Padunggi si Jehova—Ngaa kag Paano?
“Ang mga nagapadungog sa akon padunggan ko, kag ang mga nagatamay sa akon tamayon.”—1 SAMUEL 2:30.
1. Sin-o ang ginpremyohan sing bantog sa kalibutan nga Nobel nga mga premyo, kag paano ginakabig sang madamo ini nga premyo?
KADA tuig apat ka institusyon sang Scandinavia ang nagapremyo sing Nobel nga premyo sa mga tawo nga ‘nakahatag sing labing daku nga benepisyo sa katawhan sa tion sang nagligad nga tuig.’ Ang mga premyo ginahatag bangod sang mga nahimuan sa anom ka nanuhaytuhay nga latagon sang pagtinguha. Ang Nobel nga premyo ginakabig sang madamo subong amo ang labing daku nga kadungganan nga mahatag sa bisan sin-o nga tawo.
2. Sin-o ang nalimtan sang mga nagahatag sing Nobel nga mga premyo, kag ngaa takus Sia labi na sa kadungganan?
2 Samtang wala sing malain sa paghatag sing kadungganan sa takus nga mga tawo, nagahunahuna man lang bala ang mga nagahatag sining mga kadungganan sa pagpadungog sa labing daku nga Manugpakamaayo sa katawhan? Ina nga Manugpakamaayo amo ang isa nga nakahatag sing dimaisip nga benepisyo sa katawhan sugod sang gintuga niya ang nahauna nga lalaki kag babayi sang nagligad nga mga 6,000 ka tuig. Ang masunson nga kapaslawan sa pagpadungog sa iya mahimo nga magapahanumdom sa aton sang mga pulong ni Elihu, ang abyan sang dumaan nga si Job, nga nagsiling: “Apang wala sing bisan sin-o nga nagasiling, “ ‘Diin bala ang Dios nga akon Dungganon nga Magbubuhat, nga nagahatag sing mga ambahanon sa kagab-ihon?’ ” (Job 35:10) Ang aton dakung Manugpakamaayo padayon sa paghimo sing ‘maayo, nga nagahatag sa inyo sing ulan sa langit kag mga panag-on nga mapatubason, nga nagapuno sang inyo mga tagipusuon sing pagkaon kag kasadya.’ (Binuhatan 14:16, 17; Mateo 5:45) Si Jehova amo gid ang Manughatag sing “tagsa ka maayong hatag kag tagsa ka dulot nga himpit.”—Santiago 1:17.
Kon Ano ang Kahulugan sang Paghatag sing Kadungganan
3. Ano ang panguna nga Hebreo kag Griegong mga tinaga nga ginabadbad nga “kadungganan,” kag ano ang kahulugan sining duha?
3 Ang panguna nga Hebreong tinaga para sa kadungganan, ka·vohdhʹ, literal nga nagakahulugan sing “kabug-aton.” Gani ang tawo nga ginapadunggan ginakabig subong mabug-at, makahalamuot, ukon talalupangdon. Sing makawiwili, ining Hebreong tinaga, ka·vohdhʹ, masami man ginabadbad sa Kasulatan subong “himaya,” nagapakita sing dugang pa kon daw ka makapahamuot ukon daw ano ka importante ang pagkabig sa isa nga ginapadunggan. Ang isa pa ka Hebreong tinaga, yeqarʹ, nga ginabadbad “dungog” sa Kasulatan, ginabadbad man nga “hamili” kag “hamili nga mga butang.” Gani sa Hebreong Kasulatan, ang tinaga nga kadungganan ginaangot sa himaya kag pagkahamili. Ang Griegong tinaga nga ginabadbad “kadungganan,” sa Biblia amo ang ti·meʹ, kag ini man nagapaalinton sing ideya nga pagkatalahuron, balor, pagkahamili.
4, 5. (a) Ano ang kahulugan sang paghatag sing kadungganan sa isa ka indibiduwal? (b) Anong kahimtangan nga ginsugid sa Ester 6:1-9 ang nagailustrar kon ano ang nadalahig sa paghatag sing kadungganan?
4 Sa amo ginapadunggan sang isa ang isa paagi sa pagpakita sa sina nga tawo sing hanuot nga pagtahod kag pagtamod. Subong ilustrasyon, binagbinaga ang kahimtangan nga ginsugid sa Biblia tuhoy sa matutom nga Judiyo nga si Mardoqueo. Sang isa ka okasyon ginbuyagyag ni Mardoqueo ang isa ka plano batok sa kabuhi ni Hari Asuero sang dumaan nga Persia. Sang ulihi, sang gab-i nga indi makatulog ang hari, ang ginhimo ni Mardoqueo ginpatalupangod sa hari. Gani ginpamangkot niya ang iya mga alagad: “Ano bala nga kadungganan kag pagkahalangdon ang nahatag kay Mardoqueo tungod sini?” Sila nagsabat: “Wala gid sing nahimo tungod sa iya.” Daw ano ka makapasubo! Ginluwas ni Mardoqueo ang kabuhi sang hari, apang wala magpakita ang hari sing apresasyon.—Ester 6:1-3.
5 Busa, sa isa ka nagakaigo nga tion, ginpamangkot ni Asuero ang iya primer ministro nga si Haman, kon paano mapadunggan sing labi ang isa nga nahamut-an sang hari. Sa gilayon si Haman nangatarungan sa iya tagipusuon: “Sa kay sin-o bala nahamuot ang hari sa pagpadungog labi pa sa akon?” Gani nagsiling si Haman nga ini nga tawo pasul-ubon sing “panapton nga harianon” kag pasakyon sa “kabayo nga ginasakyan sang hari.” Sia naghinakop: “Pasakyon sia sa kabayo paagi sa dalan sang siudad, kag ibantala sa una niya, ‘Amo ini ang himuon sa tawo nga nahamut-an sang hari sa pagpadungog.’ ” (Ester 6:4-9) Ang isa nga ginpadunggan sing subong ginatahod sing labi sang tanan nga tawo.
Ngaa Takus si Jehova Padunggan
6. (a) Sin-o labaw sa tanan ang takus naton padunggan? (b) Ngaa ang tinaga nga “halangdon” nagakaigo nga nagalaragway kay Jehova?
6 Sa bug-os nga maragtas ang mga tawo ginpadunggan, nga sa masami indi takus sa sini. (Binuhatan 12:21-23) Apang sin-o labaw sa tanan ang takus padunggan? Si Jehova nga Dios, sa pagkamatuod! Takus sia nga padunggan naton bangod halangdon gid sia. Sa masami ang termino nga “halangdon” ginaaplikar sa iya. Sia ang Isa nga Halangdon, ang Halangdon nga Magbubuhat, ang Halangdon nga Manunuga, ang Halangdon nga Hari, ang Halangdon nga Manunudlo, ang Halangdon nga Agalon. (Salmo 48:2; Manugwali 12:1; Isaias 30:20; 42:5; 54:5; Oseas 12:14) Ang isa nga halangdon harianon, dungganon, mataas, daku, kilala, kag makapulunaw. Si Jehova wala sing kaanggid, wala sing katupong, labaw sa tanan. Sia mismo nagapamatuod sa sini nga kamatuoran, nga nagasiling: “Sa kay sin-o bala ako ninyo ipaangay kag ipatupong ako ukon ipaanggid ako agod nga mangin kaangay kami?”—Isaias 46:5.
7. Sa pila ka paagi sa dimagkubos masiling nga si Jehova nga Dios tumalagsahon, kag ngaa masiling nga sia wala sing kaanggid kon tuhoy sa awtoridad?
7 Si Jehova nga Dios indi mapaanggid sa dimagkubos pito ka paagi, nga nagahatag sing ispisipiko nga mga rason nga padunggan sia. Una sa tanan, si Jehova nga Dios takus sang labing daku nga kadungganan bangod wala sia sing kaanggid sa awtoridad. Si Ginuong Jehova amo ang Bug-os Uniberso nga Soberano—supremo sia. Sia ang aton Hukom, Manughatag sing Kasuguan, kag Hari. Ang tanan nga persona sa langit kag sa duta manabat sa Iya, apang indi sia manabat sa bisan kay sin-o. Nagakaigo nga ginlaragway sia subong “daku, gamhanan kag makakulugmat.”—Deuteronomio 10:17; Isaias 33:22; Daniel 4:35.
8. Ngaa masiling nga si Jehova wala sing kaanggid (a) kon tuhoy sa posisyon? (b) kon tuhoy sa iya dayon nga pagluntad?
8 Ikaduha, si Jehova nga Dios takus sang labing daku nga kadungganan bangod wala sia sing kaanggid sa posisyon. Sia “ang Mataas kag Makahalawhaw nga Isa,” ang Labing Mataas. Labaw sia sa tanan niya nga dutan-on nga mga tinuga! (Isaias 40:15; 57:15; Salmo 83:18) Ikatlo, si Jehova nga Dios dapat padunggan sing labaw sa tanan bangod wala sia sing tupong kon tuhoy sa iya dayon nga pagluntad. Sia lamang ang wala sing ginsuguran, bangod Sia kutob sa wala sing katapusan tubtob sa wala sing katapusan—Salmo 90:2; 1 Timoteo 1:17.
9. Sa anong paagi si Jehova indi mapaanggid (a) kon tuhoy sa iya himaya? (b) kon tuhoy sa iya sadsaran nga mga kinaiya?
9 Ikaapat, si Jehova nga Dios takus sang labing daku nga kadungganan bangod sang katahom sang iya personal nga himaya. Sia ang “Amay sang langitnon nga kapawa.” Ang iya pagkapersona tuman kasilaw nga wala sing tawo nga makakita sa iya kag mabuhi pa. Makapulunaw gid sia. (Santiago 1:17; Exodo 33:22; Salmo 24:10) Ikalima, utang naton kay Jehova nga Dios ang labing daku nga kadungganan bangod sang iya dalayawon nga mga kinaiya. Labing Gamhanan sia, wala sing latid sa gahom; labing maalam sia, wala sing latid sa kaalam; himpit sia sing bug-os sa hustisya; kag sia gid ang laragway sang gugma.—Job 37:23; Hulubaton 3:19; Daniel 4:37; 1 Juan 4:8.
10. Sa anong paagi si Jehova wala sing tupong (a) kon tuhoy sa mga buhat sang pagpanuga kag pagpanag-iya? (b) kon tuhoy sa iya ngalan kag kabantugan?
10 Ikan-om, si Jehova nga Dios takus sang labing daku nga posible nga kadungganan bangod sang iya daku nga mga buhat sang pagpanuga. Subong Manunuga sang tanan nga butang sa langit kag sa duta, sia man ang Dungganon nga Tag-iya sang tanan nga butang. Aton mabasa sa Salmo 89:11: “Imo ang kalangitan, imo ang duta man.” Ikapito, si Jehova nga aton Dios takus sang kadungganan nga labaw sa tanan bangod sia wala sing kaanggid, wala sing tupong kon tuhoy sa iya ngalan kag kabantugan. Sia lamang ang may ngalan nga Jehova, nga nagakahulugan sing, “Ginapahanabo Niya.”—Tan-awa ang Genesis 2:4; footnote.
Kon Paano Padunggan si Jehova
11. (a) Ano ang pila ka paagi nga mapadunggan naton si Jehova? (b) Paano naton mapakita nga ginapadunggan gid naton si Jehova paagi sa pagsalig sa iya?
11 Bangod sang tanan nga kinaiya ni Jehova, paano naton sia mapadunggan? Subong aton makita pa, mapadunggan naton sia paagi sa pagpakita sa iya sing kahadlok kag pagtahod, paagi sa pagtuman sa iya, paagi sa pagkilala sa iya sa tanan naton nga dalanon, paagi sa paghatag sing mga regalo, paagi sa pag-ilog sa iya, kag paagi sa pagpangabay sa iya. Mapadunggan man naton sia paagi sa pagtuo sa iya, pagsalig sa iya bisan ano man ang matabo. “Salig kay Jehova sa bug-os mo nga tagipusuon,” ginapalig-on kita. Gani ginapadunggan naton si Jehova nga Dios paagi sa pagsalig sa iya ginasiling. Halimbawa, sia nagasiling: “Dili ka mahadlok, kay ako nagaupod sa imo. Dili ka magkahangawa [mahadlok], kay ako ang imo Dios. Palig-unon ko ikaw. Buligan ko ikaw.” (Hulubaton 3:5; Isaias 41:10) Ang indi pagsalig sa iya sing bug-os mangin pagpakahuya sa iya.
12. Ano ang bahin sang pagkamatinumanon kag kahadlok sa pagpadungog kay Jehova?
12 Ang isa ka halos anggid nga paagi sa pagpadungog naton kay Jehova nga Dios amo ang pagtuman sa iya. Kag importante sa pagtuman ang diosnon nga kahadlok, huo, kahadlok nga mapaakig ang Dios. Ang nagapakita sang kaangtanan sang pagkahadlok kag pagtuman amo ang ginpamulong ni Jehova kay Abraham sa tapos gintinguhaan sing matinumanon ni Abraham nga ihalad si Isaac, nga iya anak. “Karon nakilala ko nga ikaw mahinadlukon sa Dios.” siling ni Jehova. (Genesis 22:12) Sang ginapaathag kon ano ang obligasyon sang kabataan sa ila mga ginikanan, ginpakita man ni apostol Pablo nga ang pagkamatinumanon kag pagpadungog nagaupdanay. (Efeso 6:1-3) Gani paagi sa pagtuman sa mga sugo sang Dios, nga indi mabug-at, ginapadunggan naton si Jehova. Sing indi maduhaduhaan, ang paglalis kay Jehova nga Dios mangin pagpakahuya sa iya.—1 Juan 5:3.
13. Ang pagpadungog sa Dios magapahulag sa aton sa paghupot sing anong panghunahuna tuhoy sa aton mga hilikuton kag mga plano?
13 Dugang pa, makadala kita sing nagakaigo nga dungog kay Jehova nga Dios paagi sa pagpamati sa laygay sa Hulubaton 3:6: “Sa tanan mo nga dalanon talupangda sia [huo, kilalaha sia], kag tadlungon niya mismo ang imo mga banas.” Si disipulo Santiago nagahatag sa aton sing maayong laygay sa sini. Sa baylo nga magkabuhi nga may kompiyansa sa kaugalingon sa adlaw-adlaw, nga nagasalig sa kaugalingon nga mga ikasarang, dapat kita magsiling: “Kon kabubut-on ni Jehova, magakabuhi kita kag magahimo sini ukon sina.” (Santiago 4:15) Sang nagligad nga mga tinuig nangin batasan sang International Bible Students nga magdugang sa bisan anong pinamulong nga may kaangtanan sa palaabuton sing pinalip-ot nga D.V., nga nagalaragway sa Deo volente, nga nagakahulugan “Kon kabubut-on sang Dios.”
14. (a) Anong panimuot tuhoy sa aton mga panikasog ang dapat naton huptan kon luyag naton padunggan ang Dios? (b) Anong panimuot ang ginapakita may kaangtanan sa pagbalhag sang literatura sang Watch Tower Society?
14 Ginapadunggan man naton si Jehova nga Dios paagi sa pagpakita sing mapainubuson nga panimuot, ginapadunggan ang Dios sa bisan anong kadalag-an nga matigayon naton. Nagakaigo ang ginsiling ni apostol Pablo tuhoy sa iya ministeryo: “Ako ang nagtanom, si Apolos ang nagbunyag, apang ang Dios ang nagpatubo; gani ang nagatanom ukon ang nagabunyag indi sia bisan ano, kundi ang Dios lamang nga nagapatubo.” (1 Corinto 3:6, 7) Sa pagkamatuod, nabalaka si Pablo sa pagpadungog sa Dios, indi sa iya kaugalingon ukon sa bisan sin-o nga tawo. Amo kon ngaa, sa karon, wala ginapakilala sa mga publikasyon sang Watch Tower Society ang mga nagsulat sini, kag ang mga manunulat nagalikaw sa pagsugid sa iban kon ano ang ila ginsulat. Sa sining paagi, ang igtalupangod masentro sa impormasyon, nga gindesinyo sa pagpadungog kay Jehova, kag indi sa bisan sin-o nga tawo.
15. Anong eksperiensia ang nagailustrar nga indi mahangpan sang iban nga tawo ang pagkaugdang sang mga Saksi ni Jehova?
15 Ang iban nagakakibot sa sining pagsulundan sang pagsentro sang igtalupangod kay Jehova, sa amo nagapadungog sa iya. Sang nagligad nga pila ka tuig, sang ginatakod ang sound system para sa isa ka pamulongpulong publiko sa Central Park sa Siudad sang Nueva York, ginpatokar sang mga Saksi ang isa sang mga tape sang Kingdom Melodies agod tilawan ang sistema. May isa ka nakapanapot sing pormal nga mag-asawa ang namangkot sa isa sa mga Saksi kon ano ining musika. Sa pagdumdom nga ang mag-asawa mga Saksi, sia nagsabat: “Kingdom Melodies No. 4 ina.” “Huo, apang sin-o ang nagkomposo sina nga musika?” pamangkot nila. Ang Saksi nagsabat: “A, wala ginapakilala ang nagkomposo.” Ang mag-asawa nagsabat: “Ang mga tawo nga nagakomposo sina nga sahi sang musika wala nagahimo sina nga wala nagapakilala.” Ang Saksi nagsabat: “Apang amo sina ang mga Saksi ni Jehova.” Huo, ginahimo nila ini agod nga ang tanan nga kadungganan makadto kay Jehova nga Dios!
16. Sa anong nanuhaytuhay nga mga paagi magamit naton ang aton tingog sa pagpadungog kay Jehova nga Dios?
16 Ang isa pa ka paagi sa pagpadungog kay Jehova amo ang paggamit sang aton mga bibig sa pagpanaksi nahanungod sa iya. Kon nagakabalaka gid kita sa pagdala sa iya sing kadungganan, nian mangin mahunahunaon kita sa pagpalapnag sang maayong balita sang Ginharian. Mahimo naton ini paagi sa pagpamalaybalay kag sa bisan anong paagi nga bukas sa aton, nga wala ginakalimtan ang mga kahimusan sa pagpanaksi sing dipormal. (Juan 4:6-26; Binuhatan 5:42; 20:20) Dugang pa, may mga kahigayunan kita sa pagpadungog sa aton Dios paagi sa aton tingog sa aton mga miting sa kongregasyon, paagi sa pagkomento kag paagi sa pagbuylog sa tinagipusuon nga pag-amba sang aton mga ambahanon sang Ginharian. (Hebreo 2:12; 10:24, 25) Sa aton pagpakighambal sa adlaw-adlaw, mapadunggan man naton si Jehova nga Dios paagi sa aton mga bibig. Paagi sa diutay lamang nga panikasog, sarang naton mamaniobra ang paghambalanay padulong sa makapalig-on sa espirituwal nga mga butang, kag magaresulta ini sa pagdala sing kadungganan kay Jehova nga Dios.—Salmo 145:2.
17. (a) Ano ang epekto sang husto nga paggawi sa aton pagpadungog kay Jehova? (b) Ano ang kaangtanan sang malain nga paggawi?
17 Subong katahom sa pagpadungog kay Jehova nga Dios paagi sa aton mga bibig, kinahanglanon man nga padunggan sia paagi sa aton paggawi. Ginpakamalaut ni Jesus ang mga tawo nga nagapadungog sa Dios paagi sa ila mga bibig, apang ang ila tagipusuon malayo sa iya. (Marcos 7:6) Ang malain nga paggawi magadala sing kahuy-anan kay Jehova nga Dios. Halimbawa, sa Roma 2:23, 24, aton mabasa: “Ikaw nga nagapabugal sa kasuguan, ginapakahuy-an mo bala ang Dios paagi sa imo paglapas sang Kasuguan? Kay, ‘ang ngalan sang Dios ginapasipalahan bangod sa inyo sa tunga sang mga pungsod.’ ” Sang nagligad nga tinuig madamo nga linibo ang ginsikway sa kongregasyon sang katawhan ni Jehova. Mahimo gid nga madamo pa ang naghimo sing makahuluya nga paggawi apang wala ginsikway bangod nagpakita sila sing mahinulsulon nga panimuot. Ini tanan nga katawhan nagapadungog kay Jehova sa ila mga bibig, apang napaslawan sila sa paghimo sini sa ila paggawi.
18. (a) Ano ang dapat kabalak-an sang mga utod nga napaboran sing daku kon luyag nila magpakita sing nagakaigo nga pagpadungog kay Jehova? (b) Paano ang kahimtangan sang pila ka saserdote sang adlaw ni Malaquias nagailustrar sang kinahanglanon nga dapat kita mabalaka?
18 Ang mga utod nga masako sa nanuhaytuhay nga porma sang bug-os tion nga pag-alagad—sa Bethel, sa hilikuton sa paglakbay ukon misyonero, ukon subong mga payunir—napaboran sing daku kon tuhoy sa ila mga kahigayunan sa pag-amot para sa kadungganan ni Jehova. May obligasyon sila nga himuon ang ila labi nga masarangan sa bisan anong hilikuton nga natangdo sa ila, kay sila ‘matutom sa diutay subong man sa madamo.’ (Lucas 16:10) Sa pila ka paagi ang ila dungganon nga posisyon gin-ilustrar, apang wala ginlaragway, sang mga saserdote kag mga Levinhon sa dumaan nga Israel. Apang, bangod sang pagpatumbaya sang pila ka saserdote sang adlaw ni Malaquias, si Jehova nagsiling sa ila: “Kon ako amay, diin bala ang pagtahod sa akon? Kag kon ako agalon, diin bala ang kahadlok sa akon?” (Malaquias 1:6) Yadtong mga saserdote nagtamay sang ngalan sang Dios paagi sa paghalad sing bulag, piang kag balatianon nga mga sapat. Luwas kon indi magtinguha ang mga utod nga yara sa pinasahi nga mga pribilehiyo sang pag-alagad karon sa paghimo sang ila labing masarangan, sila labi na mangin takus sa paghukom nga ginhukom ni Jehova sa mga saserdote sadto. Wala sila nagapadungog sa Dios.
19. (a) Subong ginsambit sa Hulubaton 3:9, ano ang dugang pa nga paagi sa pagpadungog kay Jehova? (b) Ano ang isa pa ka importante nga paagi sa pagpadungog kay Jehova?
19 Ang isa pa ka paagi nga mapadunggan naton si Jehova nga Dios amo ang paghatag sing kuwarta nga amot sa bug-os kalibutan nga pagbantala nga hilikuton nga iya ginsugo. “Padunggi si Jehova sang imo bilidhon nga mga butang kag sang nahauna nga mga bunga sang tanan mo nga patubas,” amo ang ginapalig-on sa aton. (Hulubaton 3:9) Ang pribilehiyo sa paghatag sina nga mga amot isa ka kahigayunan sa pagpadungog kay Jehova nga Dios nga indi dapat kalimtan sang bisan sin-o. Mapadunggan man naton si Jehova nga Dios sa aton mga pangamuyo, ginadayaw kag ginapasalamatan sia. (1 Cronica 29:10-13) Sa kamatuoran, bangod nagapalapit kita sa iya nga may pagpaubos kag may hanuot nga pagtahod, ang aton pagpalapit gid sa Dios paagi sa pangamuyo nagapadungog sa iya.
20. (a) Sin-o sa masami ang ginapadunggan sang kalibutanon nga mga tawo, kag paano? (b) Paagi sa pagsunod sa anong sugo nga mapadunggan naton sing dugang pa si Jehova?
20 Madamo nga tawo karon, mga pamatan-on labi na, ang nagapadungog sa mga tawo nga ila ginadayaw paagi sa pag-ilog sa ila—paagi sa paghambal kaangay nila kag paagi sa paghulaghulag kaangay nila. Sa masami ang mga tawo nga ila ginailog amo ang mga baganihan sa hampang ukon mga bituon sa kalibutan sang kalingawan. Sa kabaliskaran, subong mga Cristiano, dapat naton padunggan si Jehova nga Dios paagi sa pagtinguha nga ilugon sia. Ginapalig-on kita ni apostol Pablo nga himuon ini, sa pagsulat: “Mangin manug-ilog kamo sang Dios, subong nga mga anak nga hinigugma, kag padayon nga maggawi sa gugma.” (Efeso 5:1, 2) Huo, paagi sa pagtinguha nga ilugon si Jehova, ginapadunggan naton sia.
21. (a) Ano ang magasangkap sa aton sa paghimaya kag pagpadungog kay Jehova? (b) Ano nga mga padya ang ginahatag ni Jehova sa mga nagapadungog sa iya?
21 Sa pagkamatuod, may yara madamo nga paagi nga sarang kag dapat naton himayaon kag padunggan ang Dios. Indi gid naton pagkalimtan nga paagi sa regular nga pagkaon sang iya Pulong kag pagkilala sa iya sing suod pa, labi pa nga mapadunggan naton sia. Ano ang mga padya sa paghimo sini? “Ang mga nagapadungog sa akon,” siling ni Jehova, “padunggan ko.” (1 Samuel 2:30) Padunggan sa ulihi ni Jehova ang iya mga sumilimba paagi sa paghatag sa ila sing kabuhi nga wala sing katapusan nga may kalipay, sa langit subong kaupod nga mga manuggahom sang iya Anak, nga si Jesucristo, ukon sa Paraiso nga duta.
Nadumduman Mo Bala?
◻ Sin-o sa masami ang ginapadunggan sang mga tawo, kag sin-o sa masami ang ginapatumbayaan nila nga padunggan?
◻ Ano ang kahulugan sang pagpadungog sa isa, kag ano ang mga paagi nga mahimo ini?
◻ Ano ang pila sang sadsaran nga mga rason kon ngaa takus si Jehova nga Dios nga padunggan?
◻ Ano ang pila ka paagi nga mapadunggan naton si Jehova?
◻ Sa anong mga paagi ginapadyaan ni Jehova ang mga nagapadungog sa iya?