Kon Ano ang Kahulugan sang Mangin Cristiano
GINHATAG ni Jesus ang imbitasyon nga mangin iya sumulunod, nga nagasiling: “Kon sin-o nga tawo ang luyag magsunod sa akon, magdumili sia sang iya kaugalingon kag magpas-an sang iya usok sang pag-antos kag padayon nga magsunod sa akon.” (Mateo 16:24) Ang matuod nga mga Cristiano may bug-os nga pagtuo nga si Jesucristo amo ang pinasahi nga Hinaplas sang Dios kag ang bugtong nga Anak, ang Ginsaad nga Binhi nga naghalad sang iya tawhanon nga kabuhi subong gawad, ginbanhaw kag ginbayaw sa tuuhan ni Jehova, kag nakabaton sing awtoridad sa paggahom sa iya mga kaaway kag magbindikar sang ngalan ni Jehova. (Mateo 20:28; Lucas 24:46; Juan 3:16; Galacia 3:16; Filipos 2:9-11; Hebreo 10:12, 13) Ginatamod sang mga Cristiano ang Biblia subong inspirado nga Pulong sang Dios, bug-os nga kamatuoran, mapuslanon sa pagpanudlo kag sa pagdisiplina sa katawhan.—Juan 17:17; 2 Timoteo 3:16; 2 Pedro 1:21.
Kapin pa ang ginakinahanglan sa matuod nga mga Cristiano sang sa pagtu-ad lamang sang pagtuo. Kinahanglanon nga ang pagtuo ipasundayag paagi sa mga buhat. (Roma 10:10; Santiago 2:17, 26) Natawo subong mga makasasala, ang mga nangin Cristiano nagahinulsol, nagaliso, nagadedikar sang ila kabuhi kay Jehova, sa pagsimba kag sa pag-alagad sa iya, kag dayon nagapabawtismo sa tubig. (Mateo 28:19; Binuhatan 2:38; 3:19) Dapat sila magpabilin nga matinlo gikan sa pagpakighilawas, gikan sa idolatriya, kag gikan sa pagkaon sing dugo. (Binuhatan 15:20, 29) Ginauba nila ang daan nga mga personalidad upod sa ila pagkamaakigon, malaw-ay nga hambal, pagbinutig, pagpangawat, pagpahubog, kag “mga butang kaangay sini,” kag ginapahisuno nila ang ila kabuhi sa mga prinsipio sang Biblia. (Galacia 5:19-21; 1 Corinto 6:9-11; Efeso 4:17-24; Colosas 3:5-10) “Wala sing bisan sin-o sa inyo,” sulat ni Pedro sa mga Cristiano, “ang mag-antos subong nga nakapatay, ukon makawat, ukon manugbuhat sing kalautan, ukon subong nga mahilabtunon sa mga butang sang iban.” (1 Pedro 4:15) Ang mga Cristiano dapat mangin maluluy-on kag mapatugsilingon, malum-ok sing panghunahuna kag mainantuson, mahigugmaon nga nagapugong sang kaugalingon. (Galacia 5:22, 23; Colosas 3:12-14) Nagaaman sila kag nagaatipan sang ila kaugalingon kag nagahigugma sa ila mga isigkatawo subong sang ila kaugalingon. (1 Timoteo 5:8; Galacia 6:10; Mateo 22:36-40; Roma 13:8-10) Ang una nga nagapakilala nga kinaiya sa mga Cristiano amo ang talalupangdon nga gugma nila para sa isa kag isa. “Paagi sa sini,” siling ni Jesus, “makilala sang tanan nga kamo mga disipulo ko, kon maghigugmaanay kamo.”—Juan 13:34, 35; 15:12, 13.
Ginailog sang mga Cristiano ang halimbawa ni Jesus subong Dakung Manunudlo kag Matutom nga Saksi ni Jehova. (Juan 18:37; Bugna 1:5; 3:14) “Lakat kamo . . . kag himuon nga mga disipulo ang katawhan sang tanan nga pungsod” amo ang sugo sang ila Lider. (Mateo 28:19, 20) Sa pagtuman sini, ang mga Cristiano ‘nagapanaksi sing dayag kag sa balay kag balay,’ ginapalig-on ang tanan bisan diin nga magguwa sa Babilonia nga Daku kag ipahamtang ang ila paglaum kag pagsalig sa Ginharian sang Dios. (Binuhatan 5:42; 20:20, 21; Bugna 18:2-4) Maayong balita gid ini, apang ang pagwali sina nga mensahe nagadala sa mga Cristiano sing dakung paghingabot kag pag-antos, subong sang naeksperiensiahan ni Jesucristo. Ang iya mga sumulunod indi labaw sa iya; tuman na kon sila kaangay niya. (Mateo 10:24, 25; 16:21; 24:9; Juan 15:20; 2 Timoteo 3:12; 1 Pedro 2:21) Kon ang isa ‘nagaantos subong nga Cristiano, dili sia magkahuya, kundi paghimayaon niya ang Dios sa sining ngalan,’ laygay ni Pedro. (1 Pedro 4:16) Ginahatag sang mga Cristiano kay “Cesar” ang iya sang superyor nga mga awtoridad sining kalibutan—kadungganan, pagtahod, buhis—apang sa amo man nga tion nagapabilin sila nga napain gikan sa mga hilikuton sining kalibutan (Mateo 22:21; Juan 17:16; Roma 13:1-7), kag bangod sini ginadumtan sila sang kalibutan.—Juan 15:19; 18:36; 1 Pedro 4:3, 4; Santiago 4:4; 1 Juan 2:15-17.
Halangpunon kon ngaa ang mga tawo nga may subong sina kataas nga mga prinsipio sang moralidad kag integridad, nga naupdan sang makapahulag nga mensahe nga ginhatag upod ang kalayuhon nga kakugi kag pagkaprangka, natalupangdan sa gilayon sang nahaunang siglo. Ang mga paglakbay ni Pablo subong misyonero, halimbawa, daw kaangay sang nagalapta nga kalayo nga nagsunog sang siudad kag siudad—Antioquia sa Pisidia, Iconium, Listra, Derbe, kag Perga sa isa ka paglakbay; Filipos, Tesalonica, Berea, Atenas, kag Corinto sa isa pa ka paglakbay—nga nagtiklod sa mga tawo sa pagdulog, sa paghunahuna, kag sa pagdesisyon, kon bala batunon ukon isikway ang maayong balita sang Ginharian sang Dios. (Binuhatan 13:14–14:26; 16:11–18:17) Linibolibo ang nagbiya sa ila butig nga relihiosong mga organisasyon, bug-os tagipusuon nga nagbaton sang Cristianismo, kag makugihon nga naghimo sang pagbantala nga hilikuton bilang pag-ilog kay Cristo Jesus kag sa mga apostoles. Ini, sa baylo, naghimo sa ila nga mga tulumuron sang dumot kag paghingabot, nga ginsugyot labi na sang butig nga relihiosong mga lider kag sang politikal nga mga manuggahom nga may sayop nga pagkakilala. Ang ila lider nga si Jesucristo, ang Prinsipe sang Paghidait, ginpatay sa sumbong nga sedisyon; ang mahigugmaon sa paghidait nga mga Cristiano ginsumbong nga “nagagamo sang aton siudad,” ‘nagpabaliskad sang napuy-an nga duta,’ kag isa ka katawhan nga ‘ginapakamalain bisan diin.’ (Binuhatan 16:20; 17:6; 28:22) Sang tion nga ginsulat ni Pedro ang iya nahauna nga sulat (c. 62-64 C.E.) daw subong bala nga ang hilikuton sang mga Cristiano kilala sing maayo sa mga duog subong sang “Pontus, Galacia, Capadocia, Asia, kag Bitinia.”—1 Pedro 1:1.