Kay Sin-o mga Pangamuyo ang Ginasabat?
SI Jehova amo ang Dios nga nagasabat sang mga pangamuyo. Sa katunayan, ang iya Pulong, ang Biblia, nagatawag sa iya nga “Nagapamati sang pangamuyo.” (Salmo 65:2) Handa sia sa pagsabat sa mga pangamuyo. Apang kay sin-o mga pangamuyo ang ginasabat niya?
Ginasabat sang Dios ang mga pangamuyo sang mga indibiduwal nga kalahamut-an sa iya. May matinahuron nga panimuot sila sang salmista nga nagsiling: “Subong nga ang usa ginahidlaw sa tubig sang mga sapa, sa amo ang akon kalag ginahidlaw sa imo, O Dios. Ang akon kalag nauhaw sa Dios, sa Dios nga buhi.” (Salmo 42:1, 2) Apang, ano ang nagapamatuod nga ginasabat sang Dios ang mga pangamuyo sang iya matuod nga mga sumilimba?
Pamatuod nga Ginasabat sang Dios ang mga Pangamuyo
Ang Biblia nagaunod sang tul-id nga rekord nga nagapamatuod nga ginasabat sang Dios ang mga pangamuyo sang iya matutom nga mga alagad. Halimbawa, sang nangamuyo sing kaluwasan si Hari Josafat sang Juda, ginsabat sang Dios ang iya pangamuyo kag ginhatagan sia sing kadalag-an paagi sa pagpahanabo nga ang iya mga kaaway magpinatyanay sa isa kag isa. (2 Cronica 20:1-26) Sang nag-atubang man si Hari Ezequias sing mabudlay daugon nga puwersa militar, mapainubuson sia nga nagpangayo sing bulig sa Dios paagi sa pangamuyo. Nakita ni Ezequias ang pagluwas ni Jehova sang ginpatay sang isa ka anghel ang 185,000 ka Asiriahanon sa isa ka gab-i.—Isaias 37:14-20, 36-38.
Ngaa ginsabat sang Dios yadto nga mga pangamuyo? Sa duha ka hitabo, ang mga hari nagpakiluoy nga ang pagkapierde sa inaway nagadalahig sa ngalan ni Jehova. (2 Cronica 20:6-9; Isaias 37:17-20) Nabalaka sila nahanungod sa iya reputasyon. “Ang matuod nga katuyuan sang pangamuyo,” siling sang The International Standard Bible Encyclopedia, “indi lamang ang kaayuhan sang nagapangabay kundi ang kadungganan sang ngalan sang Dios.” Busa, ang matutom nga mga alagad ni Jehova makapat-od nga buligan niya sila “tungod sa iya ngalan.” Ang rekord nga nagapamatuod nga inang mga pangamuyo ginsabat nagapasalig sa katawhan sang Dios nga ginapamatian niya ang ila mga pangamuyo.—Salmo 91:14, 15; 106:8; Hulubaton 18:10.
Walay sapayan, bisan pa ang isa ka kahimtangan nagadalahig sa ngalan ni Jehova, Dios ang nagapamat-od kon bala sabton niya ina nga mga pangamuyo ukon indi. Mahimo nga may yara sia makatarunganon nga rason nga indi sabton ang iban nga mga pangamuyo. Kon ginabatyag naton nga ang aton mga pangamuyo wala ginapamatian, maayo nga binagbinagon kon ngaa amo sini ang natabo.
Kon Ngaa ang Iban nga mga Pangamuyo Wala Ginasabat
“Bisan kon maghimo kamo sing madamo nga pangamuyo, indi ako magpamati,” siling anay ni Jehova sa mga Israelinhon. Nagahatag sang rason, sia nagpadayon: “Ang inyo mga kamot puno sang dugo.” (Isaias 1:15) Paano ang isa makapasapayan sang kasuguan ni Jehova kag sa gihapon pamatian niya? Ang hulubaton sang Biblia nagahatag sing maathag nga sabat, nga nagasiling: “Ang nagapabungol sa kasuguan—bisan ang iya pangamuyo kangil-aran.”—Hulubaton 28:9.
Ang Biblia nagahatag sing isa pa ka rason kon ngaa ang iban nga mga pangamuyo wala ginapamatian, sang nagasiling ini: “Nagapangayo kamo, kag wala makabaton, bangod nga malaut ang inyo pagpangayo, agod nga mahinguyang ninyo sa inyo mga lakas nga balatyagon.” (Santiago 4:3) Indi, si Jehova indi magasabat sang mga pangamuyo nga nagapaayaw sang malaut nga mga handum. Dapat man naton dumdumon nga ang Dios wala nagabaton kag nagatuman sang mga sugo gikan sa mga tawo, kon hambalon pa. Sia amo ang Isa nga nagapamat-od kon paano niya pagasabton ang aton mga pangamuyo.
Ang pat-od gid nga pagasabton amo ang mga pangamuyo nga nagalab-ot sa Dios bangod sang matinlo nga tagipusuon, maayo nga motibo, kag sang iya gintangdo nga paagi—paagi kay Jesucristo. (Juan 14:6, 14) Apang bisan pa ang mga nagapangamuyo nga nagatuman sinang mga pagsulundan kon kaisa nagabatyag nga wala sila ginapamatian. Ngaa wala sa gilayon ginasabat sang Dios ang mga pangamuyo sang iya mga alagad?
Nakahibalo si Jehova sang labing maayong tion sa pagsabat sang mga pangamuyo. Bisan pa ang isa ka bata nga lalaki nagapangayo sing bisikleta, ang iya amay indi magahatag sa iya tubtob nga husto na sia sa edad sa pagsakay sa sini sing walay peligro. Amo man sa iban nga mga pangamuyo sang mga nagahigugma sa Dios. Nakahibalo kon ano ang labing maayo para sa ila, ginahatag niya kon ano ang kinahanglanon sa labing nagakaigo nga tion.
Apang, ang mga alagad ni Jehova indi makatigayon sang tanan nga ginapangamuyo nila. Bangod dihimpit, mahimo sila magahandum sang mga butang nga indi maayo para sa ila. Ang ila mahigugmaon nga langitnon nga Amay indi magahatag sa ila sing bisan anong malain, kay sia ang Manughatag sang “tagsa ka maayong hatag kag tagsa ka dulot nga himpit.” (Santiago 1:17) Sa kaanggid, ang Dios mahimo man nga indi magahatag sang butang nga indi kinahanglanon gikan sa iya pagtamod. (Ipaanggid ang 2 Corinto 12:7-10.) Ginasabat niya ang mga pangamuyo nga nahisanto sa iya kabubut-on kag katuyuan para sa iya katawhan.—1 Juan 5:14, 15.
Si Jesus “Ginpamatian”
Si Jesucristo isa ka tawo nga pirme nagapangamuyo. (Mateo 6:9-13; Juan 17:1-26) Nagasalig sia sing bug-os nga ang iya langitnon nga Amay magapamati kag magasabat sang iya mga pangamuyo. Si Jesus nagsiling anay: “Amay, . . . nakahibalo ako nga ginapamatian mo ako pirme.” (Juan 11:41, 42) Apang indi bala nabang-awan si Jesus sa katapusan sang iya pagkabuhi sa duta? Indi bala nga nagsinggit sia: “Dios ko, Dios ko, ngaa ginpatumbayaan mo ako?”—Mateo 27:46.
Sang ginsiling ni Jesus inang mga tinaga, maathag gid nga ginatuman niya ang isa ka tagna nahanungod sa iya kamatayon. (Salmo 22:1) Sa limitado nga kahulugan, mahimo nga buot silingon ni Jesus nga si Jehova nagkuha sang iya pangamlig kag nagtugot sa iya Anak nga mapatay sa isa ka masakit kag makahuluya nga kamatayon agod tilawan ang iya integridad. Ang pag-usisa sa mga hitabo sadtong katapusan nga adlaw sang dutan-on nga pagkabuhi ni Jesus nagapakita nga ginpamatian sang Dios ang iya mga pangamuyo.
Sang gab-i nga gindakop sia, si Jesus nagpangamuyo sa katamnan sang Getsemane. Tatlo ka beses sia nga nagpakiluoy: “Amay ko, kon mahimo, paligara sa akon ining tagayan.” (Mateo 26:39, 42, 44) Si Jesus wala magpang-alag-ag sa paghatag sang iya kabuhi subong gawad para sa nagatuo nga katawhan. Indi, kundi nabalaka lamang sia sa posibilidad nga indi mapadunggan ang iya hinigugma nga Amay paagi sa kamatayon sa usok sang pag-antos subong ginpakamalaut nga manugpasipala. Ginpamatian bala ni Jehova ang pangamuyo ni Jesus?
Mga tuig sang ulihi, si apostol Pablo nagsulat: “Sa mga adlaw sang iya pagkaunod si Cristo nagpangamuyo kag nag-ampo nga may mabaskog nga pagsinggit kag mga luha, sa Iya nga makaluwas sa iya sa kamatayon, kag ginpamatian sia tungod sang iya kahadlok nga diosnon.” (Hebreo 5:7; Lucas 22:42, 44) Huo, sa mabudlay nga gab-i antes sang iya kamatayon, si Jesus “ginpamatian.” Apang paano?
Si Jehova nagpadala sing isa ka anghel nga “nagpahayag [kay Jesus] kag nagpabakod sa iya.” (Lucas 22:43) Bangod ginpabakod, naatubang ni Jesus ang kamatayon sa usok sang pag-antos. Sing maathag, si Jehova naghatag sa iya sing pasalig nga ang iya kamatayon sa usok wala nagapasipala sa balaan nga ngalan kundi butang mismo nga pagagamiton sa ulihi sa pagpakabalaan sini. Sa pagkamatuod, ang kamatayon ni Jesus sa usok sang pag-antos nagbukas sing dalan para sa mga Judiyo, nga ginpakamalaut sa idalom sang Kasuguan, nga maluwas gikan sa pagpakamalaut sa kamatayon.—Galacia 3:11-13.
Tatlo ka adlaw sang ulihi, ginbanhaw ni Jehova si Jesus kag ginkuha sa iya ang bisan anong posible nga sumbong sang pasipala paagi sa pagbayaw sa iya sa mataas nga posisyon sa langit. (Filipos 2:7-11) Daw ano katahom nga paagi sa pagsabat sang pangamuyo ni Jesus nahanungod ‘sining tagayan’! Yadto nga pangamuyo ginsabat sa paagi ni Jehova. Kag si Jesus nakaagom sing matahom nga mga pagpakamaayo bangod nagsiling sia sa iya langitnon nga Amay: “Indi ang akon kabubut-on, kundi ang imo, paghimuon.”—Lucas 22:42.
Kon Paano Ginasabat ni Jehova ang mga Pangamuyo Karon
Kaangay ni Jesus, ang mga nagatinguha sa pagpahamuot kay Jehova karon dapat pirme magpangabay nga mahanabo ang kabubut-on sang Dios. Dapat sila magtuo nga si Jehova magasabat sang ila mga pangamuyo sa paagi nga magabenepisyo sila sing labi. Sa katunayan, ‘magapanghikot sia sing lakas kabugana labaw sa tanan nga ginapangayo ukon ginahunahuna nila.’—Efeso 3:20.
Isa ka Cristianong lin-ay nga nagapuyo kaupod sang iya ditumuluo nga mga ginikanan ang nakaeksperiensia sang kamatuoran sina nga teksto. Sa isa ka sulat gikan sa Watch Tower Society, ginpangabay sia sa pagbinagbinag sing mapangamuyuon sang posibilidad nga batunon ang pinasahi nga asaynment sang pagmisyonero. Bisan pa ang iya tinagipusuon nga handum amo ang magpabilin sa puluy-an agod buligan ang iya mga ginikanan nga mangin mga Cristiano, ginpamangkot niya ang Dios sa pangamuyo: “Ano bala ang imo kabubut-on? Kabubut-on mo bala nga batunon ko ining imbitasyon walay sapayan sang pagpamatok sang akon mga ginikanan, ukon kabubut-on mo bala nga buligan ko ang akon mga ginikanan paagi sa padayon nga pagpuyo kaupod nila?” Kada mangamuyo sia, ang iya konsiensia nagadikta sa iya nga batunon niya ang imbitasyon. Namat-od sia nga amo ini ang sabat gikan kay Jehova.
Ginpabakod sang Dios ining lin-ay sa pagpabilin sa iya desisyon. Sang ginpangabay sia sa pagsaylo sa Awaji Island, Japan, ang iya mga ginikanan nakibot kag labi pa nga nagpamatok. Apang, bangod indi sia makombinse nga bag-uhon ang iya hunahuna, ang iya iloy namat-od sa pagtuon sang Biblia agod lamang hibaluon kon ngaa ang iya anak nagpamat-od sing subong sina. Tatlo ka bulan sang ulihi ginduaw sia sang iya mga ginikanan. Sang makita nga maayo man ang pag-atipan sa iya sang iban nga mga Saksi ni Jehova, ang iya amay natandog gid kag naghibi sia sang nag-isahanon sia. Dili madugay nagtuon man sia sa Biblia. Sang ulihi ang mga ginikanan sining lin-ay nagpabawtismo kag nagsugod sa pag-alagad kay Jehova sing matutom. Indi bala nga ginpakamaayo sing bugana ni Jehova nga Dios ining Cristianong lin-ay?
Ang Ila mga Pangamuyo Ginsabat
Nadumduman mo bala ang mga pinamulong sang babayi nga ginsambit sa pamuno sang nagligad nga artikulo? Wala gid niya mabatyagi nga ang iya mga pangamuyo ginsabat. Apang, nahantop niya sang ulihi nga ginasabat gali sang Dios ang iya mga pangamuyo. Ginrekord niya ang pangunang mga punto sang iya mga pangamuyo. Isa ka adlaw gintan-aw niya ang kuwaderno kag narealisar niya nga ginpamatian gali ni Jehova ang kalabanan sang iya mga pangamuyo, bisan ang iban nga nalipatan niya mismo! Busa nahibaluan niya nga ang Dios nagaulikid sa iya kag nagasabat sang iya mga pangamuyo sa mapinalanggaon nga paagi nga nagabenepisyo sa iya sing labi.
Kon nagabatyag ka nga ang imo mga pangamuyo wala ginasabat, pamangkuta ang imo kaugalingon: ‘Ako bala may personal nga kaangtanan kay Jehova, ang “Nagapamati sang pangamuyo”? Kon wala, nagahimo bala ako sing mga tikang nga magtuon nahanungod sa iya kag mangin isa sang iya dedikado nga mga alagad?’ Ginasabat niya ang mga pangamuyo sang nagahigugma sa iya kag nagahimo sang iya kabubut-on. Sila “nagapadayon sa pagpangamuyo” kag ginapamatian, kaangay ni Jesus. (Roma 12:12) Gani, “ibubo ang imo tagipusuon” kay Jehova kag himua ang iya kabubut-on. (Salmo 62:8) Nian ang imo mga pangamuyo pagapamatian.
Sa karon, minilyon ka mga tawo ang nagapangamuyo sang isa ka butang nga pinasahi. Huo, kag ang ila mga pangamuyo ginpamatian. Tan-awon naton kon ngaa nakapat-od kita nga ginasabat ina nga mga pangamuyo.