Ginaapresyar Mo Bala ang Dutan-on nga Organisasyon ni Jehova?

TULUKA ang nakortehan sing maayo, matahom nga brilyante, kag ano ang imo makita? Isa ka alahas nga matuod isa ka matahom nga butang. Karon usisaa ina nga brilyante paagi sa isa ka mikroskopyo, ano ang imo makita? Ayhan may mga pakris, litiklitik, samaysamay, kag iban pa nga mga depekto.

Imo bala nga gub-on ukon ihaboy ang brilyante bangod lamang sang dagway sini sa idalom sang mikroskopyo? Indi gid! Palayo lang sing diutay sa mikroskopyo, kag sa gihapon maapresyar mo ang katahom kag tumalagsahon nga inggat sini nga nagahimo sini nga labaw sa iban nga mga alahas.

Kaangay sang isa ka brilyante, ang dutan-on nga organisasyon ni Jehova nagalabaw sa madamo nga paagi. Wala sing iban nga organisasyon sa duta ang nakatigayon sing malapit nga kaangtanan sa Manunuga. Sa isa ka sulat para sa unang siglo nga mga Cristiano, nga nagpakabahandi sang langitnon nga paglaum, ginpatuhuyan ni apostol Pedro ining pinasahi nga kaangtanan. Sia nagsiling: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga iya sang Dios.’ ” (1 Pedro 2:9) Sa karon ang dakung kadam-an sang “iban nga mga karnero,” nga may paglaum sa kabuhi nga dayon sa duta, nagbuylog sa nagkalabilin sinang “balaan nga pungsod” sa pagsimba sa Dios. (Juan 10:16) Ining duha ka grupo magkaupod nga ginagahuman sang isa ka organisasyon nga nagalabay kaangay sang matahom kag tumalagsahon ka inggat nga alahas.

Likawi ang Pagtamod sa Iban Upod ang Palahikay nga Mata

Apang dapat naton batunon nga ining bug-os kalibutan nga organisasyon ginahuman sang dihimpit nga mga tawo. Gani, ano ang matabo kon tulukon naton ini paagi sa malaragwayon nga mikroskopyo? Huo, makakita kita sing malauton nga huyog kag depekto sa personalidad sang mga indibiduwal nga bahin sini.​—⁠Roma 3:⁠23.

Ginbaton ni apostol Pablo nga may mga depekto sia. Sia nagsiling: “Kon luyag ko himuon ang maayo, ang malaut yara sa akon.” (Roma 7:21) Ang tagsa ka Cristiano nakaeksperiensia sing kasubong nga pagsumpakilay. Ang tanan makasala. Dugang pa, sa ulihi madamo ang nagaantos bangod sa sala sang iban. Magluya bala kita ukon madulaan sing gana kon makita ang mga diperensia kag dikahimpitan sang aton masigka Cristiano? Magabuhin bala ina sang aton apresasyon sa organisasyon ni Jehova? Indi! Sa baylo, dapat nga magpalayo kita sa amo nga mikroskopyo, kag mag-untat sa pagtulok sa mga dikahimpitan sang mga indibiduwal.

Ang Kasulatan naglista sang mga kinaiya nga nagapakilala sa sadtong ginapanghikutan sang balaan nga espiritu. Pila sa sini amo ang “gugma, kalipay, paghidait, pagbatas, kalulo, pagtuo, pagkamapainubuson, pagpugong sa kaugalingon.” (Galacia 5:​22, 23) Sa kabaliskaran, ang relihioso, politikal, kag komersial nga organisasyon sining kalibutan masami nagapakita sang ginasiling sang Biblia nga mga buhat sang unod: “kaawayon, pinuyas, kaimon, kasingkal, binangigay, pagbahinbahin, katuhaytuhayan, kahisa, pagpahubog, magansal nga kinalipay, kag kaangay sini.” (Galacia 5:​20, 21) Sa amo, kaangay sing mainggat nga brilyante sa tunga sang kinaandan nga mga bato, ang katawhan ni Jehova nagalabaw sa tunga sining malaut sa espirituwal nga kalibutan.​—⁠Mateo 5:​14-16.

“Nahiusa sing Nagakaigo sa Isa ka Kaisipan”

Ang isa ka talalupangdon nga bahin sang brilyante amo ang hugot kag mabakod nga pagkahugpong sang atomiko nga pagkahuman sini. Sing kaanggid, ang dutan-on nga organisasyon ni Jehova nagapakita sing indi matupungan nga paghiusa sa panudlo kag paghiliutod. Ang mga bahin sini nga organisasyon nagaaplikar sang laygay sang Biblia sa 1 Corinto 1:​10, nga nagasiling: “Ginapakiluoy ko sa inyo mga kauturan, sa ngalan sang aton Ginuong Jesucristo, nga maghilisugot kamo tanan, nga wala sing pagbahinbahin sa inyo, kundi mag-isa kamo sa kaisipan.”

Ang mga Saksi ni Jehova nagalabaw man sa pagkatuhaytuhay sa rasa kag pagpabugal sa pungsod. Subong nagaangkon sing “kaalam gikan sa hitaas,” wala sila ‘nagabinahinbahin.’ (Santiago 3:17) Ginahimaya naton si Jehova bangod sining nahimo niya sa isa ka organisasyon nga ginahuman sang dihimpit nga mga tawo.

Sa kabaliskaran, ang magasin nga The Christian Century, sa paghambal tuhoy sa tuig 1990, nagsiling nga “ang kalibutan labi pa nga ginbahinbahin sang relihioso nga mga grupo kag sang etniko kag nasyonalistiko nga balatyagon nga naangot sing hugot sa relihioso nga mga pagpati. Gikan sa India pakadto sa Europa kag gikan sa Natung-an nga Sidlangan pakadto sa Pasipiko, ang relihion ginsimpon sa etniko kag nasyonalistiko nga katutom​—⁠nga masami nagaresulta sa hinali nga mga pagbag-o sa politika.” Sing maathag, yadtong nagahandum nga mag-alagad sa Dios, kinahanglan nga magliso pakadto sa isa ka organisasyon nga may espiritu kag pagpakamaayo ni Jehova.

‘Kasubong sang Brilyante, Ginhimo Ko ang Imo Agtang’

Ang brilyante amo ang pinakatig-a nga duna nga butang nga nahibaluan sang tawo. Ginapatuhuyan sang Biblia ang paggamit sang brilyante sa pagkihad ukon sa pagtigib sang matig-a nga mga materyales. (Jeremias 17:1) Talupangda, man, ang pulong ni Jehova kay Ezequiel: “Tuluka! Ginahimo ko nga matig-a ang imo guya subong katig-a sang ila guya kag ang imo agtang subong katig-a sang ila agtang. Kasubong sang brilyante nga matig-a pa sa santikan, ginhimo ko ang imo agtang.” (Ezequiel 3:​8, 9) Ginhatagan ni Jehova si Ezequiel sing katulad brilyante katig-a nga determinasyon nga naghimo sa iya nga magpanagna sa mga tingkuyan nga katawhan.​—⁠Ezequiel 2:⁠6.

Sa karon man, ginhatagan ni Jehova sing katulad brilyante nga katig-a ang iya katawhan sa atubangan sang daku nga pagpamatok. Ang mga Saksi ni Jehova nagbatas sing legal nga mga pagdumili, gin-atake sang akig nga mga tawo, ginpatay sa guwa sang kasuguan, ginpamakol, di-matarong nga ginbilanggo, ginpaantos sing tuman, kag ginpamatay. Apang sa gihapon, nagpakita sila sing indi mabungkag nga pagtuo.

“Ang Akon mga Alagad Magakalipay”

Gintagna sang Biblia ang tion nga ang mga tawo may “diosnon nga debosyon” apang “nagapanghiwala sang gahom sini.” (2 Timoteo 3:​1, 5) Ang isa ka pamantalaan nagreport nga ang “mga Protestante, mga Romano Katoliko kag mga Judiyo nagakabalaka tanan sa pagdiutay” sang ila mga iglesia kag mga sinagoga. Ang mga Saksi ni Jehova, sa pihak nga bahin, serioso nga mga estudyante sang Biblia. Sa nagauswag nga kadamuon, ang mga may edad kag kabataan, mga lalaki kag mga babayi, sila tanan nagatambong sa pila ka semanal nga mga miting. Ang isa ka sulat nga ginpadala sa isa ka pamantalaan nagsiling tuhoy sa ila nga “ang ila relihion amo ang ila labing hamili nga butang, kag ang ila ginakabalak-an amo lamang ang pagpaambit sini sa iban.”

Ini nga panimuot nagahimo sa organisasyon ni Jehova nga maglabaw kaangay sang isa ka hamili nga brilyante. Kag ang dungog nagakadto sa Isa nga amo ang nagapabakod kag nagatuytoy sa dihimpit nga mga tawo paagi sa iya balaan nga espiritu.

Ang manalagna nga si Isaias nagtagna: “Amo sini ang ginasiling sang Soberanong Ginuong Jehova: ‘Tuluka! Ang akon mga alagad magakaon . . . Tuluka! Ang akon mga alagad magainom . . . Tuluka! Ang akon mga alagad magasinggit sa kalipay bangod sang maayong kahimtangan sang tagipusuon.”—Isaias 65:13, 14.

Sa karon makita naton ang katumanan sini nga tagna. Ang Dios nagaatipan sa iya katawhan sa isa ka tumalagsahon nga paagi. Busa, kon nagapakig-upod ikaw sa ila, indi pagtuguti ang negatibo nga panghunahuna nga dulaon sa imo ang imo kalipay. Tuluka ang bug-os nga laragway kag dumduma: Wala sing liwan nga organisasyon sa duta ang nagaagom sing pinasahi nga pag-atipan kag pag-amlig sang Dios. Indi gid magdulog sa pagpakabahandi sang imo pribilehiyo subong isa ka bahin sini.