Masako Gid Bala Ikaw?

¹ Si Pablo naglaygay nga ‘pirme kita may bugana nga himuon sa buluhaton sang Ginuo.’ (1 Cor. 15:58) Ginalaygayan kita nga magtigayon sing adlaw-adlaw nga rutina para sa personal nga pagtuon, regular nga pagpakigbahin sa ministeryo, pagtambong sa mga miting, kag pag-atipan sa mga katungdanan sa kongregasyon. Dugang sa sina, dapat naton buligan ang iban nga nagakinahanglan sang aton bulig. Bangod sang madamo nga hilimuon, kon kaisa mahimo kita magbatyag nga nabug-atan, nagahunahuna nga dapat naton buhinan ang aton lulan sang trabaho.

² May mga sitwasyon nga makatarunganon kuhaon ukon buhinan ang pila ka hilikuton. Ang iban nga mga indibiduwal nagabatyag nga ginapaabot sa ila nga himuon nila ang tanan nga butang nga ginapangabay sang iban sa ila. Ang kakulang sing pagkatimbang sa sining bahin makatuga sing pag-ipit kag kahuol nga makapaluya gid sang buot. Makadul-ong ini sa pagkalusod sang mga kaangtanan sa pamilya, sa natublag nga mga balatyagon, ukon sa daku nga mga problema sa panglawas.

³ Mangin Timbang: Ang yabi sa pagkatimbang nasandig sa pag-aplikar sa laygay ni Pablo nga “pat-uron ang mas importante nga mga butang.” (Filip. 1:10) Nagakahulugan ina nga magkonsentrar kita sa mga butang nga importante gid kag, kon ginatugot sang tion, atipanon ang pila ka butang nga indi tanto ka importante. Ang mga obligasyon sa pamilya amo ang pila sang mga butang nga kinahanglanon. Ang pila ka sekular nga mga katungdanan dapat himuon. Apang, gintudlo ni Jesus ang prinsipio nga pangitaon anay naton ang Ginharian. Dapat kita anay mangin mahunahunaon sa espirituwal nga mga kinahanglanon agod matuman ang aton dedikasyon kay Jehova.​—Mat. 5:3; 6:33.

⁴ Nagahunahuna sini, dapat naton kuhaon gikan sa aton masako nga iskedyul ang bisan anong dikinahanglanon nga personal nga mga hilikuton, sobra nga kalingawan, kag indi importante nga mga katungdanan sa iban. Magaiskedyul kita sing tion para sa personal nga pagtuon, makatarunganon nga pagpakigbahin sa pag-alagad, kag pagtambong sa mga miting. Ang nabilin nga tion mahimo bahinbahinon sa iban pa nga mga hilikuton.

⁵ Bisan amo sina, mahimo gihapon kita magabatyag nga ang aton lulan tuman kabug-at. Kon amo, dapat naton sabton ang pangagda ni Jesus: “Kari kamo, tanan kamo nga ginabudlayan kag ginabug-atan, kag papahuwayon ko kamo.” (Mat. 11:28) Magsalig kay Jehova, “nga nagapas-an adlaw-adlaw sang lulan para sa aton” kag nagahatag sa isa nga nakapoy sing gahom. (Sal. 68:19; Isa. 40:29) Makasalig kita nga pagahimuon ni Jehova nga posible nga magapadayon kita sa masako nga teokratikong hilikuton.

⁶ Samtang nagapabilin nga masako sa paghimo sang mga interes sang Ginharian, mahimo kita magkalipay nga ang aton pinangabudlayan indi nga wala sing pulos may kaangtanan sa Ginuo.​—1 Cor. 15:58.