Ang Biblia—Balaan Gid Bala Ini?

PILA ka tawo karon ang nagatamod sa Biblia subong balaan, Pulong sang Dios? Sa karon nga dag-on sang pagkamaduhaduhaon, ginakabig ini sang madamo nga indi na uso kag indi naaplikar sa karon, nagaduhaduha nga balaan gid ini. Bisan ang pila sang relihioso nga mga lider sang Cristiandad nagatudlo nga ang Biblia puno sing leyenda kag mito. Nagaduhaduha sila ‘kon bala ang biblikanhon nga pagpatpat sang maragtas maugyunan sang isa ka intelihente nga tawo.’​—⁠The Interpreter’s Dictionary of the Bible, Tomo 2, pahina 611.

Ang kilala nga mga eskolar nagasab-ug sing mga binhi sang pagduhaduha kon bala nagakaigo nga tawgon ang Biblia nga Pulong sang Dios. Ang isa nagsiling nga “kon luyag gamiton sang isa ang Pulong-sang-Dios nga sahi sang hambal, ang nagakaigo nga termino para sa Biblia amo ang Pulong sang Israel, Pulong sang pila ka nagapanguna nga mga Cristiano anay.” (The Bible in the Modern World, ni James Barr) Ano sa banta mo? Pulong gid bala sang Dios ang Biblia? Balaan gid bala ini?

Sin-o ang Nagsulat sang Biblia?

Ang pagsulat sang Genesis, ang nahauna nga tulun-an sang Biblia, ginpadungog kay Moises, isa ka Hebreo nga nagkabuhi sang mga 3,500 ka tuig sang una. Suno sa Biblia, mga 40 ka tawo gikan sa lainlain nga sahi sang pagkabuhi ang nag-ambit sa pagsulat sang nabilin nga bahin sang Kasulatan, nagresulta sa pagtipon sang 66 ka tulun-an, ukon subdibisyon, sang Biblia. Apang, wala ginkabig sining mga tawo ang ila kaugalingon subong matuod nga mga awtor sang Biblia. Ang isa ka manunulat nagsiling: “Ang bug-os nga kasulatan ginbugna sang Dios.” (2 Timoteo 3:16) Ang isa pa nagsulat tuhoy sa mga manunulat sang Biblia: “Ang mga tawo nga gintuytuyan sang balaan nga espiritu nagpamulong gikan sa Dios.”​—⁠2 Pedro 1:⁠21.

Ginabutang sini ang mga manunulat sa kategoriya sang mga manunulat, ukon mga sekretaryo, nga ginkontrol, ukon gintuytuyan, sang Dios. Suno sa Biblia, ang manunulat ginatugutan sa pagpili sang iya kaugalingon nga mga tinaga sa pagpabutyag sang impormasyon nga ginhatag sang Dios. (Habacuc 2:2) Amo kon ngaa may madamo nga estilo sang pagsulat sa bug-os nga Biblia. Apang ang pagsulat gintuytuyan pirme sang Dios.

Matuod, ang pangangkon sining mga manunulat sa pagbugna sang Dios indi pamatuod nga ang Biblia amo ang balaan nga mensahe sang Dios sa katawhan. Walay sapayan, paagi sa mahalungon kag wala sing nadampigan nga pag-usisa sa tulun-an maathag nga makita kon bala ang Labing Mataas nga Dios amo ang Awtor sang Biblia. Nagahatag bala ang Biblia sing pamatuod nga ang awtor sini amo ang Dios? Sa pagkamatuod, masiling bala naton nga may pagsalig nga ang Biblia balaan?