Padunggi ang Tanan nga Sahi sang Tawo

“Padunggi ang tanan nga sahi sang tawo, . . . kahadluki ang Dios, padunggi ang hari.”​—⁠1 PEDRO 2:17.

1. (a) Sin-o luwas sa Dios kag kay Cristo ang nagakaigo nga ginapadungg

NAKITA naton nga obligado kita sa pagpakita sing kadungganan kay Jehova nga Dios kag kay Jesucristo. Amo ina ang matarong, maalamon, kag mahigugmaon nga butang nga himuon. Apang ginapakita man sang Pulong sang Dios nga dapat naton padunggan ang aton mga isigkatawo. “Padunggi ang tanan nga sahi sang tawo,” amo ang sugo sa aton. (1 Pedro 2:17) Sanglit ini nga bersikulo nagahinakop paagi sa sugo nga, “padunggi ang hari,” ang pagpahangop amo nga ang kadungganan dapat ihatag sa mga tawo nga may kinamatarong sa pagbaton sini bangod sang ila katungdanan. Sin-o, nian, ang nagakaigo nga padunggan naton? Ang kadamuon sang takus padunggan mahimo nga nagalakip sa madamo pa sang sa ginahunahuna sang iban. Masiling naton nga may apat ka bahin nga sa diin dapat kita magpadungog sa iban nga mga tawo.

Padunggi ang Politikal nga mga Manuggahom

2. Paano naton mahibaluan nga ang “hari” nga ginsambit sa 1 Pedro 2:​17 nagapatuhoy sa bisan sin-o nga tawhanon nga hari ukon politikal nga manuggahom?

² Ang nahauna sini nga mga bahin may yara kaangtanan sa sekular nga mga gobierno. Dapat naton padunggan ang politikal nga mga manuggahom. Sang maglaygay si Pedro: “Padunggi ang hari,” ngaa masiling naton nga ginahunahuna ni Pedro ang politikal nga mga manuggahom? Bangod nagahambal sia tuhoy sa kahimtangan sa guwa sang Cristianong kongregasyon. Bag-o lang sia makasiling: “Magpasakop kamo sa tagsa ka tawhanon nga tinuga: kon bala sa hari subong superyor ukon sa mga gobernador subong ginpadala niya.” Talupangda, man, nga ginpatuhay ni Pedro ang Dios sa “hari,” nga nagasiling: “Kahadluki ang Dios, padunggi ang hari.” (1 Pedro 2:​13, 14) Gani “ang hari” nga ginasiling sa aton ni Pedro dapat naton padunggan nagapatuhoy sa tawhanon nga mga hari ukon politikal nga mga manuggahom.

3. Sin-o “ang superyor nga mga awtoridad,” kag ano ang nagakaigo sa ila?

³ Si apostol Pablo nagsugid sing kaanggid man: “Magpasakop sa superyor nga mga awtoridad.” Ining “superyor nga mga awtoridad” indi si Jehova nga Dios ukon si Jesucristo, kundi politikal nga mga manuggahom sila, mga opisyal sang gobierno. Ginatandaan ini, si Pablo nagsiling pa: “Bayari sila tanan sang natungod sa ila, . . . dungog sa bagay pasidunggan.” Huo, ang mga tawo nga gintugutan sang Dios sa paggamit sing politikal nga paggahom may kinamatarong nga padunggan.​—⁠Roma 13:​1, 7.

4. (a) Paano mapakita ang kadungganan sa politikal nga mga manuggahom? (b) Anong halimbawa ang ginpahamtang ni apostol Pablo sa pagpadungog sa mga manuggahom?

⁴ Paano naton ginapakita ang kadungganan sa politikal nga mga manuggahom? Ang isa ka paagi amo ang pagpakig-angot sa ila nga may hanuot nga pagtahod. (Ipaanggid ang 1 Pedro 3:⁠15.) Kag bangod sang ila katungdanan, takus sila tahuron bisan pa mahimo nga sila malaut nga mga tawo. Ginlaragway sang Romanong istoryador nga si Tacitus si Gobernador Felix subong isa ka tawo nga “naghunahuna nga mahimo niya ang bisan anong malaut nga buhat nga indi masilutan.” Apang gin-umpisahan ni Pablo ang iya pagpangapin sa atubangan ni Felix sa isa ka matinahuron nga paagi. Sing kaanggid, matinahuron nga ginsilingan ni Pablo si Hari Herodes Agrippa II, ‘Ginakabig ko ang akon kaugalingon nga malipayon nga magahimo ako sang akon pangapin sa imo atubangan,” bisan pa nahibaluan ni Pablo nga si Agrippa nagakabuhi nga incesto. Subong man, ginpadunggan ni Pablo si Gobernador Festo, ginpatuhuyan sia nga “Labing Halangdon,” bisan pa si Festo isa ka sumilimba sa mga idolo.​—⁠Binuhatan 24:​10; 26:​2, 3, 24, 25.

5. Sa anong dugang pa nga paagi ginapakita ang kadungganan sa mga awtoridad sang gobierno, kag paano ang mga Saksi ni Jehova nagapakita sing maayong halimbawa sa paghimo sini?

⁵ Ang isa pa ka paagi sa pagpakita sing kadungganan sa mga opisyal sang gobierno ginpakita ni apostol Pablo sang magsulat sia nahanungod sa paghatag sa mga awtoridad sang gobierno sang natungod sa ila. Nagsiling sia nga ‘ibayad ang buhis sa natungdan sang mga buhis; ang bayad sa balayran.’ (Roma 13:7) Ginabayaran sang mga Saksi ni Jehova ina nga mga balayran bisan diin man sila nga pungsod sa kalibutan nagapuyo. Sa Italya ang pamantalaan nga La Stampa nagsiling: “Sila ang labing matutom nga mga banwahanon nga ginahandum sang bisan sin-o: kay wala sila nagalikaw sa mga buhis ukon nagatinguha sa paglikaw sa indi kombenyente nga mga sugo para sa ila kaugalingon nga kaayuhan.” Kag ang The Post sang Palm ­Beach, Florida, E.⁠U.⁠A., nagsiling tuhoy sa mga Saksi ni Jehova: “Nagabayad sila sang ila mga buhis. Pila sila sang labing bunayag nga mga banwahanon sa Republika.”

Padunggi ang mga Amo

6. Sa kay sin-o siling ni apostol Pablo kag ni apostol Pedro dapat ihatag ang kadungganan?

⁶ Ang ikaduha nga bahin nga sa diin takus ang kadungganan amo ang sa aton mga duog sang palamugnan. Lunsay ginpadaku ni apostol Pablo kag ni apostol Pedro ang pagkaimportante sang pagpadungog sang mga Cristiano sa ila mga amo sa trabaho. Si Pablo nagsulat: “Ang tanan nga ulipon magbilang sang ila mga agalon nga takus sa bug-os nga kadungganan, agod nga indi mapasipalahan ang ngalan sang Dios kag ang pagtulun-an. Dugang pa, ang may mga agalon nga matinuuhon dili magdimatinahuron, bangod nga mga mag-ulutod sila. Kundi, mag-alagad sila sing maayo pa.” Kag si Pedro nagsiling: “Mga suluguon, magpasakop kamo sa inyo mga agalon sa bug-os nga kahadlok, indi lamang sa mga maayo kag mga rasonable, kundi man sa mga mabudlay pahamut-an.”​—⁠1 Timoteo 6:​1, 2; 1 Pedro 2:​18; Efeso 6:​5; Colosas 3:​22, 23.

7. (a) Paano ang laygay sang Biblia para sa “mga ulipon” nga magpakita sing kadungganan sa “mga tag-iya” nagakaigo nga naaplikar karon? (b) Ano ang dapat halungan nga himuon sang Cristianong mga empleyado nga may Cristianong mga amo?

⁷ Sa pagkamatuod, malaka na lang karon ang pag-ulipon. Apang ang mga prinsipio nga ginpatuman sa mga Cristiano sa ulipon-tag-iya nga kaangtanan maaplikar man sa amo-empleyado nga kaangtanan. Sa amo, may salabton ang Cristianong mga empleyado nga magpakita sing kadungganan bisan sa mga amo nga mabudlay pahamut-an. Kag ano kon ang amo natabuan nga masigkatumuluo man? Sa baylo nga magpaabot sing pinasahi nga konsiderasyon ukon pagpasulabi bangod sina nga kaangtanan, ang empleyado dapat mag-alagad sa iya Cristianong amo sing mas maayo pa, nga wala gid sia ginahimuslan sa bisan anong paagi.

Kadungganan sa Sulod sang Pamilya

8, 9. (a) Sin-o ang dapat padunggan sang kabataan? (b) Ngaa dapat ipakita sang kabataan ini nga kadungganan, kag paano nila mapakita ini?

⁸ Ang ikatlo nga bahin nga sa diin takus ang kadungganan amo ang sa sulod sang pamilya. Ang kabataan, halimbawa, may obligasyon nga padunggan ang ila mga ginikanan. Wala lamang ini ginpatuman sang Kasuguan nga ginhatag kay Moises kundi isa man ka obligasyon para sa mga Cristiano. Si apostol Pablo nagsulat: “Mga anak, tumana ang inyo mga ginikanan sa paghiusa sa Ginuo, kay ini matarong: ‘Padunggi ang imo amay kag ang imo iloy.’ ”​—⁠Efeso 6:1, 2; Exodo 20:⁠12.

⁹ Ngaa dapat padunggan sang mga anak ang ila mga ginikanan? Dapat nila padunggan sila bangod sang hinatag-sang-Dios nga awtoridad sang ila mga ginikanan kag bangod man sang nahimo sang ila mga ginikanan, ginpanganak sila kag ginpakaon kag ginsagod kutob sa pagkabata. Paano padunggan sang mga anak ang ila mga ginikanan? Dapat nila himuon ini labi na paagi sa pagtuman kag pagpasakop sa ila. (Hulubaton 23:​22, 25, 26; Colosas 3:20) Ang paghatag sina nga pagpadungog mahimo magkinahanglan sa dalagku na nga mga anak sa paghatag sing dugang nga supurta, sa materyal subong man sa espirituwal, sa ila tigulang na nga mga ginikanan ukon katigulangan. Dapat ini balansehon sing maalamon upod sa iban pa nga mga salabton, subong sang pag-atipan sa kaugalingon nga mga anak kag pagpakigbahin sing bug-os sa Cristianong pagtilipon kag pag-alagad sa latagon.​—⁠Efeso 5:​15-17; 1 Timoteo 5:​8; 1 Juan 3:⁠17.

10. Sa kay sin-o may obligasyon ang mga asawa nga magpakita sing kadungganan, kag sa anong mga paagi mahimo nila ini?

¹⁰ Apang indi lamang ang mga anak sa sulod sang pamilya ang may obligasyon nga maghatag sa iban sing kadungganan. Ang mga asawa dapat magpadungog sa ila mga bana. Si apostol Pablo nagsiling man nga “ang asawa dapat may hanuot nga pagtahod sa iya bana.” (Efeso 5:​33; 1 Pedro 3:​1, 2) Ang pagpakita sa mga bana sing “hanuot nga pagtahod” nagadalahig sing pagpadungog nila sa ila bana. Ginpadunggan ni Sara ang iya bana, nga si Abraham, sang gintawag niya sia nga “ginuo.” (1 Pedro 3:6) Gani mga asawa, iluga si Sara. Padunggi ang inyo bana paagi sa pagbaton sang ila mga desisyon kag magkooperar agod magmadinalag-on ini. Paagi sa paghimo sang tanan nga masarangan ninyo agod buligan ang inyo bana sa pagpas-an sang ila mga lulan, sa baylo nga dugangan ini, ginapadunggan ninyo sila.

11. Tuhoy sa pagpakita sing kadungganan, ano ang obligasyon sang mga bana, kag ngaa?

¹¹ Kamusta naman ang mga bana? Ginatugunan sila sa Pulong sang Dios: “Kamo nga mga bana, padayon nga magkabuhi sa amo man nga paagi upod sa [inyo asawa] suno sa ihibalo, nga ginapadunggan sila subong isa ka maluya nga suludlan, ang babayinhon, kay kamo man mga manunubli kaupod nila sang dibagay nga pabor sang kabuhi, agod nga indi masablagan ang inyo mga pangamuyo.” (1 Pedro 3:7) Dapat magpahunahuna gid ina sa tagsa ka bana. Daw subong bala nga ang asawa may etiketa nga “Hamili. Delikado. Halungi! Padunggi!” Gani dapat dumdumon sang mga bana nga kon indi nila padunggan ang ila asawa paagi sa pagpakita sa ila sing nagakaigo nga konsiderasyon, mahalitan nila ang ila kaangtanan kay Jehova nga Dios, kay ang ila mga pangamuyo masablagan. Sa pagkamatuod, mangin mapuslanon gid para sa mga katapo sang isa ka pamilya nga magpadungog sa isa kag isa.

Sa Kongregasyon

12. (a) Sin-o ang may salabton sa pagpakita sing kadungganan sa kongregasyon? (b) Paano ginpakita ni Jesus nga nagakaigo batunon ang kadungganan?

¹² Yara man ang salabton sang kada isa nga magpadungog sa sulod sang Cristianong kongregasyon. Ginalaygayan kita: “Magpanguna sa pagpadungog sa isa kag isa.” (Roma 12:10) Ginpakita ni Jesus sa isa sang iya mga ilustrasyon nga nagakaigo nga batunon ang pasidungog. Nagsiling sia nga kon gin-agda kita sa isa ka piesta, dapat naton pilion ang pinakamanubo nga duog, kay nian pangabayon kita sang tagbalay nga magsaylo sa mas mataas nga pulungkuan, kag makatigayon kita sing kadungganan sa atubangan sang tanan nga kaupod naton nga mga bisita. (Lucas 14:10) Karon, sanglit ginaapresyar naton tanan kon padunggan kita, indi bala kita dapat magpakita sing kahanuklog kag pagpadungog sa isa kag isa? Paano naton mahimo ini?

13. Ano ang pila ka mga paagi nga makapakita kita sing kadungganan sa iban sa sulod sang kongregasyon?

¹³ Ang pagpabutyag sing apresasyon para sa isa ka maayo nga hinimuan daw subong sang pagpadungog. Gani makapadungog kita sa isa kag isa paagi sa paghatag sing komendasyon, ayhan para sa isa ka pamulongpulong ukon komento nga ginhatag sang isa sa kongregasyon. Dugang pa, makapadungog kita sa isa kag isa paagi sa pagwagkos sang aton kaugalingon sing mapainubuson nga hunahuna sa aton Cristianong kauturan nga mga lalaki kag mga babayi, paagi sa pagpakig-angot sa ila nga may hanuot nga pagtahod. (1 Pedro 5:5) Sa amo ginapasundayag naton nga ginapabilihan naton sila subong dungganon nga mga masigkaalagad ni Jehova nga Dios.

14. (a) Paano ang kauturan nga lalaki sa kongregasyon makapakita sing nagakaigo nga kadungganan sa kauturan nga babayi? (b) Ano ang nagapakita nga ang pagregalo isa ka paagi sa paghatag sing kadungganan?

1⁴ Ginlaygayan ni apostol Pablo ang pamatan-on nga si Timoteo nga kabigon ang magulang sa iya nga Cristianong mga babayi subong mga iloy kag ang mga lamharon subong undanon nga mga utod nga babayi, “sa bug-os nga pagkaputli.” Huo, kon maghalong ang mga utod nga lalaki nga indi mangin tuman ka pamilyar sa ila Cristianong mga utod nga babayi, ginapadunggan nila sila. Si Pablo nagsulat pa: “Padunggi ang balo nga mga babayi nga mga balo nga matuod.” Ang isa ka paagi sa pagpadungog sa imol nga balo nga babayi amo ang paghatag sing materyal nga supurta. Apang agod makalipikar sia para sa sini, dapat nga ‘may pamatuod sa iya maayong mga buhat.’ (1 Timoteo 5:​2-10) May kaangtanan sa materyal nga mga regalo, si Lucas nagsulat tuhoy sa mga tawo sa isla sang Malta: “Sila man nagpadungog sa amon sing madamo nga regalo kag, sang paglayag namon, ginlulan nila sa sakayan ang amon mga kinahanglan.” (Binuhatan 28:10) Sa amo ang pagpadungog sarang mapakita sa isa paagi sa paghatag sing materyal nga mga regalo.

15. (a) Sa kay sin-o kita may pinasahi nga obligasyon nga magpakita sing kadungganan? (b) Ano ang isa ka paagi nga makapakita kita sing kadungganan sa mga nagapanguna?

¹⁵ Sa pagpadayon sang iya sulat kay Timoteo, si Pablo nagsulat: “Ang mga gulang nga nagadumala sing maayo pag-isipon nga takus sa pilo nga kadungganan, labi na gid ang mga nagapangabudlay sa pagwali kag sa pagpanudlo.” (1 Timoteo 5:17) Sa anong mga paagi mapadunggan naton ang mga gulang, ukon mga manugtatap? Si Pablo nagsiling: “Magmanug-ilog kamo sa akon, subong nga ako manug-ilog ni Cristo.” (1 Corinto 11:1) Kon sundon naton ang mga pulong ni Pablo nga mangin mga manug-ilog niya, ginapadunggan naton sia. Naaplikar ini sa mga nagapanguna sa aton karon. Tubtob sa kasangkaron nga ginailog naton sila paagi sa pagsunod sang ila halimbawa, ginapadunggan naton sila.

16. Ano ang dugang pa nga mga paagi nga ang kadungganan sarang mapakita sa mga nagapanguna?

¹⁶ Ang isa pa ka paagi nga mapadunggan naton ang mga manugtatap amo ang pagsunod sa laygay: “Tumana ang mga nagapanguna sa inyo kag magpasakop sa ila, kay nagapulaw sila tungod sa inyo mga kalag subong nga sila ang magahatag sing husay.” (Hebreo 13:17) Sa pareho nga paagi nga ginapadunggan sang kabataan ang ila mga ginikanan paagi sa pagtuman sa ila, ginapadunggan man naton ang mga nagapanguna sa aton paagi sa pagtuman kag pagpasakop sa ila. Kag, subong nga si Pablo kag ang iya mga kaupod ginpadunggan paagi sa materyal nga mga regalo sang maluluy-on nga mga pumuluyo sang Malta, madamo sang nagalakbay nga mga tiglawas sang Sosiedad ang ginpadunggan sa sini man nga paagi sa tion kag tion. Apang, sa pagkamatuod, indi gid nila dapat pangayuon ini nga mga regalo ukon magpabatibati nga apresyahon nila ukon nga kinahanglanon nila ini.

17. Ano ang obligasyon sang mga may pribilehiyo sa pagtatap kon tuhoy sa pagpakita sing kadungganan?

¹⁷ Sa pihak nga bahin, ang tanan nga yara sa katungdanan sang pagtatap sa sulod sang teokratiko nga organisasyon​—⁠kon bala sa lokal nga kongregasyon, sa sirkito ukon sa distrito subong isa ka nagalakbay nga manugtatap, sa isa sang mga sanga sang Watch Tower Society, ukon sa sulod sang pamilya​—⁠may obligasyon nga magpadungog sa ila ginatatap. Dapat sila magpakita sing kahanuklog subong man sing konsiderasyon sa isigkatawo. Dapat sila madali palapitan sa tanan nga tion, kay sila malum-ok sing panghunahuna kag mapainubuson sa tagipusuon kag hunahuna, subong nga siling ni Jesucristo amo sia anay.​—⁠Mateo 11:29, 30.

Magpanikasog sa Pagpadungog sa Isa kag Isa

18. (a) Ano ang makasablag sa aton sa pagpakita sing kadungganan sa mga takus sa sini? (b) Ngaa indi mapakamatarong ang negatibo kag mamulayon nga panghunahuna?

¹⁸ Dapat kita tanan magpanikasog sa pagpadungog sa isa kag isa, kay may yara mabaskog nga sablag sa paghimo naton sini. Ina nga sablag, ukon balagbag, amo ang aton dihimpit nga tagipusuon. “Ang huyog sang tagipusuon sang tawo malaut kutob sa iya pagkapamatan-on,” siling sang Biblia. (Genesis 8:21) Ang isa sang tawhanon nga mga huyog nga mahimo magsablag sa aton sa pagpadungog sa iban amo ang negatibo, mamulayon nga panghunahuna. Kita tanan maluya kag dihimpit nga mga tawo, nga nagakinahanglan sang kaluoy kag dibagay nga kaluoy ni Jehova. (Roma 3:​23, 24) Bilang pag-apresyar sa sini, maghalong kita nga indi pagpensaron ang mga kaluyahon lamang sang aton kauturan ukon suspetsahan sing malain nga mga motibo ang aton kauturan.

19. Ano ang magabulig sa aton sa pagpamatok sa negatibo nga panimuot?

¹⁹ Ang remedyo sa sining negatibo nga huyog amo ang gugma kag pagpugong sa kaugalingon. Dapat kita magpakita sing mahinuklugon, matutom, positibo nga panimuot tuhoy sa aton kauturan, nga ginatalupangod ang ila maayong mga kinaiya. Kon may butang nga indi naton mahangpan, mangin handa kita pirme nga indi paghukman dayon ang aton kauturan kag sundon naton ang laygay ni Pedro: “Labaw sa tanan nga butang, magpakita sing mainit nga gugma sa isa kag isa, kay ang gugma nagatabon sang madamo nga sala.” (1 Pedro 4:8) Dapat kita magpakita sina nga sahi sang gugma agod mapadunggan naton ang aton kauturan nga nagakaigo para sa ila.

20, 21. (a) Ano ang isa pa ka huyog nga mahimo gid nga magaupang sa aton pagpakita sing kadungganan sa isa kag isa? (b) Ano ang magabulig sa aton sa pagpamatok sa sini nga huyog?

²⁰ Ang isa pa ka kinaiya nga mahimo gid magaupang sa aton sa pagpadungog sa iban amo ang huyog nga madali masaklaw, ukon dinagakaigo nga sensitibo. Ang pagkasensitibo may kaugalingon nga lugar. Ang mga artist dapat mangin sensitibo sa mga tunog ukon mga kolor subong bahin sang ila propesyon. Apang ang dinagakaigo nga pagkasensitibo, ukon madali masaklaw, sa aton pagpakig-angot sa iban isa ka porma sang kakagod nga makaagaw sang aton kalinong kag magapugong sa aton sa pagpadungog sa iban.

²¹ Ang nagahatag sa aton sing maayong laygay sa sining bahin amo ang mga pulong nga masapwan sa Manugwali 7:​9: “Dili ka magmadagmit sa imo espiritu sa pagpangakig, kay ang kaakig nagapuyo sa dughan sang mga buangbuang.” Gani, ang dinagakaigo nga pagkasensitibo ukon madali masaklaw, isa ka tanda sang pagkakulang sing kaalam kag sing maayong paghukom, subong man sing kakulang sing gugma. Dapat kita magbantay kay basi ang aton napukan nga mga huyog, subong sang pagkanegatibo, sobra nga pagkamamulayon, ukon dinagakaigo nga pagkasensitibo, magasablag sa aton sa pagpadungog sa tanan nga nagakaigo sa ila.

22. Paano masumaryo ang aton obligasyon sa pagpakita sing kadungganan?

²² Sa pagkamatuod, madamo kita sing rason sa pagpakita sing kadungganan sa iban. Kag, subong nakita na naton, madamo gid sing paagi nga mapakita naton ina nga kadungganan. Sa tanan nga tion dapat kita magbantay kay basi ang aton makagod ukon negatibo nga panimuot mag-upang sa aton sa pagpakita sina nga kadungganan. Labi na, dapat kita maghalong sa pagpakita sing kadungganan sa mga katapo sang aton pamilya, ang bana kag asawa sa isa kag isa kag ang kabataan sa ila mga ginikanan. Kag sa sulod sang kongregasyon, may obligasyon kita sa pagpakita sing kadungganan sa aton mga masigkasumilimba kag, labi na, sa mga nagapangabudlay sing lakas nga may katungdanan sa pagtatap. Sa sining tanan nga bahin, para sa aton kaayuhan kon ipakita naton ang nagakaigo nga kadungganan sa mga nasambit na, kay, siling ni Jesus: “May kapin nga kalipay sa paghatag sang sa pagbaton.”​—⁠Binuhatan 20:⁠35.

Paano Mo Sabton?

◻ Ngaa kag paano naton mapadunggan ang mga awtoridad sang gobierno?

◻ Anong laygay sang Biblia ang mahimo maaplikar sa empleyado-amo nga kaangtanan?

◻ Paano dapat ipakita ang kadungganan sa sulod sang pamilya?

◻ Anong pinasahi nga kadungganan ang mapakita sa sulod sang kongregasyon, kag ngaa?

◻ Paano malandas ang tawhanon nga mga kaluyahon sa indi pagpadungog sa iban?

an? (b) Sa anong mga bahin ang mga tawo dapat pakitaan sing kadungganan suno sa 1 Pedro 2:17?