Mangin “Masako Kaayo” sa Imo Ministeryo

¹ Kon mabasa naton nga si apostol Pablo nagtrabaho paagi sa paghimo sing tolda samtang sa Corinto, mahimo kita maghinakop nga ang iya kahigayunan sa pagbantala nalimitehan bangod sini. Apang, ang Binuhatan 18:5 nagasaysay: “Si Pablo nagsugod nga mangin masako kaayo sa pulong, nga nagapanaksi sa mga Judiyo agod pamatud-an nga si Jesus amo ang Cristo.” Ngaa si Pablo masako kaayo sa pagbantala nga hilikuton? Bisan pa madamo sa Corinto ang nangin mga tumuluo na, ginpamatud-an sang Ginuo nga madamo pa nga disipulo ang dapat himuon sa sina nga siudad. (Binu. 18:​8-11) May amo man bala kita nga rason agod mangin masako kaayo sa aton ministeryo? Huo. Madamo pa nga tawo ang mahimo masalapuan kag matudluan sang kamatuoran.

² Maghinguyang sing Madamo Pa nga Tion sa Pag-alagad sa Abril: Ayhan tulumuron mo nga magpabilin nga masako sa pagbantala sing maayong balita kada bulan. Apang may mga binulan nga ilabi na nga nagahatag sa aton sing mga kahigayunan agod mangin “masako kaayo” sa sining hilikuton. Nagalakip ini sa bulan sang Abril, ang pinakamasako nga panag-on sang Memoryal. Ginatugot bala sang imo kahimtangan nga mag-auxiliary payunir ka ukon dugangan mo ang imo panikasog sa ministeryo sa sini nga tion? Madamo nga manugbantala nga nagahimo sini ang ginpakamaayo sing bugana. (2 Cor. 9:6) Kon ginahimo mo ang imo bug-os nga masarangan, dumduma nga si Jehova nahamuot sa imo bug-os kalag nga pag-alagad. (Luc. 21:​2-4) Ano man ang imo kahimtangan, himua nga imo tulumuron nga mangin “masako kaayo” sa imo ministeryo sa Abril. Kag indi pagkalimti nga ihatag ang imo report sa pag-alagad sa latagon sa katapusan sang bulan agod ang imo panikasog maisip upod sa tanan nga katawhan ni Jehova.

³ Duawa ang mga Bag-uhan nga Nagtambong sa Memoryal: Sa Pilipinas sang nagligad nga tuig, ang nagtambong sa Memoryal 413,023. Ang kabug-usan nga nagtambong para sa sini nga tuig wala pa mahibaluan. Apang, ginapakita sang mga report nga may tumalagsahon nga posibilidad para sa daku pa nga “alanyon.” (Mat. 9:​37, 38) Busa, sa gilayon kon mahimo pa, maghimo sing kahimusan nga duawon ang mga interesado nga nagtambong sa Memoryal agod buligan sila sa espirituwal. Ang pagpaisol sini nga mga pagduaw magapahanugot sa ‘malaut nga agawon ang pulong sang ginharian nga ginsab-ug sa ila tagipusuon.’ (Mat. 13:19) Paagi sa pagduaw sa gilayon, ginapakita mo nga ikaw gid “masako kaayo” sa imo ministeryo.

⁴ Padayon nga Buligi ang mga Di-aktibo: Sang Pebrero ginsugdan ang isa ka pinasahi nga panikasog agod buligan ang mga di-aktibo. Kon may pila nga wala pa maduaw, ang mga gulang dapat maghimo sing kahimusan nga duawon sila antes matapos ang Abril. Panikasugan nga hibaluon sang mga gulang kon ano gid ang ginatunaan sang problema sang indibiduwal kag kon paano gid sia mabuligan agod mangin aktibo liwat sa pag-alagad kay Jehova. Ining mahigugmaon nga bulig nagapakita nga ang mga gulang serioso gid sa ila responsabilidad subong mga manugbantay sang “panong sang Dios.” (1 Ped. 5:​2; Binu. 20:28) Ang Septiembre 15, 1993, nga guwa sang Ang Lalantawan, pahina 22-3, nagahatag sing maayo gid nga mga panugda nga sarang magamit sang mga gulang kon nagalubad sang bisan diin sa lima ka kinaandan nga problema nga mahimo nagaapektar sa mga di-aktibo. Sing nagakaigo, ang iban mahimo pa mapaaktibo liwat sa ministeryo sa latagon sa Abril.

⁵ Buligi ang Madamo Pa nga Mangin Di-bawtismado nga mga Manugbantala: Ang imo mga anak bala nangin kalipikado subong bag-ong mga manugbantala sing maayong balita? Kamusta naman ang iban pa nga ginatun-an mo sa Biblia? Kon gin-aprobahan sila sang mga gulang, indi bala nga ang Abril mangin isa ka nagakaigo nga tion agod magsugod sila sa pagbantala? Kon ang isa ka tawo nagauswag kag nakatapos na sa pagtuon sa Ginapatuman nga brosyur kag Ihibalo nga libro, ang pagtuon sa Biblia mahimo padayunon sa ikaduha nga libro​—⁠ayhan sa God’s Word nga libro, Matuod nga Paghidaet nga libro, ukon Nahiusa sa Pagsimba nga libro. Ang imo tulumuron amo nga buligan ang estudyante nga matigayon ang maayo pa nga paghangop sa kamatuoran, mangin kalipikado subong di-bawtismado nga manugbantala, kag mangin isa ka dedikado kag bawtismado nga Saksi ni Jehova.​—⁠Efe. 3:​17-19; 1 Tim. 1:​12; 1 Ped. 3:⁠21.

⁶ Ang imo padayon kag matuod nga interes sa imo mga estudyante sa Biblia magabulig sa ila sa ulihi nga batunon sing hanuot ang kamatuoran. Nasugilanon sang isa ka Saksi ang tigulang nga mag-asawa nga tinagipusuon nga nagpasugot sa isa ka pagtuon sa Biblia. Apang tatlo ka paagisod nga semana nga ginpaisol sang mag-asawa ang pagtuon. Sang ulihi nasugdan ang pagtuon. Nian, ginkanselar sang mag-asawa ang pagtuon halos kada duha ka semana. Apang, sang ulihi, ang asawa nag-uswag padulong sa bawtismo. “Sang ginbawtismuhan sia,” panaysayon sang utod nga lalaki, “naghibi sia bangod sa kalipay, nga nagpahibi man sa amon sang akon asawa.” Huo, ang mangin “masako kaayo” sa maayong balita nagapahalipay sing daku!

⁷ Ginapakita sang tagna sa Biblia kag sang mga hitabo sa kalibutan nga madugay na kita nga nagapuyo sa tion sang katapusan. Karon na ang tion nga ang tanan nga katawhan sang Dios dapat mangin “masako kaayo” sa pagbantala sing maayong balita sa iban. Si apostol Pablo nagapasalig nga ini nga pagpangabudlay pat-od nga ‘indi walay pulos may kaangtanan sa Ginuo.’​—⁠1 Cor. 15:⁠58.