Mga Pamangkot Gikan sa mga Bumalasa
◼ Ang mga anghel mga espiritu, nga wala sing materyal nga mga lawas, gani ngaa ginapakita ninyo sila sa mga ilustrasyon nga may mga pakpak? Isa lamang bala ini ka relihioso nga tradisyon?
Masami namon ginalaragway ang mga anghel nga may pakpak bangod sang simbuliko nga mga paglaragway nga masapwan sa Biblia.
Husto ka sa pagsiling nga ang mga espiritu wala sing materyal nga mga lawas nga may literal nga mga pakpak—ukon mga nawong, mga kamot, mga tiil, ukon iban pa nga mga bahin sang lawas. Apang, sa pila ka okasyon, sang ang mga anghel nagpakita sa mga alagad sang Dios, mahimo nga subong sila sa normal nga mga tawo, kay nasal-an sila nga mga tawo.—Genesis 18:2, 22; 19:1; Hukom 6:11-22.
Apang, kon kaisa, ang mga tawo nakabaton sing mga palanan-awon tuhoy sa mga anghel kag ginlaragway sila. Si manalagna Ezequiel nakakita sing “apat ka buhi nga mga tinuga,” kag sa ulihi pa nga palanan-awon, ginkilala niya ini sila subong mga anghel sa ranggo nga nakilal-an subong mga querubin. (Ezequiel 1:5; 9:3; 10:3) Ang kada isa sining mga anghel may apat ka pakpak, nga nagpakita sang ila ikasarang sa pagsunod sing madasig sa bisan anong direksion nga isugo sang Dios. “Wala sila nagaliso kon maglakat sila; sila nagalakat ang tagsatagsa sing tadlong paatubang . . . Kon diin ang espiritu magkadto, naglakat sila. Wala sila nagaliso kon maglakat sila.”—Ezequiel 1:6, 9, 12.
Apang indi palareho ang hitsura sang mga anghel nga nakita sa palanan-awon. Ang mga anghel nga ginatawag mga serafin nga nakita ni Isaias may anom ka pakpak. (Isaias 6:1, 2) May yara pa gani mga kinatuhayan sa ulot sang mga palanan-awon ni Ezequiel. Sa nahauna, ang mga anghel may tiil, may mga kamot sa idalom sang tagsa ka apat ka pakpak, kag may apat ka nawong (kaangay sang nawong sang tawo, leon, baka, kag agila). Sa iya masunod nga palanan-awon, ang isa sang mga nawong kaangay sang querubin sa baylo nga kaangay sang baka, ayhan agod ipakita ang daku nga gahom sang mga querubin. Sa ulihi pa nga palanan-awon tuhoy sa mga puni sang simbuliko nga templo, nakakita si Ezequiel sing mga querubin nga may duha lamang ka nawong, ang isa kaangay sang tawo kag ang isa pa kaangay sang leon. (Ezequiel 1:5-11; 10:7-17; 41:18, 19) Sa Labing Balaan sang tabernakulo, subong man sa templo nga gintukod ni Solomon sa Jerusalem, may duha ka querubin nga may duha ka pakpak. Nagatungtong ini sa bulawan nga taklob sang kahon nga gintawag kaban sang katipan. Ang duha ka bulawan nga querubin nagaatubangay, kag lunsay may duha ka pakpak nga nagahumlad sa ibabaw sang Kaban. (Exodo 25:10-22; 37:6-9) Sa ibabaw sang Kaban (kag sang taklob sini) sa templo ni Solomon may nagatindog nga duha ka dakudaku natabunan sing bulawan nga mga querubin, ang tagsa may duha ka nagahumlad nga mga pakpak.—1 Hari 8:6-8; 1 Cronica 28:18; 2 Cronica 5:7, 8.
Si Josephus nagsulat: “Tuhoy sa sadto nga mga querubin, wala sing bisan sin-o ang makasiling ukon makahanduraw kon ano ang ila hitsura.” Sa amo, ginapasad sang iban nga mga eskolar kag mga artista ang ila paglaragway sa mga anghel (labi na sa mga querubin) sa ginatawag nga dumaan nga mga modelo sang mga dios sa Malapit nga Sidlangan sa porma sang may pakpak nga mga sapat. Apang ang kapin ka masaligan nga tuytoy amo ang komento ni Ezequiel nga ang iya nakita “kaangay sa dutan-on nga tawo.” (Ezequiel 1:5) Gani kon ginalaragway ang langitnon nga mga anghel sa aton mga publikasyon, sa masami ginalaragway namon sila sa porma sang tawo. Ginalaragway namon sila nga may mga pakpak bangod sang madamo nga paglaragway sang Biblia sa nanuhaytuhay nga mga anghel nga may mga pakpak kag bangod sang mga komento nahanungod sa “nagalupad” nga mga anghel.—Bugna 14:6; Salmo 18:10.
Bilang katapusan, ang pahina 288 sang Revelation—Its Grand Climax At Hand! nagalaragway sang may pakpak nga langitnon nga tinuga, nga may korona sa iya ulo kag may yabi sa iya kamot. Isa ini ka maathag nga paglaragway sa Bugna 20:1: “Nakita ko ang anghel nga nagakunsad gikan sa langit nga may yabi sang kadadalman kag daku nga talikala sa iya kamot.” Ginahangop naton ining anghel nga may yabi nga amo ang ginhimaya nga si Jesucristo. Ginalaragway sia nga may mga pakpak agod maghisanto sa kamatuoran nga ang mga anghel nga nakita sa palanan-awon masami nga may mga pakpak.