Mga Pamangkot Gikan sa mga Bumalasa

◼ Ngaa ang Isaias 11:6 nagasiling nga “ang lobo magapuyo (reside) sa makadali kaupod sang kordero”? Indi bala permanente ina nga paghidait?

Ang makarepresko nga paghidait sa mga kasapatan nga gintagna sa Isaias 11:​6-9 mangin permanente. Apang ang mahalungon nga pagbadbad sa Isaias 11:6 nagaathag nga ina nga mga sapat indi pirme nga mangin magkaupod.

Sa New World Translation of the Holy Scriptures, ang Isaias 11:6 mabasa: “Ang lobo magapuyo (re­side) sa makadali kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila.”

Ang badbad sang madamong bersion sang Biblia amo sini: “Ang lobo magapuyo (dwell) [ukon, “live”] man kaupod sang kordero.” Inang mga badbad mahimo magapaalinton sang larawan tuhoy sa lobo kag kordero nga pirme magkaupod, subong sang isa ka bag-ong pamilya ukon kahimusan sa pagkabuhi.

Apang, ang Hebreong tinaga nga ginbadbad “magapuyo” (dwell ukon live) amo ang gur. Suno sa lexico­grapo nga si Wil­liam Ge­senius, nagakahulugan ini sang “pag-istar, pagpuyo sa makadali, pag-istar nga indi subong sa balay, nga amo, subong estranghero, dumuluong, bisita.” ­(A Hebrew and English Lexicon of the Old Testament, ginbadbad ni Edward Rob­inson) Ang lexicon nanday F. Brown, S. Driver, kag C. Briggs nagahatag sang kahulugan nga “pag-istar, pagpuyo sa (may pat-od ukon walay pat-od) nga tion, pagpuyo subong bag-ohan . . . nga wala sing orihinal nga kinamatarong.”

Gingamit sang Dios ang gur sang nagsugo kay Abraham sa “pagpuyo subong dumuluong” sa Canaan. Ang patriarka indi magapanag-iya sing duta, kundi mangin isa sia ka protektado nga pamuluyo didto. (Genesis 26:​3; Exodo 6:​2-4; Hebreo 11:​9, 13) Sa kaanggid, si Jacob nagsiling nga ‘nagpuyo [sia] subong dumuluong’ sa Haran, kay magabalik sia sa Canaan.​—⁠Genesis 29:​4; 32:⁠4.

Sa Paraiso nga ipaluntad sang Dios sa dili madugay, ang mga sapat kag mga tawo magahidaitay. Ang kordero indi maano kaupod sang kordero ukon ang tinday nga baka kaupod sang leopardo. Agod ipakita ang kabaliskaran sa karon, ang hambal nagatugot pa sang ideya nga ang lobo mangin pumuluyo nga protektado sang kordero.​—⁠Isaias 35:​9; 65:⁠25.

Apang, ina nga mga sapat may yara gihapon lainlain nga puluy-an. Ang iban nga mga sapat nagakaigo sa mga kagulangan, ang iban sa mga kapatagan, ang iban pa gid sa mga tupad baybay nga mga lugar ukon mga kabukiran. Bisan sadto anay sa orihinal nga Paraiso, ang Dios naghambal nahanungod sa ‘mahagop nga mga sapat kag sa mga sapat nga mapintas.’ (Genesis 1:24) Ang mahagop nga mga sapat maathag nga amo yadtong kinaandan nga malapit sa mga tawo kag sa ila mga puluy-an. Ang mga sapat nga mapintas, bisan pa indi makatalagam, ayhan nagpakamaayo nga magpuyo malayo sa katawhan. Gani, subong sang ginatagna ni Isaias, ang lobo “magapuyo sa makadali kaupod sang kordero,” apang indi pirme mangin kaupod sinang mahagop nga mga sapat.

[Footnote]

Ang The Bible in Living English nagabadbad sang Isaias 11:6 sa sining paagi: “Kag ang lobo mangin kaupod (tenant) sang kordero.”

[Ginkuhaan sang Laragway sa pahina 31]

Zoological Research Center, Tel-Aviv Hebrew University