Madumduman Mo Bala?

Nasapwan mo bala ang ulihi nga mga guwa sang Ang Lalantawan nga may praktikal nga kabilihanan? Nian ngaa indi pagtilawan ang imo memorya paagi sa masunod?

◻ Anong mga katunayan ang nagabais sa pagpakabalaan nga ginakunokuno nga lugar nga natawhan ni Jesus?

Wala ginasambit sang Biblia ang eksakto nga lugar nga natawhan ni Jesus. Mga kinahanglanon lamang ang ginahatag sang mga kasaysayan sang Ebanghelyo nanday Mateo kag Lucas. (Mateo 2:​1, 5; Lucas 2:4-7) Ang Juan 7:40-42 nagapakita nga ang katawhan sa kabilugan wala makahibalo sang iya lugar nga natawhan, ang iban naghunahuna nga natawo sia sa Galilea. Subong man, sang yari diri mismo sa duta si Jesus, wala niya ginsugid ang detalye sang iya pagkabun-ag.​—⁠12/15, pahina 5.

◻ Paano mahuptan sang isa ka Cristiano ang iya kalipay samtang nagaatubang sang mga pagtilaw sang balatian sa pisikal, kapung-aw, kag kapigaduhon?

Ang Pulong sang Dios nagahatag sang nagakaigo nga lugpay kag tuytoy. Paagi sa pagbasa ukon sa pagpamati sa mga salmo, matigayon ang daku nga paumpaw. Si David naglaygay sa aton: “Itungtong kay Jehova ang imo lulan, kag sia magaalay-ay sa imo.” Ginapasalig man niya sa aton nga si Jehova amo gid ang “Nagapamati sang pangamuyo.” (Salmo 55:​22; 65:2) Ang organisasyon ni Jehova, paagi sa iya mga publikasyon kag mga gulang sa kongregasyon, pirme handa sa pagbulig sa aton nga maatubang ang aton mga problema.​—⁠1/1, pahina 14-15.

◻ Ano ang buot silingon ni Jesus sang nagapakadto sa pagalansangan sa iya, sia nagsiling: “Kon ginahimo nila ini sa hilaw pa nga kahoy, ano bala ang mahanabo kon laya na ini?” (Lucas 23:31)

Ginapatuhuyan ni Jesus ang kahoy sang Judiyong pungsod. Bangod sang presensia ni Jesus kag sang nagkalabilin nga mga Judiyo nga nagtuo sa iya, ang pungsod may kahun-og pa sang kabuhi. Apang, sang ini tanan ginkuha sa pungsod, ang isa ka patay sa espirituwal nga kahoy lamang ang mabilin, isa ka laya nga pungsodnon nga organisasyon.​—⁠1/15, pahina 9.

◻ Paano ang “mga putli sing tagipusuon,” nga ginapatuhuyan sa Mateo 5:​8, “makakita sa Dios”?

“Makakita [sila] sa Dios” kon makita nila sia nga nagapanghikot tungod sa mga nagahupot sing integridad. (Ipaanggid ang Exodo 33:​20; Job 19:​26; 42:⁠5.) Apang, ang Griegong tinaga sa Mateo 5:8 nga ginbadbad sing “makakita” nagakahulugan man sing “pagtan-aw paagi sa hunahuna, paghangop, paghibalo.” Bangod kay ginpabanaag sing himpit ni Jesus ang personalidad sang Dios, ang paghangop sina nga personalidad nagpaposible sa “mga putli sing tagipusuon” nga “makakita sa Dios.” (Juan 14:​7-9)​—⁠1/15, pahina 16.

◻ Ngaa nagahinakop kita nga si Jesus amo si arkanghel Gabriel?

Ang Pulong sang Dios nagasambit sang isa lamang ka arkanghel, kag nagapamulong ini nahanungod sina nga anghel may kaangtanan sa ginbanhaw nga si Ginuong Jesus: “Ang Ginuo gid magakunsad gikan sa langit nga may singgit sang pagmando, sa tingog sang arkanghel kag sa budyong sang Dios.” (1 Tesalonica 4:16) Sa Judas 9 masapwan naton nga ang ngalan sining arkanghel amo si Miguel.​—⁠2/1, pahina 17.

◻ Ano ang apat ka bahin nga sa sini mapakita naton ang pagtahod sa iban nga mga tawo?

Dapat kita magpakita sing pagtahod sa mga gumalahom sa politika, sa mga amo, sa mga katapo sang aton pamilya, kag sa mga sa kongregasyon.—2/1, pahina 20-2.

◻ Wala madugay pagkatapos si Jesus napatay, anong maayo nga halimbawa ang ginpahamtang niya para sa tigulang nga mga ginikanan?

Samtang si Jesus nalansang pa gihapon sa kasakit sang usok sang pag-antos, ginpatugsilingan niya ang pisikal kag espirituwal nga kaayuhan sang iya iloy paagi sa pagtugyan sa iya sa pag-atipan sang iya hinigugma nga si apostol Juan. (Juan 19:​25-27)​—⁠2/15, pahina 8.

◻ Ngaa kinahanglan si Jesus mag-antos?

Ang mga pag-antos ni Jesus magalubad sang hulusayon tuhoy sa integridad sang mga alagad sang Dios. Nagasangkap man ini sa iya para sa katungdanan niya subong maluluy-on nga Mataas nga Saserdote para sa katawhan. (Hebreo 4:15)​—⁠2/15, pahina 14-15.

◻ Anong importante nga mga hulusayon ang ginpautwas sang pagrebelde sa Eden?

Magahuman bala sang tawo ang iya kaugalingon sing madinalag-on nga hilway sa Dios? Makatarunganon bala sa bahin sang Dios nga pangayuon ang pagpasakop sa pagkasoberano niya? Dugang pa, dimakagod bala nga pilion sang tawo nga alagaron ang Dios sing kinabubut-on?​—⁠3/1, pahina 6.

◻ Ngaa sayop nga nakigbahin ang iban sa mga emblema sang Memoryal?

Ang iban nga mga dihamtong mahimo nga wala pa sing timbang nga apresasyon sa mga katuyuan sang Dios. Ayhan wala pa nila ginakilala nga ang paghaplas “indi sa pagbuot ukon pagpanikasog sang tawo, kundi sa kaluoy sang Dios.” (Roma 9:16) Indi ang indibiduwal ang magapamat-od kon bala dalhon sia pasulod sa bag-ong katipan kag mangin masigkamanunubli ni Cristo. Ang importante amo ang pagpili ni Jehova, kag ang iya espiritu nagasaksi sa sina nga pagpili. (Roma 8:​16; 1 Corinto 12:18)​—⁠3/15, pahina 21.

◻ Ano ang “putli nga hambal” nga ginapamulong sang Sofonias 3:​9?

Amo ini ang nagakaigo nga paghangop sa kamatuoran nahanungod sa Dios kag sa iya mga katuyuan.​—⁠4/1, pahina 21-2.