Magmabinatason Kamo Ayon sa Tanan
“Nagalaygay kami sa inyo, mga kauturan, nga laygayan ang mga matamad, palig-unon ang mga mahuyang sing tagipusuon, sakdagon ang mga maluya, magmabinatason kamo ayon sa tanan.”—1 TESALONICA 5:14.
1. Sa diin kag sa idalom sang anong mga kahimtangan ang mga Saksi ni Jehova nagpakita sing pagkamabinatason?
DAW ano katahom nga halimbawa ang ginahatag sang modernong-adlaw nga mga Saksi ni Jehova sa pagkamabinatason! Nagbatas sila sing daku nga kabudlayan kag paghingabot sa Nazi kag Pasista anay nga mga kadutaan kag sa mga pungsod subong sang Malawi tubtob karon nga tion. Mabinatason man ang nagapuyo sa nabahinbahin sa relihion nga mga panimalay.
2. Ano ang duha ka butang nga nagahatag sing rason sa espirituwal nga paraiso ang ginaagom sang katawhan ni Jehova?
2 Walay sapayan sang paghingabot kag mga kabudlayan nga naeksperiensiahan nila, ang dedikado nga katawhan ni Jehova nagaagom sing mga pagpakamaayo sa espirituwal nga paraiso. Sa pagkamatuod, ginapakita sang katunayan nga ang hinaplas nga mga Cristiano nagsugod sa pag-agom sini sang tuig 1919. Ano ang rason para sining espirituwal nga paraiso? Una sa tanan, ining paraiso nga kahimtangan nagluntad sa tunga sang katawhan ni Jehova bangod ginpasag-uli sang Dios ang iya hinaplas nga mga alagad sa ila “duta,” ukon kahimtangan, sang putli nga pagsimba. (Isaias 66:7, 8) Ang espirituwal nga paraiso nagauswag man bangod ang tanan nga yari diri nagapakita sang mga bunga sang espiritu sang Dios. Ang pagbatas amo ang isa sini. (Galacia 5:22, 23) Ang importansia sini nga kinaiya kon tuhoy sa aton espirituwal nga paraiso makita gikan sa ginpamulong sang eskolar nga si William Barclay: “Wala sing Cristianong pagpakig-upod kon wala sing makrothumia [pagbatas]. . . . Kag ang rason sina amo lang ini—nga ang makrothumia amo ang daku nga kinaiya sang Dios (Roma 2.4; 9.22).” (A New Testament Wordbook, pahina 84) Huo, amo sina ka importante ang pagbatas!
Pagkamabinatason Ayon sa Aton mga Kauturan
3. Anong leksion nahanungod sa pagkamabinatason ang ginhatag ni Jesus kay Pedro?
3 Ayhan nabudlayan si apostol Pedro sa pagpakita sing pagbatas, kay kis-a ginpamangkot niya si Jesus: “Ginuo, makapila bala ang akon utod makasala sa akon kag mapatawad ko sia? Tubtob bala sa makapito?” Si Jesus naglaygay sa iya: “Wala ako nagasiling sa imo, Tubtob sa makapito, kundi Tubtob sa kapitoan ka pito.” (Mateo 18:21, 22) Sa aton pa, wala sing latid kon tubtob pila ka beses kita magbinatasay sa isa kag isa kag magpatawad sa isa nga nakasala batok sa aton. Total, indi naton mahanduraw nga may isa nga magaisip tubtob sa 77 ka beses! Apang, ang mangin subong ka mapatawaron nagakinahanglan sing pagbatas.
4. Ngaa ang mga gulang labi na nga kinahanglan magmabinatason?
4 Nahanungod sa pagpakita sing pagbatas sa espirituwal nga mga kauturan, indi mapangduhaduhaan nga ang mga gulang sa kongregasyon kinahanglan mangin huwaran. Ang ila pagpailob mahimo matilawan bangod ang iban nga mga masigkatumuluo mahimo mangin dimahalungon ukon dimainulikdon. Ang iban mahimo nga hungod nga nagapalantang sa pagtadlong sang malain nga mga batasan. Ang mga gulang dapat maghalong nga indi madali maugot ukon maakig sa mga kaluyahon sang ila Cristianong mga kauturan nga lalaki kag babayi. Sa baylo, dapat dumdumon sining espirituwal nga mga manugbantay ang laygay: “Kita nga mabakud dapat magdala sang mga kaluyahon sang mga maluya, kag dili magpahamuot sa aton kaugalingon.”—Roma 15:1.
5. Ano ang masarangan naton paumuran kon kita mabinatason?
5 Nian sa liwat, ang pagbangig sa personalidad mahimo nga magautwas bangod sang mga kaluyahon kag mga kakulangan sang tawo. Bangod sang mga kakulangan ukon mga batasan, mahimo naton pirme ginapahanumdom ang aton mga kauturan sa sayop nga paagi, kag mahimo nila ina himuon sa aton. Gani, nagakaigo gid ang laygay: “Padayon sa pagpinaumuray kag pagpinatawaray kon ang isa may inugsumbong batok sa iya. Subong nga si Jehova nagpatawad sa inyo, amo man ang himuon ninyo.” (Colosas 3:13) Ang “pagpinaumuray” nagakahulugan sang pagkamabinatason, bisan pa may rason gid kita nga magreklamo batok sa iban. Indi kita dapat magbalus ukon magsilot sa aton utod, indi bisan magpanghayhay sa iya.—Santiago 5:9.
6. Ngaa ang pagkamabinatason dalanon sang kaalam?
6 Amo man sina ang laygay nga makita sa Roma 12:19: “Dili kamo magtimalus, mga hinigugma, kundi pabayai ini sa kasingkal; kay nasulat na: ‘Akon ang pagtimalus; ako ang magatumbas, siling ni Jehova.’ ” Ang ‘pagpabaya sa kasingkal’ nagakahulugan sang pagkamakuli sa pagpangakig, ukon pagkamabinatason. Dalanon sang kaalam ang pagpakita sini nga kinaiya, kay nagabenepisyo ini sa aton kag sa iban. Kon magautwas ang problema, magaayo mismo ang aton pamatyag bangod sang pagkamabinatason, wala naton ginapadaku ang problema. Kag magaayo man ang pamatyag sang isa nga ginapakitaan naton sing pagkamabinatason bangod wala naton sia ginasilutan ukon ginabalusan sa pila ka paagi. Indi katingalahan nga si Pablo naglaygay sa mga masigka Cristiano nga “sakdagon ang mga maluya, magmabinatason kamo ayon sa tanan”!—1 Tesalonica 5:14.
Sa Sulod sang Pamilya
7. Ngaa ang mga mag-asawa dapat magmabinatason?
7 May ginasiling nga ang malipayon nga pag-asawahay pag-updanay sang duha ka maayong manugpatawad. Ano ang kahulugan sina? Nga ang malipayon nga mga mag-asawa mabinatason kon nagapakig-angot sa isa kag isa. Ang mga indibiduwal masami nga naganyat sa isa kag isa bangod sang ila magkatuhay nga mga batasan. Makatilingala ini nga mga kinatuhayan, apang mangin ginhalinan man ini sang pagbaisay nga nagadugang sa mga kahuol kag mga paghimud-os nga nagahatag na sa minyo nga mga Cristiano sing “kapipit-an sa ila unod.” (1 Corinto 7:28) Halimbawa, ang bana wala nagasapak sa mga detalye ukon daw mapatumbayaon ukon dimahalungon. Mabudlay ini sa iya asawa. Apang kon ang malulo sing hambal nga mga panugda indi madinalag-on, mahimo na lamang sia magpaumod sa mga kakulangan sang iya bana paagi sa pagkamabinatason.
8. Ngaa ang mga bana kinahanglan nga magmabinatason?
8 Sa pihak nga bahin, ang asawa mahimo magausisa sang mga detalye kag magabasol sang iya bana. Nagapahanumdom ini sang kasulatan: “Maayo pa magpuyo sa pamusod sang atop sang sa mag-upod sa babayi nga palabasol sa masangkad nga balay.” (Hulubaton 25:24, Today’s English Version) Sa amo nga kaso, ang pagkamabinatason kinahanglanon agod masunod ang laygay ni Pablo: “Mga bana, higugmaa ang inyo mga asawa kag dili kamo magpamati sa ila.” (Colosas 3:9) Nagakinahanglan man sing pagkamabinatason para sa mga bana nga pamatian ang laygay ni apostol Pedro: “Kamo nga mga bana, padayon kamo nga magkabuhi nga may patugsiling kaupod sang [inyo mga asawa] suno sa ihibalo, nga nagahatag sing dungog sa ila subong maluya nga suludlan, sanglit nga masigkamanunubli kamo sang bugay sang kabuhi, sa katuyuan nga indi masablagan ang inyo mga pangamuyo.” (1 Pedro 3:7) Ang mga kaluyahon sang iya asawa mahimo nga magapainit sa bana, apang ang pagkamabinatason magabulig sa iya nga magpaumod.
9. Ngaa kinahanglan ang pagkamabinatason sa bahin sang mga ginikanan?
9 Ang mga ginikanan dapat magmabinatason agod magmadinalag-on sila sa pagpadaku sa ila mga anak. Ang mga bata nagahimo sing amoamo lamang nga mga sayop. Mahimo sila nga mangin batinggilan ukon mahinay sa pagtuon kag padayon nga magapainit sa ila mga ginikanan. Sa sina nga mga kahimtangan, ang Cristianong mga ginikanan dapat mangin makuli sa pagpangakig, nga indi mainit kag madulaan sing pagpugong sa kaugalingon kundi magpabilin nga kalma samtang malig-on sa matarong nga mga prinsipio. Dapat dumdumon sang mga amay nga mga bata man sila anay kag nagasala man. Dapat nila sundon ang laygay ni Pablo: “Mga amay, dili pagpaakiga ang inyo mga kabataan, agod nga indi sila mahanusbu.”
—Colosas 3:21.
Sa mga Tagaguwa
10. Paano kita dapat magpanghikot sa aton ginaubrahan, subong sang makita sa anong eksperiensia?
10 Bangod sang tawhanon nga pagkadihimpit kag pagkakagod, ang dimakalilipay nga mga sitwasyon mahimo nga magautwas sa ginaubrahan sang isa ka Cristiano. Dalanon sang kaalam ang mangin mataktika kag magpaumod tungod sa paghidait. Nagapakita kon daw ano ka maalamon ini amo ang eksperiensia sang isa ka Cristiano nga biktima sang daku nga kaugot sang nahisa nga kaupod nga empleyado. Bangod wala ini ginapadaku sang utod kundi nangin mabinatason, sang ulihi nakaumpisa sia sing pagtuon sa Biblia sa empleyado nga nagapanggamo anay.
11. San-o kita labi nga nagakinahanglan nga magmabinatason, kag ngaa?
11 Labi na gid nga kinahanglan sang katawhan ni Jehova ang pagkamabinatason kon nagapanaksi sa mga tagaguwa sang Cristianong kongregasyon. Sa liwat kag liwat, ang mga Cristiano nagabaton sing bastos ukon dimatinahuron nga mga sabat. Nagakaigo ukon maalamon bala nga magsabat sa amo man nga paagi? Indi, kay wala ina nagapakita sing pagkamabinatason. Ang dalanon sang kaalam amo ang pagdumdom kag pagsunod sa maalam nga laygay: “Ang mahumok nga panalabton nagapalugpay sang kasingkal, apang ang matigdas nga pulong nagapaibwal sang kaakig.”—Hulubaton 15:1.
Ang Pagtuo kag Paglaum Nagabulig sa Pagpakita sing Pagkamabinatason
12, 13. Anong mga kinaiya ang nagabulig sa aton nga magmabinatason?
12 Ano ang magabulig sa aton sa pagpakita sing pagkamabinatason, sa pagpaumod sa mabug-at nga mga kahimtangan? Ang isa amo ang pagtuo sa mga saad sang Dios. Dapat kita magtuo sa ginasiling sang Dios. Ang Kasulatan nagasiling: “Walay pagsulay nga nakaabot sa inyo nga indi masarangan sang tawo. Ang Dios matutom, kag indi magtugot nga sulayon kamo labaw sa inyo masarangan, kundi kaupod sang pagsulay magahatag man sing lulutsan agod nga makasarang kamo sa pagbatas.” (1 Corinto 10:13) Sa iban nga hambal, subong sang siling sang isa ka madugay na nga Saksi: “Kon ginatugot ini sang Dios, masarangan ko ini.” Huo, masarangan naton ini paagi sa pagkamabinatason.
13 Naangot sing suod sa pagtuo amo ang paglaum sa Ginharian sang Dios. Kon magagahom ini sa duta, ang tanan nga malaut nga mga kahimtangan nga nagapasubo sa aton pagadulaon. Nahanungod sini, si salmista David nagsiling: “Untati ang kaakig kag bayai ang kasingkal; dili ka magkaakig kay ini nagapadulong lamang sa malaut nga buhat. Kay utdon ang mga manughikot sing malaut, apang ang mga nagalaum kay Jehova magapanubli sang duta.” (Salmo 37:8, 9) Ang pat-od nga paglaum nga sa dili madugay dulaon sang Dios ining tanan mabudlay nga mga kahimtangan nagabulig sa aton nga magmabinatason.
14. Anong mga eksperiensia ang nagapakita kon ngaa dapat kita magmabinatason ayon sa ditumuluo nga tiayon?
14 Ano dapat ang aton reaksion kon ang ditumuluo nga asawa nagahatag sa aton sing kasubo? Padayon nga magpangayo sing bulig sa Dios, kag padayon nga maglaum nga ang nagapamatok mangin sumilimba ni Jehova. Kon kaisa ang asawa sang isa ka Cristiano wala nagahanda sang iya pagkaon kag nagalaba sang iya mga panapton. Nagapamuyayaw sia, wala nagapakighambal sa iya bana sa sulod sang mga adlaw, kag nagtilaw pa gani sa paghiwit sa iya. “Apang,” siling sang bana, “pirme ako nagapangamuyo sing bulig kay Jehova, kag nagsalig ako sa Iya nga buligan niya ako sa pagpalambo sang maayong kinaiya sang pagkamabinatason agod indi ko mawasi ang akon Cristianong pagkatimbang. Naglaum man ako nga sa pila ka adlaw magabag-o ang iya panimuot.” Pagligad sang 20 ka tuig sing subong sina nga pagtrato, ang iya asawa nagsugod sa pagbag-o, kag ang bana nagsiling: “Daku gid ang akon pasalamat kay Jehova nga ginbuligan niya ako sa pagpalambo sang bunga sang espiritu, ang pagbatas, bangod nakita ko karon ang resulta: Ang akon asawa nagsugod sa paglakat sa banas sang kabuhi!”
Ang Pangamuyo, Pagpaubos, kag Gugma Makabulig
15. Ngaa ang pangamuyo makabulig sa aton nga magmabinatason?
15 Ang pangamuyo isa pa ka daku nga bulig sa pagpakita sing pagkamabinatason. Si Pablo naglaygay: “Dili kamo maghimud-os sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga paghangop magatipig sang inyo mga tagipusuon kag inyo mga painoino sa kay Cristo Jesus.” (Filipos 4:6, 7) Dumduma man ang pagpamati sa laygay: “Itungtong kay Jehova ang imo lulan, kag sia magaalay-ay sa imo. Indi sia magtugot nga malingkang ang matarong.”—Salmo 55:22.
16. Sa pagkamabinatason, paano kita mabuligan sang pagpaubos?
16 Ang pagpaubos isa pa ka dakung bulig sa pagpalambo sang bunga sang espiritu nga pagbatas. Ang tawo nga bugalon dimapailubon. Madali sia masaklaw, maabtik maakig, kag indi makabatas sa dimaayo nga kahimtangan. Ini tanan kabaliskaran sang pagkamabinatason. Apang ang tawo nga mapainubuson wala nagapaimportante sang iya kaugalingon. Magahulat sia kay Jehova, subong sang ginhimo ni David sang ginlagas sia ni Hari Saul kag gin-insultohan sang Benjamita nga si Simei. (1 Samuel 24:4-6; 2 Samuel 16:5-13) Gani, dapat kita maglakat nga “may bug-os nga pagpaubos kag pagkamapailubon, nga may pagbatas, nga nagapinaumuray kamo sa gugma.” (Efeso 4:2) Dugang pa, dapat kita ‘magpaubos sang aton kaugalingon sa atubangan ni Jehova.’—Santiago 4:10.
17. Ngaa ang gugma nagabulig sa aton nga magmabinatason?
17 Ang dimakagod nga gugma labi na gid nga nagabulig sa aton nga magmabinatason. Sa pagkamatuod, “ang gugma mabinatason,” kay nagatiklod ini sa aton nga dumdumon ang labing maayo nga kaayuhan sang iban. (1 Corinto 13:4) Ang gugma nagapaposible sa aton nga makatigayon sing empatiya, nagabutang sang aton kaugalingon sa lugar sang iban, kon hambalon pa. Dugang pa, ang gugma nagabulig sa aton nga magmabinatason bangod “nagabatas [ini] sang tanan nga butang, nagatuo sang tanan nga butang, nagalaum sang tanan nga butang, nagaantos sang tanan nga butang. Ang gugma wala nagauntat.” (1 Corinto 13:7, 8) Huo, subong sang ginasiling sang numero 200 sang libro nga Sing Praises to Jehovah:
“Love has eyes to see the good.
Love builds up the brotherhood.
Love to erring ones is kind.
Seeks their better side to find.”
Magmabinatason Upod ang Kalipay?
18. Paano posible mangin mabinatason upod ang kalipay?
18 Si Pablo nagpangamuyo nga ang iya mga masigkatumuluo sa Colosas mapun-an sang sibu nga ihibalo sang kabubut-on sang Dios agod makalakat sila sing takus kay Jehova, makapahamuot sa iya, kag makapamunga sa tagsa ka maayong buhat. Busa sila ‘mapabakud sa bug-os nga gahom suno sa mahimayaon nga kagamhanan niya tungod sa bug-os nga pagpailob kag pagbatas nga may kalipay.’ (Colosas 1:9-11) Apang, paano ang isa ‘magabatas nga may kalipay’? Wala ina nagasumpakilay, kay ang kalipay nga ginasambit sa Kasulatan indi lamang butang nga mangin malipayon ukon masinadyahon. Ang kalipay nga bunga sang espiritu nagalakip sang pagbatyag sing daku nga kaayawan bangod sang paghimo sing butang nga maayo sa atubangan sang Dios. Ekspresyon man sang paglaum nga makabaton sang ginsaad nga padya subong resulta sang pagpakita sing pagkamabinatason. Amo sina kon ngaa si Jesus nagsiling: “Malipayon kamo kon ang mga tawo magpasipala sa inyo kag maghingabot sa inyo kag maghambal sang tanan nga bagay sang kalautan batok sa inyo sing dimatuod bangod sa akon. Magkalipay kamo kag magkasadya, kay ang inyo balus daku sa langit; kay amo man ang paghingabot nila sang mga manalagna nga nahauna sa inyo.”—Mateo 5:11, 12.
19. Anong mga halimbawa ang nagapakita nga posible mangin mabinatason kag malipayon?
19 Si Jesus may amo sina nga kalipay. Sa pagkamatuod, “tungod sa kalipay nga ginbutang sa iya atubang nagbatas sia sang usok sang pag-antos, nga nagatamay sang kahuluy-an.” (Hebreo 12:2) Ina nga kalipay naghimo kay Jesus nga magmabinatason. Sa kaanggid, binagbinaga ang natabo sang ang mga apostoles ginbunal kag ginmanduan nga “indi maghambal sa ngalan ni Jesus.” “Naghalin sila sa atubangan sang Sanhedrin, nga nagakalipay nga naisipan sila nga takus sa pag-antos sing kahuluy-an tungod sa ngalan. Kag sa adlaw-adlaw sa templo kag sa puluy-an wala sila mag-untat sa pagpanudlo kag pagwali kay Jesus subong nga Cristo.” (Binuhatan 5:40-42) Daw ano kaayo nga halimbawa nga nagapamatuod nga ang mga sumulunod ni Cristo sarang mangin mabinatason nga may kalipay!
20. Kon nagapakita kita sing pagkamabinatason, paano ini makaapektar sa aton kaangtanan sa iban?
20 Ang Pulong sang Dios nagahatag gid sing maalamon nga laygay sang naglaygay ini sa aton nga indi magbalus, mangin makuli sa pagpangakig samtang nagalaum para sa labing maayo—huo, mangin mabinatason! Kinahanglan naton ang tayuyon nga pagpangamuyo kag ining bunga sang espiritu sang Dios agod mahiusa sa aton mga kauturan nga lalaki kag babayi sa kongregasyon, sa pamilya, sa mga tawo sa aton ginaobrahan, kag sa mga indibiduwal nga masugata naton sa Cristianong ministeryo. Kag ano ang magabulig sa aton sa pagpakita sing pagbatas? Pagtuo, paglaum, pagpaubos, kalipay, kag gugma. Sa pagkamatuod, paagi sa sina nga mga kinaiya mangin mabinatason kita ayon sa tanan.
Madumduman Mo Bala?
◻ Ngaa ang pagkamabinatason kinahanglanon sa pag-ambit naton sa espirituwal nga paraiso?
◻ Ngaa ang mga gulang labi na nga kinahanglan nga magmabinatason?
◻ Ngaa dapat palambuon sang mga bana kag mga asawa ang pagkamabinatason?
◻ Anong iban nga mga kinaiya ang magabulig sa aton nga magmabinatason?
[Laragway sa pahina 17]
Anong laygay halin kay Jesus ang nagbulig kay Pedro nga magmabinatason?