Pagtipon Upod sa mga Mahigugmaon sang Hinatag-Dios nga Kahilwayan

ANG mga Saksi ni Jehova pinasahi sa tuman kadamo nga paagi. Sila lamang ang nagapamulong sing “putli nga hambal.” (Sofonias 3:9) Sila lamang ang nahiusa, subong nga may nagapakilala nga tanda sang gugma nga ginlaragway ni Jesucristo. (Juan 13:35) Kag sila lamang ang nagaagom sing kahilwayan nga ginsiling ni Jesucristo nga dalhon sang kamatuoran, subong sang ginarekord sa Juan 8:32: “Kamo makakilala sang kamatuoran, kag ang kamatuoran magahilway sa inyo.”

Inang mga pinamulong nga ginpatuhoy ni Jesucristo, ang Anak sang Dios, sa iya mga alagad nagmatuod. Kag ginaapresyar ini karon sing labi pa sang sa nagligad sang tanan nga mga Saksi ni Jehova nga nagtambong sa “Mga Mahigugmaon sang Kahilwayan” nga Distrito nga mga Kombension. Ang programa sang kombension nagsugid sa ila sang lainlain nga mga bahin sang ila kahilwayan, kon paano nila ini gamiton, ang salabton nga nagaupod sa ila kahilwayan, kag kon daw ano sila ka bulahan nga mangin hilway nga katawhan.

Ining suno sa tion kag praktikal nga mga kombension nagsugod sa Naaminhan nga Hemisperio sadtong Hunyo 7, 1991, sa Los Angeles, California, E.U.A. Ang programa nagbukas sang alas 10:20 s.a. paagi sa presentasyon sa musika, ginsundan sang ambahanon kag pangamuyo. Ang nagabukas nga pamulongpulong isa ka matigdas nga presentasyon pasad sa Santiago 1:25. Suno sa The Jerusalem Bible, ining bersikulo mabasa: “Ang tawo nga nagatulok sa himpit nga kasuguan sang kahilwayan kag nagahimo sini nga batasan niya—wala nagapamati kag nian nagakalimot, kundi aktibo nga nagatuman sini—mangin malipayon sa tanan niya nga ginahimo.” Subong nga nagatan-aw kita sa espeho agod makita kon diin kita kinahanglan nga maghimo sing pagpauswag sa aton hitsura, gani kinahanglan kita maglili sa himpit nga kasuguan sang Dios nga iya sang kahilwayan agod mahibaluan kon diin kita nagakinahanglan nga maghimo sing mga pagbalhin sa aton personalidad. Kag dapat kita padayon nga magtan-aw sa sina nga espeho.

Masunod amo ang pamulongpulong sang tsirman, “Kari Kamo, Tanan Kamo nga mga Mahigugmaon sang Kahilwayan.” Ang mga Saksi ni Jehova nagahigugma sang kahilwayan, kag luyag nila magpabilin nga hilway. Ginbalikwat sang humalambal ang legal nga mga awtoridad nga nagpakita nga wala sing kahilwayan kon wala sing kasuguan. Huo, ang mga Cristiano indi hilway sa paghimo sang luyag nila kundi hilway sila sa paghimo sang kabubut-on ni Jehova. Luyag nila himuslan sing bug-os ang ila kahilwayan apang wala ini ginaabuso. Labi na sugod sang 1919 nga ang mga Saksi ni Jehova nagaagom sing dugang nga kahilwayan. Gin-asoy sang humalambal ang pagpadaku sa kahilwayan sa mga tema sang kombension kag Cristianong mga publikasyon. Ang tanan nga mga kombensionista dapat magtuon sing dugang nahanungod sa hatag-Dios nga kahilwayan kag kon paano ini gamiton.

Ang suno sa tion nga mga komento ginsundan sang mga interbyu sa mga nagahigugma sang kahilwayan nga nalipay makatambong sa kombension. Ang mga kombension tion sa pagkasadya, subong nga ang tatlo ka tuigan nga mga piesta sang Israel anay gintandaan sang daku nga kasadya. Ang madamong interbyu nagpamatuod nga ang mga kombension makapalig-on sa espirituwal nga tion sa pagkasadya.

Nian nagsunod ang keynote address, “Ang Katuyuan kag Kapuslanan sang Aton Hatag-Dios nga Kahilwayan.” Sa sining pamulongpulong natun-an sang mga kombensionista nga si Jehova lamang ang may bug-os nga kahilwayan bangod sia amo ang Supremo nga Awtoridad kag labing gamhanan. Tungod sa iya ngalan kag sa kaayuhan sang iya mga tinuga, walay sapayan, kon kaisa ginalatiran niya ang iya kahilwayan paagi sa pagkamakuli sa pagkaakig kag pagpakita sing pagpugong sa kaugalingon. Ang tanan niyang intelihente nga mga tinuga may relatibo nga kahilwayan, kay napasakop sila kay Jehova kag limitado sang iya mga kasuguan sa pisikal kag moral. Ginhatagan sila ni Jehova sing kahilwayan para sa ikalipay nila apang sing labi pa agod magahatag sila sa iya sing kadungganan kag kalipay paagi sa pagsimba sa iya. Bangod sang paggamit sing maayo sang ila kahilwayan, ang mga Saksi ni Jehova nakatigayon sing bug-os kalibutan nga reputasyon sang maayong paggawi kag kakugi sa ila ministeryo.

Biernes sang Hapon

“Masako—Sa Patay nga mga Buhat ukon sa Pag-alagad kay Jehova?” amo ang nagapahunahuna nga titulo sang pamulongpulong nga nagbukas sang sesyon sang Biernes sang hapon. Ang patay nga mga buhat nagalakip indi lamang sang iya sang unod kundi sang iban man nga patay sa espirituwal, walay pulos, kag walay bunga—subong sang madasig makakuwarta nga mga padugi. Nahanungod sini, ang bunayag nga pag-usisa sa kaugalingon kinahanglanon sa pagpat-od kon bala ginauna naton ang Ginharian sa kabuhi.

Ang masunod nga pamulongpulong may kaanggid nga katuyuan, “Pagtuman sang Aton Komisyon Subong mga Ministro sang Dios.” Ginpakita sang humalambal nga ang mga Cristiano indi dapat mangin kontento lamang sa pakitakita nga pag-alagad ukon sa paglab-ot lamang sa mga lalab-uton nga oras. Dapat nga luyag nila mangin epektibo sa tanan nga bahin sang ila Cristianong ministeryo. Ining mga punto ginpatudok sa hunahuna paagi sa demonstrasyon kag mga interbyu. Ang tanan ginlaygayan sa pagtuman sang ila ministeryo sa bug-os gid nga kasangkaron kon mahimo.

Sa pamulongpulong “Hilway nga Katawhan Apang Manabat.” Ginpadaku sang humalambal nga bisan pa ginahamili sang katawhan ni Jehova ang kahilwayan nga ginadala sa ila sang kamatuoran, dapat nila dumdumon nga nagaupod sa sini ang salabton. Dapat nila gamiton ang ila kahilwayan, indi subong balibad para sa malain nga paggawi, kundi sa pagdayaw kay Jehova. Subong mga Cristiano, may salabton sila sa “superyor nga mga awtoridad” kag dapat man magkooperar sa mga gulang sa kongregasyon. (Roma 13:1) Dugang pa, may salabton man sila tungod sa ila pamayo, pamustura, kag paggawi. Indi gid nila dapat pagkalimtan nga “ang tagsatagsa sa aton magahatag sing husay sang iya kaugalingon sa Dios.”—Roma 14:12; 1 Pedro 2:16.

Nian nagsunod ang paghinun-anon sa kinahanglanon nga ang tanan nga mga Cristiano mangin “Walay Kahadlok Samtang Nagahilapit ang Katapusan Sining Kalibutan.” Samtang ang katawhan nahadlok nahanungod sa kon ano ang magaabot, ang mga Cristiano dapat magmangin walay kahadlok sa pagtuman sang ila ministeryo. Ang pagkawalay kahadlok resulta sang pagsalig kay Jehova, kay sa labi nga pagkahadlok sang isa ka Cristiano nga indi mapahamut-an ang Dios, kubos sia nga magakahadlok sa mga tinuga. Ang pagsaulo sang nagapaumpaw nga mga kasulatan nagapabakod sa isa ka tawo nga magmangin walay kahadlok. Agod mangin mabaskog sa espirituwal kag walay kahadlok, ang mga alagad sang Dios dapat man maghimulos sang tanan nga kahigayunan sa pagpakig-upod sa mga masigkatumuluo. Dapat man dumdumon sang tagsatagsa ang papel sang pangamuyo sa pagkawalay kahadlok. Paagi sa pagpabilin nga walay kahadlok, ang mga Cristiano nagahupot sang maayong kaangtanan kay Jehova nga Dios.

Ang programa sa nahaunang adlaw naghinakop paagi sa makatudlo katama nga drama nga Ginhilway sa Pagpauswag sang Matuod nga Pagsimba. Ginpakita sini kon paano ang isa ka modernong-adlaw nga pamilya nakatuon sing leksion gikan kay Esdras kag sa iya 7,000 ka hangaway, nga nagdulot sing mga halad agod makabalik sa Jerusalem. Nagpaposible ini sa tagsatagsa ka kombensionita sa pag-usisa sang iya mga prioridad kag sa pagpat-od kon paano niya mapauswag ang iya mga pribilehiyo sa pag-alagad. Ining drama para gid sa mga may edad kag mga bata.

Sabado sang Aga

Pagkatapos sang programa sa musika, ambahanon, pangamuyo, kag paghinun-anon sa adlaw-adlaw nga teksto sa Biblia, ang programa sang Sabado sang aga naglakip sang simposium nga natig-uluhan “Kahilwayan nga May Responsabilidad sa Pamilya.” Sa unang bahin sini, “Kon Paano Mailog sang mga Amay si Jehova,” ang mga amay ginlaygayan sa lainlain nga mga paagi diin sarang nila mailog ang aton langitnon nga Amay. Ang 1 Timoteo 5:8 nagasugo nga indi lamang sila magaaman sa materyal kundi sa espirituwal man. Ginailog nila si Jehova paagi sa pagkamangin maayong mga manunudlo sa ila pamilya kag paagi sa pagpadapat sing mahigugmaon nga disiplina kon kinahanglan. Ining mga punto gin-ilustrar paagi sa madamong interbyu.

“Ang Nagasakdag nga Papel sang Asawa” amo ang masunod nga bahin sining simposium. Nagsugod ini paagi sa pagpadaku nga ang asawa may talahuron nga posisyon sa Cristianong pamilya, ang mangin masinakdagon. Ano ang ginakinahanglan sini sa iya? Nga magpasakop sia sing nagakaigo, wala nagaipit sa iya bana sa paghimo sang butang nga sia lamang ang may luyag. Dapat niya atipanon sing maayo ang iya mga obligasyon sa iya bana kag kabataan, kag makatigayon sia sing daku nga kalipay paagi sa paghupot sang iya puluy-an nga matinlo kag mahim-ong. Kag subong isa ka Cristianong ministro, madamo sia sing kahigayunan sa pagpakigbahin sa pag-alagad sa latagon. Ang interbyu sa isa ka pamilya nagpakita sang kaalam sinang Makasulatanhon nga laygay.

Ang mga kabataan nakabaton sing igtalupangod sa bahin “Mga Anak nga Nagapamati kag Nagatuon.” Paagi sa paghanas sa ila kabataan sa pagpamati kag sa pagtuon, ang mga ginikanan nagahatag sing kadungganan kay Jehova kag nagapakita sing gugma para sa ila espirituwal nga mga kauturan kag para sa ila kaugalingon nga mga anak. Ang mabakod nga higot nagaluntad sa ulot sang mga ginikanan kag kabataan kon nagahinguyang sila sing de-kalidad nga tion sing tingob. Ang mga ginikanan dapat nasangkapan sa pagsabat sa mga pamangkot sang ila mga kabataan kag sa pagpukaw sang ila kauhaw sa ihibalo. Sa liwat, ang mga interbyu nagpakita kon paano ini himuon.

Nagsunod ang maayong laygay nga “Hupti ang Imo Kaugalingon nga Hilway sa Pag-alagad kay Jehova.” Paano ini himuon? Paagi sa pagpabilin nga hilway gikan sa paghingamo sa kalibutanon nga mga karera, nagakonsumo sang tion nga mga kalingawan, kag materyalistiko nga mga tulumuron. Si Jesus kag si apostol Pablo naghatag sa aton sing maayong halimbawa paagi sa pagsakripisyo sa kaugalingon. Ang katawhan ni Jehova dapat maghupot sing simple nga mata, nga nahugod sa mga interes sang Ginharian. Nahanungod sa pagtigayon sing materyal nga mga butang, mas maalamon nga magsupot karon kag magbakal sa ulihi sang sa magbakal karon kag magbayad sa ulihi. Ang mga pamatan-on dapat magbantay batok sa pagpamensar sa seksuwal nga mga kalipayan kag kalibutanon nga mga karera. Ang pag-interbyu sa isa ka diminyo nga payunir nagpakita sang mga kabulahanan nga matigayon kon ang isa nagapabilin nga hilway sa pag-alagad kay Jehova.

Ang programa sang Sabado sang aga nagtakop paagi sa pamulongpulong “Magsulod sa Kahilwayan Paagi sa Dedikasyon kag Bawtismo.” Ang mga kandidato sa bawtismo ginpahanumdom nga bisan pa ang tinuga nahulog sa kahiolipnan bangod sang pagrebelde ni Adan, ang gamhanan nga Manughilway, si Jesucristo, nagbukas sang dalan padulong sa kahilwayan paagi sa iya halad. Ginpakita sang humalambal kon ano ang nadalahig sa pagkamangin hilway sa paghimo sang kabubut-on sang Dios kag ginpadaku ang mga obligasyon kag mga pagpakamaayo nga matigayon sang mga bawtismuhan.

Sabado sang Hapon

Ang programa sang Sabado sang hapon nagsugod paagi sa nagausisa sang kalag nga pamangkot “Kay Sin-o Kaayuhan ang Imo Ginapangita?” Ang kalibutan nagapakita sang nagapangita sang kaugalingon nga kaayuhan nga espiritu sang Yawa. Apang, ang mga Cristiano dapat mag-ilog sang nagasakripisyo sa kaugalingon nga espiritu ni Jesucristo. Daw ano kaayo nga huwaran ang ginpahamtang niya! Ginbayaan niya ang langitnon nga himaya kag nian ginhalad ang iya tawhanon nga kabuhi para sa aton kaayuhan. Ang mga hangkat sa kon kay sin-o kaayuhan ang ginapangita naton nagalutaw kon may mga dipaghangpanay sa ulot sang mga Cristiano sa negosyo ukon kuwarta, kon may pagbungguanay sing personalidad, kag iban pa. Nagatilaw ina sang Cristianong gugma. Apang paagi sa pagpangita sang kaayuhan sang iban, nakapat-od ang isa nga matigayon ang daku pa nga pagpakamaayo sang paghatag, kag matigayon niya ang kahamuot ni Jehova.

Nian nagsunod ang may kaangtanan nga tema nga “Pagkilala kag Paglandas sa Espirituwal nga Kaluyahon.” Ginpadaku sining pamulongpulong ang kinahanglanon sa pagkilala sa mga simtoma sang espirituwal nga kaluyahon kag nian sa pagpanghikot sing mapinamat-uron sa pagpakig-away agod malandas si Satanas kag ang iya mga siod. Dapat ipalambo sang mga alagad ni Jehova ang tudok nga gugma sa iya kag ang pagdumot sa malain. Nagakinahanglan ini nga kilalahon nila si Jehova paagi sa regular kag matinuyuon nga personal kag pamilya nga pagtuon sa Biblia. Dapat nila likawan ang tanan nga dagway sang kalingawan nga nagapadaku sang kasingki kag seksuwal nga imoralidad. (Efeso 5:3-5) Ang regular nga pagpangamuyo kag pagtambong sa mga miting kinahanglan man sa paglandas sing madinalag-on sang espirituwal nga kaluyahon.

Ayhan ang pamulongpulong nga ginhambalan sing labi sang sa iban pa nga ginhatag sa kombension amo ang isa nga natig-uluhan “Ang Pag-asawahay Bala Amo ang Yabi sa Kalipay?” Amo sina ang ginahunahuna sang madamong pamatan-on! Apang gin-athag sang humalambal nga madamong matutom nga espiritu nga mga tinuga ang malipayon bisan pa indi minyo, subong nga madamong dedikadong Cristiano ang tuman ka malipayon bisan pa wala sila nagota sa pag-asawahay. Dugang pa, madamong mag-asawa ang indi malipayon, subong sang ginapakita sang mataas nga kadamuon sang diborsio. Dapat lamang hunahunaon sang isa ang madamong pagpakamaayo nga maagom sang tanan nga dedikadong mga Cristiano sa paghibalo nga ang pag-asawahay, bisan pa pagpakamaayo, indi ang yabi sa kalipay.

Ginsundan ini sang simposium nga “Ang Cristianong Kahilwayan sa Aton Adlaw.” Ginhambalan sang nahaunang humalambal ang “Pag-usisa sa mga Bahin sang Aton Cristianong Kahilwayan.” Nagalakip ini sang kahilwayan sa butig nga relihiosong mga panudlo subong sang Trinidad, pagkadimamalatyon sang tawhanon nga kalag, kag dayon nga pag-antos. Nian may kahilwayan gikan sa pagkaulipon sa sala. Bisan pa ang mga Cristiano dihimpit, hilway sila sa malain nga mga batasan subong sang panigarilyo, panahor, pahubog, kag seksuwal nga pagkasalamwanan. May kahilwayan man gikan sa pagkawalay paglaum, kay may paglaum sila sang Ginharian nga nagapahulag sa ila nga isugid sa iban ang nahanungod sini.

Ang masunod nga humalambal nagpamangkot “Personal Mo Bala nga Ginahamili ang Kahilwayan?” Ang paghamili nagakahulugan sing pagmahal, sing pag-atipan upod ang pag-ulikid. Agod mahimo ina, ang alagad sang Dios dapat magbantay nga indi masulay sa paglabang sa mga dulunan sang Cristianong kahilwayan. Ang kahilwayan sang kalibutan malimbungon, kay na garesulta ini sa pagkaulipon sa sala kag kalautan.

Ang katapusan nga humalambal sa sining simposium nagpamulongpulong nahanungod sa tema “Ang mga Mahigugmaon sang Kahilwayan Nagatindog nga Dimationg.” Agod mahimo ina, ang mga Cristiano dapat magpabilin nga suod sa ila langitnon nga mga ginikanan, kay Jehova kag sa iya katulad-asawa nga organisasyon. Indi mahimo nga pabay-an sang katawhan ni Jehova ang ila kaugalingon nga matublag sang apostata nga propaganda; dapat nila sikwayon yadtong nagapalapit nga may imoral nga proposisyon. Agod makatindog nga dimationg sa diosnon nga kahilwayan, ang mga Cristiano dapat “magkabuhi sa espiritu.”—Galacia 5:25.

Ang katapusan nga pamulongpulong sadto nga adlaw tuburan gid sang kalipay. Natig-uluhan ini “Ang Pinakabantog nga Tawo nga Nagkabuhi.” Si Jesucristo amo ang pinakabantog nga tawo, kay apektado niya ang kabuhi sang katawhan sing labi ka kusog sang sa tanan nga mga hangaway, mga navy, mga parlamento, kag mga hari kon tingubon. Sia ang Anak sang Dios, nga nagkabuhi sa langit antes magkari sa duta. Nailog gid sing maayo ni Jesus ang iya langitnon nga Amay sa ginpamulong kag gintudlo niya kag sa kon paano sia nagkabuhi sa bagay nga nakasiling sia: “Ang nakakita sa akon nakakita man sa Amay.” (Juan 14:9) Ginpakita gid sing maayo ni Jesus nga ang “Dios gugma”! (1 Juan 4:8) Pagkatapos mabinagbinag sing malawig ang nahanungod sa mga kinaiya ni Jesus, ang humalambal nagsiling nga ginbalhag sa Ang Lalantawan kutob sang Oktubre 1985 (Abril 1985 sa The Watchtower) ang serye sang mga artikulo nga natig-uluhan “Ang Kabuhi kag Ministeryo ni Jesus.” Bilang sabat sa madamong pangabay, ginapaguwa karon sang Sosiedad ang bag-ong libro nga Ang Pinakabantog nga Tawo nga Nagkabuhi. May 133 ini ka kapitulo kag gin-imprinta sing de-kolor. Ang materyal sa mga serye gin-edit, kag ang tanan ginlakip sa 448 ka pahina sang libro. Sa pagkamatuod, ining adlaw sang kombension natapos sing makalilipay!

Domingo sang Udto

Sa una nga bahin sang sesyon sang Domingo sang aga ginhatag ang simposium “Pag-alagad Subong mga Mangingisda sang Tawo.” Ang pamulongpulong “Pagdakop sing Isda—Literal kag Simbuliko” nagpasad sing sadsaran para sa mga pamulongpulong nga nagsunod. Ginpakita sang humalambal nga pagkatapos ginpahanabo ni Jesus ang milagruso nga pagdakop sa isda, gin-agda niya ang mga mangingisda nga mangin mangingisda sang tawo. Sa pila ka tion, ginhanas ni Jesus ang iya mga disipulo nga mangin mga mangingisda sang tawo, kag sugod sang Pentecostes 33 C.E., madinalag-on sila sa pagbulig sa kadam-an nga mga lalaki kag mga babayi nga mangin mga disipulo.

Ang masunod nga humalambal nagpamulongpulong nahanungod sa parabola sang pukot nga narekord sa Mateo 13:47-50. Ginpakita niya nga ang malaragwayon nga pukot nagalakip sa hinaplas nga mga Cristiano kag Cristiandad, ang naulihi bangod sang hilikuton nga ginhimo sa pagbadbad, pagbalhag, kag pagpanagtag sing mga Biblia, bisan pa ining mga panikasog nagtipon sang kadam-an sang dimaayo nga isda. Labi na sugod sang 1919 ginhimo ang hilikuton sa pagpainpain, kag ang dimaayo nga isda ginhaboy, samtang ang maayo gintipon sa daw suludlan nga mga kongregasyon nga nagbulig sa pag-amlig kag sa pagtipig sa matuod nga mga Cristiano para sa balaan nga pag-alagad.

Ang ikatlo nga pamulongpulong, “Pagpangisda sing Tawo sa Tugob-globo nga Tubig,” nagpadaku sang obligasyon sang tanan dedikado nga mga Cristiano sa pagpakigbahin sa bug-os kalibutan nga pagpangisda. Sa karon kapin sa 4,000,000 ang nagapakigbahin sa sining hilikuton sa kapin sa 200 ka kadutaan, kag sining karon lang nga mga tinuig kapin sa 230,000 ang ginbawtismuhan kada tuig. Ang tanan nga katawhan ni Jehova ginlaygayan nga pauswagon ang ila ikasarang sa pagpangisda, kag gin-interbyu ang pila ka madinalag-on nga “mga mangingisda.”

Sa masunod nga pamulongpulong, nga natig-uluhan “Pagpabilin nga Nagabugtaw sa ‘Tion sang Katapusan,’ ” ginhatag sang humalambal ang pito ka bulig sa pagtabang sa katawhan sang Dios sa pagpabilin nga nagabugtaw: pagbato sa mga tublag, pagpangamuyo, pagpalanog sang paandam nahanungod sa katapusan sining sistema, pagpabilin sa organisasyon ni Jehova, pag-usisa sa kaugalingon, pagpamalandong sa natuman nga mga tagna, kag pagdumdum nga ang ila kaluwasan mas malapit na sang sa nangin mga tumuluo sila.

Ang programa sang aga naghinakop paagi sa paghinun-anon sa “Sin-o ang Makapalagyo sa ‘Tion sang Kasisit-an’?” Ginpakita sang humalambal kon paano ang tagna ni Joel natuman sa tion sang mga apostol, may dugang nga katumanan karon, kag may bug-os nga katumanan sa malapit nga palaabuton.

Domingo sang Hapon

Ang programa sa hapon nagsugod paagi sa pamulongpulong publiko, “Pag-abiabi sa Bag-ong Kalibutan sang Dios sa Kahilwayan!” Ining pamulongpulong nagpadayon sang tema sang kombension nahanungod sa kahilwayan. Ginpakita nga ang Pulong sang Dios nagatagna sang isa ka bag-ong kalibutan diin may kahilwayan gikan sa pagpigos sang mga elemento sang butig nga relihion, politika, ekonomiko, kag rasa. May kahilwayan man sa sala kag kamatayon. Ang himpit nga kapagros ipasag-uli agod ang katawhan magakabuhi sing dayon sa kalipay sa paraiso nga duta. Busa, ang mga nagahigugma sang pagkamatarong may rason sa pag-abiabi sa Manughimo sang bag-ong kalibutan paagi sa pagtu-aw: “Salamat, Jehova, tungod sa matuod nga kahilwayan sa katapusan!”

Ang pamulongpulong publiko ginsundan sang butang nga bag-o para sa distrito nga mga kombension—ang paghinun-anon sa leksion sa Ang Lalantawan sa semana. Nian natapos ang kombension paagi sa isa ka makapulukaw nga pamulongpulong kag laygay nga “Mga Mahigugmaon sang Kahilwayan, Padayon nga Mag-uswag.” Malip-ot nga ginhambalan sang humalambal ang talalupangdon nga mga punto sang tema sang kombension nga kahilwayan. Ginpadaku niya kon daw ano ka malipayon ang katawhan ni Jehova bangod sang ila kahilwayan, ginhatag ang mga paagi diin ang mga Cristiano naghimo sing pag-uswag, kag naglaygay sa ila sa pag-uswag sing padayon nga nahiusa agod maani ang dugang nga mga pagpakamaayo. Naghinakop sia paagi sa mga pulong: “Samtang ginahimo naton ini, kabay nga padayon nga pakamaayuhon ni Jehova ang tanan agod padayon kita nga mag-uswag subong mga nagahigugma sang kahilwayan.”

“Ang tinuga nasakop sa kaluyahon, indi sa iya kaugalingon nga kabubut-on kundi sa kabubut-on sadtong nagsakop sa iya sa paglaum, bangod nga ang tinuga gid hilwayon sa kahiolipnan sang pagkadimadinulunton kag makaagom sang mahimayaon nga kahilwayan sang mga anak sang Dios.”—Roma 8:20, 21.

[Mga laragway sa pahina 25]

Ang lamharon nga delegado sa kombension sa Prague, Czechoslovakia

[Mga laragway sa pahina 26]

1. Mga kandidato manugpakadto sa lugar nga bawtismuhan sa Prague, Czechoslovakia

2. Pagpabawtismo subong isa ka Saksi ni Jehova sa Tallinn, Estonia

3. Ang bag-ong mga publikasyon nagpahalipay sa mga kombensionista sa Usolye-Sibirskoye, Siberia

4. Pagpaguwa sing “New World Translation of the Holy Scriptures” sa Czech kag Slovak sa kombension sa Prague