Ano ang Isiling Ninyo sa Isa ka Hindu?
1 Subong sang mahimo nga nahibaluan na ninyo, madamong Hindu ang nagapuyo sa lainlain nga kadutaan, lakip na sa sini nga pungsod. Nagakahulugan ini nga makasugilanon kamo sa ulihi sing isa ka Hindu sa inyo ministeryo. Kon matabo ini, paano ninyo himuon ang pagduaw?
2 Dumduma Ining mga Punto: Ang mga misyonero nga nakapanaksi sing madinalag-on sa mga Hindu nagasiling nga indi na kinahanglan nga tun-an pa sing maayo ang tuhoy sa Hinduismo agod makapanaksi sing epektibo. Ang isa ka simple kag mataktikanhon nga pagpresentar sa kamatuoran masunson nga may positibo nga resulta. Mangabay nga masugilanon una ang ulo sang pamilya. Kon mamati sia, ang pagpanaksi sa iban nga mga katapo sang pamilya mangin mas mahapos. Sa umpisa likawi ang pagpahangop nga may mensahe kamo nga labaw sa ginapatihan sang tagbalay ukon luyag ninyo ipaathag ang lamang matuod nga Dios ukon ang pinakadumaan nga sagrado nga mga sinulatan. Sanglit madamo nga Hindu ang nagakabig sa Biblia nga isa ka libro sang Nakatundan, madula ninyo ang sayop nga panghunahuna paagi sa pagpaathag nga wala sini ginapauswag ang kolonyalismo ukon ang pagkasuperyor sang isa ka rasa sangsa iban.
3 Gamita ang Nagakaigo nga Kasangkapan: Duha ka brosyur ang ginbalhag nga ang ginahunahuna sing espesipiko amo ang mga Hindu. Ini amo ang: Why Should We Worship God in Love and Truth? kag Our Problems—Who Will Help Us Solve Them? Matigayon ini sa Ingles. Ang mga brosyur nga“Toloka! Ginahimo Ko nga Bag-o Ang Tanan nga Butang” kag Nagaulikid Gid Bala ang Dios sa Aton? napamatud-an man nga epektibo kon nagapanaksi sa mga Hindu. Ang Ginapatuman nga brosyur kag ang Ihibalo nga libro sarang magamit sing madinalag-on sa pagdumala sing mga pagtuon sa Biblia.
4 Magpasad sing Sadsaran nga Maugyunan: Indi mabudlay makakita sing sadsaran nga maugyunan upod sa mga Hindu. Nagapati sila nga nagakabuhi kita sa isa ka tion nga ang kalautan yari na sa talipuspusan sini kag dulaon sang Dios ang mga problema sa kalibutan paagi sa daku nga kapahamakan nga pagasundan sang isa ka dag-on sang kamatuoran. Makita ninyo kon daw ano kahapos iangot ining mga pagpati sa mga panudlo sang Biblia tuhoy sa katapusan nga mga adlaw, dakung kapipit-an, kag sa nagapakari nga bag-ong kalibutan. Sanglit ang kalabanan nga mga Hindu nagatamod sang kabuhi subong isa ka serye sang mga problema nga wala sing mga solusyon, interesado sila sa mga topiko tuhoy sa pagkabuhi sang pamilya, krimen kag kaluwasan, kag kon ano ang nagakatabo sa kamatayon. Yari ang duha ka halimbawa nga presentasyon nga mahimo ninyo tilawan.
5 Mahimo ini magganyat sa tawo nga may pamilya:
◼ “Nagaduaw ako sa mga tawo nga nabalaka sa kahimtangan sang pagkabuhi sang pamilya sa madamong kadutaan karon. Ano sa banta mo ang makabulig agod mahuptan nga magkaupod ang pamilya? [Pasabta sia.] Nahibaluan sang pila ka tawo ang ginasiling sang mga kasulatan sang mga Hindu tuhoy sa pamilya, apang wala gid sila sing higayon nga mapaanggid ini sa ginasiling sang Biblia tuhoy sini. Luyag ko ipaambit sa imo ini nga panghunahuna sa Colosas 3:12-14.” Sa tapos mabasa ang kasulatan, ipakita sa tagbalay ang kapitulo 15 sang Ihibalo nga libro kag magsiling: “Nalipay ako sa paghinguyang sing pila ka tion sa pagbasa sini nga kapitulo sa imo.”
6 Ang isa ka pamatan-on mahimo magasabat sa sini:
◼ “Walay duhaduha nga nagapati ka sa Dios. Ano sa banta mo ang katuyuan sang Dios para sa aton?” Pasabta sia. Dayon basaha ang Genesis 1:28, kag magsiling: “Sa madamo nga lugar ang duta sobra sing populasyon kag nasit-an sing mga problema. Sa banta mo handa bala ang Manunuga nga buligan kita sa paglubad sa aton mga problema?” Sa tapos mabatian ang sabat, ipakita ang isa ka nagakaigo nga publikasyon.
7 Aguma ang Positibo nga mga Resulta: Ginpalapitan sang isa ka 22-anyos nga Hindu nga lalaki ang isa ka utod nga babayi nga nagapanaksi sa tiendahan kag nangabay sing pagtuon sa Biblia. Ginpaathag niya sa utod nga sang nagligad nga walo ka tuig nabatian niya ang paghambalanay sang iya iloy kag sang utod tuhoy sa Biblia. Bisan pa nga nagdayaw sia sa praktikal nga mga sabat sang Biblia sa mga problema sang katawhan, ang iya iloy indi interesado kag nagbatyag sia nga bata pa kaayo agod padayunon nga usisaon ang kamatuoran sing kinaugalingon. Karon bangod hamtong na, luyag niya makatuon sing dugang pa. Ang pamatan-on wala mag-uyang sing tion. Sa sulod lamang sang 23 ka adlaw, natapos niya ang iya pagtuon sa Ihibalo nga libro, kag sa sulod lamang sang apat ka bulan sa tapos niya masugilanon ang utod sa tiendahan, nangabay sia nga magpabawtismo!
8 Nasugdan sang utod nga lalaki ang pagtuon sa isa ka Hindu nga lalaki nga nasugilanon niya sa tren. Ang lalaki may problema sa iya pag-asawahay. May problema man sia sa pag-inom. Nagpasugot sia nga duawon sia sang Saksi kag sugiran sang laygay sang Biblia tuhoy sa pagkabuhi sang pamilya. Ang mga panudlo sang Biblia sa moral nagganyat sa iya, kag nagpasugot sia sa pagtuon sa Biblia. Sia kag ang iya pamilya nagsugod sa pagtambong sa mga miting sing magkaupod. Sang ulihi ginsugid nila ang kamatuoran sa mga abyan kag mga himata. Sa karon, anom na sa ila ang nagbaton sang kamatuoran!
9 Kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Nagalakip ina sa mga lalaki kag mga babayi nga nagapangangkon sang di-Cristiano nga relihion, subong sang Hinduismo. Kon may mga Hindu sa inyo teritoryo, ngaa indi sila duawon sa gilayon kag gamiton ang pila sa mga panugda nga ginhatag sa sini nga artikulo?