Mga Pamatan-on—Makapasar Bala Kamo sa Pagtilaw sang Cristianong Katutom?

“WALA mo ginahunahuna nga pagkadimatutom ang imoral nga paggawi. Nagalipaylipay ka lamang. Huo, nakahibalo ka nga kon mahibaluan ini sang imo mga ginikanan ukon sang mga gulang, makapasubo gid kag makatuga ini sing madamong mga problema. Apang kon nagalipaylipay ka, ginakalipatan mo inang tanan nga panghunahuna.”

Ang soltero nga ginsambit bag-o lang nagahimo sing tago nga pakighilawas. Doble ang iya kabuhi, nagadaya sang iya mga ginikanan kag sang Cristianong kongregasyon. Wala gid sia makahibalo nga napaslawan sia sa pagtilaw sang Cristianong katutom.

Linibo ka Cristianong mga pamatan-on ang napaslawan sa kaanggid nga mga pagtilaw sang katutom. Kag indi gid makatilingala! Ti, si Satanas nga Yawa ‘nagapakig-away’ sa katawhan sang Dios, nagahimo sang tanan nga masarangan niya sa pagbungkag sang ila integridad. (Bugna 12:17) Ginhimo niya nga puntariya sang iya “malimbungon nga mga buhat” labi na ang mga pamatan-on. (Efeso 6:​11, Kingdom Interlinear) Busa kinahanglan gid ang daku nga panikasog kag determinasyon agod magpabilin nga matutom.

Apang ano ang katutom? Sa Hebreong Kasulatan, ang orihinal nga tinaga para sa “katutom” nagalakip sang mahigugmaon nga pagkasuod sa isa ka tawo nga may ginatan-aw nga katuyuan. (Salmo 18:25) Wala ini nagalaragway sang mapigaw nga higot nga madali mautod kundi pagkasuod nga nagapabilin nga mabakud tubtob nga ang katuyuan may kaangtanan sa sina nga tawo matuman. Sa Griegong Kasulatan, ang orihinal nga tinaga para sa “katutom” nagadala sang panghunahuna sang pagkabalaan, pagkamatarong, ukon pagtahod.

Busa ang katutom nagadalahig sang matarong nga kaangtanan upod sa Dios. Ang Efeso 4:​24 nagasugo sa aton nga “magsuklob sang bag-ong personalidad nga gintuga . . . sa matuod nga pagkamatarong kag pagkabalaan.” Luyag bala ninyo mangin matutom kay Jehova? Nian dapat ninyo palambuon ang matutom nga pagkasuod sa iya, isa ka dimautod nga higot, isa ka determinasyon nga pahamut-an sia sa tanan ninyong dalanon. Dapat ninyo sundon ang matarong nga mga talaksan ni Jehova​—⁠bisan kon daw ano man ka makasululay ang paghimo sing tuhay!

Ang mga Pag-ipit nga Mangin Dimatutom

Sing dalayawon, ang kalabanan nga mga pamatan-on sa tunga sang mga Saksi ni Jehova nagapanikasog sa pagpabilin nga matutom, kag nagaagom sila sing matinlo nga konsiensia subong resulta. Apang si apostol Pablo nagtagna nga sa “katapusan nga mga adlaw,” sa kabilugan makita sa mga tawo ang pagkadimatutom. (2 Timoteo 3:​1, 2) Sing masubo, ginpahanugutan sang iban nga Cristianong mga pamatan-on ining dimatutom nga kalibutan nga ‘magdasok sa ila sa hurmahan sini.’ (Roma 12:​2, Phillips) Paano ini ginhimo ni Satanas?

Ang pag-ipit sang katubotubo amo ang isa ka epektibo nga paagi ni Satanas. Luyag sang kalabanan nga mga tawo nga kahamut-an sila sang iban, kag si Satanas nakahibalo kon paano hingalitan ining kinaugali nga handum. Maluyag tamdon subong normal, ang iban nga Cristianong mga pamatan-on nagbuylog sa malaw-ay nga hambalanay, imoral nga paggawi, pagpanigarilyo, pagpahubog​—⁠bisan sa pagdroga​—⁠ang tanan agod kahamut-an sang ila mga katubotubo.

Luyag ni Satanas nga kita ‘magpangabuhi sa mga kailigbon sang aton lawas, nga nagasunod sang mga handum sang lawas.’ (Efeso 2:3) Nakahibalo gid sia kon daw ano kakusog ang ganyat sang kailigbon sa sekso sa tion sang ‘pagbuskad sang pagkapamatan-on.’ (1 Corinto 7:36) Kag luyag niya nga magpadala kamo sa sinang mga kailigbon. Ang iban nga Cristianong mga pamatan-on dihungod nga nagapadala paagi sa pagtan-aw sa pornograpiko nga literatura, mga sine, kag mga vid­eo ukon paagi sa pagbuhat sing masturbasyon. Sa masunson, ining mga butang nagadul-ong sa serioso nga mga buhat sang dikatutom. Ang kalibutan ni Satanas ‘nagdasok bala sa imo sa hurmahan sini’ sa iban sining mga bahin?

Pagkabuhi sing Doble nga Kabuhi

Samtang ang pagbuhat sang daku nga sala subong sang pakighilawas isa na mismo ka mabug-at nga butang, ginadugangan sang iban nga mga pamatan-on ang ila mga problema. Kaangay sila sang “mga tawo nga butigon,” nga ginasiling sa Salmo 26:​4, “nga nagalikom kon ano sila.” Nagakabuhi sila sing doble nga kabuhi, nagabuhat sing lain samtang kaupod sang ila mga ginikanan kag sang iban pa nga hamtong nga mga Cristiano kag sing lain pa gid samtang kaupod sang ila mga katubotubo.

Apang, ang pagkabuhi sing doble nga kabuhi nagapierde sang kaugalingon kag makatalagam. Ang sayop nga mga buhat nga wala ginatapna pirme halos nagadul-ong sa iban pa nga sayop nga mga buhat. Kag bisan pa nga sa primero ang iya konsiensia nagatublag sa iya, sa padayon nga paghimo sang sala, ang iya konsiensia wala na sing reaksion. Ang isa literal nga ‘nagauntat sa pagbatyag sang kasakit’ tungod sa paghimo sing sala.​—⁠Efeso 4:​19, Kingdom Interlinear.

Sa sining punto mangin mabudlay na katama nga itu-ad ang sala kag magpabulig. Labi na gid kon ang iban nga Cristianong mga pamatan-on nadalahig sa sala. Ang sayop nga katutom masunson nga nagapangibabaw. Ang pamatan-on nga ginbalikwat sa umpisa nagpaathag: “Narealisar mo kon ano ang ginhimo mo, kag nahibaluan mo nga sayop ini. Agod indi maulamid sa problema ang iban nga mga indibiduwal, nagpasugot nga indi ini pag-isugid kay bisan sin-o.”

Samtang ‘malikom [sang] isa kon ano sia’ sa iya mga ginikanan ukon sa kongregasyon, indi niya ini malikom kay Jehova. “Walay tinuga nga indi hayag sa atubangan niya, kundi ang tanan hublas kag dayag sa mga mata niya nga hatagan ta sing husay.” (Hebreo 4:13) Ang Biblia nagapasalig sa aton: “Ang nagatabon sang iya mga paglalis indi mag-uswag.” (Hulubaton 28:13) Sa ulihi ang sala mabuyagyag. Indi mahimo malimbungan sang isa si Jehova. Ang Hulubaton 3:7 nagasiling: “Dili ka magpakaalam sa imo kaugalingon nga mga mata. Kahadluki si Jehova, kag talikud sa malaut.” Dumduma, man, nga “ang mga mata ni Jehova yara sa tagsa ka duog, nga nagabantay sang malaut kag maayo.”​—⁠Hulubaton 15:⁠3.

Ang ginsambit kaina nga pamatan-on, kaupod sang madamo pa nga iban nga nakahimo sing tago nga sala, natukiban, kag sia kag ang iya mga kaupdanan kinahanglan nga paguwaon gikan sa Cristianong kongregasyon. Naulian sila sang ulihi sa espirituwal kag nakapanumbalik. Apang, isa gid ka mabudlay nga paagi sa pagtuon sang kahulugan sang katutom!

‘Pagtadlong sang mga Butang’Upod sa Dios

Kamusta kon ang isa napamatud-an na nga dimatutom sa pila ka paagi, ayhan paagi sa paghimo sing malain? Mahapos buangon ang isa kag ipanghiwala ang kinahanglanon nga tadlungon ang mga butang. Isa ka pamatan-on ang tago nga nakahimo sing pakighilawas: “Gindugangan ko ang akon ministeryo sa latagon, sa paghunahuna nga basi sa bisan paano makatabon ini sang sala.” Ang batinggilan nga pungsod sang Israel nagtinguhan man sa pag-uluulo kay Jehova paagi sa mga halad. Apang ginsikway ni Jehova inang salimpapaw nga debosyon. Ginlaygayan niya sila: “Panghugas kamo; paninlo kamo; isikway ang malaut nga mga buhat ninyo sa atubangan sang akon mga mata; mag-untat sa paghimo sing malaut.” Si Jehova magabaton lamang sang ila mga halad sa tapos sila nga ‘magtadlong sang mga butang upod sa iya.’ Amo man sa karon para kay bisan sin-o nga nakahimo sang sala.​—⁠Isaias 1:​11, 15-18.

Indi matadlong sang isa ang mga butang upod kay Jehova paagi lamang sa pagtu-ad sa isa ka katubotubo. Una, ang mga katubotubo masunson nga wala nagahatag sing labing maayo nga bulig, kay sa masami sila man limitado sing eksperiensia sa kabuhi. Sing labi pa ka importante, indi sila makapatawad sang imo sala. Dios lamang ang makahimo sina. Gani “ibubo ang imo tagipusuon” sa iya sa pagkumpisar. (Salmo 62:8) Bisan pa nga nahuya gid ikaw sa imo ginhimo, makasalig ka nga si Jehova ‘nagapatawad sing bugana.’​—⁠Isaias 55:⁠7.

Magakinahanglan ikaw sing dugang nga bulig. “Sugiri ang imo mga ginikanan, sugiri sa gilayon ang mga gulang​—⁠sugod gid sa ginsuguran,” laygay sang isa ka lamharon nga Cristiano nga nakabenepisyo gikan sa sina nga bulig. Huo, ang imo mga ginikanan mahimo nga yara sa maayong posisyon agod buligan ikaw. ‘Ihatag ang imo tagipusuon’ sa ila, nagasugid sa ila sang imo bug-os nga problema. (Hulubaton 23:26) Kon kinahanglan makahimus sila nga ikaw ­makabaton sing dugang nga bulig gikan sa ­mga gulang sang kongregasyon.​—⁠Santiago 5:​14, 15.

Pagpakita sing Matuod nga Katutom​—⁠Paano?

Sa pagkamatuod, labing maayo nga indi gid mahulog sa dimatutom nga paggawi una sa tanan. Ang Salmo 18:​25 nagasugid sa aton: “Sa matutom magpakita ka [Jehova] nga matutom; sa walay sala kag mapagros nga tawo magpakita ka nga walay sala.” Si Jehova bugana nga nagapakamaayo sa matutom nga nagahupot sang mataas nga talaksan sang paggawi.

Apang, may iban pa nga mga paagi nga ang imo katutom mahimo matilawan. Halimbawa, ang imo abyan nagahimo sing sala. Magapangibabaw bala ang imo katutom sa imo abyan sang sa imo katutom kay Jehova? Ang mahigugmaon nga butang nga himuon amo ang pagpalapit sa imo abyan kag paglaygay sa iya nga isugid ini sa iya mga ginikanan ukon sa mga gulang. Sugiri ang imo abyan nga kon indi niya ina paghimuon sa isa ka maarang-arang nga panag-on sang tion, ikaw na mismo ang magapanugid. Ang Hulubaton 27:5 nagasiling: “Maayo pa ang dayag nga pagsabdong sang sa tago nga gugma.” Paagi sa pagbulig sa imo abyan sa sining paagi, mapakita mo indi lamang ang imo matuod nga pagpakig-abyan kundi ang kadalom man sang imo katutom kay Jehova.

Sa ano man nga pagtilaw, ang kusog nga mapakita ang katutom nagahalin sa pagtigayon sing mabakud nga personal nga kaangtanan kay Jehova. Ang makahulugan nga pangamuyo kag makugi nga personal nga pagtuon kinahanglanon agod matigayon naton ina nga kaangtanan. Sa makawiwili, ang tanan nga mga pamatan-on nga nakasala nga ginsambit kaina nagbaton nga ang ila mga pangamuyo kag mga batasan sang personal nga pagtuon nangin rutina​—⁠kag sang ulihi nag-untat. Si Jehova indi na nangin matuod sa ila, kag sang ulihi ang dimatinlo nga paggawi nagsunod. Ikaw bala, paagi sa pangamuyo kag personal nga pagtuon, nagapabakud sang imo kaangtanan kay Jehova agod magpabilin nga matutom?

Huo, kon kaisa magapalibog kamo kon bala may nawasi kamo nga makalilipay nga tion. “Kon kaisa ang mga kalibutanon daw nagakalipay,” siling sang isa ka lamharon nga babayi. “Apang kon ikaw ang yara sa sina nga sitwasyon, makita mo nga indi gid man ini makalilipay.” Naghambal sia bangod sang iya naeksperiensiahan, kay nakahimo sia sing seksuwal nga imoralidad, nagresulta sa pagbusong kag aborsion. “Ang mangin sa kamatuoran isa ka proteksion,” siling niya sa karon​—⁠isa ka leksion nga natun-an niya sa mabudlay nga paagi. Ang Salmo 119:​165 nagapahanumdom sa aton nga “may daku nga paghidait ang mga nagahigugma sang kasuguan [sang Dios].”

Busa, himua ang imo bug-os nga masarangan sa pagpabilin nga matutom. Tinguhai nga palig-unon ang nagapadayon nga kaangtanan kay Jehova. Dumti ang malain kag manguyapot sa maayo. (Roma 12:9) Ang Salmo 97:​10 nagasiling sa aton: “O kamo nga nagahigugma kay Jehova dumti ang malaut. Sia nagatipig sang mga kalag sang iya mga balaan; ginaluwas niya sila sa kamot sang mga malauton.” Huo, subong isa ka Cristianong pamatan-on, makabenepisyo ka gikan sa pangamlig ni Jehova kag makaagom sang kabuhi nga dayon kon makapasar ka sa pagtilaw sang Cristianong katutom.