Masako Gid sa Maayong Balita
SI APOSTOL Pablo yara anay sa isa ka kahimtangan nga wala mahibal-i sang mga Saksi ni Jehova nga bug-os tion nga mga ministro—pigado sia. Gani nag-obra sia sa Corinto sang kubos nga obra nga pagpanghimo sing mga tolda nga natun-an niya sang pamatan-on sia. Ini nga obra mabudlay, kag kon kaisa mahimo nga ang iya mga kamot nagdugo sa pag-uyat sing magaras nga tela nga pangtolda. Ang iya ginaganar kulangkulang para sa iya kalan-on kag panapton, apang kontento na sia, kay sa tapos sang iya sekular nga pag-obra kada adlaw, ginabiyaan niya ang iya mga galamiton sa pag-obra kag ginahimo ang iya una nga tuyo sa pagkadto sa Corinto—ginbantala niya ang maayong balita!—Filipos 4:11, 12.
Sa mga adlaw nga inugpahuway, nagakadto si Pablo sa sinagoga. Matuod, sang primero gin-atubang ni Pablo ang iya mga tumalambong sa Corinto “sa kaluyahon kag sa kahadlok kag sa dakung pagkurog.” (1 Corinto 2:1, 3) Apang bangod napalig-on sang pagbaton sang iban sa iya mensahe, si Pablo nagpadayon sa “paghatag sing pamulongpulong sa sinagoga sa tagsa ka adlaw nga inugpahuway kag ginbuyok niya ang mga Judiyo kag mga Griego.”—Binuhatan 18:1-4.
Sang primero, indi bug-os ang pagbantala ni Pablo. Nian nag-abot si Silas kag si Timoteo gikan sa Macedonia nga may dala nga daku nga amot nga ‘bugana nga naghimuno sang iya kakulangan.’ (2 Corinto 11:9; Filipos 4:15) Makalilipay man ang balita nga ang kauturan sa Tesalonica nagatindog sing malig-on walay sapayan sang paghingabot.—1 Tesalonica 3:6.
Ang epekto kay Pablo? “Nangin masako gid si Pablo sa pulong [“naghinguyang sang iya bug-os nga tion sa pagbantala,” The Jerusalem Bible; Today’s English Version], nga nagapanaksi sa mga Judiyo sa pagpamatuod nga si Jesus amo ang Cristo.” (Binuhatan 18:5) Bangod wala anay sing kakulangan sa materyal, indi mapahamtang si Pablo tubtob nakabalik sia sa bug-os tion nga pagbantala. Nagbalik sia sa sining hilikuton nga may daku nga kapagsik kag kakunyag, indi lamang nagbantala sa mga Judiyo kundi ginsulat pa niya ang nahauna sang iya inspirado nga mga sulat—ang sulat sa mga taga-Tesalonica!
Isa ka Sulundan Para sa Aton Karon
Ang rekord sang makugi nga pagpanghikot ni Pablo sa Corinto gintipigan agod palig-unon ang tanan nga mga Cristiano nga mangin masako gid sa maayong balita. Narealisar ni Pablo nga ginpaliton ni Ginuong Jesus mismo sa iya mga disipulo ang mataas nga dungog nga mangin “kapawa sang kalibutan.” Indi nila dapat pagtaguon ining kapawa. Ginsilingan sila ni Jesus: “Paiwaga ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa langit.” (Mateo 5:14-16) Nagakahulugan ini sing bug-os nga pagpakigbahin sa pagbantala nga hilikuton nga gintagna ni Jesus. (Mateo 24:14; 28:19, 20; Binuhatan 1:6-8) Ang pagbantala sining maayong balita sang Ginharian amo ang panguna nga rason sa pagluntad sang Cristianong kongregasyon.
Ang nahauna nga mga Cristiano, kaangay ni Pablo, nangin serioso sa sining pagbantala nga hilikuton. Sa amo, sang magdumdom ang mga kaaway sang Dios nga napalong na nila ang matuod nga kapawa paagi sa mapintas nga pagpatay sa “pangulo nga Ahente sang kabuhi,” ang iya mga sumulunod nagpadayon subong kapawa sang kalibutan, mapagsik nga nagbantala. (Binuhatan 3:15) Bisan ang paghingabot wala makapugong sa ila panikasog. Ang rekord sang Biblia nagasiling: “Sa adlaw-adlaw sa templo kag sa puluy-an wala sila mag-untat sa pagpanudlo kag pagwali sing maayong balita nahanungod kay Cristo, nga si Jesus.” (Binuhatan 5:42) Wala sing nakapugong sa ila!
Sa modernong mga tion, ang mga Cristiano nangin masako man sa pagpanaksi. Sa talipuspusan nayon sang ika-19 nga siglo, nakita sang maukod nga mga estudyante sang Pulong sang Dios ang kinahanglanon nga ipaambit ang mga kamatuoran sang Biblia sa iban. Ang Zion’s Watch Tower Tract Society—isa ka organisasyon nga nangin internasyonal sa kasangkaron—ginhimo nga korporasyon sang 1884. Literal nga ginpuno sining mga Estudyante sang Biblia, nakilal-an sugod sang 1931 subong mga Saksi ni Jehova, ang duta sing ihibalo tuhoy sa Pulong sang Dios. Ang ila makugi nga pagpanghikot nagresulta sa daku nga kadam-an sang kapin sa apat ka milyon! Kag wala sing duhaduha nga ang ila kadamuon padayon nga magadaku sa idalom sang pagtuytoy ni Jehova.—Isaias 60:22.
Ginahimo Mo Bala ang Imo Bahin?
Si Jesus nagsiling: “Ang alanyon daku, apang pila lamang ang mga mangangani.” (Mateo 9:37, 38) Sang 1990 halos napulo ka milyon ka tawo ang nagtambong sa Memoryal sang kamatayon ni Cristo. Daw ano ka daku ang posibilidad para sa dugang pa nga pag-ani sa bug-os nga kalibutan! Apang samtang nagakalipay sa sining padayon nga pagdamo, dapat pamangkuton sang tagsatagsa ang iya kaugalingon, ‘Tubtob sa anong kasangkaron nagapakigbahin ako sa sining dungganon nga hilikuton? Ginahimo ko bala ini sing tayuyon—kada semana kon mahimo?’
Ang mga gulang dapat manguna sa sining hilikuton subong “mga halimbawa sa panong.” (1 Pedro 5:3) Matuod, ang kalabanan nga mga gulang may sekular nga mga obra. Amo man si apostol Pablo sang didto sia sa Corinto. Apang, nagpain sia sing tion para sa tayuyon nga pagbantala. Madamo nga mga gulang karon ang masako man sa espirituwal nga mga hilikuton sa talipuspusan sang semana. Makahatag ini sing daku kag makapalig-on nga epekto sa tanan sa kongregasyon. Sa pila ka bulan sang ginhinguyang ang pinasahi nga panikasog, kalabanan sang mga manugbantala sa madamo nga kongregasyon nagpayunir. Ang sekreto? Ang mga gulang nagapanguna sa pagbantala kag sa pag-organisar sang pag-alagad sa latagon nga mga kahimusan.
Ang ministeryal nga mga alagad mahimo man mangin mapuslanon nga impluwensia sa kongregasyon kon sila tayuyon nga nagapakigbahin sa pag-alagad sa latagon. Dumduma, ginapatuman sang Kasulatan nga sila mangin “serioso, . . . mga lalaki nga nagaalagad sing maayo.” (1 Timoteo 3:8, 13) Ang pagkatutom sa pag-alagad sa latagon kinahanglanon agod makalipikar ang isa ka utod nga lalaki subong isa ka gulang ukon ministeryal nga alagad.—Tito 1:8, 9.
Kaangay ni Pablo, nabuhinan sang iban ang ila sekular nga obra kag sa amo nakapayunir sila. Ang kadamuon sang regular, auxiliary, kag espesyal nga mga payunir nagdugang halin sa 137,861 sang nagligad nga napulo ka tuig lamang tubtob sa 536,508 sang 1990. Apang, dapat man maghalong ang mga payunir nga gamiton sing maalamon ang tion, indi lamang mag-isip sang tion. Mga payunir, nagahanda bala kamo sing maayo kag epektibo sa ministeryo? Nagapanikasog bala kamo nga magpadayon sa pag-uswag agod nga ang inyo ministeryo mangin mabungahon gid?
Mga Padya sang Isa ka Balanse nga Ministeryo
Ginaapresyar mo bala ang nagasakdag sang kabuhi nga impormasyon nga ginapresentar kada bulan sa Ang Lalantawan kag sa kaupod sini, ang Magmata!? Wala sing duhaduha nga ginaapresyar mo. Napahulag ka bala sang imo apresasyon nga makigbahin sa pagpahamtang sining mga balasahon? Amo sini ang natabo sa isa ka utod nga babayi sa Botswana. Batok sia sang una sa kamatuoran, apang ginbasahan sia sang iya bana gikan sa mga magasin. Sang ulihi nagbag-o ang iya tagipusuon kag nangin Saksi. Bisan pa indi sia makahibalo magbasa, madinalag-on gid sia sa pagpahamtang sing mga magasin, paagi sa pagsiling, “Indi ako makahibalo magbasa, apang ginabasa sang akon bana ining mga magasin sa akon. Naluyagan ko ini, kag napat-od ko nga amo man kamo.”
Ngaa indi magpakigbahin kada semana sa sining nagaluwas-kabuhi nga hilikuton? Sa tion nga matigayon mo ang espirituwal nga mga kalipikasyon, ang Cristianong kongregasyon malipay sa pagbulig sa imo sa pag-umpisa. Apang, ang pagpahamtang sing mga magasin, isa lamang ka bahin sang pag-alagad. Ang bisan sin-o nga masako gid sa maayong balita nagatinguha sing balanse nga ministeryo. Halimbawa, ang Watch Tower Society nagabalhag sing mga libro sing minilyon, kag ginatanyag ini sa publiko subong kapin ka permanente nga tuburan sang maayong espirituwal nga kalan-on. Nangin sampaton ka bala sa imo ministeryo sa pagpahamtang sing mga libro, subong sang Mahimu Ka Mabuhi sing Dayon sa Paraiso sa Duta?
Kag kamusta ang mga tawo nga nagapakita sing interes? Nagahupot ka bala sing maayong mga rekord agod duawon sila liwat? Ina nga mga pagduaw makadul-ong sa bahin sang pag-alagad nga nagadala sing labing daku nga kalipay sa tanan—ang hilikuton sa pagtuon sang Biblia sa puluy-an. Dumduma, ginsugo kita ni Jesus sa Mateo 28:19, 20 nga ‘maghimo sing mga disipulo, nga ginabawtismuhan sila.’ Nagakahulugan ina nga tun-an ang Biblia upod sa ila. Matuod, ang pag-umpisa sing pagtuon masami nagakinahanglan sing pagkamapinadayunon. Ang isa ka Saksi nakasugata sing isa ka tigulang nga mag-asawa nga makunyagon nga nag-ugyon sa isa ka pagtuon sa Biblia. Apang ginpaisol nila ang pagtuon sing tatlo ka paagisod nga semana. Sang ulihi nasugdan ang pagtuon. Nian, sa sulod sang isa ka tion, ginkanselar sang mag-asawa ang pagtuon sing halos kada ikaduha ka semana. Apang, sang ulihi, ang asawa nag-uswag tubtob sa punto sang pagpabawtismo. “Sa tapos mabawtismuhan,” alimunaw sang utod nga lalaki, “ang iya mga mata napuno sing mga luha sang kalipay, nga nagpatulo man sing mga luha sang kalipay sang akon asawa kag nakon.” Huo, ang pagkamasako gid sa maayong balita nagadala sing indi malaragway nga kalipay!
Ihanda ang Imo Kaugalingon!
Si Jesucristo kag si apostol Pablo nagpahamtang sing maayong mga sulundan sang debosyon nga ilugon naton. Kag madamo kita sing dungganon nga mga halimbawa sa tunga sang mga Saksi ni Jehova sa modernong mga tion. Tuman na ang tion para sa tanan nga nakahibalo sang maayong balita nga mangin aktibo sing bug-os sa pagpahibalo sini sa iban. Ginapasalig kita sang Biblia nga ina tanan nga pagpangabudlay “indi wala sing pulos.”—1 Corinto 15:58.
Kaangay ni Pablo, ang kalabanan may pinansial nga mga obligasyon. Bangod sini, madamo ang indi makapayunir. Apang sa bulig ni Jehova, sarang masunod sang tanan ang maayong laygay sa Roma 12:11: “Magmakugihon. Magmainit sa espiritu. Magpaulipon kay Jehova.” Kag kon magbalhin ang mga kahimtangan nga magatugot sing kapin nga tion nga mahinguyang sa pag-alagad kay Jehova, ang bisan sin-o nga nagahigugma gid kay Jehova, kaangay ni Pablo, magahimulos sang kahigayunan. Magmasako gid sa maayong balita! Ang paghimo sini indi lamang magadala sing mga pagpakamaayo karon kundi sa palaabuton magaresulta sa kabuhi nga walay katapusan nga may dayon nga kasadya kag kalipay!—Mateo 19:28, 29.