Report sang mga Manugbantala sang Ginharian

Pagpaayaw sa mga Gutom sa Espirituwal​—Sa Eskwelahan

“MALIPAYON ang mga mahunahunaon sang ila espirituwal nga kinahanglanon,” siling ni Jesus sa iya Sermon sa Bukid. (Mateo 5:3) Madamong nagaeskwela nga kabataan ang uhaw sa ihibalo sa Dios kag sa iya matahom nga mga katuyuan. Luyag nila masabat ang mga pamangkot nahanungod sa kabuhi kag kon paano sila dapat magkabuhi agod matigayon ang kahamuot sang Dios kag magmalipayon. Makita ini sa isa ka eskwelahan sa British Virgin Islands. Ang isa sa mga Saksi ni Jehova didto nagasaysay:

◻ “Nagtambong ako sa isa ka miting sang mga ginikanan kag mga manunudlo sa lokal nga eskwelahan, kag madamo ang ginhambalan nahanungod sa droga, pag-inom, pagdate, pagtan-aw sing TV, mga grado, kag iban pa nga mga butang, gani namat-od ako nga dalhon ang libro nga Questions Young People Ask​—Answers That Work kag ginhatag ini sa prinsipal. Sa tapos niya matan-aw ang libro, nagsiling sia nga amo gid ini ang ila ginakinahanglan kag namangkot kon mahimo makakuha ang eskwelahan sing tig-isa ka kopya para sa 120 ka estudyante. Ginpakighambal ini nga butang sa mga gulang sa kongregasyon, kag namat-od sila nga magdonar sing mga libro sa eskwelahan. Sang ginsambit namon ini, ang mga manunudlo nangabay nga ihatag namon ang mga libro sa hubon sang mga estudyante. Duha ka Saksi ang nagkadto, kag ang kuwarto puno sang mga estudyante nga nagahulat sa ila. Ang mga utod nga lalaki naghambal sa tunga sa oras, kag ang mga eksperiensia nga nagapakita kon paano ang libro nakabulig sa bata kag tigulang ginbasa gikan sa mga magasin sang Watch Tower Society. Nian ang mga libro ginhatag sa malangkagon nga mga estudyante.”

Makalilipay mahibaluan nga namat-od ang eskwelahan sa paggamit sang libro subong bahin sang regular nga klase sang ikap-at kag ikalima nga grado sa panahon sang ikap-at kag ikalima nga tuig sa elementarya. Ginasabat gid sini ang madamong pamangkot sining mga estudyante nahanungod sa kabuhi kag sa palaabuton.

Pagpaayaw sa mga Gutom sa Espirituwal​—Sa Papua New Guinea

Ang masunod nga eksperiensia nabaton halin sa isa ka nagalakbay nga manugtatap. Nagalaragway ini kon daw ano ka gutom sa espirituwal ang mga tawo sa sinang pungsod kag kon daw ano ka epektibo ang aton pasad-sa-Biblia nga mga publikasyon sa pagpaayaw sang ila pagkagutom.

◻ “Bangod indi ako makaduaw sa minuro sang Kamberatoro,” siling sang manugtatap, “ginhinguyang ko ang akon tion sa pagpangabudlay upod sa diutay nga kongregasyon sa Vanimo. Daku ang interes didto. May mga taga-Bewani nga nagbaton sang literatura. Isa ka lalaki ang nangabay sa akon nga kadtuan kag duawon ining minuro, kag hatagan niya ako sing dalayunan. Madamo nga tawo ang pamilyar sa amon literatura. Kada kadto namon sa banwa sang Vanimo, nagakaubos ang amon literatura walay sapayan nga tatlo ka kahon sang libro ang amon dala. Ang Akon Libro sang mga Sugilanon sa Biblia ginakabig nga bilidhon subong sang bulawan. Ginapangita ini sang mga tawo. Ang akon dala nga mga libro tuman kadasig nga napahamtang. Kon ipakita namon sa mga tawo ang amon literatura, ang iban nagapamangkot: ‘Diin ang dalag nga libro?’ Isa ka tawo ang nag-order sing anom. Ginhatag niya sa akon ang iya ngalan kag direksion kag nangabay sa akon nga ipaanunsio ini sa radyo kon mabaton ko ini. Nian magakadto sia gikan sa iya minuro agod kuhaon ini.” Ang nagalakbay nga manugtatap nagadugang: “Natukiban ko nga madamo nga tawo sa Vanimo ang nagbaton sang libro nga Mankind’s Search for God kag Questions Young People Ask​—Answers That Work.”

Nagalaragway ini kon daw ano ka gutom ang bunayag sing tagipusuon nga mga tawo sa espirituwal nga kalan-on nga makita sa Biblia kag sa mga publikasyon nga ginaaman sang mga Saksi ni Jehova paagi sa “matutom kag mainandamon nga ulipon.” (Mateo 24:​45-47) Daw ano ka malipayon ang mga Saksi ni Jehova sa pagbulig sining gutom sa kamatuoran nga katawhan!

[Piktyur sa pahina 19]

Pagpanaksi sa Papua New Guinea