Daw Ano ang Nahibaluan Mo sa Biblia?

‘Ang tolon-an ni Tomas? Huo, yari ini sa Biblia. Apang ang tolon-an ni Jonas wala. Duog nga natawhan ni Cristo? A, Jerusalem ina ​—⁠ukon Nasaret bala? Indi gid ako sigurado kon ang tolon-an ni Isaias yara sa nahauna ukon ikaduha nga bahin sang Biblia. Ang kadamuon sang mga apostoles? Ambot.’

“INI nga resulta indi kuntani makakilibot kon ang impormasyon gintipon sa tunga sang mga di-Cristiano lamang,” siling sang magasin nga Christianity Today. “Ang makakilibot​—⁠kag makatulublag⁠—​amo ang daku nga pagkawalay hinalung-ong sa Kasulatan nga nasapwan sa tunga sang born-again nga mga Cristiano.”

Halimbawa, 22 porsiento sang ginatawag nga mga Cristiano nga ginsurbey ang nagahunahuna nga may yara gid tolon-an ni Tomas sa Biblia, samtang 13 porsiento ang indi sigurado. Tuhoy sa Jonas, 27 porsiento ang nagsiling nga wala ini sa Biblia, kag 12 porsiento ang wala sing ideya. Seis porsiento ang indi gani makapakot kon diin nabun-ag si Cristo, samtang 16 porsiento ang naghingalan sa Jerusalem, kag 8 porsiento ang nagsiling nga sa Nasaret. Trese porsiento ang wala sing ideya kon diin sa Biblia makita ang tolon-an ni Isaias, samtang 11 porsiento ang nagbutang sini sa Cristianong Griegong Kasulatan (“Bag-ong Testamento”). Kag samtang nahibaluan sang kalabanan nga may yara 12 ka apostoles, 12 porsiento ang naghatag sang iban pa nga numero, halin sa 2 tubtob sa sobra sa 20, kag 10 porsiento ang wala gid sing ideya.

Ang pamangkot nga nagahatag sing daku gid nga problema amo nga kon bala ang ekspresyon nga “Ang Dios nagabulig sa mga nagabulig sang ila kaugalingon” yara sa Biblia ukon wala. Treinta’y otso porsiento lamang sang “mga Cristiano” nga ginsurbey ang nakahibalo nga indi ini makita bisan diin sa Biblia, samtang madamo, 42 porsiento, ang naghunahuna nga isa ini ka ekspresyon sang Biblia. Ang iban wala makahibalo.

“Ngaa may daku gid nga pagkawalay hinalung-ong nahanungod sa Biblia?” pamangkot sang Christianity Today. “Ayhan bangod ini sang kakulang sang pagbasa sa Biblia. Katunga sang tanan nga mga Amerikano ang wala nagabasa sang Biblia. Ang kalabanan sang tanan nga born-again nga mga Cristiano nagabasa sang Biblia sing makaisa ukon makaduha sa isa ka semana, ukon wala gid. Indi katingalahan nga tuman kadamo sang mga Cristiano ang diutay lamang sing nahibaluan nahanungod sa Kasulatan!”