Padayon nga Magpaandam Tuhoy sa Tumalagsahon nga Hilikuton ni Jehova
“Si Jehova magatindog subong sang sa bukid nga Perasim, magasingkal sia subong sang sa nalupyakan sang Gabaon.”—ISAIAS 28:21.
1, 2. Anong tumalagsahon nga hilikuton ang ginhimo ni Jehova para sa Iya katawhan sang adlaw ni David?
ISA ka makatilingala nga buhat! Isa ka labing tumalagsahon nga hilikuton! Amo ina ang ginhimo ni Jehova para sa iya katawhan sang dumaan nga tion sadto sang ika-11 nga siglo B.C.E. Kag ining makatilingala nga buhat isa ka sulundan sang kapin pa ka tumalagsahon nga hilikuton nga malapit na niya himuon sa palaabuton. Ano yadtong dumaan nga buhat? Sa tapos ginhimo si David nga hari sa Jerusalem, ang kaingod nga mga Filistinhon nagsalakay, kag nagdul-ong ini sa makatilingala nga buhat ni Jehova. Nahauna, ginsalakay sang mga Filistinhon ang nalupyakan sang Refaim. Namangkot si David kay Jehova kon ano ang dapat niya himuon kag ginsugo sia nga magsalakay. Bilang pagtuman sa sugo ni Jehova, ginlutos ni David ang gamhanan nga hangaway sang mga Filistinhon sa Baal-perasim. Apang wala ginbaton sang mga Filistinhon nga nalutos sila. Wala madugay nagbalik sila liwat agod salakayon kag atihon ang dugang pa nga bahin sang nalupyakan sang Refaim, kag si David namangkot liwat kay Jehova.
2 Sini nga tion ginsugo sia nga magsalakay sa likod sang mga Filistinhon upod sa iya mga tropa. Si Jehova nagsiling: “Kon makabati ka sing linapaklapak sa tuyuktuyukan sang mga kahoy nga moral, nian magpanilag ka, kay si Jehova nagguwa una sa imo sa paglaglag sang kasoldadusan sang mga Filistinhon.” Kag amo sina ang natabo. Naghulat si David tubtob ginpahanabo ni Jehova ang gahod sang linapaklapak sa tuyuktuyukan sang mga kahoy nga moral—ayhan paagi sa mabaskog nga hangin. Sa gilayon, si David kag ang iya mga tropa nagguwa gikan sa ila ginapanaguan kag ginsalakay ang wala makapangaman nga mga Filistinhon, kag ginlutos sila kag madamo ang napatay sa ila. Ang relihioso nga mga diosdios nga nabilin sang mga Filistinhon sa patag-awayan gintipon kag ginsunog.—2 Samuel 5:17-25; 1 Cronica 14:8-17.
3. Ngaa nangin interesado ang mga Judiyo sang adlaw ni Isaias sa makatilingala nga buluhaton ni Jehova, kag ngaa dapat mangin interesado sa sini ang Cristiandad karon?
3 Isa ini ka tumalagsahon nga hilikuton, isa ka makatilingala nga buluhaton, nga ginhimo ni Jehova batok sa mga Filistinhon kag para sa iya hinaplas nga hari. Interesado gid kita sa sining talalupangdon nga buluhaton bangod nagpaandam si manalagna Isaias nga si Jehova magahimo sing isa ka butang nga subong ka makatilingala kag gamhanan batok sa espirituwal nga mga palahubog sang Juda. Busa, dapat magbantay ang dimatutom nga relihiosong mga lider sang adlaw ni Isaias. Dapat man karon magbantay ang Cristiandad kay ang natabo sa Juda isa ka sulundan sang madangatan sang Cristiandad.
“Ang Higdaan Kabos”
4, 5. (a) Paano ginalaragway ni Isaias ang mabudlay nga kahimtangan sang relihioso nga mga lider sang iya adlaw? (b) Ano ang kabangdanan sang kabudlayan sang Cristiandad karon?
4 Nahauna, ginbuyagyag ni Isaias ang kamatuoran nga ang mga tratado nga ginsaligan sang dumaan nga espirituwal nga mga palahubog isa ka limbong, isa ka kabutigan. Nian maathag nga ginlaragway niya ang mabudlay nga kahimtangan sang mga nagalaum sa sadto nga kabutigan. Sia nagsiling: “Ang higdaan kabos sa mauntayan sang tawo, kag ang habol makitid pa sa mapangalumbot niya sa iya.” (Isaias 28:20) Ang isa nga nagauntay sang iya kaugalingon sa katre nga kabos makasapo nga ang iya tiil nagalusot sa tugnaw. Sa pihak nga bahin, kon pil-on niya ang iya tuhod agod mag-igo sa katre, ang habol tuman ka kitid kag ang daku nga bahin sang iya lawas nagaguwa gihapon. Bisan ano ang iya himuon, ang iban nga bahin sang iya lawas matugnawan.
5 Amo sina anay ang kahimtangan, sa simbuliko nga paghambal, sang mga tawo sang adlaw ni Isaias nga nagpahamtang sang ila pagsalig sa butig nga dalangpan. Amo man ini ang mabudlay nga kahimtangan sang mga nagapahamtang karon sang ila pagsalig sa butig nga dalangpan sang Cristiandad. Ginatugnawan sila sa guwa, kon sa aton pa. Indi ini tion sa pagpangita sing kasulhay sa sulod sang kalibutanon nga mga kahimusan para sa paghidait kag kalig-unan. Sa idalom sang landong sang nagapakari nga paghukom sang Dios, ang pagpakig-alyansa sa politikal nga mga lider indi magahatag sing mainit-init nga kasulhay para sa Cristiandad.
Ang Makatilingala nga Buluhaton ni Jehova
6. Paano naghikot si Jehova batok sa Juda, kag paano sia magahikot batok sa Cristiandad?
6 Sa tapos malaragway ang mabudlay nga kahimtangan sang dimatutom nga Jerusalem sang iya adlaw—kag sang modernong dimatutom nga Cristiandad—si Isaias nagpadayon sa pagsiling: “Si Jehova magatindog subong sang sa Bukid nga Perasim, magasingkal sia subong sang sa nalupyakan sang Gabaon, agod nga mahimo niya ang iya buluhaton—ang iya makatilingala nga buhat—kag agod nga mahimo niya ang iya hilikuton—ang iya tumalagsahon nga hilikuton.” (Isaias 28:21) Huo, si Isaias nagpaandam nga si Jehova sa indi madugay magatindog subong sang sa Baal-perasim. Apang sini nga tion magahikot sia batok sa iya wala sing pagtuo nga katawhan, kag himuon niya ini kaangay sang indi mapunggan nga baha nga nagaagi sa nabulwang nga dam. Ang pagpakigkatipan sang Jerusalem sa kamatayon mapamatud-an nga wala sing pulos. Sa kaanggid nga paagi, si Jehova magahikot sa malapit nga palaabuton batok sa Cristiandad, kag masapwan niya nga ang iya tanan makapahubog nga mga kasugtanan upod sa sining kalibutan wala sing mahimo. Ang iya daku nga organisasyon mabungkag kag ang iya mga sumalakdag magalapta. Ang iya butig nga mga diosdios sunugon sing bug-os.
7. Ngaa ang katuyuan ni Jehova may kaangtanan sa Juda gintawag nga “makatilingala” kag “tumalagsahon”?
7 Ngaa ginatawag ni Isaias ang paghikot ni Jehova batok sa Jerusalem nga isa ka makatilingala kag tumalagsahon nga hilikuton? Ti, ang Jerusalem amo anay ang sentro sang pagsimba kay Jehova kag ang siudad sang hinaplas nga hari ni Jehova. (Salmo 132:11-18) Wala pa gid ini malaglag anay. Ang templo sini wala pa gid masunog anay. Ang harianon nga panimalay ni David, nga natukod anay sa Jerusalem, wala gid mapukan. Imposible ini nga mga butang. Tumalagsahon gid nga tugutan ni Jehova nga mahanabo ini nga mga butang.
8. Ano nga paandam ang ginhatag ni Jehova tuhoy sa iya nagapakari nga tumalagsahon nga buhat?
8 Apang naghatag si Jehova sing paandam paagi sa iya mga manalagna nga magaabot ang makapakibot nga mga butang. (Miqueas 3:9-12) Halimbawa, si manalagna Habacuc, nga nagkabuhi sang ikapito nga siglo B.C.E., nagsiling: “Tulok kamo sa mga pungsod, kag magtan-aw, kag magtulukay kamo sa katingala. Magkatingala kamo; kay nagahimo ako sing buluhaton sa inyo mga adlaw, nga indi ninyo pagpatihan bisan isugid sa inyo. Kay yari karon ginabangon ko ang mga Caldeanhon, ina nga pungsod nga mapintas kag padasudaso, nga nagalatas sa kasangkaran sang duta sa pag-angkon sing puluy-an nga mga duog nga indi ila. Makakulugmat sila kag makakululba.”—Habacuc 1:5-7.
9. Sa anong paagi gintuman ni Jehova ang iya paandam batok sa Jerusalem?
9 Sang 607 B.C.E., gintuman ni Jehova ang iya paandam. Bangod gintugutan niya ang Babilonianhon nga mga hangaway sa pagsalakay sa Jerusalem, gintugutan niya sila nga laglagon ang siudad kag ang templo. (Panalabiton 2:7-9) Dugang pa, gintugutan niya ang Jerusalem nga laglagon sa ikaduha nga tion. Ngaa? Ti, pagligad sang 70 ka tuig nga pagkabihag, ang mahinulsulon nga mga Judiyo nagbalik sa ila puluy-an nga duta, kag sang ulihi isa pa ka templo ang gintukod sa Jerusalem. Apang, sa liwat, ang mga Judiyo nagpalayo kay Jehova. Sang nahaunang siglo C.E., ginbalikwat ni Pablo ang mga pulong ni Habacuc para sa mga Judiyo sang iya adlaw, sa amo nagapaandam nga ini nga tagna may palaabuton nga aplikasyon. (Binuhatan 13:40, 41) Si Jesus ispisipiko nga nagpaandam nga ang Jerusalem kag ang templo sini pagalaglagon bangod kulang sing pagtuo ang mga Judiyo. (Mateo 23:37–24:2) Namati bala yadtong nahaunang-siglo nga mga Judiyo? Wala. Kaangay sang ila mga katigulangan, ginsikway nila sing bug-os ang paandam ni Jehova. Busa, ginsulit ni Jehova ang iya makatilingala nga hilikuton. Ang Jerusalem kag ang templo sini ginlaglag sang 70 C.E. paagi sa Romano nga mga hangaway.
10. Paano si Jehova magahikot batok sa Cristiandad sa malapit nga palaabuton?
10 Ngaa, nian, wala ginahunahuna sang bisan sin-o nga si Jehova indi magahimo sing kaanggid sini sa aton tion? Ang matuod amo, tumanon niya ang iya katuyuan bisan pa daw makatilingala ini kag tumalagsahon para sa mga nagaduhaduha. Sini nga tion ang iya puntariya amo ang Cristiandad, nga, kaangay sang dumaan nga Juda, nagapangangkon nga nagasimba sa Dios apang nangin malaut. Paagi sa iya Daku Pa nga David, si Cristo Jesus, si Jehova magasalakay batok sa “mga Filistinhon” sang Cristiandad sa oras nga wala nila ginapaabot. Himuon niya ang iya tumalagsahon nga hilikuton tubtob sa punto nga dulaon niya ang katapusan nga tanda sang relihioso nga mga sistema sang Cristiandad.—Mateo 13:36-43; 2 Tesalonica 1:6-10.
Nagapaandam Tuhoy sa Himuon ni Jehova
11, 12. Paano nagapaandam ang mga Saksi ni Jehova tuhoy sa nagapakari nga paghukom ni Jehova?
11 Sa sulod sang madamo nga tinuig ang mga Saksi ni Jehova nagapaandam tuhoy sining nagapakari nga paghukom ni Jehova. Ginpaathag nila nga ang kalaglagan sang Jerusalem kag sang templo sini sang 607 B.C.E. kag sa liwat sang 70 C.E. matagnaon nga mga paandam sang matabo sa Cristiandad. Dugang pa, ginpakita nila nga ang Cristiandad, bangod sang iya pag-apostasya, nangin bahin sang bug-os kalibutan nga emperyo sang butig nga relihion, ang Babilonia nga Daku. Bangod sini, ang paghukom sang Dios batok sa Babilonia nga Daku labi na nga ipatuman sa Cristiandad, kay sia amo ang may labing daku nga sala nga bahin sang organisasyon ni Satanas.—Bugna 19:1-3.
12 Ginatudlo sang mga Saksi ni Jehova ang matagnaon nga tagna sang Biblia nga sa sibu nga tion ni Jehova, ang politikal nga kahagugma sang Babilonia nga Daku magabalikid sa iya. Ginsimbulo ini subong amo ang napulo ka sungay sang mapula nga sapat nga mapintas, ang Bugna nagapaandam: “Ang napulo ka sungay nga imo nakita, kag ang sapat nga mapintas, ini sila magadumot sa makihilawason nga babayi [Babilonia nga Daku] kag magahapay kag magapahubo sa iya, kag magakaon sang iya unod kag magasunog sa iya sa kalayo.” (Bugna 17:16) Ang relihioso nga Cristiandad pagasunugon kag laglagon upod sa tanan nga iban pa nga butig nga mga relihion. Mangin amo ini ang makatilingala nga buluhaton ni Jehova, ang iya tumalagsahon nga hilikuton para sa aton adlaw.
13. Paano ang mga reaksion sa mga paandam ni Jehova karon kaanggid sa nasumalang ni Isaias?
13 Kon ginapaalinton sang mga Saksi ni Jehova ang paandam tuhoy sining nagapakari nga kalaglagan, masami nga ginakadlawan sila. Ang mga tawo nagahunahuna nga sin-o gid bala sila sa pagsiling sining mga butang. Ang Cristiandad daw malig-on, establisado gid. Ti, ginabatyag sang iban nga nagauswag pa gani ang iya kahimtangan. Ang mga gobierno nga sang una nagapigos sa iya naghatag kasan-o lang sa iya sing daku pa nga kahilwayan. Apang, dapat pamatian sang Cristiandad ang laygay ni Isaias: “Dili kamo magmayubiton, agod nga indi pagbakuron ang inyo mga gapos, kay nabatian ko ang mando sang kalaglagan gikan sa Soberanong Ginuo, si Jehova sang kasuldadusan, sa ibabaw sang bug-os nga duta.”—Isaias 28: 22; 2 Pedro 3:3, 4.
14. Paano ang mga gapos sang Cristiandad magalig-on pa kag magahugot pa?
14 Sa kabilugan, ang Cristiandad padayon nga mangin makiawayon sa Hari kag sa Ginharian. (2 Tesalonica 2:3, 4, 8) Apang, sa amo man nga tion, ang iya gapos magalig-on pa kag magahugot pa. Kon sa aton pa, ang iya kalaglagan mangin kapin ka pat-od. Indi pagbag-uhon ni Jehova ang iya desisyon nga laglagon ang Cristiandad subong nga wala niya anay pagbag-uha ang iya desisyon nga tugutan ang kalaglagan sang Jerusalem kag sang iya templo sang 607 B.C.E.
“Guwa Ka sa Iya”
15. Anong dalan nga palalagyuhan ang bukas para sa matarong sing tagipusuon nga mga indibiduwal?
15 Paano malikawan sang isa ang madangatan sang Cristiandad? Sadto sang mga adlaw sang Israel, ginpadala ni Jehova ang matutom nga mga manalagna agod pabalikon ang mga matadlong sing tagipusuon sa putli nga pagsimba. Sa karon, ginbangon niya ang iya mga Saksi, nga minilyon sa kadamuon karon, para sa amo man nga katuyuan. Maisugon nga ginabuyagyag nila ang patay sa espirituwal nga kahimtangan sang Cristiandad. Sa paghimo sini, matutom nga ginasulit nila ang tulad-kalalat-an nga mga pahayag sang mga trumpeta nga ginhuyop sang mga anghel sa Bugna kapitulo 8 kag 9. Dugang pa, maukod nga ginapahibalo nila ang laygay nga narekord sa Bugna 18:4: “Guwa ka sa iya, katawhan ko, . . . kon indi mo luyag nga makabaton sing bahin sa iya mga kalalat-an.” Ang “iya” nga ginapatuhuyan diri amo ang Babilonia nga Daku, ang bug-os kalibutan nga emperyo sang butig nga relihion, ang nagapanguna nga bahin sini amo ang Cristiandad.
16. Sa anong paagi ang minilyon nagpalagyo gikan sa butig nga relihion?
16 Sugod sang 1919, kag labi na sugod sang 1922, daku nga kadam-an sang mga mahagop, nga nagbaton sini nga laygay, ang nagbiya sa Babilonia nga Daku. Primero mga linibo, dayon ginatos ka libo, kag karon minilyon ang nagpain sang ila kaugalingon gikan sa butig nga relihion, labi na sa Cristiandad, kag nagpalagyo padulong sa putli nga pagsimba. (Isaias 2:2-4) Nahibaluan nila nga paagi lamang sa pagguwa sa Babilonia nga Daku malikawan nila nga makaambit sa iya mga kalalat-an, nga magadangat sa iya kalaglagan kon mag-abot na ang tion nga himuon ni Jehova ang iya tumalagsahon nga hilikuton.
17, 18. Paano si Jehova nangin korona sang himaya kag kulintas sang matahom nga mga bulak para sa iya katawhan?
17 Ginalaragway ni manalagna Isaias ang makalilipay nga kahimtangan sang mga nagatindog para sa putli nga pagsimba. Sia nagsiling: “Sa sadto nga adlaw si Jehova sang mga kasuldadusan mangin korona sang himaya kag kulintas sang matahom nga mga bulak sa nabilin sang iya katawhan, kag espiritu sang katarungan sa isa nga nagalingkod sa hukmanan, kag kusog sa mga nagapaisol sang inaway sa gawang.”—Isaias 28:5, 6.
18 Bangod sang ila katutom sa kamatuoran, si Jehova amo ang dayon nga korona sang himaya para sa mga katapo sang matutom kag mainandamon nga ulipon nga klase. Matuod ini labi na sugod sang 1926. Sadto nga tuig ang Enero 1 nga guwa sang The Watch Tower nagpadaku sang importante nga kinahanglanon nga pakadakuon ang ngalan ni Jehova sa artikulo nga natig-uluhan “Sin-o ang Magapadungog kay Jehova?” Sugod sadto, ginbantala sang hinaplas nga mga Cristiano ini nga ngalan sa bug-os nga kalibutan sing kapin pa. Sang 1931 kapin pa sila nga nakilala sa ngalan ni Jehova paagi sa pagbaton sang ngalan nga mga Saksi ni Jehova. Dugang pa, isa ka dakung kadam-an sang iban nga mga karnero ang nagguwa man sa Cristiandad kag sa nabilin nga bahin sang Babilonia nga Daku. Ini man sila nagbaton sang ngalan sang Dios. Ang resulta? Si Jehova mismo—sa baylo sang temporaryo nga kahilwayan sang pungsod—ang nangin korona sang himaya kag kulintas sang matahom nga mga bulak para sa kapin sa apat ka milyon ka tawo sa mga 212 ka kadutaan kag mga isla sang dagat. Daw ano ang kadungganan sini nila sa pagdala sang ngalan sang lamang buhi kag matuod nga Dios!—Bugna 7:3, 4, 9, 10; 15:4.
“Magadulog sa Iya ang Espiritu ni Jehova”
19. Sin-o ang isa nga nagalingkod sa hukmanan, kag paano si Jehova nangin espiritu sang katarungan para sa iya?
19 Si Jehova nangin “espiritu sang katarungan,” para kay Jesus, “ang isa nga nagalingkod sa hukmanan.” Sang si Jesus yari sa duta, nagdumili sia nga mahubog sang makahulubog nga espiritu sang kalibutanon nga mga pagpakig-alyansa. Sa karon, subong nagalingkod sa trono nga Hari ni Jehova, puno sia sing balaan nga espiritu, nga nagatuytoy sa iya sa paghimo sing balanse, maathag nga mga desisyon. Natuman kay Jesus ang tagna nga: “Magadulog sa iya ang espiritu ni Jehova, ang espiritu sang kaalam kag paghangop, ang espiritu sang laygay kag kusog, ang espiritu sang ihibalo kag sang kahadlok kay Jehova.” (Isaias 11:2) Sa pagkamatuod, paagi kay Jesus, ‘himuon [ni Jehova] ang katarungan nga latid kag ang pagkamatarong nga tonton.’ (Isaias 28:17) Samtang malaglag ang hubog sa espirituwal nga mga kaaway, mangin katarungan ini sa balaan nga ngalan kag bug-os uniberso nga pagkasoberano ni Jehova.
20, 21. Sa anong paagi ang mga pulong sang Isaias 28:1-22 nagaapektar sa imo?
20 Daw ano katahom, nian, ang kahulugan sining tagna sang Isaias kapitulo 28 para sa aton karon! Kon likawan naton ang espirituwal nga mga palahubog sang Cristiandad kag magpabilin sa putli nga pagsimba, maamligan kita kon himuon ni Jehova ang iya makatilingala nga buluhaton kag ang iya tumalagsahon nga hilikuton. Daw ano ang kalipay naton nga mahibal-an ini! Kag daw ano ang kalipay naton sa pagbinagbinag nga kon matabo na ining mga butang, ang tanan mapilitan sa pagkilala nga si Jehova sang kasuldadusan naghikot para sa iya matutom nga katawhan kag para sa pagbindikar sang iya kaugalingon paagi kay Jesucristo!—Salmo 83:17, 18.
21 Gani kabay nga ang tanan nga matuod nga mga Cristiano magpadayon sa walay kahadlok nga pagpaandam tuhoy sa makatilingala nga buluhaton ni Jehova. Magpadayon sila sa pagsugid sang iya tumalagsahon nga hilikuton. Samtang ginahimo nila ini, magpadayon sila nga iwali sa tanan nga ang aton dimationg nga paglaum yara sa Ginharian sang Dios sa idalom sang iya nagalingkod sa trono nga Hari. Kabay nga ang ila kakugi, determinasyon, kag katutom makaamot sa walay katapusan nga kadayawan sang aton labing gamhanan nga Dios, si Jehova.—Salmo 146:1, 2, 10.
Madumduman Mo Bala?
◻ Ngaa ang Cristiandad yara sa mabudlay nga kahimtangan?
◻ Ano ang gintuyo ni Jehova para sa Jerusalem, kag ngaa “makatilingala” kag “tumalagsahon” ini?
◻ Anong paandam ang ginabantala sang mga Saksi ni Jehova tuhoy sa Cristiandad, kag anong reaksion ang nasumalang nila?
◻ Paano malikawan sang katawhan ang madangatan sang Cristiandad?
[Laragway sa pahina 24]
Suliton ni Jehova ang iya makatilingala nga buhat, sini nga tion batok sa Cristiandad