Mangin Maayo Makigsugilanon!
1 Agod matuman ang aton katungdanan sa pagbantala kag sa paghimo disipulo, dapat kita magpaambit sing impormasyon sa iban. (Mat. 24:14; 28:19, 20) Ang pagpakigsugilanon mahimo mangin mabudlay bisan pa gani sa mga mag-abyanay. Ano ang magabulig sa aton agod makapakigsugilanon sing maayo sa mga tawo tuhoy sa maayong balita?
2 Mangin Isa ka Abyan kag Indi Isa ka Estranghero: Ibutang ang imo kaugalingon sa lugar sang imo ginasugilanon sa ministeryo. Sa kahimtangan sang kalibutan karon, mahangpan naton nga ang iban mahimo mangin suspetsuso, ukon mahinadlukon pa gani sa mga pangayaw. Bangod sini, mabudlay ang pagpakigsugilanon. Paano naton madula ang kahadlok sang aton masumalang? Bisan wala pa kita sing mamitlang nga tinaga, ang aton maugdang nga hitsura nagahatag na sing mensahe. Ang aton maayo nga pamayo kag talahuron nga tindog nagabuhin sa kahadlok sang iban.—1 Tim. 2:9, 10.
3 Mangin maayo ang pagpakigsugilanon kon ginahimo ini sa relaks kag mainabyanon nga paagi. Mangin komportable sa sini ang iban kag mas makapamati sila sing maayo. Sa sining bahin kinahanglan ang maayo nga paghanda. Kon nakahibalo kita sang aton inughambal, mas relaks kita. Ang aton pagkakalmado sarang makaganyat sa iban sa aton mensahe. Amo sini ang siling sang isa ka babayi tuhoy sa pagbisita sang isa ka Saksi: “Ang madumduman ko sa iya pagyuhom amo ang kalinong sa hunahuna. Naengganyo ako.” Bangod sini ang babayi namati sa maayong balita.
4 Mga Kinaiya nga Makaganyat sa Pagpamati: Dapat kita magpakita sing sinsero nga personal nga interes sa iban. (Filip. 2:4) Mahimo naton ini kon likawan naton nga kita lamang pirme ang magahambal. Ti, ang pagpakigsugilanon nagadalahig man sang pagpamati. Kon ginaagda naton ang aton tagpalamati nga maghambal tuhoy sa ila kaugalingon kag ginapamatian nga may interes ang ila mga komento, mabatyagan nila nga nagakabalaka kita sa ila. Sa amo kon maghambal ang imo tagpalamati, indi gilayon pag-isal-ot ang imo nahanda nga presentasyon. Dayawa sila kon mahimo mo ini sing sinsero, kag ipasibu ang imo mga komento sa kon ano ang ila ginasiling. Kon ginapakita sang ila mga komento nga may yara sila ginakabalak-an, ipasibu ang imo presentasyon sa ila ginakabalak-an.
5 Ang kaugdang kag pagkamapainubuson nagapanami sang pagsugilanunay. (Hulu. 11:2; Binu. 20:19) Nagpalapit ang mga tawo kay Jesus bangod “malulo [sia] kag mapainubuson sing tagipusuon.” (Mat. 11:29) Sa pihak nga bahin, ang tawo nga may superyor nga panimuot ginalikawan sang mga tawo. Busa, bisan kumbinsido gid kita nga yara sa aton ang kamatuoran, maalamon nga likawan naton ang makigsugilanon sa dogmatiko nga paagi.
6 Ano abi kon ang mga komento sang tawo supak sa panudlo sang Biblia? Obligasyon bala naton nga tadlungon sia? Huo, sa ulihi, apang indi naton ini pagtinguhaan sa una nga pagduaw. Sa masami mas maayo kon padakuon naton ang mga ideya nga pareho naton ginapatihan sang aton tagpalamati antes magpaambit sing mga panudlo sa Biblia nga mas mabudlay niya batunon. Nagakinahanglan ini sing pasensia kag taktika. Si Pablo nagpahamtang sing maayo nga halimbawa sa sining bahin sang nagpanaksi sia sa mga hukom sa Areopago.—Binu. 17:18, 22-31.
7 Labaw sa tanan, ang di-makagod nga gugma amo ang magabulig sa aton nga mangin maayo makigsugilanon. Kaangay ni Jesus, dapat kita magbatyag sing kaluoy sa mga tawo nga ‘ginpanitan kag nag-alaplaag kaangay sang mga karnero nga wala sing manugbantay.’ (Mat. 9:36) Magapahulag ini sa aton sa pagdala sa ila sang maayong balita kag buligan sila nga makalakat sa dalanon sang kabuhi. Ang aton mensahe, isa ka mensahe sang gugma, busa padayon naton nga isugid ini sa mahigugmaon nga paagi. Sa paghimo sini, ginailog naton si Jehova nga Dios kag si Jesucristo—ang pinakamaayo makigsugilanon sa bug-os nga uniberso.