Report sang mga Manugbantala sang Ginharian

‘Malipayon ang mga Ginauhaw sa Espirituwal’

SI Jesus nagsiling: “Malipayon yadtong nagakabalaka sa ila espirituwal nga kinahanglanon.” (Mateo 5:3) Ini sila magapangita sing nagahatag kabuhi nga impormasyon gikan sa pulong sang Dios, ang Biblia, kag ang pagkuha sini nga ihibalo magadul-ong sa ila sa kabuhi nga dayon.​—⁠Mateo 4:4; Juan 17:⁠3.

◻ Ang isa ka gutom sa espirituwal nga tawo sa duta sang Aprika naglakat sing mga apat ka oras bisan matugnaw kag madulom agod lamang makatigayon sang kopya sang libro nga Ang Akon Libro sang mga Sugilanon sa Biblia. Sang makadangat na sia didto sa lugar nga nagabantala ang mga Saksi ni Jehova, nagkasubo gid sia sang iya mahibal-an nga ang katapusan nga kopya napahamtang na. Nagpabilin sia didto sing tatlo ka adlaw tubtob nga nag-abot ang dugang nga mga suplay, kag nalipay gid sia kay sa ulihi natigayon gid man niya ining maayo erspirituwal nga impormasyon.

Sa sulod sang amo nga bulan nga pagtinir nila sa sini nga nabaw-ing nga duog, ang mga Saksi nakapahamtang sing 55 ka libro, 365 ka polyeto, kag 145 ka magasin kag nakatigayon sila sing 5 ka suskripsion. Natandog gid sila, sang samtang manuglakat na sila, ang mga tigulang kag kabataan man nagsiling sa ila sa Kpelle nga hambal: “Si Jehova magin sa inyo!” Ginhimo ang panikasog agod nga atipanon ang ila nga interes.

Ang isa ka babayi sa sini gihapon nga pungsod gutom man sa espirituwal. Isa sia ka tesorera sa ila nga iglesia kag opisyal sang kalingawan sa ila nga lugar. Sang nagpakigsugilanon sa iya ang mga saksi, masinulub-on nga ginbaton niya nga ang ila iglesia napaslawan sa paglab-ot sa talaksan sang Biblia para sa Cristianismo. Ginpakita sa iya sang mga saksi gikan sa iya kaugalingon nga Biblia kon paano makilala ang matuod nga relihiyon. Nian, nagtambong sia sa duha ka miting sa Kingdom Hall kag pagkatapos sia nagsiling: “Ang akon nakita kag nabatian naghaylo sa akon nga amo ini ang kamatuoran.” Nagdayaw gid sia sa mga miting kag sa mga pagginawi sang mga nagtambong. Nakita niya nga ang mga saksi nga nagduaw sa iya wala mag-uluimbento kondi matuod ang ila ginasiling. Sugod sadto naghimo sia sing tikang nga bugtuon ang iya relasyon sa ila iglesia, kag nagresulta ini sa isa ka maayo nga panaksi sa ila duog.

◻ Ang lamharon nga taga-Melanesia nga katekista sa New Caledonia gutom man sa espirituwal. Nakit-an niya ang isa ka kopya sang libro nga Ang Kamatuoran nga Nagadul-ong sa Kabuhi nga Dayon sa lamesa sa balay sang iya iloy, kag iya ginbasa ang kapitulo 2 kag 3. Ang teksto sa Biblia sa Exodus 20:​4, 5 kag Juan 4:​23, 24 nga ginapaathag sa libro nagtandog sang iya tagipusuon. Bangod sang ginasiling sining mga kasulatan, ginpamangkot niya ang pari kon ngaa ginatugutan sang Iglesia Katolika ang paggamit sing mga imahen sa pagsimba. Ginlikawan sang pari ang iya pamangkot. Nagkadto sia sa pila ka “Cristiano” nga mga relihion, apang wala sila makahatag sa iya sing makaalayaw nga sabat sa iya mga pamangkot. Sang ulihi namat-od sia nga magtambong sa miting sang mga Saksi ni Jehova upod sa iya interesado na nga iloy. Nagdayaw gid sia sa pagtan-aw sa gugma kag napasad sa Biblia nga panudlo sang mga saksi ni Jehova.

Walay sapayan sang kalayuon, regular sia nga nagaangkas sa mga salakyan agod makatambong sa mga miting, madasig sia nga nagtindog sa kamatuoran kag nabawtismuhan. Karon isa na sia ka ministeryal nga alagad. Ang iya iloy kag duha ka utod nga babayi mga Saksi ni Jehova na. Nagpanaksi sa iya kaugalingon nga tribo ining pamatan-on kag nakasugod sing madamo nga pagtuon sa Biblia. Sa karon madamo nga tawo sa ila lugar ang nagatambong sa mga miting​—⁠ini tanan bangod natalupangdan sang isa ka pamatan-on ang libro sa lamesa nga nagapaathag sang Biblia, gintun-an ini, kag serioso nga gin-aplikar ang iya nga natun-an.

Si Jehova may daku nga programa sang espirituwal nga pagpakaon karon, kag madamo ang nagabenepisyo gikan sa sini. Si Isaias nagakaigo nga nagtagna sini sang sia magsiling: “Tuluka! Ang akon mga alagad magakaon, apang kamo [miembro sang butig nga relihiyon] gutumon.” (Isaias 65:13) Malipayon kita kon makabenepisyo kita gikan sa aman ni Jehova para sa pagbusog sang aton espirituwal nga kagutom.