Komunikasyon sa Cristianong Ministeryo
“Busa lakat kamo kag himuon nga mga disipulo ang katawhan sang tanan nga kapungsuran.”—MATEO 28:19.
1. Anong sugo nga ginhatag ni Cristo ang nagapahangop sing kinahanglanon nga magkomunikar?
ANG sugo ni Jesus, nga ginbalikwat sa ibabaw, nagapresentar sa aton sing hangkat sa pagkomunikar sa mga tawo sa aton ministeryo samtang nagapamalaybalay kita, nagaduaw liwat, kag nagapakigbahin sa tanan nga iban pa nga bahin sang pagbantala sang Ginharian. Nalakip sa sina nga sugo ang salabton nga ipakilala ang kamatuoran nahanungod kay Jehova nga Dios, kay Jesucristo, kag sa Mesianikong Ginharian nga ginagamhan karon ni Jesus.—Mateo 25:31-33.
2. Agod mangin epektibo sa pagkomunikar, ano ang kinahanglan naton?
2 Paano kita makakomunikar sing epektibo? Una, dapat naton tuuhan ang impormasyon nga aton ginakomunikar. Kon sa aton pa, dapat may mabaskog kita nga pagtuo nga si Jehova amo ang isa ka matuod nga Dios, nga ang Biblia amo gid ang Pulong sang Dios, kag nga ang Ginharian sang Dios amo lamang ang paglaum para sa katawhan. Sa sinang paagi, ang ginatudlo naton magagikan sa tagipusuon, kag masunod naton ang laygay ni Pablo kay Timoteo: “Himua ang imo labing masarangan sa pagpresentar sang imo kaugalingon nga nahamut-an sa Dios, isa ka manugpangabudlay nga wala sing ikahuya, nga nagagamit sang pulong sang kamatuoran sing husto.”—2 Timoteo 2:15.
Wala sing Hambal nga Komunikasyon
3-5. (a) Paano kita makakomunikar nga wala nagahambal sing bisan isa ka tinaga? (b) Anong mga eksperiensia ang nagapamatuod sa sini?
3 Ang komunikasyon masami nga nagadalahig sing mga tinaga. Apang, ang matuod, nagakomunikar kita sa mga tawo bisan sa wala pa kita makahambal sa ila. Paano? Paagi sa aton pagdala sang aton kaugalingon kag paagi sa aton pagpanapot kag pagpamustura. Sang nagligad nga mga tinuig ang isa ka naggradwar nga misyonero sang Watchtower Bible School of Gilead nagsakay sa isa ka daku nga barko padulong sa iya asaynment sa iban nga pungsod. Pagligad sang pila ka adlaw sa dagat, ginpamangkot sia sang isa ka dumuluong kon ngaa lain gid sia sa tanan nga pasahero. Ang misyonero may ginkomunikar nga isa ka butang nga takus talupangdon—nga sia may lain nga talaksan kag madali palapitan—bangod lamang sang iya panagway kag panghulaghulag. Naghatag ini sa misyonero sing maayong kahigayunan sa pagpanaksi.
4 Nian sa liwat pa gid, ang isa ka utod nga babayi nga nagatindog sa kalye nga nagatanyag sing literatura sa Biblia sa mga nagalalabay mainabyanon nga nagyuhom sa isa ka babayi nga nag-agi sa tupad niya. Ining babayi nanaug sa hagdan padulong sa estasyunan sa ubos. Nian nagbag-o ang iya hunahuna, ginbalikan niya ang utod nga babayi, kag nangabay sing pagtuon sa Biblia. Ano ang nagpahamuot sa iya? Bisan pa wala sia gintanyagan sing literatura sa Biblia, mainabyanon nga ginyuhuman sia sang Saksi nga nagapanaksi sa kalye.
5 Ikatlo nga halimbawa: Ang isa ka grupo sang pamatan-on nga mga Saksi nagkaon sa isa ka restawran kag nakibot sang magpalapit sa ila lamesa ang isa ka dikilala nga tawo kag ginbayaran ang ila kinaon. Ngaa ginhimo niya ina? Nahamuot sia sa ila panghulaghulag. Sa wala sing paghambal sing isa ka tinaga sa dikilala nga tawo, ining pamatan-on nga mga Cristiano nagkomunikar nga sila mahinadlukon sa Dios nga mga indibiduwal. Sing maathag, paagi sa aton pagdala sang aton kaugalingon, panagway, kag pagkamainabyanon, nagakomunikar kita bisan sa wala pa kita makahambal sing isa ka tinaga.—Ipaanggid ang 1 Pedro 3:1, 2.
Ang Pagpangatarungan Importante sa Komunikasyon
6. Iilustrar kon paano ang pagpangatarungan kinahanglanon gid para sa komunikasyon.
6 Sa pagkomunikar sa mga tawo paagi sa hambal nahanungod sa maayong balita, dapat kita mangin handa, indi sa paghambal sing dogmatiko, kundi sa pagpangatarungan sa ila. Makapila naton nabasa nga si Pablo nangatarungan sa mga tawo nga gintinguhaan niya nga paambitan sing maayong balita. (Binuhatan 17:2, 17; 18:19) Paano naton mailog ang iya halimbawa? Ti, ang nagalain nga mga kahimtangan sa kalibutan mahimo nagdul-ong sa iban sa pagduhaduha sa pagluntad sang isa ka labing gamhanan kag mahigugmaon nga Dios nga nagaulikid sa katawhan. Apang, makapangatarungan kita sa ila nga ang Dios may tion para sa tanan nga butang. (Manugwali 3:1-8) Sa amo, ang Galacia 4:4 nagasiling nga sang mag-abot ang sibu nga tion sang Dios, ginpadala niya ang iya Anak sa duta. Natabo ini pagligad sang linibo ka tuig nga una sia nanaad sa paghimo sini. Gani man, kon mag-abot ang iya sibu nga tion, tapuson niya ang pag-antos kag kalautan. Dugang pa, ginapakita sang Pulong sang Dios nga ang Dios may mabaskog nga mga rason sa pagtugot sang kalautan nga magpadayon sing tuman kadugay. (Ipaanggid ang Exodo 9:16.) Ang amo sini nga pagpangatarungan, kag ang pagsakdag sina nga pagpangatarungan paagi sa mga ilustrasyon kag mabaskog nga pamatuod sa Kasulatan, magabulig sa sinsero nga mga tawo sa pagtalupangod nga ang pagkalapnag sang kalautan indi magamit subong argumento nga si Jehova wala nagaluntad ukon wala nagasapak.—Roma 9:14-18.
7, 8. Paano ang pagpangatarungan mahimo makabulig sa aton sa pagkomunikar sa isa ka Ortodokso nga Judiyo?
7 Kon ibutang ta nga samtang nagapamalaybalay ikaw, ang isa ka tagbalay magasiling sa imo: “Isa ako ka Judiyo. Indi ako interesado.” Ano ang imo isabat? Ang isa ka utod nga lalaki nagreport nga nagmadinalag-on sia sa sini nga paagi: ‘Napat-od ko nga magaugyon ka sa akon nga si Moises isa sang labing daku nga mga manalagna nga gingamit sang Dios. Kag nahibaluan mo bala nga subong narekord sa Deuteronomio 31:29, sia nagsiling: “Nahibaluan ko nga sa tapos ako mapatay . . . magatalikod kamo sa dalanon nga ginsugo ko sa inyo; kag ang kalamidad magaabot sa inyo”? Si Moises isa ka matuod nga manalagna, gani ang iya ginsiling dapat magmatuod. Nagmatuod ayhan ini sang ginpadala sang Dios ang Mesias sa mga Judiyo kag amo kon ngaa wala sia pagbatuna sang mga Judiyo? Mahimo nga matuod ini. Karon kon matuod ini kag nagsayop sila, isa bala ina ka rason kon ngaa ikaw kag ako dapat maghimo sing amo man nga sayop?’
8 Dumduma, man, nga ang mga Judiyo nag-antos sing daku sa mga kamot sang Cristiandad, labi na sa sini nga siglo. Gani mahimo sugiran mo ang tagbalay nga wala kita magpakigbahin sa sini. Halimbawa, mahimo mo isiling: ‘Nahibaluan mo bala nga sang nagagahom si Hitler, ang lamang nga grupo nga nagpamatok sa iya pagdumili sa mga Judiyo amo ang mga Saksi ni Jehova? Nangindi man sila sa pagsiling sing “Heil Hitler” kag sa pag-alagad sa iya hangaway.
9, 10. Paano ang pagpangatarungan magamit sa pagbulig sa isa nga nagapati sa kalayuhon nga impierno?
9 Sa pagtinguha nga magkomunikar sa isa nga nagapati sa kalayuhon nga impierno, mahimo ka mangatarungan nga agod ang isa ka indibiduwal mag-antos sing dayon sa impierno, dapat nga may yara sia dimamalatyon nga kalag. Ang nagapati sa kalayuhon nga impierno magaugyon sa gilayon. Dayon sarang mo masambit ang kasaysayan sang pagtuga kay Adan kag kay Eva kag pamangkuton sia sa malolo nga paagi kon may natalupangdan sia sa kasaysayan nga ginsambit inang dimamalatyon nga kalag. Sa pagpadayon sang imo pagpangatarungan, mahimo mo dayon ipatalupangod sa iya ang Genesis 2:7, nga sa diin ginasugiran kita sang Biblia nga si Adan nangin isa ka kalag. Kag talalupangda kon ano ang ginsiling sang Dios nga mangin resulta sang sala ni Adan: “Sa balhas sang imo nawong magakaon ka sing kalan-on tubtob nga magbalik ka sa duta, kay ginkuha ka gikan sa sini. Kay yab-ok ka kag sa yab-ok magabalik ka.” (Genesis 3:19) Hanti, si Adan nga kalag nagbalik sa yab-ok.
10 Mahimo mo man ipatalupangod ang kamatuoran nga sa kasaysayan sang Genesis wala gid ginasambit sang Dios ang walay katapusan nga pag-antos sa kalayuhon nga impierno. Sang ginpaandaman sang Dios si Adan nga indi pagkaunon ang gindumilian nga bunga, sia nagsiling: “Sa adlaw nga magkaon ka sa sini mapatay ka nga totoo.” (Genesis 2:17 Wala ginsambit ang kalayuhon nga impierno! Kon ang matuod nga resulta sang sala ni Adan, indi ang kamatayon, ang ‘pagbalik sa yab-ok,’ kundi dayon nga pag-antos, nahisuno sa bug-os nga katarungan indi bala dapat maathag kuntani nga ginpaathag ini sang Dios? Hanti, ang mahalungon kag malolo nga pagpangatarungan mahimo nga makabulig sa sinsero nga indibiduwal nga mahangpan ang indi pagsinanto sang iya ginatuuhan. Kabay nga indi gid naton pagkalimtan ang pagkaimportante sang paggamit sang pagpangatarungan sa pagganyat samtang ginapaambit naton sa iban ang kamatuoran sang Pulong sang Dios.—Ipaanggid ang 2 Timoteo 2:24-26; 1 Juan 4:8, 16.
Mga Kinaiya nga Kinahanglanon Para sa Epektibo nga Komunikasyon
11-13. Anong Cristianong mga kinaiya ang makabulig sa aton sa pagkomunikar sing epektibo?
11 Karon, anong mga kinaiya ang dapat naton palambuon agod makomunikar ang mga kamatuoran sang Ginharian sing labing epektibo? Ti, ano ang ginasugid sa aton sang halimbawa ni Jesus? Sa Mateo 11:28-30, aton mabasa ang iya ginsiling: “Kari sa akon, tanan kamo nga ginabudlayan kag ginabug-atan, kag pabugnawan ko kamo. Itakud ang akon gota sa inyo kag magtuon kamo sa akon, kay ako mapainubuson kag malolo sa tagipusuon, kag makakita kamo sing kabugnaw sa inyo mga kalag. Kay ang akon gota mahulas kag ang akon lulan mamag-an.” Makita naton diri ang isa sang mga sekreto sang kadalag-an ni Jesus sa pagkomunikar. Sia mapainubuson kag malolo sa tagipusuon. Ang matarong sing tagipusuon nga mga tawo mabugnawan sa iya. Si apostol Pablo nagpahamtang man sing maayong halimbawa, kay, subong sang ginsugid niya sa mga gulang gikan sa Efeso, sugod sa una nga adlaw nga nagkari sia sa ila, nagpaulipon sia sa Ginuo nga “may daku gid nga pagkamapainubuson.”—Binuhatan 20:19.
12 Paagi sa aton pirme nga pagpakita sing kaugdang kag pagkamapainubuson, masapwan sang iban nga kita man makapabugnaw, kag mangin mas mahapos sa aton nga magkomunikar sa ila. Ang tuhay sa sini nga panimuot mahimo gid nga magpautwas sing balagbag sa ulot naton kag sang mga ginatinguhaan naton nga mapaalintunan. Sa pagkamatuod, “ang kaalam yara sa mga maugdang.”—Hulubaton 11:2.
13 Agod mangin epektibo sa pagpaalinton sing impormasyon, dapat man kita mangin mapailubon kag mataktikanhon. Si apostol Pablo nangin mataktikanhon gid sang nagpanaksi sia sa mga pilosopo nga nagtipon sa atubangan niya sa Mars’ Hill. Ginpresentar niya ang maayong balita sa paagi nga nahangpan nila. (Binuhatan 17:18, 22-31) Kon luyag naton magkomunikar sing madinalag-on sa mga nagapalamati sa aton, dapat naton sundon ang laygay ni apostol Pablo sa mga taga-Colosas sang sia nagsiling: “Kabay nga ang inyo pagpakighambal pirme nga may bugay, kag indi gid malas-ay; tun-i kon paano makighambal sing labing maayo sa tagsa ka tawo nga masugata mo.” (Colosas 4:6, The New English Bible) Ang aton panghambal dapat pirme nga makahalamuot. Ina nga panghambal mahimo nga magabukas sang hunahuna sang nagapalamati sa aton, samtang ang indi maalamon nga mga komento magapasira sang ila hunahuna.
14. Paano ang kalma kag nagapakighambal nga paagi makabulig sa aton sa pagkomunikar sa iban?
14 Luyag naton mangin kalma tulukon sa tanan nga tion. Makabulig ini agod indi matahap ang nagapalamati sa aton. Ang pagkakalma nagakahulugan sing indi tuman nga pagkalangkag nga ikaw lang ang magahambal. Sa baylo, paagi sa wala nagadali nga panimuot kag mainabyanon nga mga pamangkot, ginahatagan naton ang mga nagapalamati sa aton sing kahigayunan sa pagpabutyag sang ila kaugalingon. Labi na kon kita nagapanaksi sing di-pormal, maalamon nga palig-unon naton ang isa ka tawo sa paghambal. Subong isa ka halimbawa, nasapwan sang isa ka Saksi ang iya kaugalingon nga nagapungko sa eroplano sa tupad sang isa ka Romano Katoliko nga pari. Sa kapin sa isa ka oras, ginpamangkot sang Saksi ang pari sing mataktikanhon nga mga pamangkot, kag ang pari, sa pagsabat, amo ang naghambal sa laban nga tion. Apang sang magbulagay sila, ang pari nakatigayon sing pila ka publikasyon sa Biblia. Inang mapailubon nga paagi magabulig sa aton sa pagpakita sing kinahanglanon nga kinaiya, nga amo ang, kahanuklog.
15, 16. Paano ang kahanuklog makabulig sa aton sa pagkomunikar?
15 Ang kahanuklog nagakahulugan sing pagbutang sang aton kaugalingon sa lugar sang iban, kon sa aton pa. Gin-apresyar sing bug-os ni apostol Pablo ang pagkinahanglan sing kahanuklog, subong makita sa iya ginsulat sa mga taga-Corinto: “Kay bisan hilway ako sa tanan nga tawo, nagpaulipon ako sa tanan, agod nga madamo pa ang akon madaug. Kag gani sa mga Judiyo nangin subong ako sang Judiyo; sa mga sa idalom sang kasuguan nangin subong ako nga sa idalom sang kasuguan, bisan indi ako sa idalom sang kasuguan, agod nga madaug ko ang mga sa idalom sang kasuguan. Sa mga walay kasuguan nangin subong ako nga walay kasuguan, bisan pa ako indi nga walay kasuguan sa Dios kundi sa idalom sang kasuguan ni Cristo, agod nga madaug ko ang mga walay kasuguan. Sa mga maluya nangin maluya ako, agod nga madaug ko ang mga maluya. Nangin tanan nga butang ako sa tanan nga tawo, agod nga sa tanan nga bagay maluwas ko ang iban.”—1 Corinto 9:19-22.
16 Agod mailog si apostol Pablo sa sining mga bahin, dapat kita mangin mataktikanhon, mahinantupon, kag mapanilagon. Ang kahanuklog magabulig sa aton sa pagkomunikar sing kamatuoran sa aton mga tagpalamati suno sa ila panghunahuna kag pagbatyag. Ang publikasyon nga Reasoning From the Scriptures nagahatag sing daku nga bulig sa sini nga bahin. Dalha ini pirme sa ministeryo.
Gugma—Isa ka Bulig sa Komunikasyon
17. Sa tanan nga Cristianong mga kinaiya, diin ang labing hamili sa pagkomunikar sang kamatuoran sing epektibo, kag paano ini ginapakita?
17 Ang kaugdang, pagkamapainubuson, pagpailob, kag kahanuklog kinahanglanon para sa epektibo nga komunikasyon sa pagpaalinton sing impormasyon. Apang, labaw sa tanan, ang dimakagod nga gugma magabulig sa aton agod magmadinalag-on sa paglab-ot sa tagipusuon sang iban. Si Jesus nagbatyag sing kaluoy sa mga tawo bangod “napanitan [sila] kag nag-alaplaag subong sang mga karnero nga wala sing manugbantay.” Gugma ang nagpahulag kay Jesus sa pagsiling: “Kari sa akon, tanan kamo nga ginabudlayan kag ginabug-atan, kag pabugnawan ko kamo.” (Mateo 9:36; 11:28) Bangod ginahigugma naton sila, luyag man naton pabugnawan ang mga tawo kag buligan sila sa paglakat sa dalan pa kabuhi. Ang sa aton isa ka mensahe sang gugma, gani padayon nga ibantala naton ini sa isa ka mahigugmaon nga paagi. Ining gugma nagapakita sang iya kaugalingon paagi sa mainabyanon nga yuhom, paagi sa kaayo kag kalolo, paagi sa pagkamalipayon kag kapagsik.
18. Paano naton mailog si Pablo, subong nga gin-ilog niya ang Agalon?
18 Sa sining bahin, si apostol Pablo isa ka maayong manug-ilog sa iya Agalon, nga si Jesucristo. Ngaa nagmadinalag-on gid sia sa pagtukod sing lainlain nga kongregasyon? Bangod bala sang iya kakugi? Huo. Apang bangod man yadto sang gugma nga iya ginpakita. Talupangda ang iya mga pagpabutyag sing gugma tuhoy sa bag-o nga kongregasyon sa Tesalonica: “Nangin malolo kami sa tunga ninyo, subong sang iloy nga nagabatiti sa iya mga anak. Gani, bangod sang malolo nga gugma sa inyo, nahamuot kami sa pagpaalinton sa inyo, indi lamang sing maayong balita sang Dios, kundi sang amon man mga kalag, bangod nangin mahal gid kamo sa amon.” Ang pag-ilog kay Pablo magabulig sa aton sa panikasog naton sa pagkomunikar.—1 Tesalonica 2:7, 8.
19. Ngaa indi naton dapat tugutan ang wala nagabaton nga teritoryo nga magpaluya sang aton buot?
19 Kon nahimo naton ang aton labing maayo sa pagkomunikar kag indi naton matigayon ang resulta nga ginahandum naton, dapat bala magluya ang aton buot? Indi dapat. Ang mga Bible Students (amo anay ang pagtawag sa mga Saksi ni Jehova) nagasiling anay nga agod batunon ang kamatuoran, ang mga tawo dapat nga may tatlo ka kinaiya. Dapat sila mangin bunayag, mapainubuson, kag gutom sa espirituwal. Indi naton mapaabot ang indi sinsero nga mga tawo, ang mga indi bunayag, nga batunon ang kamatuoran; ukon ang matinaastaason ukon bugalon nga mga indibiduwal nga mamati sa maayong balita. Dugang pa, bisan pa ang isa ka indibiduwal may isa ka kadakuon sang pagkabunayag kag pagkamapainubuson, mahimo nga indi niya pagbatunon ang kamatuoran kon indi sia gutom sa espirituwal.
20. Ngaa masiling pirme nga ang aton panikasog indi walay pulos?
20 Wala sing duhaduha nga madamo sang inyo masugata sa inyo teritoryo ang kulang sing isa ukon kapin pa sang tatlo ka kinaiya nga nasambit. Amo man sini ang naeksperiensiahan ni manalagna Jeremias. (Jeremias 1:17-19; ipaanggid ang Mateo 5:3.) Sa gihapon, ang aton panikasog indi walay pulos. Ngaa indi? Bangod ginabantala naton ang ngalan kag Ginharian ni Jehova. Paagi sa aton pagbantala kag paagi sa aton pagkadto sa teritoryo, ginapaandaman naton ang mga malauton. (Ezequiel 33:33) Kag indi gid pagkalimti nga paagi sa aton panikasog nga ipaalinton ang kamatuoran sa iban, kita mismo nagabenepisyo. (1 Timoteo 4:16) Ginahuptan naton ang aton pagtuo nga mabakod kag ang aton paglaum sa Ginharian nga masanag. Dugang pa, ginahuptan naton ang aton integridad kag sa amo nagaambit sa pagpakabalaan sa ngalan ni Jehova nga Dios, nga nagapahalipay sang iya tagipusuon.—Hulubaton 27:11.
21. Ano ang masiling sa sumaryo?
21 Sa pagsumaryo: Ang komunikasyon amo ang epektibo nga pagpaalinton sing impormasyon. Ang arte sang komunikasyon importante, kag daku nga halit ang nagaresulta kon maguba ang komunikasyon. Nakita naton nga si Jehova nga Dios kag si Jesucristo amo ang nagapanguna nga manugkomunikar kag si Jesucristo may alagyan sang komunikasyon nga gintulinan para sa aton adlaw. Ginhambalan man naton nga paagi sa aton pagpamustura kag paggawi, nagakomunikar kita, nagapadala sing mga mensahe sa iban. Natun-an naton nga ang pagpangatarungan nagadala sing importante nga papel sa aton pagtinguha sa pagkomunikar sa mga tawo kag agod mangin epektibo sa pagkomunikar, dapat kita mangin maugdang kag mapainubuson, magpakita sing kahanuklog, pagpailob, kag, labaw sa tanan, dapat kita mapahulag sang tagipusuon nga puno sing gugma. Kon palambuon naton ining mga kinaiya kag sundon ang mga halimbawa sa Biblia, mangin madinalag-on kita nga Cristianong mga manugkomunikar.—Roma 12:8-11.
[Footnote]
Para sa dugang pa nga mga panugda kon paano magkomunikar sa tumuluo nga mga Judiyo kag sa iban pa, tan-awa ang Reasoning From the Scriptures, pahina 21-4.
Paano Mo Sabton?
◻ Sa anong paagi ang komunikasyon nagasugod sa wala pa mahambal ang isa ka tinaga?
◻ Ano ang pila ka halimbawa sang komunikasyon paagi sa epektibo nga pagpangatarungan?
◻ Anong mga kinaiya ang nagbulig kay Jesucristo kag kay Pablo sa pagkomunikar sing epektibo?
◻ Ngaa indi dapat magluya ang aton buot kon ang resulta mahinay?