang mga disipulo padayon nga napun-an sang kalipay kag sang balaan nga espiritu.” (Binuhatan 6:​15; 7:​55; 13:​48-52) Bisan ano man ang himuon sa aton sang aton mga kaaway, bisan ano man ang aton mga pagtilaw sa kabuhi sa adlaw-adlaw, indi gid naton pagtugutan nga mabuhinan ang aton kalipay sang balaan nga espiritu. Si Pablo nagalaygay: “Magkalipay sa inyo paglaum. Magbatas sa idalom sang kapipit-an. Magpadayon sa pangamuyo.”​—⁠Roma 12:⁠12.

18. (a) Ano ang Bag-ong Jerusalem, kag ngaa ang katawhan sang Dios dapat magkalipay upod sa iya? (b) Paano pakamaayuhon sang “bag-ong mga langit kag bag-ong duta” ang katawhan?

¹⁸ Daw ano katahom ina nga paglaum! Sa tanan niya nga katawhan, si Jehova nagasiling: “Yari karon, ako nagatuga sing bag-ong mga langit kag bag-ong duta; kag ang una nga mga butang indi na pagdumdumon, ukon mag-abot sa painoino. Apang, magkasadya kamo, kag magkalipay sing dayon sa akon ginatuga.” Si Cristo nga Ginuo upod sa “Bag-ong Jerusalem” (nga amo karon ang kapital nga siudad sang langitnon nga organisasyon sang Dios, ang “Jerusalem sa ibabaw”) kag ang bag-ong katilingban sang kalibutan sa duta magadala sing daku nga kalipay sa katawhan. (Galacia 4:26) Pagkabanhaw sang tawhanon nga mga patay, pagbayaw sa tanan nga mga matinumanon sa kabuhi nga wala sing katapusan sa himpit nga panglawas, mapuslanon kag mapagsik nga pagkabuhi sing dayon sa paraiso nga duta​—⁠daw ano katahom nga paglaum kag kabangdanan sang pagkasadya ini! Subong nga si Jehova gid ‘nagakalipay sa Jerusalem kag nagakasadya sa iya katawhan,’ ang iya manalagna nagapanawag sing dugang pa sa katawhan sang Dios: “Magkalipay kamo upod sa Jerusalem kag magkasadya tungod sa iya, kamo tanan nga nagahigugma sa iya. Magkalipay sa kasadya upod sa iya.” (Isaias 65:​17-19; 66:​10; Bugna 14:​1; 20:​12, 13; 21:​2-4) Kabay nga kita pirme mapun-an sing kalipay kag sang balaan nga espiritu samtang ginapamatian naton ang laygay ni apostol Pablo: “Magkalipay pirme sa Ginuo. Sa liwat magasiling ako, Magkalipay!”​—⁠Filipos 4:⁠4.

Bilang Pagrepaso sang Aton Kalipay:

◻ Anong modelo sang makalilipay nga pagbatas ang ginbilin sa aton ni Jesus?

◻ Ang duha ka dedikado nga grupo may anong mga rason sa pagkasadya?

◻ Paano ang lamharon kag tigulang karon nagakasadya sa kamatuoran?

◻ Sa pagrepaso sang 1990 nga report, ano nga sabat ang ginahatag karon sa pangamuyo nga, “Jehova, ihatag sa amon palihog ang kadalag-an”?

◻ San-o kag paano maagom ang pagkabug-os sang kalipay?

[Tsart sa pahina 18-21]

REPORT SA 1990 NGA PAG-ALAGAD SANG MGA SAKSI NI JEHOVA SA BUG-OS KALIBUTAN

(Tan-awa ang tomo)

[Laragway sa pahina 16]

Ginbantala sang anghel ni Jehova ang pagkatawo ni Cristo nga Ginuo subong “maayong balita sang dakung kalipay”