Mangin Malipayon Ka Bala sa Madamo nga Hilimuon?
KALABANAN sa aton nagakabuhi sing tuman kasako, sing masami mabudlay. Ang mga kahuol sang modernong-adlaw nga pagkabuhi nagakinahanglan nga pirme kita manikasog agod makadungan. Ang mga bana kag mga amay dapat magtuman sang ila nagaipit nga mga obligasyon sa pamilya, sa manug-empleo, kag sa iban pa. Ang mga asawa kag mga iloy dapat mag-atipan sang mga kinahanglanon sa balay sang ila pamilya kag masunson nga dapat magtrabaho sekular. Ang mga pamatan-on man ginaipit sa pagtuman sang mga obligasyon sa pamilya samtang nagaeskwela nga nagahanda sa ila para sa isa ka mapatubason nga katungdanan sa Sosiedad.
Apang kamusta kita nga nagdedikar sang aton kabuhi kay Jehova nga Dios kag bawtismado nga mga Saksi niya? Dugang sa iban pa nga ginakinahanglan sa aton, si apostol Pablo naglaygay sa aton: “Mga kauturan ko nga hinigugma, magpakalig-on kamo, nga dimationg, nga nagabugana gihapon sa buluhaton sang Ginuo, nga nahibaluan ninyo nga ang inyo pagpangabudlay indi walay pulos sa Ginuo.” (1 Corinto 15:58) Huo, madamong dugang nga mga responsabilidad ang bahin sang mga kinahanglanon sang matuod nga pagsimba. Paano naton matuman ining tanan nga mga obligasyon kag matigayon ang kalinong sa hunahuna kag malipayon nga panimuot?
Ang May Hinimoan Nagadala sing Kalipay
Ang kalipay—ang pagbatyag sing maayo ukon kontento—naangot sing suod sa pag-uyat sing madinalag-on sa mga responsabilidad sa kabuhi. Agod mahimo naton ang aton adlaw-adlaw nga mga obligasyon sa maayo gid nga paagi, ang pagtapos sini sa husto sa oras kag sa mahim-ong nga paagi, magapabatyag sa aton nga may hinimoan kag kaayawan. Dapat gid nga mangin amo sini, kag ang resulta nagahatag sa aton sing kalipay.
Indi gid tuyo ni Jehova nga Dios nga ang pag-uyat naton sang mga responsabilidad mangin mapiguson nga lulan. Sa baylo, luyag gid niya pirme nga kita ‘magkalipay kag makita ang maayo sa tanan nga pinangabudlayan naton.’ (Manugwali 3:12, 13) Kon kita malipayon sa aton trabaho, masunson kita nga mapatubason. Madali kita nga nagabaton sing instruksion kag nagapakig-angot sing mahidaiton sa iban. Sa pihak nga bahin, kon kita dimalipayon, ang aton trabaho mahimo nga mangin makatalaka—kon kaisa amoamo lang pirme, makatuluyo, kag makapalapyo sa balatyagon. Nagadul-ong ini sa dimapatubason nga mga batasan sa pagtrabaho kag negatibo nga panghunahuna. Ang kabuhi mangin adlaw-adlaw nga paghimud-os samtang ginatinguhaan naton nga himuon ang tanan nga ginakinahanglan sa aton. Apang, kon makakita kita sing paagi nga makapabilin nga malipayon sa kon ano ang aton ginahimo, mahimo nga maeksperiensiahan naton ang makapaladya kag makalilipay nga dalanon sang kabuhi.
Mangin Timbang
Agod mangin malipayon kita bisan pa madamo kita sing hilimuon, dapat kita mangin timbang. Kag ano ang timbang? Amo ini ang “pagkalig-on sa hunahuna kag emosyon.” Ang timbang nga tawo nagapanikasog nga mangin mahim-ong sa iya mga hilikuton. Nagaplano sia sing abanse, nagalikaw sang pagpalantang, kag haganhagan sa mga batasan. Nagapakita sia sing pagpugong sa kaugalingon sa pagkaon, ilimnon, kalingawan, liwaliwa, kag lipaylipay. Sa pagkamatuod, nagapakita sia sing “pagpugong sa kaugalingon sa tanan nga mga butang!”—1 Corinto 9:24-27; ipaanggid ang Tito 2:2.
Ang pangamuyo may importante nga papel sa paghupot sing Cristianong pagkatimbang. Ang alagad ni Jehova sarang makapangamuyo para sa balaan nga espiritu sang Dios kag para sa bulig sang iya langitnon nga Amay sa pagpalambo sang bunga sini, lakip ang pagpugong sang kaugalingon. (Lucas 11:13; Galacia 5:22, 23) Labi na gid nga ang isa ka Cristiano magapangamuyo sa Dios kon ginatublag sang mga pagtilaw nga nagatublag sang iya pagkatimbang. “Itugyan kay Jehova ang imo dalanon, kag salig man sa iya, kag himuon niya ini,” siling ni salmista David. (Salmo 37:5) Kon kaisa kinahanglan kita mangamuyo subong sang ginhimo ni David sang nagpakiluoy sia: “Dalidali sa akon, O Dios. Ikaw ang akon kabulig kag ang akon Manugluwas. O Jehova, dili ka magpalantang.” (Salmo 70:5) Indi pagkalimti nga paagi sa pangamuyo posible mahuptan ang pagkatimbang kag maagom ‘ang paghidait sang Dios nga nagalabaw sa tanan nga paghangop kag nagatipig sang aton mga tagipusuon kag mga painoino.’—Filipos 4:6, 7.
Bangod nagasalig sia kay Jehova kag nagaagom sang paghidait sang Dios, ang timbang nga Cristiano maligdong sing hunahuna. (Tito 2:11, 12) Bunga ini sang maayo nga paghantop sa mga prinsipio sang Biblia kag pag-aplikar sini sa iya kabuhi. Indi sia salimpapaw, ni padasudaso sa iya desisyon. Bangod sang pagkarasonable, indi sia matig-a sa iya mga opinyon ukon dimasinulundon. Ginahuptan niya ang mapainubuson nga pagtamod sang iya kaugalingon kag sang iya mga ikasarang, kag nagahimo ini sa iya nga magkooperar sa iban. (Miqueas 6:8) Sa makawiwili, ang mga kinaiya nga nagabulig sa isa ka tawo nga mangin timbang amo man ang mga kinaiya nga ginakinahanglan sa mga ginatangdo nga mag-alagad subong mga manugtatap sa Cristianong kongregasyon.—1 Timoteo 3:2, 3.
Madugangan naton sing daku ang aton kalipay paagi sa pagkamangin labi ka timbang sa aton adlaw-adlaw nga mga hilikuton. Paagi sa pagpakita sang mga kinaiya nga ginaupdan sang maayo nga pagkatimbang, mahimo naton ang mga butang nga wala nagapahuol sing sobra sa pisikal ukon emosyonal. Ang aton estilo sang pagkabuhi magapakita sing labi pa nga kalig-onan, kag madamo pa ang aton mahimo. Ang iban makasapo sing daku pa nga kalipay sa aton pagpakig-upod, kag maeksperiensiahan naton ang labi nga pagkakontento kag kalipay. Apang ano ang pila sa praktikal nga mga paagi sa paghupot sing pagkatimbang?
Praktikal nga mga Paagi sa Paghupot sing Pagkatimbang
Agod mahuptan ang pagkatimbang, dapat naton tinguhaan nga mangin maabtik kag organisado sa pag-uyat sang personal nga mga hilikuton. Kinahanglan nga magplano kita sing abanse, nagaatipan sini sa mahim-ong kag sistematiko nga mga paagi. Yadtong kulang sing maayo nga organisasyon kag nahuyog sa pagpatig-a sing ulo nagapabudlay sang ila kabuhi sing daku nga kahuol kag paghimud-os. Ang pagkamadinalag-on sa sini nga bahin sang kabuhi magabulig sa aton sa pagbatyag nga kita ang nagakontrol sa baylo sang pagbatyag nga kita walay mahimo nga mga biktima sang mga sirkunstansia.
Indi naton dapat pagtinguhaan nga kita mismo ang magahimo sang tanan. Ang indi handa magpabulig masami nagabayad sing daku sa kakapoy kag kabang-awan. Madamo sing mga hilikuton nga sarang maatipan sang iban. Gani, maalamon nga himuslan ang mga ikasarang sadtong handa magbulig. Luwas nga ginapamag-an ang aton kaugalingon nga lulan, makapalig-on ini sa iban nga luyag magsuod sa aton.
Indi maalamon nga ipaanggid ang aton kaugalingon sa iban nga madamo pa ang mahimo. Ang pagtinguha nga mangin kaangay sadtong labi ang masarangan sang sa aton makapaluya sing buot, nagapabatyag sa aton nga kubos kag ditakus. Indi maayo ina nga panghunahuna, nagapakadiutay sang aton determinasyon kag kompiansia sa kaugalingon. “Ang tagsatagsa magtilaw sang iya buhat,” sulat ni Pablo, “kag nian ang kabangdanan niya sa pagpabugal mangin sa iya kaugalingon lamang kag indi sa iya isigkatawo.” (Galacia 6:4) Dumduma nga ang ginahamili sing labi nga manugpangabudlay amo ang isa nga nagasunod sang mga instruksion, malig-on kag masaligan, kag nagahimo sang mga buhat nga maayo sing kalidad. Kon amo kita sina, ang aton pag-alagad pagaapresyahon kag pagakinahanglan.—Hulubaton 22:29.
Dapat naton halungan ang aton panglawas. Amo ini ang isa sang aton labing hamili nga mga pagkabutang, kay kon wala ini diutay lamang ang aton mahimo. Gani, dapat naton huptan ang mapagros nga dieta paagi sa pagkaon sing masustansia nga kalan-on. Magpahuway kita suno sa aton kinahanglanon, nagatulog sa maarang-arang nga oras sa gab-i. Kon nasubrahan ang aton kakapoy ukon daw magamasakit ang aton pamatyag, indi naton dapat pagpiliton ang aton kaugalingon; mahimo kita magbayad sing daku.
Importante ang mag-andam batok sa pagpalambo sing mayamuhon nga espiritu. Kon magpadala kita sa negatibo nga panghunahuna, may makita kita nga sala sa halos tanan nga butang ukon sa halos tanan nga tawo. Nagakuha gid ini sang aton kalipay kag sang iya sang iban. Sa baylo nga ikutsokutso ukon ireklamo ang sa banta naton indi husto, dapat naton sugiran ang mga responsable sa pag-uyat sini kag itugyan sa ila ang pagtadlong sini. (Ipaanggid ang 1 Corinto 1:10-12.) Maalamon nga huptan naton ang positibo nga pagtamod, pirme nagapanikasog kag nagapaabot sa pagpangita sing maayo sa iban kag sa mga hitabo nga nagadihon sang aton kabuhi.—Ipaanggid ang Judas 3, 4, 16.
Sa pagplano sang aton mga hilikuton, dapat naton dumdumon nga ang tuman nga kadasig nagahimo sing rekord, apang kis-a lang ini mahuptan sa malawig. Ang dalayon nga pagpanikasog sing sobra wala lamang nagadul-ong sa pagkakapoy kundi nagadala man sing pagluya sing buot nga nagapakadiutay sang aton determinasyon nga magpadayon. Busa, magpahamtang kita sing kadasig nga sarang naton mahuptan sa walay katubtuban. Halimbawa, maayo ang maghimo sing praktikal nga iskedyul para sa regular nga pagpakigbahin sa pamalaybalay nga pagbantala nga hilikuton kag sa iban pa nga bahin sang Cristianong ministeryo. Dapat kita maghatag sing tion para sa pagrelaks kag makapalig-on nga paglingawlingaw. Kag masapwan naton nga mapuslanon ang makighambal sa mga tigulang nga may mga dekada nga eksperiensia, kay natun-an nila ang paghimo sang nagakaigo nga mga butang nga wala nagakapoy sang ila kaugalingon sa pisikal ukon emosyonal.
Maghimo sing Maayo nga Desisyon
Nagakaigo ang magbatyag sing obligasyon kag handum nga himuon ang aton tanan gintangdo nga mga responsabilidad, lakip na ang sa sulod sang kongregasyon sang katawhan ni Jehova. Ang Dios nahalipay sa mapisan kag masaligan nga mga manugpangabudlay. (Ipaanggid ang Mateo 25:21; Tito 2:11-14.) Apang ang Kasulatan nagalaygay: “Bantayi ang maayo nga kaalam kag pagbinagbinag.” (Hulubaton 3:21) Ang pag-aplikar sa Biblikanhon nga kaalam magabenepisyo sa aton, kag kinahanglan naton nga gamiton ang maayo nga desisyon, nagahimo sing maayo nga mga plano kag pirme nagapabilin sa latid sang aton kusog.
Ang laygay nga magbugana sa hilikuton sang Dios dapat mangin timbang upod ang laygay nga ginahatag sang Manugwali 9:4. Mabasa naton ini: “Maayo pa ang ido nga buhi sang sa leon nga patay.” Huo, ang ido nga buhi, bisan pa ginatamay sang iban, maayo pa sa leon nga patay, ang sapat nga ginakabig sang madamo nga harianon. Kon mangin timbang kita kag mag-atipan sing nagakaigo sang aton panglawas, magakabuhi kita kag makapadayon sa paghimo sang mga butang. Ang patay wala sing mahimo. Ang maayo nga desisyon magabulig sa aton sa pagsapo sing rasonable nga pagkatimbang nga nagatugot sa aton nga himuon ang kinahanglanon nga mga butang nga wala nagawasi sang aton kalipay.
Gani, nian, ang pagkamay madamo sing hilimuon wala nagakahulugan nga indi kita mahimo mangin malipayon. Ang pinakamasako nga mga tawo mahimo mangin pinakamalipayon kon sila rasonable, nagahupot sing maayo nga pagtamod, kag nagahimo sing maayo nga desisyon agod mahuptan ang maayo nga pagkatimbang. Maagom naton ang labing daku nga kalipay kon ginapakita naton ang kaalam, ginahimo ang maayong mga buhat, kag ginatugyan ang aton paglaum kay Jehova nga Dios.—1 Timoteo 6:17-19.