Ang Pagpangita sang Katawhan sa Dios

NGAA kita, subong mga Saksi ni Jehova, ginhatagan sing “putli nga hambal”? Sa pagkamatuod, indi agod taguon ini sa aton kaugalingon. Kag indi agod makaagom kita sing masulhay nga estilo sang pagkabuhi subong sang mahapos, nagakompromiso nga dalanon sang pagpanghikot sang Cristiandad. Sa baylo, agod nga ang ‘tanan magtawag sa ngalan ni Jehova, sa pag-alagad sa iya sa isa ka paghilisugot.’ (Sofonias 3:9) Huo, ang putli nga hambal nagadalahig sing hilikuton upod sa minilyon sang aton Cristianong kauturan nga mga lalaki kag mga babayi​—⁠gikan sa tanan nga mga rasa, mga pungsod, kag mga hambal⁠—​nga matutom nga nagabantala sing maayong balita sa wala pa ang katapusan.​—⁠Marcos 13:​10; Roma 13:​11; Bugna 14:​6, 7.

Ang aton pagbantala karon nagapresentar kon kaisa sing tumalagsahon nga mga hangkat. Ngaa subong sina? Sa sulod sining ika-20 nga siglo, madamo nga tawo ang nagsaylo sing lugar subong resulta sang mga inaway, pagpigos, ekonomiko nga kabudlayan, kag bangod sang iban pa nga mga rason. Gani, ang katawhan sang madamo nga hambal kag mga relihion nagsaylo sa mga kultura nga indi ila. Sa amo, daku nga mga komunidad sang mga Hindu, mga Budhista, kag mga Muslim ang nagsaylo sa Nakatundan nga Kalibutan. Samtang ginapaambit naton ang putli nga hambal sa balay kag balay, masugata naton ining mga tawo. Kon kaisa nagalibog ang aton ulo bangod diutay lamang ang aton nahibaluan nahanungod sa ila relihion. Ano ang mahimo naton nahanungod sini?​—⁠Ipaanggid ang Binuhatan 2:​5-11.

Paano naton ipaambit ang kamatuoran sa isa ka Muslim ukon isa ka Judiyo? Paano sila nagakatuhay sa isa kag isa? Ano gid ang ginatuuhan sang Hindu? Ngaa ang mga Sikh nagasul-ob sing turbante? Ano ang ila balaan nga tulun-an? Ano ang kinatuhayan sang Budhista gikan sa Hindu? Ano ang ginatuuhan sang Hapones nga mga Shintoista? Nagatuo bala sa Dios ang Intsik nga mga Taoista ukon mga Confucianista?a Ano ang kinatuhayan sang Ortodokso nga Judiyo gikan sa Repormado nga Judiyo ukon Konserbatibo nga Judiyo? Agod malab-ot ining nanuhaytuhay nga mga tawo, dapat naton anay mahangpan ang ila pagtamod kag dayon hibaluon naton kon paano sila tuytuyan sa isa ka maluluy-on kag mataktikanhon nga paagi padulong sa matuod nga Dios, nga si Jehova.​—⁠Binuhatan 17:22, 23; 1 Corinto 9:19-23; Colosas 4:⁠6.

Agod buligan kita nga mahangpan sing maayo pa ang iban nga mga relihion, ang ila mga panudlo, kag ang ila maragtason nga ginhalinan, ginpahibalo sang Watch Tower Society sa bug-os nga kalibutan sa tion sang 1990 nga “Putli nga Hambal” nga mga Kombension ang bag-o nga publikasyon nga natig-uluhan Mankind’s Search for God. Nasangkapan sini nga instrumento, makabantala kita sing maayo pa sa katawhan sang di-Cristiano nga kalibutan subong man sa iban pa sa Cristiandad.

Isa ka Praktikal nga Instrumento

Ining 384-pahina nga libro nagaunod sing 16 ka kapitulo nga nagasaysay sang maragtas sang pagpangita sang katawhan sa Dios sa sulod sang nagligad nga anom ka libo ka tuig. Ginasabat sini ang ginatos ka pamangkot nahanungod sa mga relihion sang kalibutan. Yari ang isa ka halimbawa sang pila sini: Ano nga mga butang sa masami ang nagapat-od sang relihion sang isa ka tawo? Ngaa indi sayop nga usisaon ang iban nga mga pagtuluuhan? Ano ang mga pagkaanggid sang Romanong Katolisismo kag sang Budhismo? Ano ang papel sang mga mito sa madamo nga mga relihion? Ngaa madamo nga tawo ang nagapati sa madyik, espiritismo, kag astrolohiya? Ngaa kadamo sang mga dios kag mga diosa sang mga Hindu? Ano ang kinatuhayan sang mga Sikh gikan sa mga Hindu? Sin-o si Budha, kag ano ang iya gintudlo? Ngaa ang Shinto relihion lamang sang mga Hapones? Ngaa ang mga Judiyo may yara oral subong man nasulat nga kasuguan? Paano naton mahibaluan nga si Cristo indi isa ka mito? Ano ang kinatuhayan sang Koran gikan sa Biblia? Ngaa nagasiling ang mga Katoliko nga si Pedro amo ang nahauna nga papa? Ngaa ang Katoliko nga pari nga si Luther nagbulag sa Iglesia Katolika Romana?

Ang mga pamangkot halos wala sing katapusan, kag gindasok sining publikasyon ang mga sabat agod kapin ka epektibo nga makabantala kita sa mga tawo nga may subong sini ka nanuhaytuhay nga relihiosong mga ginhalinan. Ginakilala sang libro nga madamo nga tawo ang may ila kaugalingon nga relihion kag nga ang relihion isa ka personal gid nga butang. Apang, sa pahina 8, ini nagasiling: “Gikan sa pagkabun-ag gintanom sa aton hunahuna sang aton mga ginikanan kag mga paryente ang relihioso ukon etiko nga mga ideya. Subong resulta, masami nga ginasunod naton ang relihioso nga mga ideya sang aton mga ginikanan kag mga katigulangan.” Nagakahulugan ina nga “sa madamo nga kaso iban ang nagpili sang aton relihion para sa aton. Depende lamang ini kon sa diin kita natawo kag kon san-o.”​—⁠Ipaanggid ang Filipos 3:​4-6.

Ginapautwas kon amo sang libro ang makatarunganon nga pamangkot. “Rasonable bala hunahunaon nga ang relihion nga ginpatuman sa pagkatawo sang isa bug-os nga kamatuoran?” Sa amo, ginapalig-on ang tagsa ka tawo nga usisaon ang iban nga mga relihion upod ang bukas nga hunahuna. Subong ginasiling sa pahina 10: “Ang paghangop sang pagtamod sang isa kag isa makadul-ong sa kapin ka makahulugan nga pagpaalintunay kag paghambalanay sa ulot sang katawhan sang nanuhaytuhay nga mga pagtuluuhan.” Nagapadayon ini: “Matuod, mahimo nga ang mga tawo mabaskog nga nagapamatok sa ila relihioso nga mga pagtuluuhan, apang wala sing sadsaran nga dumtan ang isa ka tawo bangod lamang lain ang iya pagtamod.”​—⁠Mateo 5:​43, 44.

Ang isa ka sadsaran nga pamangkot nga nagautwas sa bug-os nga libro amo, Ang tawo bala may dimamalatyon nga kalag nga nagapadayon sa pagkabuhi sa tapos sang kamatayon kag nagasaylo sa pihak nga kinabuhi? Sa nanuhaytuhay nga porma, amo sina nga ideya ang ginatudlo sang halos tanan nga relihion. Subong ginasiling sang Mankind’s Search for God (pahina 52): “Sa iya pagpangita sa Dios, gintilawan sang tawo ang tanan nga paagi, ginpatalang sang wala sing kamatuoran nga pagkadimamalatyon sang kalag. . . . Ang pagtuo sa dimamalatyon nga kalag ukon ang mga pagkatuhay sa sini isa ka panublion nga nag-abot sa aton gikan sa linibolibo ka tuig.” Ang iban pa nga mga pamangkot amo: May yara bala isa ka duog subong sang impierno nga sa diin ginapaantos ang mga kalag? Ano ang matuod nga paglaum sang mga patay? Isa bala ang Dios ukon madamo bala ang Dios?​—⁠Genesis 2:​7; Ezequiel 18:⁠4.

Mga Sadsaran Para sa mga Pagtuon sa Biblia

Sa halos kronolohiko nga paagisod sang ila paglutaw sa danyag sang kalibutan, ginapaathag sang libro ang paghuman sang dalagku nga mga relihion sang katawhan​—⁠Hinduismo, Budhismo, Taoismo, Confucianismo, Shinto, Judaismo, Cristianismo, Cristiandad, kag Islam. Sa tagsa ka kapitulo ginabalikwat ang balaan nga mga tulun-an sining mga relihion agod nga mausisa sang bisan sin-o nga sinsero nga tumuluo ang mga binalikwat para sa iya kaugalingon. Para sa kapitulo tuhoy sa Islam, tatlo ka nanuhaytuhay nga Ingles nga mga badbad sang Koran ang gingamit. Ang pinakabag-o nga badbad sang Jewish Publication Society nga ­Tanakh​—⁠A New Translation of the Holy Scriptures ginbalikwat sa kapitulo tuhoy sa Judaismo.​—⁠Ipaanggid ang Binuhatan 17:​28; Tito 1:⁠12.

Ano ang yara para sa ateista kag agnostiko? Ang kapitulo 14 nagapaathag sang karon nga indi pagtuo sa Dios kag kon ngaa nahibaluan sang mga Saksi ni Jehova nga nagaluntad ang Dios. Sa kada kapitulo, ang bumalasa ginatudlo sa Biblia. Sa amo, paagi sa paggamit sining publikasyon, nga Mankind’s Search for God, masangkapan kita sing maayo pa sa pagsugod sing mga pagtuon sa Biblia upod sa mga tawo sang tanan nga relihion ukon upod sa mga tawo nga nagapangangkon nga wala sing relihion. Ginatamod sini ang tagsa ka relihion sing matinahuron kag mataktikanhon, apang nagapautwas ini sing mga pamangkot nga makadul-ong sa isa ka tawo kay Jehova kag sa kamatuoran. Para sa mga hanuot nga nagapangita sa Dios, ini nga libro mangin isa ka matuod nga pagpakamaayo.​—⁠Salmo 83:​18; Juan 8:​31, 32; 2 Timoteo 3:​16, 17.

May makatudlo nga mga kahon sa kada kapitulo. Halimbawa, sa pahina 226 kag 227, may yara kahon tuhoy sa “Judaism​—⁠A Religion of Many Voices” nga nagapaathag sang dalagku nga mga pagbahinbahin nga masapwan sa Judiyong pagtuluuhan. Sa idalom sang “Hinduism​—⁠A Search for Liberation,” may yara kahon sa pahina 116 kag 117, nga “Hinduism​—⁠Some Gods and Goddesses.” Nagahatag ini sing listahan sang pila lamang sang kapin sa 330 milyones ka dios nga ginasimba sang mga Hindu. Nagatuo bala ang mga Budhista sa Dios suno sa pagkahangop sang Nakatundan nga kalibutan sa sina nga termino? Ang kahon nga “Buddhism and God” sa pahina 145 nagasabat sina nga pamangkot. Ang libro may yara praktikal nga indese para sa madasig nga reperensya sa dalagku nga mga tema. Ang bibliograpiya sang panguna nga mga reperensya nga gingamit sa pagpanalawsaw isa man ka sadsaran para sa dugang pa nga pagbasa kon ang isa nagahandum sing dugang pa nga detalye.

Ang libro may kapin sa 200 ka retrato kag mga ilustrasyon, apang indi sila mga adorno lamang. Ang tagsa ka ilustrasyon may punto nga inugtudlo nga nagapaathag sing dugang pa sang relihion nga ginahambalan. Halimbawa, sa pahina 238 may yara serye sang mga retrato nga nagailustrar sang pila sang mga parabola nga gintudlo ni Jesus. Sa iban nga bahin naman, may yara isa ka serye sang lima ka laragway nga nagailustrar man sang nanuhaytuhay nga bahin sang ministeryo ni Cristo​—⁠ang iya mga milagro, ang iya pagbaylo-dagway, ang iya mahalaron nga kamatayon, kag ang iya pag­sugo sa iya mga disipulo nga magbantala sa bug-os nga kalibutan.

Sa pahina 289 may yara mga retrato nga mangin makapainteres sa mga Muslim. Ginadala sini ang tumalan-aw sa Mecca, sa isa ka daku nga moske nga sa diin makita ang Kaaba kag dayon sa aktuwal nga itom nga bato nga ginasimba sang mga Muslim. Ang nanuhaytuhay nga pagsimba sang Budhismo ginailustrar sa pahina 157. Ang mga Hindu mangin interesado sa pagtan-aw sang mga laragway sang ila popular nga mga dios nga sanday Ganesa kag Krishna sa pahina 96 kag 117.

Ang sangkol nga Cristianong mga ministro sa bug-os nga kalibutan ginkonsulta agod matigayon ang ispisipiko nga paagi sa paghangop sang tagsa ka daku nga relihion. Halimbawa, mapuslanon nga materyal ang naghalin sa Israel para sa mga kapitulo tuhoy sa Judaismo kag Baha’i nga pagtuluuhan. Mahalungon nga gin-usisa sang mga Saksi sa Muslim nga mga pungsod ang kaundan sang kapitulo tuhoy sa Islam. Ang mapuslanon nga kasayuran naghalin sa India tuhoy sa mga Hindu, mga Sikh, kag mga Jain. Ginpat-od sang mga ministro sa Sidlangan nga ang kapitulo tuhoy sa Shinto sibu, kag naghatag man sila sing kasayuran tuhoy sa Budhismo, Taoismo, kag Confucianismo.

Bangod sang mahalungon nga pagkobre sang libro sa tagsa ka relihion, ang mga may yari sini sa ila hambal sarang makasugod sing mga pagtuon sa Biblia sa kapitulo nga nagakabagay sa relihioso nga ginhalinan sang tagsa ka tawo. Dayon mahimo sila magpadayon sa kapitulo nga nagapaathag sang pag-utwas sang nahaunang Cristianismo kag sang mga rason sa pagtuo nga si Cristo amo ang matuod nga Tiglawas sang Dios, ang isa nga gingamit agod papalapiton ang katawhan sa Dios. May yara mga kapitulo nga nagapaathag kon paano natabo ang apostasya, nga nagresulta sa madamo nga pagbahinbahin kag mga sekta sang Cristiandad. Ginapakita sang hingapusan nga duha ka kapitulo kon paano ang matuod nga pagsimba ginpasag-uli sa sining katapusan nga mga adlaw kag kon ano nga palaabuton ang nagahulat sa Babilonia nga Daku, ang bug-os kalibutan nga emperyo sang butig nga relihion ni Satanas. Sa tapos sina, ginapadaku ang bag-ong kalibutan kag ang pagkabanhaw nga paglaum sa Biblia.​—⁠Juan 5:​28, 29; 12:​44-46; 14:​6; Bugna 21:​1-4.

Isa gid ini ka publikasyon nga dapat magbulig sa madamo sa bug-os nga kalibutan sa pagpalapit sa Dios, subong sang ginhambal ni Santiago sa kapitulo 4 sang iya sulat, bersikulo 8: “Magpalapit sa Dios kag sia magapalapit sa inyo. Tinlui ang inyo mga kamot, kamo nga mga makasasala, kag putlia ang inyo mga tagipusuon, kamo nga mga duha sing hunahuna.” Huo, subong ginasiling ni Isaias: “Pangitaa si Jehova samtang nga makita pa sia. Tawga ninyo sia samtang nga malapit pa sia.”​—⁠Isaias 55:​6; Juan 6:​44, 65.

Kabay nga magpadayon kita tanan nga magpatuytoy sa husto nga direksion, padulong sa Soberanong Ginuo sang uniberso, nga si Jehova nga Dios. Kag sa bulig sining publikasyon nga, Mankind’s Search for God, buligan naton ang linibolibo pa sa pagsimba kay Jehova “sa espiritu kag kamatuoran.” (Juan 4:​23, 24) Kabay nga magpadayon kita sa pagpangita sa mga nagapangita sang kamatuoran kag sugiran sila nahanungod sa Dios sang kamatuoran, kay, sa pagkamatuod, makita sia!

[Footnote]

[Mga Laragway sa pahina 17]

Ginpangita sang tawo ang Dios sa madamo nga paagi

[Laragway]

Ginasimba sang mga Hindu ang suba Ganges

[Ginkuhaan]

Harry Burdich, Transglobe Agency, Hamburg

[Laragway]

Ang sinsero nga mga Katoliko nagaliso kay Maria

[Laragway]

Ang pila sang debotado nga mga Judiyo nagasuksok sing mga filacteria

[Ginkuhaan]

GPO, Jerusalem

[Laragway]

Ang Muslim nga mga lalaki nagalakbay padulong sa Mecca

[Ginkuhaan]

Camerapix

[Laragway]

Madamo ang nagasimba kay Budha

[Mga Laragway sa pahina 18]

Naggamit si Jesus sing mga parabola agod buligan ang mga tawo nga makita ang matuod nga Dios

[Ginkuhaan]

Pictorial Archive (Near Eastern History) Est.

[Ginkuhaan]

Pictorial Archive (Near Eastern History) Est.

[Ginkuhaan]

Pictorial Archive (Near Eastern History) Est.